लुका 5 - चेपाङ1 ओहाङःसैको गालील अन्चल्हाङः मुओ गनेसरेत् त तोओ ताङ्ह्ओ दुम्हान्कोः छेव्हाङः आल्ती चीङ्ती येसुइ स्यान्ती तोओ खेःतो। ओउःहाङः स्यान्तोक् बेलाहाङः येसुइ तोओ कुरा पेतो सायःसाकायः हुम्ओ मान्तालम्इ येसुकःताङ् लमःकाय्ती न्हेङःती वाङ्आकाय्। 2 ओहाङःसैको द्याङ्तोलेः नीस्ज्योः तीःकोः दोङ्गालेः पोत्ओ सीङःहाङः पेन्ह्ती गम्ओ येसुइ च्यवःआकान्। ओउः दोङ्गाकोः ङाः सात्ओ काम् धुःती जाङ्ह्ओ मान्तालम् दोङ्गा फेआक्तीको लयःकोः लाङःलम् तीःहाङः धावःती मुओ खेःइतो। 3 यात् दोङ्गापाय् सीमोन् त तोओकोः खेःतो। ओउः दोङ्गाहाङः येसु लन्ह्ती सीमोन्कायः गोःती “लौ इ दोङ्गा बलचोः तीःताङ् लात्उ दा” त दाय्ह्ती येसुइ तोआथै। ओउःत हायःआक्तीको येसु दोङ्गाहाङः च्युङःती मुती हुम्लाङ् वाङ्ओ मान्तालम्कायः स्यान्आथास। 4 ओहाङःसैको ओउःत स्यान्ती दप्आक्तीको “लौ इ दोङ्गापाय् ज्युम्ह्ओ तीःताङ् लात्ती आलःती ओउःहाङः लाङः वार्नु। ओउःत हायःती नीङ्इ ङाः सात्तेःनानी” त दाय्ह्ती येसुइ सीमोन्कायः तोथातो 5 “गाव् माःहै गुरुय ङीइपाय् जुदा याह्दीङ्च्युक्कायःलेः वार्ङुसुतो यात्ज्याङ् ङाःमा ङायःङुसुलु। ङायःसापाय् ङायःङुसुलु नाङ्इ इतलेः तोतेःचाक्तेःआची उया ङाइधाङ् वार्धाङ्चाङः उया” त दाय्ह्ती सीमोन् त्याङ्आ। 6 ओउःत त्याङ्ती लाङः वार्ती वार्आक्तीको ओउःच्युक् ङाः ङायःती झ्यान्ते ओउःमयःकोः लाङःलम् आन पङःती क्रत्खयःआ। 7 लाङःलम् क्रत्खयःओ च्यवःती अरु दोङ्गाहाङः मुओ नीस्चाक्इ साथीनीस्कायः लव्ह्सा थेङा गोत्आथाच। गोत्ती वानःआक्तीको ङाःलम्पाय् दोङ्गानीस्हाङः काती ब्लीङ्ताक्ती झ्यान्ते दोङ्गालेः ज्युप्खयःआ। 8 ओहाङःसैको ओउःच्युक् नाःतो ङाः सात्ओ च्यवःआक्तीको सीमोन्पाय् येसुकःताङ् वाङ्ती ओउःकायः बाःती स्यवआकान् “अ प्रभुय ङालो खेःओ पेमालो मान्ताकुस्पाय् नाङ्लो पेओ ताङ्ह्ओ वाङ्ती मुचाक्तेःजेःचाः” त दाय्ह्ती सीमोन्इ तोआथै। 9 सीमोन्मा ओउःकुस् मुओलम्मा ओउःच्युक् नाःतो ङाः सात्ओ च्यवःती आन ग्याङ्ह्आकाय्। सीमोन्कोः साथीलम् जबदी त तोओकोः गोय्चोःनीस् याकुब् युहनामा ओउःनीस्इ ग्याङ्ह्तीलेः योआकाचु। 10 ओउःमयः ग्याङ्ह्तीमा रैतीमा मुती झ्यान्ते “लौ रैतेःचनै। द्याह्हाङःसैकोः नीङ्इ लाङः वार्ती ङाः सात्ओ काम् फेती ङाकोः पेओ कुरा वार्ती ङाकःताङ् मान्तालम् वानःतेःनानी” त दाय्ह्ती प्रभु येसुइ सीमोन्कायः तोआकान्। 11 ओउःत तोआक्तीको ओउःमयः दोङ्गालम् तीःकोः छेव्हाङः वानःती गम्आक्तीको सबै थोक् फेती येसुकायः गुल्ह्तीलेः आल्आकाय्। 12 ओहाङःसैको यात्ज्योः सहर्ताङ् आल्ती ओहाङः यात्चाक् आन कोह्र् चाओ मान्ता येसुकःताङ् वाङ्आ। येसुकायः च्यवःआक्तीको ओउः मान्ताइ येसुकायः बाःती स्यवती “अ प्रभुय नाङ् ग्यातेःनाः त खेःया ङाकायः स्याक्ताक्सातेः खाय्तेःनाःची बा” त दाय्ह्ती येसुकः काःहाल्ती तेआ। 13 ओउःत तेआक्तीको ओउः कोह्र् चाओ मान्ताकायः येसुइ लयःकोः क्रुत् प्योती दीन्ह्आकान्। क्रुत्इ दीन्ह्ती “ग्यालेःनाङः बा स्याक्तेःपाः” त दाय्ह्ती येसु त्याङ्ओ कुस्ब्रक्तलेः ओउः मान्ता सेलः स्याव्आ। 14 ओउःखेपाय् सेलः स्याव्आक्तीको “लौ ‘येसुइलेः स्याक्ताक्आताङः’ त दाय्ह्ओ सुकायःमा छ्यानःतेःचनौ दा। अरुकायः छ्यानःलाम् मन्दीर्कोः पुरोहीत्कःताङ् न्यास्माःत आल्ती ओउःकायः ह ‘लौ ङाकोः आङ् द्याह् सेलः मुनाः’ त दाय्ह्ती लयःकोः आङ् छ्यानःउ दा। ओहाङःसैको आङ् छ्यानःआक्तीको मोसाइ गानाक्ती तोओ जवसाकायः मन्दीर्हाङः परमेस्वर्कायः वाः मेत्छ्याः सात्ती ल्हाउ। ओउःत छय्ङ्ताक्ती हायःआक्तीको सबैइ नाङ्कायः ‘सेलः मुलेःनाः’ त चीःतेःनाः” त दाय्ह्ती येसुइ तोआथै। 15 एतलेः स्याक्ताक्ओ कुरा “सुकायःमातेः छ्यानःतेःचनौ” त दाय्ह्ती येसुइ गानाक्तीलेः तोथातो येसुइ स्याक्ताक्ओ कुरापाय् न्हाङ्तोलेः फानःती छ्यानःती नोःओ खेःतो। ओउः कुरा सायःआक्तीको नाःती नाःतो मान्तालम् येसुइ स्यान्ओ कुरा सायःलाङ्मा हुम्ती वाङ्आकाय् जीक्ओ मान्ताकायः काःहाल्लाङ्मा नाःतो वाङ्आकाय्। 16 ओउःमयः आन हुम्ती वाङ्ती झ्यान्ते बेला बेलाहाङः येसु मान्ता नाःमालो बेलाङ् आल्ती परमेस्वर्कायः तेती तोओ खेःतो। 17 ओहाङःसैको यात् दीन्हाङः येसुइ कीम्हाङः मान्तालम्कायः स्यान्ती मुओ खेःतो। ओउःकायः सायःओ मान्तालम्कुस् फरीसी त तोओलम्मा धर्मा स्यान्ओमयःलम्मा मुओ खेःतो। ओउःमयःपाय् यरुसालेम्सैमा गालील यहुदीया नीस् अन्चल्कोः गाव् गाव्सैमा वाङ्ती येसुकायः पुरःती मुआकाय्। ओउः बेलाहाङः येसुपाय् परमेस्वर्कोः स्याक्ताक्सा ग्वम् दोःआ। 18 ओहाङःसैको येसुइ ओहाङः स्यान्तोक्हाङः यात्चाक् जुगाङ् वाह्सा खाय्मालो मान्ताकायः न्हाप्लावःहाङः लात्ती वानःआकानी। ओउःकायः लात्ओ मान्तालम्इ येसुकःताङ् ब्रेङःती वानःसा बोङःनीतो नाःतो मान्तालम् हुम्ती मुओ त झ्यान्ते कीम् भीत्रहाङः पोक्सा ल्याम् दोःल। 19 भीत्रहाङः पोक्सा दोःमाःत झ्यान्ते ओउःमयःइ ओउः जीक्ओचाक्कायः कीम्कोः छानाताङ् आलःती कीम्कोः छाना बल ल्ह्युती होल्ह्ताक्ती ओउःकायः घाङ्सै योल्ह्ती न्हाप्लावःहाङः ला छुःती येसुकःताङ् ओम्त क्लाःती ल्होक्आकानी। 20 ओउःकःताङ् ल्होक्तोक्हाङः येसुइ इत हायःओ च्यवःती “इ मान्तालम्इजा ङाकायःजा आन ङ्हाम्नाःताङः रैस बा” त चीःती ओउः जीक्ओकायः ल्हेःती “नाङ्इ जाङ्ह्ओ रेव्ओ काम्लम्कोः जाङ्ह्झ्याङ् द्याह् क्युम्ह्ती वाय्ओ लेःआः बा” त दाय्ह्ती येसुइ तोआथै। 21 ओउःत तोओ सायःती ओउः फरीसीलम्मा धर्मा स्यान्ओमयःमा “इ मान्तापाय् सुलो। लयःकायःलेः ‘ङा परमेस्वर् लेःआः ङ’ त ताःनाःस रैस। परमेस्वर्इ ह रेव्ओ काम्कोः जाङ्ह्झ्याङ् क्युम्ह्ती वाय्सा खाय्नौ” त दाय्ह्ती ओउःमयःकोः ल्हुङ्हाङः म्हर्इतो 22 ओउःमयःकोः ल्हुङ्तुक्हाङः नोःकाय्ओ कुरा येसुइ चीःती “नीङ् दोह् हायःतीतेः इतलेः ल्हुङ्हाङः म्हर्तेःनै। 23 गाव्खे तोसा सजीलो त तोनाङ्स दा। वाह्सा खाय्मालो चाक्कायः ‘लौ नाङ्इ जाङ्ह्ओ रेव्ओ काम्कोः जाङ्ह्झ्याङ्पाय् क्युम्ह्ती वाय्ओ लेःआः’ त दाय्ह्ती तोसाया ‘लौ चीङ्अ नाङ्कोः न्हाप्लावः लात्ती वाह्अ’ त दाय्ह्ती ओउः जीक्ओकायः स्याक्ताक्साया गाव्खे सजीलो त तोनाङ्स दा। 24 लौ ङा मान्ताकोः चोः त तोओपाय् ल्हाव्ह्दैबाङ्हाङः रेव्ओ काम् वाय्साकायः ग्वम्मा स्याक्ताक्साकायः ग्वम्मा दोःआलाङः त नीङ्कायः छ्यानःसाकायः ङाइ इकायः स्याक्ताक्लेःनाङः” त दाय्ह्ती येसुइ ओउः जीक्ओ मान्ताकःताङ् ल्हेःती “लौ च्योक्अ नाङ्कोः न्हाप्लावः लात्ती पाय्ह्अ दा” त दाय्ह्ती ओउः जीक्ओ मान्ताकायः तोआथै। 25-26 ओउःत तोओ कुस्ब्रक्त ओउः मान्ता च्योक्ती न्हाप्लावः खुम्ती लात्ती परमेस्वर्कायः ताङ्ह्ताक्तीलेः पाय्ह्आ। ओहाङःसैको ओउः वाह्सा खाय्आक्मालो मान्ता च्योक्ती पाय्ह्ओ च्यवःती ओउः कीम्हाङः मुओलम् आन ग्याङ्ह्ती “लौ तेन् ङीइ आन ग्याङ्ह्सीःओ कुरालेः च्यवःआतय्ह्नी बा” त दाय्ह्ती एङःतीलेः परमेस्वर्कायः ताङ्ह्ताक्तीलेः नोःकाय्आकाय्। 27 ओहाङःसैको कीम्सै ग्ल्युङ्ह्ती आल्ती लोन्ते येसुइ यात्चाक् लेवी त तोओ पैसा उथावओ जीमदार्कायः आफीस्हाङः च्युङःती मुओ च्यवःती क्रुस्आकान्। ओउःकायः क्रुस्आक्तीको “लौ ङाकुस् वाह्अ” त दाय्ह्ती येसुइ तोआथै। 28 इत तोआक्तीको उया लेवीपाय् चीङ्ती येसुकुस् वाह्आकाच। 29 ओहाङःसैको वाह्ती लयःकोः कीम्हाङः आल्ती लेवीइ येसुलम्कायः भोरःती बयःओ भोस् जाङ्ह्आथास। ओउः भोस् जेःतोक्हाङः नाःतो अरु पैसा उथावओ मान्तालम्मा अरुलम्मा हुम्ती भोस् जेःलाङ् वाङ्आकाय्। 30 ओहाङःसैको ओउः मान्तालम्इ येसुकुस् ब्रेङःतीलेः जेःतोक्हाङः यात्नीस् फरीसीलम्मा ओउःमयःकोः धर्मा स्यान्ओमयःमा वाङ्ती इत हायःओ च्यवःती “लौ इलो खेःओ पैसा माःती जेःओमा रेव्ओ काम् जाङ्ह्ओलम्मा ओउःमयःकुस् नीङ्इ दोह् हायःतीतेः ब्रेङःकाय्तीलेः जेःती तुङ्ती मुतेःनै” त दाय्ह्ती येसुकुस् वाह्ओमयःकायः जान्तीलेः तोथासतो 31 ओउःमयःइ तोओ येसुइ सायःती “सेलः मुओ मान्ताकःताङ् दाक्तर् वाङ्सा परल जीक्ओ मान्ताकःताङ् ह दाक्तर् वाङ्सा परनाः। 32 ओउःलो लेखालेः ङापाय् पेओ मान्ताखेकायः खेःल पेमालो हायःओलम्कायः ह ‘नाङ्कोः रेव्ओ काम्लम् फेती ङाकोः पेओ काम् जाङ्ह्उ’ त दाय्ह्ती तोलाङ् वाङ्ओआः ङ” त दाय्ह्ती ओउःइ त्याङ्ती तोआथास। 33 ओहाङःसैको मान्तालम् येसुकःताङ् वाङ्ती “लौ बाप्तीस्मा बयःओ युहनाकुस् वाह्ओमयःखेमा फरीसीलम्कुस् वाह्ओमयःखेइमा उपाङ् काःओ जवमानानी परमेस्वर्कायः आन तेती तोमानानी नाङ्कुस् वाह्ओमयःखेइ आन जेःधै तुङ्धै मुनै” त दाय्ह्ती तोथातो 34 “लौ बीहाताङ् वाङ्ओ पहुनालम्इ बीहाकोः भोस् जेःनानी माःदै। भाव् मुतोक्हाङः सुकायःमा उपाङ् काःताक्सा स्याव्ल। 35 लोने वाङ्सा दीन्हाङः ओउः भाव्कायःपाय् ओउःमयःकःसै आल्साआः आल्आक्तीको ह उपाङ् काःसा ज्योनाः। इलो लेखालेः ङा मुमुबालेहाङः ङाकुस् वाह्ओमयःपाय् उपाङ् काःसा परइली ङाकायः आलःआक्तीको ह ओउःमयः उपाङ् काःनाःइसी” त दाय्ह्ती येसु त्याङ्आ। 36 ओहाङःसैको यात्ज्योः अरु कुरा येसुइ स्यान्तीलेः तोआथास “आय् नाय् काप्साकायः सुइमा रौ नाय् तेत्ती काप्नीली उया ओउः रौ नाय्पाय् तेत्ती वाय्ओ लेःआः आय् नाय्कुस् रौ नाय् ब्राङ्चल। 37 फेरी रौ धाक्सायःकोः तीः आय् वङ्ह्ओ पोम्हाङः सुइमा बोमःती कानीली उया स्योङ्तीलेः पक्ताक्ती पोम्मा धाक्सायःकोः तीःमा वाय्चाः। 38 खेःल रौ धाक्सायःकोः तीःपाय् रौ पोम्हाङः कासा खेःतो। 39 ओहाङःसैको आय् धाक्सायःकोः तीः तुङ्आक्तीको सुइमा रौ धाक्सायःकोः तीः झाक्तीलेः तुङ्नीली ‘रौ कुरासै ओउः आय्पाय् पेओ लेःआः बा’ त दाय्ह्ती दाय्ह्नाः” त दाय्ह्ती येसुइ स्यान्ती तोआकान्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.