मर्कस् 4 - चेपाङ1 ओउःत तोआथास ओहाङःसैको येसु गालील त तोओ दुम्हान्ताङ् द्यान्ह्ती वाङ्आकाय्। वाङ्आक्तीको तीःकोः चीनःहाङः मुती ओउःइ फेरीलेः स्यान्ती तोआकान्। एत स्यान्तोक्हाङः आन नाःतो मान्ता सायःलाङ् हुम्ती वाङ्ती झ्यान्ते येसुखे तीःहाङः मुओ दोङ्गाहाङःलेः लन्ह्ती ओहाङः च्युङःती मुओ खेःतो ओउः हुम्ओ मान्तालम्खे दुम्हान्कोः चीनःसै सायःती मुआकाय्। 2 ओहाङःसै ओउःमयः सायःती मुतोक्हाङः येसुइ फेरीलेः वीनःराय् ल्हाक्ती नाःतो कुरा क्लोन्कोःदीङ् त तोती स्यान्आथास। 3 “लौ सायःती मुन दा। यात्चाक् बीया चोया वार्साकायः चीङ्ती राङ्ताङ् आल्आ। 4 राङ्ताङ् आल्ती ओहाङः वार्तोक्हाङः कोय् बीया राङ्हाङः मुओ ल्याम्हाङः दीह्आल्आ। ल्याम्हाङः दीह्आक्तीको वाःलम्इ दाह्ती वाङ्ती ओउः बीया चोयाकायः सेक्ती माक्जेःआथै। 5 अरु बीया चोयाखे बाङ् ह्र्युङ्हाङः दीह्आल्आ। ओहाङःकोः साः ज्युम्ह्मालो त झ्यान्ते ओउः बीया रेन्ह्तोलेः दुङ्तो ती 6 ओउःकोः रुत् पेओ साःहाङः जोय्ती पोक्सा खाय्माःत न्याम् रावःतोक्हाङः मात् झ्योम्ह्ती सीजेःआ। 7 फेरी अरु बीया चोयाखे चुःराङ् बन्राङ्हाङः दीह्आल्आ। ओउःखे बन्कुस् ब्रक्त लन्ह्ती यार्ती सायः नाःमाःत वाय्आ। 8 अरुखे पेओ साःहाङः दीह्ती न्ह्योरःती न्ह्योरःती लन्ह्आक्तीको आनलेः सायःनाः। कोय् बोत्सै यात् घोगा वाङ्आ कोय्सै नीस् घोगा अरुसै तीन् घोगा वाङ्आ। 9 लौ इ ङाइ तोओ कुरा पेतो चीःतीलेः सायःनु दा” त दाय्ह्ती येसुइ तोआथास। 10 ओहाङःसै ओउःत तोआक्तीको ओउः हुम्ती मुओलम् पाय्ह्आकाय्। ओउःमयः पाय्ह्आक्तीको येसुइ छ्युङ्ह्ओ बारजनमा ओउःकुस् मुओलम्मा येसुकःताङ् व्हत्लाङ् वाङ्आकाय् “लौ मेस् कोदीङःती नोःओ कुरा दोह् हायःती तोतेःआताङ्स ओउःकोः माने दोह्लो” त दाय्ह्ती व्हत्थातो ती 11 “नीङ् परमेस्वर्कोः कुराकः ग्याओलम्खेकायः ओउःकोः राजीकोः चीःआक्मालो कुरा पेतो चीःसा दोःतेःनै। अरु ग्यामालो मान्तालम्खेइ वीनःराय् झुङ्आले सायःसा खाय्नानी ओउःत झ्यान्ते ओउःमयःइ परमेस्वर्कोः राजीकोः कुरा चीःसा दोःइली। ओउःमयःइ परमेस्वर्कोः कुरा च्यवःसापाय् च्यवःनानी सायःसापाय् सायःनानी पेतो ग्याती च्यवःमाःत सायःमाःत झ्यान्ते पेतो चीःसा खाय्नीली। 12 चीःआकानी त खेःया ओउःमयः परमेस्वर्कःताङ् द्यान्ह्ती लःलयःकोः रेव्ओ काम् क्युम्ह्ती वाय्सा दोःचनै” त दाय्ह्ती येसु त्याङ्आ। 13 “लौ ङा मेस्खा क्लोन्कोःदीङ् त नोःओ कुराकोः माने चीःतेःनीलीया ओउःत खेःया सबै अरु गत हायःतीतेः चीःसा खाय्तेःचानी। 14 ओउःपाय् इलेःआः। परमेस्वर्कोः कुरा नोःओ मान्ताइ पेओ समचार्लेः बीया चोयालो लेखा वार्नौ। 15 कोय् मान्तालम्खेइ इ पेओ समचार् सायःनानी। सायःआक्तीको सैतान् त तोओ रेन्ह्तोलेः वाङ्ती ओउः सायःओलम्कोः ल्हुङ्तुक्सै परमेस्वर्कोः पेओ कुरा सेक्ती आलःनौ। इलो खेःओ मान्तालम्खे ल्याम्कोः साःहाङः दीह्ओ बीया चोयालो लेखा मुनै। 16-17 फेरी अरु मान्तालम्खेइ परमेस्वर्कोः कुरा म्रोती सायःती ङ्हा ल्हुङ्हाङः ग्याइतो लोने परमेस्वर्कोः काम् जाङ्ह्साकायः लीह्सीःओ बेलाहाङः वाङ्नाः त खेःया ओउः कुरा फेनानी। इलो खेःओ मान्तालम्खे रुत् ज्युम्ह्ती आलःमालो बाङ् ह्र्युङ्हाङः दीह्ओ बीया चोयालो लेखा मुनै। 18 ओहाङःसै अरु मान्तालम्खेइ परमेस्वर्कोः कुरा सायःती ओउःकोः काम् जाङ्ह्आक्नीतो 19 लोने लयःकोः झाक्ओ काम्कायः रुःओ ल्हुङ्मा वाङ्नाः पैसा क्युसा बोङःओ ल्हुङ्मा लीङ्हायःओ ल्हुङ्मा वाङ्नाः त खेःयाकायः परमेस्वर्कोः काम् जाङ्ह्सा ग्याइली। इलो खेःओ मान्तालम्खे यार्ती वाय्ओ सायःसा खाय्मालो चुःराङ्हाङः दीह्आ बीयालो लेखा मुनै। 20 फेरी अरु मान्तालम्खेइ परमेस्वर्कोः कुरा सायःती पेतो ङ्हाम्आक्तीको ओउःकोः काम् आन ब्याव्तीलेः जाङ्ह्नानी। इलो खेःओ मान्तालम् पेओ साःहाङः दीह्ओ बीया चोयालो लेखा मुनै” त दाय्ह्ती येसुइ स्यान्ती तोआथास। 21 “लौ बत्ती हवःआक्तीको सुइमा ओउः बत्तीकायः पाथीइ कोमःती खुप्ती गम्नीली खात्माल्गमा गम्नीली खेःल यास्ओ ओखोय्ह्हाङः गम्नानी बा। 22 ओहाङःसै दोह् दोह्लो तेन्छ्याङ् नुस्ती मुनाः लोन्ते सबैकायः छ्यानःतो स्याव्नाः। दोह् दोह् कुरा मान्तालम्कायः छ्यान्ह्आक्माःत मुनाः लोन्ते सबैकायः चीःतो स्याव्नाः। 23 लौ ओउः कुरा पेतो सायःनु दा” त दाय्ह्ती येसुइ तोआथास। 24 “इ कुरामा पेतो ङ्हाम्ती सायःनु। गुच्युक् नीङ्इ ल्हुङ्हाङः त्याक्ती सेसा ग्यातेःनै ओउःच्युक्लेः स्यान्ती बयःतेःनै माःरैस पाःतोलेः बयःतेःनै। 25 सुसुखेकुस् नाःतोपाय् मुनाः ओउःकायः अरुमा न्हाङ्तोलेः बयःनाःथास। सुसुखेकुस् नाःतो नाःमाःतपाय् मुनाः ओउःकोः दोह् दोह् मुचाः ओउःलेः सबै लाती आलःसाआः। 26 लौ अरु परमेस्वर्कोः राजीकोः कुरा वीनःराय् ल्हाक्ती स्यान्नेःनाङ्स। मान्ताइपाय् राङ्हाङः बीया चोया वार्नौ। 27 वार्आक्तीको दीन्का दीन् ओउः मान्ता एनःतीमा च्योक्तीमा काम् जाङ्ह्धै मुनाः। ओउः एनःतीमा च्योक्तीमा मुमुबाले ओउः वार्ओ बीया चोया लयः दुङ्ती थानाः थाआक्तीको च्युलःनाः। बीया चोया गत हायःती दुङ्ती च्युलःओ ओउः मान्ताइपाय् दोह्मा चीःउलु। 28 फेरी साःसै बीरुवा लयः थाती दुङ्नाः दुङ्आक्तीको च्युलःनाः च्युलःआक्तीको ब्ल्यात्नाः ब्ल्यात्आक्तीको लयःलेः सायःनाः। 29 सायः मीन्आ त खेःया ओउः मान्ताइ रामाइ राःती सायः त्युम्ह्नौ। इलो लेखा परमेस्वर्कोः राजी मुनाः ओउःपाय् गत हायःती स्याव्नाः सुइमा चीःनीली। लोनेकोः दीन् पुत्आक्तीको ओउः राजीकोः प्रजालम्कायः सबै त्युम्ह्ती वानःनानी। 30 ओहाङःसै परमेस्वर्कोः राजी अरु दोह्लो खेःओ मुनाः दाय्ह्सा। 31 ओउःपाय् अरुसै मीस्ओ सायःलो लेखा मुनाः। ओउः सायःपाय् मान्ताइ लात्ती आलःती राङ्हाङः सुक्नानी। सुक्आक्तीको दुङ्ती लन्ह्नाः 32 ओउःपाय् दुङ्ती लन्ह्दा लन्ह्दा जुगाङ् ब्राव्ओ सीङः स्याव्नाः। ब्राव्ती अरु अरु सीङःसै छोङ्ह्ती झ्यान्ते ओउःकोः केङ्काहाङः वाःलम् न्यास्सा खाय्नानी” त दाय्ह्ती येसुइ स्यान्ती तोआथास। 33 ओउःइ नाःतो वीनःराय् तातीलेः हुम्ती वाङ्ओ मान्तालम्कायः क्लोन्कोःदीङ् त तोती स्यान्आथास। 34 वीनःराय् आःताः तामाःत ओउःइ दोह्मा स्यान्थासल ओउःकुस् वाह्ओमयःकायः ह लोने ओउः क्लोन्कोःदीङ् त तोओ कुराकोः माने सबै छ्यान्ह्आथास अरु मान्ता मुमाःतोक्हाङः। 35 ओहाङःसैको स्यान्आक्तीको ओउःनम्कोः राम्हसै वाङ्ती “लौ इ दुम्हान्कोः उःसै त्यात्लाङ् आल्इ” त दाय्ह्ती ओउःकुस् वाह्ओमयःकायः तोआथास। 36 ओउःत तोती अरु मान्ताकायः फेआक्तीको ओउःकुस् वाह्ओमयः येसुकःताङ् दोङ्गाहाङः लन्ह्ती वाङ्ती आल्आकाय्। ओउःमयःकोः दोङ्गाकुस् अरु दोङ्गालम् वाह्माआकाय्। 37 ओहाङःसैको ओउः तीः वाह्तोक्हाङः जोक्तो गाय्ध वाङ्आ। वाङ्ती ओउः मारुःइ तीः आन साङ्ह्ताक्ती दोङ्गाकायः पोक्ती ब्लीङ्ताक्खेःआथै। 38 तीःइ ब्लीङ्ती ज्युप्खेःतोक्हाङः येसु दोङ्गाकोः पोर्हाङः एनःती मुओ खेःतो। येसु एनःती मुओ च्यवःती ओउःकुस् वाह्ओमयःइ ओउःकायः म्हाङ्ती “अ गुरुय ङीजा दोङ्गा ज्युप्ती सीखेःनाःतय्ही बाती सीसाकायःपाय् नाङ्इ दोह्तमा ताःतेःल दै” त दाय्ह्ती तोथातो ती 39 येसु म्र्याती च्योक्ती मारुःकायः जान्ती तीःकायः “लौ साङ्ह्माःत मुअ दा” त दाय्ह्ती तोआकान्। एत तोआक्तीको मारुःमा दीःजेःआ दुम्हान्मा एवेङ्त स्याव्आ। 40 दुम्हान् एवेङ्त स्याव्आक्तीको “लौ नीङ्इतेः दोह् हायःतीतेः एत रैती ङाकायःतेः ङ्हाम्तेःनाङ्सल” त दाय्ह्ती येसुइ दोङ्गाहाङः मुओलम्कायः तोआथास। 41 ओउःमयः आन ग्याङ्ह्ती रैती “लौ इजा गत खेःओ मान्तालो ती। दोङ्सीलेः ओउः गानाक्ती तोओ कुरालेः मारुःलम्कायःमा तीःलम्कायःमा ग्याताक्नौ बा” त दाय्ह्ती ओउःमयः लयःमयःकुस् नोःकाय्आकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.