मत्ती 22 - चेपाङ1 ओहाङःसैको येसु फेरीलेः “लौ परमेस्वर्कोः राजी स्यान्ती गतलो लेखा दाय्ह्सा। 2 यात्चाक् राजा खेःतो। ओउःइ यात् दीन् लयःकोः चोःकायः बीहाकोः भोस् जाङ्ह्आकान्। 3 भोस् जाङ्ह्तोक्हाङः ओउः राजाइ पहुनालम् गोत्ती वानःसा थेङा लयःकोः नोकरीलम् ल्होक्उतो पहुनालम्पाय् सुमा वाङ्सा ग्याइली। 4 ओउःत झ्यान्ते अरु अरु नोकरीलम् गोत्ती ‘लौ “पहुनालम्कायः राजाइ भोस् जाङ्ह्ती खाय्ओआः। ओउःइ भैसी मेत्छ्याः सात्ती सबै जेःसाकायः मुनाः। लौ वाङ्न दै” त ओउःमयःकायः तोसा’ त दाय्ह्ती राजाइ ल्होक्थासतो 5 ओउः वानःसा खेःओ पहुनालम्इ नोकरीइ तोओ सायःमाःत लयःकोः काम् जाङ्ह्लाङ् आल्आकाय्। कोय्खे राङ्ताङ् आल्आकाय् कोय्खे लयःकोः पसल्ताङ् आल्आकाय् अरुखे राजाकोः नोकरीकायः चुम्ती हेला क्लाःतीमा थोःती सात्आकानी। 6-7 ओहाङःसैको ‘नाङ्कोः नोकरीलम् सात्ती वाय्आकानी’ त दाय्ह्ओ राजाइ सायःती आन ल्हुङ् मल्ह्तो स्याव्ती लयःकोः पल्तन्लम् ल्होक्ती ओउः पेमालो मान्तालम्कायःमा सात्ताक्आकान्। ओउःमयःकोः कीम्लम् गाव्लम्मा ह्र्योङःती वाय्ताक्आकान्। 8 वाय्आक्तीको ओउः राजाइ अरु नोकरीलम् गोत्ती ‘लौ ङाकोः भोस् द्याह् स्याव्खेःआ। ङाइ ङ्हा गोत्सा बोङःओलम् पेमालो खेःइतो 9 ओउःत झ्यान्ते मीमीओ ल्याम्हाङः आल्ती ओहाङः सुलोतेः च्यवःतेःनानी ओउःलेः भोस्ताङ् गोत्ती वानःन’ त दाय्ह्ती तोआथास। 10 एत तोआक्तीको ओउः नोकरीलम् मीमीओ ल्याम्हाङः आल्ती सुकायःलो च्यवःआकानी पेओमा पेमालोमा ओउःकायःलेः सबै गोत्ती भोस्ताङ् वानःआकानी। वानःआक्तीको भोस्हाङः पहुनालम् पेतोलेः स्याव्आकाय्। 11 ओहाङःसैको भोस् जेःतोक्हाङः ओउः राजाइपाय् पहुनालम् क्रुस्लाङ् वाङ्ती यात्चाक् बीहाकायः स्याव्ओ नाय् लावमालो मान्ता च्यवःती 12 ‘लौ हौय नाङ् गत हायःती बीहाकायः स्याव्ओ नाय् लावमाःत वाङ्ती मुतेःनाः’ त दाय्ह्ती व्हत्उतो ओउः मान्तापाय् दोह्मा त्याङ्सा खाय्उलु। 13 ओउःइ त्याङ्ती नोःसा खाय्उलु त झ्यान्ते राजाइ ‘लौ इकायः चुम्ती क्रुत्दोम् पानःती बाहीर च्याक्ओहाङः क्लाःनु दा’ त दाय्ह्ती नोकरीलम्कायः तोआकान्। ‘ओहाङः नाःतो मान्तालम् आन र्याःती मुनै’ 14 दोह् हायःती दाय्ह्सा नाःतो मान्तालम्कायः परमेस्वर्इ गोत्उतो बल बल ह ओउःइ लयःकुस् मुसाकायः छ्युङ्ह्नौ” त दाय्ह्ती येसु दाय्ह्आ 15 ओउःतलेः येसु दाय्ह्आ ओहाङःसैको ओउः फरीसीलम् हुम्लाङ् वाङ्ती “येसुकायः ङीइ गत हायःती गाल्तुम्ती नोःसा खाय्चाङःसु” त दाय्ह्ती नोःकाय्आकाय्। 16 ओहाङःसैको ओउः फरीसीलम्इ लयःकुस् वाह्ओमयःमा हेरोद् राजाकोः मान्तालम्मा येसुकःताङ् ल्होक्आकानी। ओउःमयः येसुकःताङ् वाङ्ती “लौ गुरुय नाङ्इ दोङ् कुरातेः स्यान्ती तोतेःनौ बा। सुकायःमातेः नोःतेःनौ ताङ्ह्ओ मान्ताकायःया मीओकायःया नाङ्इ यातैज्योः कुरा हतेः तोतेःनौ। सुकःमातेः रैमाःत परमेस्वर्कोः दोङ् कुरातेः स्यान्तेःनौ बा 17 इतलेः चीःनाङःसु ओउःत झ्यान्ते ङीकायः तोताङी दा। ङीकोः देस्कोः सीजर् माहाराजाकायः कर्कोः पैसा बयःसा स्याव्नाःया स्याव्लया दोह्ततेः दाय्ह्तेःनाः” त दाय्ह्ती व्हत्थातो ती 18 येसुइ ओउःमयःकोः पेमालो ल्हुङ्तुक् चीःती “दोह् हायःतीतेः नीङ्इ ङाकायः ल्हुङ्तुक् योतेःनेःनाङ्स नीङ् रेव्ओलम्। 19 लौ यात्ज्याङ् कर् पाय्क्सा खेःओ पैसा छ्यानःवानःनाङ्स दा” त दाय्ह्ती येसुइ तोआकान्। ओउःत तोती झ्यान्ते यात्ज्योः पैसा वानःआकानी। 20 वानःआक्तोकोः “लौ इ पैसाहाङः सुकोः रुप्मा मय्ङ्मा मुनाः” त दाय्ह्ती येसुइ व्हत्आथास। 21 “इपाय् सीजर् राजाकोः लेःआः” त दाय्ह्ती त्याङ्इतो “ओउःत झ्यान्ते ओउः पैसा सीजर् राजाकोः लेःआः माःर। दोह् खेःयामा सीजर्कोः लेःआः मुनाः ओउःखेलेः सीजर्कायः पाय्क्पाः। दोह् खेःयामा परमेस्वर्कोः खेःनाः ओउःखेलेः परमेस्वर्कायः पाय्क्पाः” त दाय्ह्ती येसु त्याङ्आ। 22 येसु एत व्हाय्तोलेः त्याङ्ओ सायःती ओउःमयः आन ग्याङ्ह्ती पाय्ह्आकाय्। 23 ओउःमयः पाय्ह्आकाय् ओहाङःसैको ओउःनम् दीन्हाङः सादुकीत तोओलम्मा येसुकःताङ् वाङ्आकाय्। ओउः सादुकीलम्इ “मान्ता सीआक्तीको रौ जीङः नाःल सुमा उह्ती च्योक्इली” त दाय्ह्ती स्यान्ओ खेःइतो। 24 फेरी ओउःमयः येसुकःहाङः वाङ्तोक्हाङः “अ गुरुय ‘मान्तापाय् चोः दोःमाःत सीनाः त खेःया ओउः सीओ मान्ताकोः बुधीकायः ओउःकोः हौखेइ वानःसा खेःतो। पुःकोः रधीङः गम्सा थेङा ओउःत हायःसा खेःतो’ त दाय्ह्ती उय्ह्ले मोसाइ तोती गम्ओ माःर। 25 ओउःत झ्यान्ते इ कुरा सायःउ दा। सात् पुःचोङ् खेःइतो। सात् पुःचोङ् खेःतो जेथा पुःइ बुधीलेः वानःउतो लयःकोः चोः दोःमाःत ओउः जेथा सीआ। जेथा पुः सीआ त झ्यान्ते ओउःकोः बुधीकायः माय्ह्ला हौखेइ वानःआकान् वानःआक्तीको ओउः माय्ह्ला हौमा चोः दोःमामाःत सीआ। 26 माय्ह्ला सीआक्तीको ओउः मोमःचोःकायः साय्ह्लाखेइ वानःथातो ओउःमा चोः दोःमामाःतलेः सीआ। ओउःत हायःदा हायःदा ओउः मोमःचोःकायः ओउः सात् पुःचोङ्इ स्योत्ताङ् स्योत्ताङ् लोय्ती गम्नीतो सबै चोः दोःमाःत सीआकाय्। 27 ओहाङःसैको सबैसै दप्ती ओउः मोमःचोःमा लोने सीआ। 28 लौ उया तोताङी दा। ओउः मोमःचोःमा सात् पुःचोङ्मा सीआक्तीको उह्ती च्योक्ती रौ जीङः दोःनै त खेःया ओउः मोमःचोः सुकोः बुधी स्याव्चानाः आने ओउःपाय् सात् पुःचोङ्कः पाय्ह्आ” त दाय्ह्ती येसुकायः व्हत्आकानी। 29 “नीङ्पाय् परमेस्वर्कोः ग्वम्मा ओउःकोः आखरःमा चीःबाय्तेःनीली ओउःत झ्यान्ते नीङ्इ ब्रःती व्हत्तेःआनाङ्स। 30 सीआक्तीको उह्ती च्योक्ओलम्पाय् मोमःचोः वानःनीली गोय्चोःकुस् पाय्ह्इली ओउःमयः परमेस्वर्कोः ल्होक्ओमयःलो लेखा मुनै। 31 फेरी उह्ती च्योक्ओ कुरा परमेस्वर्कोः आखरःहाङः लेखती मुनाः। ओउः नीङ्कायः तोओ कुरा पह्रतेःइली यादो। 32 परमेस्वर्इ मोसाकायः तोतोक्हाङः ‘लौ आब्राहाम् इसाक् याकुब् त तोओलम्कोः परमेस्वर् ङालेः मुनाङः’ त दाय्ह्ती परमेस्वर्इ तोआकान्। ओउःइ ओउःमयःकोः परमेस्वर्लेः ‘खेःङोतो’ त तोउलु ओउःमयःकोः ‘मुलेःनाङः’ त तोआकान्। ओउःत झ्यान्ते परमेस्वर्पाय् सीती मुओ म्हाङ्कोः परमेस्वर्लेः खेःल बा ओउः सुम्चाक् उय्ह्लेकोः मान्तालम् सीआक्तीको द्याह् परमेस्वर्कःहाङः उह्ती च्योक्ती मुधाङ्नै। फेरी ओउः सुम्चाक् रौ जीङः दोःनै त खेःया अरु मान्तालम्कायःमा दोःनै” त दाय्ह्ती येसुइ तोआथास। 33 ओउःत तोओ सायःती ओउः हुम्ती मुओलम् “ओउःइ आन व्हाय्तोलेः तोनौ बा” त दाय्ह्ती ग्याङ्ह्ती नोःकाय्आकाय्। 34 ओहाङःसैको “येसुइ तोआक्तीको ओउः सादुकीलम्इ कायःकाय्ती नोःसा खाय्नीली” त दाय्ह्ती दाय्ह्ओ फरीसीलम्इ सायःआक्तीको ओउःमयः लयःकुस् नोःकाय्लाङ् हुम्आकाय्। 35 ओहाङःसैको हुम्ती नोःकाय्आक्तीको ओउःमयःकःसै यात्चाक् ऐन् स्यान्ओ मान्ता येसुकःताङ् वाङ्ती 36 “लौ गुरुय परमेस्वर्इ गानाक्ती बयःओ हुकुम्लम्कोः गाव्खेलो अरुसै ताङ्ह्लेःनाः” त दाय्ह्ती व्हत्थातो 37 “सबैसै ताङ्ह्ओपाय् इलेःआः बा। प्रभु परमेस्वर्कायः ल्हुङ्हाङः राप्ती ल्हुङ्तुक् ग्याती आन पेतो वाय्क्ती मुसा खेःनाः। 38 इ कुरा अरुसै ताङ्ह्लेःनाः बा। 39 ओहाङःसै यात्ज्योः अरु हुकुम् ङ्हाकोःलो लेखालेः ताङ्ह्लेःनाः। नाङ्कुस् ब्रेङःकाय्ती याक्ओ मान्तालम्कायः लयःकायःलो धेःती राप्ती स्यास्उ। 40 इ नीस् कुरा मान्ताइ जाङ्ह्नौ त खेःया ओउः मान्ताइ सबै मोसाइ तोओमा परमेस्वर्कोः कुरा छ्यानःओमयःइ तोओ कुरामा जाङ्ह्नौ बा” त दाय्ह्ती येसु त्याङ्आ। 41 ओउःतलेः येसु त्याङ्लेःआ ओहाङःसैको हुम्ती मुओ फरीसीलम्कायः 42 “लौ परमेस्वर्इ ल्होक्सा खेःओ ख्रीस् त तोओपाय् सुलोतेः ताःतेःनै सुकोः प्लोमःदाने” त दाय्ह्ती येसुइ व्हत्थासतो “ओउःपाय् दावुद् राजाकोः प्लोमःदानेलेः” त दाय्ह्ती त्याङ्आकाय्। 43 “ओउःत खेःया दावुद् राजापाय् परमेस्वर्कोः ग्वालामः दोःआक्तीको दोह् हायःती ख्रीस्कायः ‘प्रभु’ त तोआकान्। 44 परमेस्वर्कोः ग्वालामःइ इ कुरामा दावुद् राजाकायः तोताक्ओ ‘ “लौ नाङ्कोः दुस्मान्कायः क्लीमःधाङ्माःच्युक्हाङः ङाकोः ङोय्दोसै गुल्ह्दाङ्कोः च्युङःसा थाव्हाङः मुअ” त दाय्ह्ती परमेस्वर्इ ङाकोः प्रभुकायः तोआकान्’ त दाय्ह्ती दाय्ह्ओ दावुद्इ लेखआकान्। 45 इत लेखओहाङः दावुद् राजाइ ख्रीस्कायः ‘ङाकोः प्रभु’ त तोओ त खेःया ओउः ख्रीस्लेः दावुद् राजाकोः दोङ् प्लोमःदाने खेःबाय्ल” त दाय्ह्ती येसुइ स्यान्ती तोआकान्। 46 एत तोओ सायःआक्तीको अरु मान्तालम्इ नोःसा खाय्नीली फेरी ओउःनम्ह् दीन्हाङःसै सुइ खेःयामा येसुकायः ल्हुङ्तुक् योसा थेङा व्हत्सा ग्याइली। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.