मर्कस् 5 - चेपाङ1 ओउःत नोःकाय्आकाय् ओहाङःसैको दुम्हान्कोः उःसै गेरासेने त तोओ देस्ताङ् दाह्ती वाङ्आकाय्। 2 ओहाङः दाह्ती वाङ्ती दोङ्गासै ग्ल्युङ्ह्आक्ती यात्चाक् गालःलान्इ ङायःओ मान्ताइ येसुकायः क्रुस्लाङ् वाङ्आ। 3 ओउः मान्तापाय् आन ब्रःती तेस्राङ्हाङः याक्ती मुओ खेःतो। ओउःकायः सुइमा पानःसा खाय्नीली। दोह्इमा पानःसा खाय्नीली। 4 ओउःकोः दोम् क्रुत्पाय् आन साङ्लाइ पानःझुङ्नीतो गलमा ओउःइ क्रुत्कोः साङ्ला तेत्ती वाय्ती दोम्कोः साङ्ला बाङ्हाङः थोःती क्लय्ह्आकान्। ओउःकायः सुइमा क्लीमःसा खाय्नीली। 5 न्हीदीङ्हाङःमा याह्दीङ्हाङःमा तेस्राङ्हाङः स्यालुङ्हाङः ओउःपाय् हीह्ती बाङ् थुङ्ती भ्यामःती वाह्ओ खेःतो। 6 ओहाङःसैको येसुकायः लोक्तोसै च्यवःती ओउःकःताङ् तन्ती बाःती स्यवलाङ् वाङ्आ। 7-8 वाङ्आक्तीको “लौ नाङ् गालःलान्इतेः इ मान्ताकायः ल्हेस्ती फेउ” त येसुइ दाय्ह्ती तोती झ्यान्ते ओउः मान्ताइ सोतो गोःती “अ प्रभु येसुय नाङ् सबैसै ताङ्ह्ओ परमेस्वर्कोः चोःतेःआः ङाकायःतेः दोह् हायःलाङ् वाङ्ओतेःआः। सत्ते ताम्बजेः दाय्ह्तीलेः ङाकायःतेः न्युम्ह्ताक्चाःची दा” त दाय्ह्ती येसुकायः तेती तोआकान्। 9 तोआक्तीको “लौ नाङ् गतलोतेः मय्ङ्तेःनाः” त दाय्ह्ती येसुइ व्हत्थातो ती “ङाकायः पल्तन् त मय्ङ्आताङः” त दाय्ह्ती ओउःपाय् त्याङ्आ “ङी लान्लम्पाय् नाःतो लेःआः ङी त झ्यान्ते ओउःतलेः मय्ङ्ओआः” 10 ओहाङःसै “लौ लान्लम्पाय् इ देस्सै ल्होक्लाम् दा” त दाय्ह्ती ओउः मान्तापाय् येसुकः आन तेलेःआ। 11 इत तेती तोतोक्हाङः ओउःमयः मुओ ध्याप्हाङः नाःतो प्याक् ह्राम्ती मुओ खेःइतो 12 ओउःत च्यवःती “लौ ङीकायः उःनोको प्याक्लम्कायः ङायःलाङ् ल्होक्ताङी” त दाय्ह्ती ओउः लान्लम्पाय् तेआकाय् 13 “लौ उया ओउःकायः ङायःलाङ् आल्न” त दाय्ह्ती येसु ग्याती तोथासतो तोआक्तीको ओउः लान्लम्इ मान्ताकायः सबै फेआक्तीको ह्राम्ती मुओ प्याक्लम्कायः ङायःआकानी। ङायःआक्तीको प्याक्लम्पाय् सबै ब्रःती वारताङ् तन्ती आल्ती तोन्ती तोन्ती ताङ्ह्ओ दुम्हान्कोः तीःहाङः ज्युप्ती ज्युप्तीलेः सीजेःआकाय्। ओउः ज्युप्ती सीओ प्याक्पाय् आन नाःतो लेःआः नीस् हजार्च्युक् खेःतो। 14 ओहाङःसैको प्याक्लम्पाय् तीःहाङः ज्युप्ती सीओ च्यवःती ओउः प्याक् ह्रामःओ मान्तालम्मा क्रव्आकाय्। ओउःमयः क्रव्तोक्हाङः सहर्हाङःमा गाव् गाव्हाङःमा मेस्लो च्यवःओ कुरा सबै मान्ताकायः ल्हाक्ती छ्यानःआकानी। ओउःमयःइ छ्यानःओ कुरा सायःती ओहाङःकोः मान्तालम् येसुकःताङ् योलाङ् वाङ्आकाय्। 15 वाङ्आक्तीको ओउः लान्लम्इ ङ्हा ङायःओ मान्ता द्याह् येसुकोः दोम्हाङः च्युङःती सोह्पाय् खेःमाःत नाय् लावती सेलः मुओ च्यवःआकानी। एत च्यवःतीलेः ओउः वाङ्ओ मान्तालम्पाय् रैआकाय्। 16 ओहाङःसैको येसुइ स्याक्ताक्ओ काम् च्यवःओ मान्तालम्इ ओउः लान्लम्कायः ल्हेस्ओ कुरामा प्याक्कायः ङायःताक्ओ कुरामा ओउः योलाङ् वाङ्ओ मान्तालम्कायः सबै ल्हाक्ती छ्यानःआकानी। 17 एत छ्यानःआक्तीको “लौ उया ङीकोः देस्सै आल्अ दा” त दाय्ह्ती येसुकः तेती तोआकानी 18 ओउःमयःइ “लौ आल्अ” त दाय्ह्ती तोती झ्यान्ते येसु दोङ्गा लन्ह्ती वाङ्आ। लन्ह्ती वाङ्ओ बेलाहाङः ओउः ङ्हा लान्इ ङायःओ मान्तामा दोङ्गाताङ् वाङ्ती “लौ ङामा नाङ्कुस् वाह्पाङः” त दाय्ह्ती तोथातो 19 “खेःल नाङ् लयःकोः मान्तालम्कःताङ् पाय्ह्ती ओउःमयःकायः ‘लौ ङीकोः प्रभुइ इत इत हायःतीलेः ङाकायः आन योनःती योती स्याक्ताक्आताङः बा’ त दाय्ह्ती ल्हाक्ती छ्यानःउसु दा” त दाय्ह्ती येसुइ तोआथै। 20 ओहाङःसैको ओउः मान्ता पाय्ह्ती “लौ ङीकोः प्रभुइ इत हायःतीलेः गुच्युक् पेओ जाङ्ह्ओआः बा” त दाय्ह्ती ओउः दस् सहर् त तोओ देस्हाङः सबै थोल्ह्ती तोआकान्। ओउःइ ल्हाक्ती तोओपाय् सायःती ओहाङःकोः मान्तालम् आन ग्याङ्ह्आकाय्। 21 ओहाङःसै एत हायःआक्तीको येसुमा ओउःकुस् वाह्ओमयःमा फेरी दोङ्गाहाङः लन्ह्ती ओउः दुम्हान् त्यात्ती द्यान्ह्आकाय्। द्यान्ह्ती वाङ्आक्तीको येसु तीःकोः चीनःसै मुतोक्हाङः नाःतो मान्तालम् ओउःकःताङ् हुम्लाङ् वाङ्आकाय्। 22 ओउःमयःकुस् यात्चाक् याय्रुस् त तोओ थनःओ कीम्कोः ताङ्ह्ओ मान्ता येसुकःताङ् वाङ्आ। वाङ्ती येसुकायः बाःती स्यवती 23 “लौ ङाकोः चोःद्याङ्जा आन जीक्ती सीखेःनाः बा। ओउःकायः क्रुत् झाम्ह्ती स्याक्ताक्लाङ् वाङ्अ दा” त दाय्ह्ती तेती तोआथै। 24 इत तेओ सायःती येसु ओउःकुस् ग्याती पाय्ह्आकाय्। पाय्ह्तोक्हाङः नाःतो मान्तालम्इ येसुकोः वेङ्ह्ग चीङ्ह्गहाङः वाह्ती झ्यान्ते ओउःकायः न्हेङःआथै। 25 ओउःमयःकःगन यात्चाक् वयः वयःओ पीर्इ ङायःओ मोमःचोः मुओ खेःतो। 26 ओउः मोमःचोःपाय् बार बर्सच्युक्कायः आङ्रयःबाङ् जीक्ओ खेःतो ओउःकायः दाक्तर्लम्इ स्याक्ताक्सा जुगाङ् खाय्नीली ओउःमयःइ आन दुख बयःती ओउःकोः पैसा सबै त्याक्ती जेःथातो ओउः मोमःचोःपाय् न्हाङ्तोलेः क्लोःतो स्याव्आ बा। 27 ओउःत झ्यान्ते ओउः मोमःचोःपाय् येसुकोः कुरा सायःआक्तीको ओउःकःताङ् अरु हुम्ओ मान्तालम्कुस् वाङ्आ। 28 ओउःकःताङ् काह्सै वाङ्ती “लौ ओउःकोः नाय् ह दीन्ह्चाङः त खेःया सेलः स्याव्आनाङः” त म्हर्ती येसुकोः नाय्पाय् क्रुत्इ दीन्ह्आकान्। 29 येसुकोः नाय् दीन्ह्माकादे ओउः मोमःचोःकोः वयः थुम्ह्माकादे “लौ ङाकोः आङ्पाय् द्याह् जुगाङ् सेलः मुनाङः” त सायःआकास। 30 ओउः मोमःचोः स्याक्ताक्ओ कुस्ब्रक्त “लौ ङाकोः ग्वम् ज्याल्खेःनाः” त येसुइ चीःती “ए सुइ ङाकोः नाय् दीन्ह्ओ” त दाय्ह्ती गुल्ह्ती वाङ्ओ मान्तालम्कायः व्हत्आकान्। 31 ओउःत व्हत्तोक्हाङः “इहाङः नाःतो हुम्ओलम्इ नाङ्कायः न्हेङःतेःनाः रैस। नाङ्इ एत च्यवःसा खाय्तेःनौ दोह् हायःतीतेः ‘सुइ दीन्ह्आताङः’ त दाय्ह्ती व्हत्तेःचाः” त दाय्ह्ती येसुकुस् वाह्ओमयःइ ओउःकायःलेः व्हत्थातो ती 32 येसुपाय् ओउःकायः दीन्ह्ओ मान्ताकायः योसा थेङालेः काह्ताङ् ल्हेःआ। 33 एत ल्हेःतोक्हाङः ओउः मोमःचोःपाय् आन रैतीमा रीङ्ह्तीमा येसुकःताङ् बाःती स्यवलाङ् वाङ्ती सबै घोती छ्यान्ह्आथै। 34 ओउः छ्यान्ह्आक्तीको “अ हौद्याङ् ङाकायःतेः पेतोतेः ङ्हाम्तेःआची ओउःत झ्यान्ते स्याक्तेःपाः लौ सेलः स्याव्ती ल्हुङ् धोमाय्ती पाय्ह्अ” त दाय्ह्ती येसुइ तोआथै। 35 ओहाङःसैको ओउः मोमःचोःकायः तोतोक्हाङः यात्नीस्चाक् ओउः ताङ्ह्ओ मान्ताकोः कीम्सै दाह्ती “लौ नाङ्कोः चोःद्याङ्जा सीजेःआ बा। इ गुरुकायः द्याह् वानःसा परल” त दाय्ह्ती याय्रुस्कायः तोथातो ती 36 ओउःमयःइ तोओ कुरा येसुइमा सायःती “लौ ल्हुङ् र्याङःमाःत ङाकायः पेतो ङ्हाम्ची दा” त दाय्ह्ती येसुइ तोआथै। 37 एत तोआक्तीको येसुमा सुम्चाक् ओउःकुस् वाह्ओमयः पत्रुस्मा याकुब् युहना नीस्पुःचाःमा ओउः ताङ्ह्ओ मान्ताकुस् पाय्ह्आकाय् अरु मान्ताकायः येसुइ वाङ्सा ताक्उलु। 38 ओहाङःसैको ओउःकोः कीम्हाङः दाह्ती मान्तालम्इ ओउः मोमःचोःकायः आन क्रेस्ती र्याःओ च्यवःआकान्। 39 च्यवःआक्ती कीम्हाङः पोक्ती “लौ नीङ्पाय् दोह् हायःतीतेः इतलेः क्रेस्ती ङैती मुतेःनै। ओउः मोमःचोःचोः सीलेःल एनःती मुओ ह” त दाय्ह्ती येसुइ तोथासतो ती 40 ओउः र्याःती मुओलम्इ “इइपाय् ‘ओउः चोःपाय् जुगाङ् सीओआः’ त चीःबाय्उलु” त म्हर्ती येसुकायः ङीःती गाक्आथै। ओउःमयः ङीःती झ्यान्ते येसुइ सबैकायः बाहीर क्लाःती ल्होक्ती ओउःमा ओउःकुस् मुओ सुम्चाक्मा ओउः मोमःचोःकोः आमा आपाकुस् चोःकोः कोथाहाङः पोक्ती वाङ्आकाय्। 41 पोक्ती वाङ्आक्तीको ओउः मोमःचोःचोःकोः क्रुत् चुम्ती “तालीथा कुम्” त दाय्ह्ती येसुइ तोउतो “तालीथा कुम्” त दाय्ह्ओकोः माने “लौ हौय ‘च्योक्अ’ त तोनेःनाङ् बा” 42 ओहाङःसैको ओउःत तोओ कुस्ब्रक्पाय् ओउः मोमःचोःचोः च्योक्ती वाह्लेःआ ओउःपाय् बार बर्सकोः मोमःचोःलेः खेःतो। ओहाङःसैको ओउः मोमःचोःचोः च्योक्ती वाह्ओ च्यवःती सबै मान्तालम् आन ग्याङ्ह्ती मुआकाय्। 43 ओहाङःसैको आमा आपानीस्कायः “लौ इ कुरा सुकायःमा छ्यान्ह्लाम्” त दाय्ह्ती तोआक्तीको “इ मोमःचोःचोःकायः जेःगा बयःजु दा” त दाय्ह्ती येसुइ तोआथाच। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.