Biblia Todo Logo
Bìoball air-loidhne

- Sanasan -

फीलीपी 4 - चेपाङ

1 लौ उया ङाइ आन राप्ओ आन झाह्ओ पुःचोङ् हौचोङ्‌य नीङ् पेतो स्‍याव्‌ती झ्‍यान्‍ते ङापाय् आन चोङाय्‌तो आन म्रोतोलेः मुनाङः। ओउःत खेःओ प्रभुकोः काम् फेमाःत ङाइ तोओलो लेखालेः क्रोङ्ओ ल्‍हुङ्इ पेतो जाङ्‌ह्‌धै मुन।

2 इयोदीयामा सुन्‍तुखेमा नीङ्‌जीनीस् मोमःचोःपाय् “प्रभुकोः काम् जाङ्‌ह्‌साकायः यातैज्‍याङ् ल्‍हुङ् स्‍याव्‌तेःपाःच” त तेती तोनेःनाङ्‌ज।

3 फेरी ङाकुस् ब्राङ्‌ती काम् जाङ्‌ह्ओ साथीय नाङ्‌मा ओउः मोमःचोःनीस्‌कायः ब्राङ्‌ताक्‌सा काम् जाङ्‌ह्उ दा एत दाय्‍ह्‌ती ङाइ नीङ्‌कायःमा तेती तोनेःनाङ्। ओउःनीस्इ परमेस्‍वर्‌कोः पेओ समचार्‌कोः काम् ङाकुस्इ आन जाङ्‌ह्आलाङःसु। ओउःनीस्‌मा क्‍लेमेन्‍त्‌मा अरु ङाकुस् काम् जाङ्‌ह्ओलम्‌मा इमयः सबैकोः मय्‍ङ्‌लम्‌पाय् परमेस्‍वर्‌इ रौ जीङः दोःओलम्‌कुस् थेङ्‌ती ओउःकोः कीताप्‌हाङः लेखती मुनाः।

4 लौ प्रभुकायः तय्‍ह्‌ती झ्‍यान्‍ते गलकायःमा चोङाय्‌तीलेः मुन दा। माः रैस ङाइ पुछ्युङःती तोनेःनाङ्‌स चोङाय्‌तीलेः मुन दा।

5 सबैकायः काङ्‌तोलेः नोःन। ङीकोः प्रभुपाय् देङीलेः वाङ्‌नाः।

6 दोह् खेःयाकायःमा ल्‍हुङ् रुःतेःचनै सबै कुराकायः “च्‍युता” त दाय्‍ह्‌ती परमेस्‍वर्‌कायः तेती तोनु।

7 ओहाङःसैको परमेस्‍वर्‌इ मान्‍ताइ चीःसा खाय्‌मालो काम् जाङ्‌ह्‌ती नीङ्‌कायः धोमाय्ओ ल्‍हुङ् बयःतेःनै। बयःआक्‌तीको येसु ख्रीस्इलेः नीङ्‌कोः ल्‍हुङ्‌पाय् पेतो ओम्‌पायःतीलेः गम्‌बत्‌तेःनै।

8 लौ पुःचोङ् हौचोङ्‌य दोह् कुरालो पेओमा लुङ्‌गार्‌सीःमा खेःलेःनाः ओउः कुरापाय् ल्‍हुङ्‌हाङः सेती मुन। दोह् दोह् दोङ् कुरा लेःआः दोह् दोह् ताङ्‌ह्ओ कुरा पेओ छय्‍ङ्ओ कुरा दोह् दोह् झाक्‌सीःओ सायःगार्‌सीःओ कुरा लेःआः इ खाल्‌कोः कुरालम् सबै ल्‍हुङ्‌हाङः सेती गम्‌नु।

9 ओहाङःसै दोह् कुरामा ङाइ स्‍यान्‌नेःआलाङ्‌स छ्यानःनेःआलाङ्‌स ओउः कुरापाय् नीङ्इ च्‍यवःओ सायःओलो लेखालेः सबै ग्‍याती जाङ्‌ह्‌नु दा। ओउःत झ्‍यान्‍ते ङीकायः ल्‍हुङ् धोमाय्‌ताक्ओ परमेस्‍वर्‌लेः नीङ्‌कःहाङः मुलेःनाः।

10 परमेस्‍वर्‌इ पेतो हायःओ त खेःओ ङा आन चोङाय्‌लेःनाङः। दोह् हायःती दाय्‍ह्‌सा आन ज्‍याङःओकायः नीङ्इ ङाकायः बयःमालो खेःतेःइतो द्याह् फेरीलेः नीङ्इ लव्‍ह्‌ती बयःसा बोङःतेःनानाङ्‌स। ओउःत बयःसापाय् ङ्‌हामा म्‍हर्‌ती बोङःतेःनीतो ङाकायः लव्‍ह्‌ती बयःसा दोःआक्‌तेःइली।

11 नीङ्इ बयःधाङ्‌माखाहाङः “ङा राह्ओ खेःङोतो” त दाय्‍ह्‌ती ङाइ द्याह् इतलेः तोनेःनाङ्‌सल। खेःल नाःयाकायःमा नाःमायाकायःमा गाव्‌खेयाकायःमा छ्युप्‌तोलेः मुनाङः ओउःत मुसा ङाइ चीःआलाङः

12 ङा ह्र्यात्‌मा स्‍याव्‌सा धेःआलाङःस साहुमा स्‍याव्‌सा धेःआलाङःस। गाःहाङःमा गलकायःमा ङाइ लयः धेःती चीःनाङः योङ्‌क्राय्ओहाङःमा कोस्‌तोक्‌हाङःमा नाःती नाःओहाङःमा राह्ओहाङःमा सबै लयः धेःती छ्युप्‌ती मुसा खाय्‌नाङः।

13 ख्रीस्इ बयःओ ग्‍वम् दोःआक्‌तीको दोह् खेःयाकायःमा ङाइ लोत्‌ती जाङ्‌ह्‌सा खाय्‌लेःनाङः।

14 ओउःत लोत्‌साकायः खाय्‌सापाय् खाय्‌लेःनाङः मासीदोनीया देस्‌हाङः ङा इत लोत्‌ती मुओहाङः नीङ्इ लव्‍ह्‌ती बयःओपाय् आन पेतो खेःतो।

15 ङ्‌हाहाङःपाय् पेओ समचार्‌ नीङ्इ तोहालेः सायःतोक्‌हाङः ङा मासीदोनीयासै फेआक्‌तीको सुइमा ङाकायः बयःताङःल नीङ् फीलीपीहाङः मुओ ङ्‌हाम्ओलम्इ ह ङाकुस्इ थोप्‌काय्‌तोलेः बयःकाय्आतय्‍ही। एत चीःतेःनानी।

16 ओहाङःसैको ङा थेसालोनीकाहाङःमा राह्‌ती मुओहाङः नीङ्इ बयःझुङ्‌तेःआनाङ्‌स।

17 ङा नीङ्‌कःसै त्‍याक्‌सा ह झाक्ओ खेःङल बयःतोक्‌हाङः नीङ्‌मा “मुह्‌तो स्‍याव्‌तेःपै” त दाय्‍ह्‌ती झाक्‌नाङः बा।

18 द्याह् ङा दप्‌तोलेः दोःआलाङः। नीङ्इ एपाफ्रोदाय्‍तस्‌कुस् ल्‍होक्ओ थोक्‌लम् दोःती ङा प्‍ल्‍याय्‌ती वाय्‌तोलेः स्‍याव्आलाङः। ओउः थोक्‌लम्‌पाय् पेतो सय्‍ङ्ओ उलःसा ल्‍हाओ धुप्‌लो लेखा परमेस्‍वर्‌कायः म्रोताक्‌नौ बा।

19 ओहाङःसै दोह्‌लो नीङ्‌तेः राह्‌तेःचनै ओउःलेः ङाकोः परमेस्‍वर्‌इपाय् ओउःकोः येसु ख्रीस्‌कुस् मुओ ताङ्‌ह्ओ गह्र्सै जुगाङ् दोःताक्‌तेःनै।

20 लौ ङीकोः परमेस्‍वर्‌ आपाकायः गलकायः खेःयामा ताङ्‌ह्‌ताक्‌तीलेः गम्‌ताक्‌पानाःथै।

21 लौ सबै येसु ख्रीस्‌कायः ङ्‌हाम्ओ पुःचोङ् हौचोङ्‌कायः ङाइमा ङाकुस् मुओ ङ्‌हाम्ओ हौलम्इमा नमस्‍ते ल्‍होक्‌नेःनाङ्‌स।

22 इ रोमी राजाकोः दर्‌बाल्‌हाङः मुओलम्इमा सबै ङ्‌हाम्ओलम्इमा नमस्‍ते ल्‍होक्‌तेःनै।

23 लौ नीङ् सबैकायः ङीकोः प्रभु येसु ख्रीस्इ योनःतीलेः योतेःपै। ओउःच्‍युक्‌लेः।

© 1993 Wycliffe Bible Translators Inc., All Rights Reserved.

Wycliffe Bible Translators, Inc.
Lean sinn:



Sanasan