मत्ती 28 - चेपाङ1 ओहाङःसैको ओउः धोओ दीन् पुत्आक्तीको आइतेबार्कोः न्याम् थोङ्खयःओहाङः मरीयम् माग्दालामा ओउः अरु मरीयम्मा येसुकोः तेस् योलाङ् वाङ्आकाय्। 2 ओहाङःसैको ओउः बेलाहाङः ताङ्ह्ओ ल्याङ् वाङ्आ। यात्चाक् परमेस्वर्इ लाङ्कासै ल्होक्ओमयः ग्ल्युङ्ह्ती वाङ्ती ओउः तेस् बोमःओ बाङ्कायः घाङ्सै तुलुती आलःती ओउः बाङ्हाङः च्युङःती मुआ। 3 ओउःकोः खेन् झीली मीली त थोङ्ओमा ओउःकोः नाय्पाय् आन भाम् फीर्लीक्त छोओमा खेःतो। 4 एत च्यवःती ओउः ल्युङ्ह्ती मुओ सीपाहीलम् आन युम्ह्ती ल्हुङ् क्रम्ती सीओलो स्याव्आकाय्। 5 ओहाङःसैको ओउः मोमःचोःलम् वाङ्ती “लौ रैतेःचनै ओउः ङ्हासै क्ल्याय्ओ सीङःहाङः सात्ओ येसुकायः बोङःतेःनानी एत ङाइ चीःनाङः 6 ओउःपाय् इहाङःलेः खेःल। ओउःइ ङ्हासै तोओलो लेखा उह्ती च्योक्ओआः। लौ प्रभुकोः मेस् इस्ती गम्ओ थाव्पाय् योलाङ् वाङ्न दै। 7 ओहाङःसै रेन्ह्तो पाय्ह्ती ओउःकुस् वाह्ओमयःकायः छ्यानःलाङ् आल्न। ‘ओउःपाय् उह्ती च्योक्ती नीङ्कायः ङ्हासै स्यालःती गालीलहाङः क्रुस्तेःनै’ त दाय्ह्ओ ओउःमयःकायः तोनुसु दै। ङाकोः कुरा ओउःच्युक् लेःआः” त दाय्ह्ती ओउः ल्होक्ओमयःइ तोआथास। 8 एत तोओ सायःआक्तीको ओउः मोमःचोःलम् रैतीमा चोङाय्तीमा तेस्घाङ्सै ग्ल्युङ्ह्ती येसुकुस् वाह्ओमयःकायः इ कुरा ल्हाक्ती छ्यानःलाङ् तन्ती पाय्ह्आकाय्। 9 तन्ती पाय्ह्तोक्हाङः ओउःमयः येसुकुस् क्रुस्काय्आकाय् “लौ ल्हुङ् धोमाय्ती मुन” त दाय्ह्ती येसु दाय्ह्आ ओउःमयः साःताङ् बाःती ओउःकोः दोम् दीन्ह्ती स्यवआथै। 10 एत हायःतोक्हाङः “लौ रैतेःचनै ङाकोः पुःचोङ् हौचोङ्लम्कःताङ् आल्ती ‘लौ गालीलताङ् आल्न। ओहाङः नीङ्इ येसुकायः क्रुस्तेःनानी’ त दाय्ह्ओ ओउःमयःकायः तोनुसु दा” त दाय्ह्ती येसुइ तोआथास। 11 ओहाङःसैको ओउः मोमःचोःलम्खे पाय्ह्तोक्हाङः ओउः ल्युङ्ह्ती मुओ सीपाहीलम् सहर्ताङ् आल्ती ओउः मेस्लो स्याव्ओ कुरा ताङ्ह्ओ पुरोहीत्लम्कायः ल्हाक्ती छ्यानःआकानी। 12 ओउःत झ्यान्ते ओउः कुरा सायःआक्तीको अरु यहुदीलम्कोः ताङ्ह्ओ मान्तालम्कुस् हुम्ती नोःकाय्आक्तीको ओउः सीपाहीलम्कायः नाःतो पैसा बयःआकानी। 13 “लौ सबै मान्ताकायः ‘येसुकुस् वाह्ओमयः याह्दीङ्हाङः वाङ्ती ङी एनःओ बेलाहाङःपाय् येसुकोः म्हाङ् कुःआकानी’ त दाय्ह्ती तोनु। 14 ओहाङःसैको इ कुरा अन्चलादीस्इ सायःचौ त खेःया ङी ओउःकःताङ् होम्काय्ती नोःलाङ् आल्ती ओउःकुस् कुरा पेतो स्याव्ताक्नाङी ओहाङःसैको नीङ् ल्हुङ् र्याङःसा परतेःल” त दाय्ह्ती सीपाहीलम्कायः स्यान्ती तोआकानी। 15 फेरी ओउः सीपाहीलम्इ पैसा त्याक्ती ओउः ताङ्ह्ओ मान्तालम्इ स्यान्ओलो लेखालेः ल्हाक्आकानी। ओउःत झ्यान्ते तेन्छ्याङ्मा “येसुकोः म्हाङ्पाय् ओउःकुस् वाह्ओमयःइ कुःआकानी” त दाय्ह्ती यहुदीलम् नोःकाय्नै। 16 ओहाङःसैको ओउः एघारजन येसुकोः छ्युङ्ह्ओमयः येसुइ तोओ कुरा ङ्हाम्ती गालीलताङ् आल्ती स्यालुङ्ताङ् लन्ह्आकाय्। 17 ओहाङः येसु उह्ती च्योक्ओ च्यवःआक्तीको ओउःमयःइ ओउःकायः स्यवती ताङ्ह्ताक्आथै। यात्नीस्चाक् मान्तालम्खे “येसु उह्ती च्योक्ओआः” त ङ्हाम्आक्नीली। 18 फेरी येसु वाङ्ती “लौ द्याह्पाय् लाङ्काहाङःमा ल्हाव्ह्दैबाङ्हाङःमा सबै जाङ्ह्सा खाय्ओ ग्वम्पाय् ङाकायः बयःओ लेःआः। 19 ओउःत झ्यान्ते सबै जात्कोः मान्तालम्कःताङ् आल्ती ङाकोः कुरा स्यान्उसु। ओहाङःसैको परमेस्वर् आपाकोः मय्ङ्मा ङाकोः मय्ङ्मा परमेस्वर्कोः ग्वालामःकोः मय्ङ्मा पेह्ती बाप्तीस्मा बयःउसु। 20 ङाइ तोआ कुरा सबै स्यान्उसु दा। लौ इ ल्हाव्ह्दैबाङ्कोः द्युम्ओ बेलाहाङःमा गलकायःमा ङापाय् नीङ्कुस् मुलेःनाङः बा” त दाय्ह्ती येसुइ तोआथास। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.