लुका 1 - चेपाङ1 अ नाङ् पेओ थीओफीलस्य ङीकःगन ङ्हा स्याव्ओ कुरापाय् नाःतो मान्तालम्इ लेखसा बोङःनीतो 2 इ कुराखेपाय् येसुकोः ओत्नम् दीन्हाङःसै सबै च्यवःओ मान्तालम्कोः ल्हाक्राय् सायःती चीःआक्तीको ओउःमयःइ लेखआकानी। 3 ओहाङःसैको उया इ कुरापाय् ङाइमा सबै पेतो सायःआक्तीको नाङ्कायः दोङ्ह्तोलेः छ्यानःसा थेङालेः लेखनेःआलाङ्। 4 इ ङाइ लेखओ कुरा पह्रआक्तीको नाङ्इ ओउः ङ्हा स्यान्ओ कुराकायःपाय् “गाव्खे दोङ् कुरा लेःआः गाव्खे दोङ्मालो कुरालेः” त नाङ्इ लयःकायः तय्ह्सा खाय्तेःनौ। 5 यहुदीया देस्हाङः यात्चाक् हेरोद् राजा मुओ खेःतो। ओउः राजा मुतोक्हाङः अबीयाह् त तोओ पुरोहीत्कोः खलक्हाङः यात्चाक् जखरीया त तोओ खेःतो। ओउःकोः बुधीपाय् इलीसबा त तोओलेः ओउःपाय् जुगाङ् ङ्हा स्याव्ओ पुरोहीत् हारन् त तोओकोः मोमःदाने खेःतो। 6 ओउःनीस् पय्क्चाःइ परमेस्वर्कोः मीक्हाङः पेओ काम् जाङ्ह्माआकाचु ओउःकोः गानाक्ती तोओ कुरापाय् पेतो सायःमाआकाचु। 7 इलीसबा त तोओइपाय् चोः जुगाङ् लात्सा खाय्उलु ओउःत झ्यान्ते ओउःनीस् बुधा बुधी स्याव्तोक्हाङः चोः नाःचल। 8 ओहाङःसैको यात्दीन्हाङः ओउः अबीयाह् खलक्कोः पुरोहीत्लम् काम् जाङ्ह्सा पालो स्याव्आ। मन्दीर्हाङः काम् जाङ्ह्तोक् बेलाहाङः ओउः मन्दीर् कीम्कोः दोङ् दुङ्हाङः यात्चाक्इ परमेस्वर्कायः धुप् उलःसा काम् जाङ्ह्ओ त जवनानी। 9 ओउः दीन्हाङः बाङ् खेलती योआक्तीको इ धुप् उलःसा काम् जाङ्ह्साकायः जखरीयाकायःलेः दोक्ती गम्ओ खेःतो। ओउः त झ्यान्ते जखरीयापाय् मन्दीर् कीम् दुङ्हाङः पोक्ती वाङ्तो 10 बाहीरसै नाःतो अरु मान्तालम्खेइ परमेस्वर्कायः तेती तोती मुआकाय्। 11 ओहाङःसैको जखरीयाइ धुप् उलःती बयःओ बेलाहाङः ओउः उलःती गम्सा थाव्कोः ङोय्दोहाङः यात्ज्योः परमेस्वर्इ लाङ्कासै ल्होक्ओमयः थाओ च्यवःआकान्। 12 ओउः ल्होक्ओमयः च्यवःआक्तीको जखरीयापाय् ल्हुङ् क्रम्ती रैआ। 13 ओउःत रैतोक्हाङः “अ जखरीयाय रैतेःचाःनाः। नाङ्इ चोः तेओ कुरापाय् परमेस्वर्इ म्रोती सायःतेःनाः। नाङ्कोः इलीसबा त तोओ बुधीइ गोय्चोःचोःलेः दोःबत्तेःनाः। दोःआक्तीको ओउः चोःकायः ‘युहना’ त मय्ङ्उ” त दाय्ह्ती ओउः ल्होक्ओमयः तोआथै। 14 “लौ नाङ्कोः गोय्चोःचोः दोःओ बेलाहाङःपाय् नाङ्मा आनतेः म्रोतेःनाः नाःतो अरुलम्मा चोङाय्तो स्याव्नै। 15 इ मान्तापाय् लोने परमेस्वर्कोः मीक्हाङः ताङ्ह्तोलेः स्याव्नाः। ओउःइपाय् ङोताक्ओ थोक्लम् धाक्सायःकोः तीःलम् तुङ्सा गलमा स्याव्ल। ओउःपाय् लयः ओत्ओहाङःसै परमेस्वर्कोः ग्वालामः आन दोःनाः। 16 लौ नाङ्कोः चोःइपाय् नाःतो इस्राएल्कोः मान्तालम्कायः परमेस्वर्कःताङ् द्यान्ह्ताक्नाःथास। 17 उय्ह्लेकोः परमेस्वर्कोः ग्वम्मा ग्वालामःमा दोःओ एलीयालो लेखा स्याव्ती नाङ्कोः चोःपाय् परमेस्वर्इ तोती गम्ओ प्रभुकोः ङ्हासै वाह्नाः। ओउःइ आपालम् चोःलम्कुस् ब्राङ्ताक्मानौ रेव्ओ काम् जाङ्ह्ओ मान्तालम्कायः पेओ व्हाय्ओ ल्हुङ् स्याव्ताक्मानौ। ओउःत हायःती ओउःइ ख्रीस्कोः वाङ्सा बेलाहाङःकायः मान्तालम्इ प्रभुकायः रोम्ताक्नाःथै” त दाय्ह्ती ओउः ल्होक्ओमयःइ जखरीयाकायः तोआथै। 18 ओउःत तोआक्तीको “लौ ङामा बुधा स्याव्आलाङः ङाकोः बुधीमा बुधीलेः स्याव्जेःआ बा ओउःत खेःया नीची लोने चोः दोःनाङःच त गत हायःती ङ्हाम्चाङः र” त दाय्ह्ती जखरीया त्याङ्आ। 19 “लौ ङापाय् परमेस्वर्कोः मीक्हाङः चीङ्ओ गब्रीएल् त तोओ लेःआः ङ। नाङ्कायः इ चोङाय्सीःओ चोः दोःताक्सा कुरा छ्यानःसा थेङा ओउःइ ल्होक्आताङः बा। 20 इ ङाइ तोओ कुरापाय् क्रोःओ बेलाहाङः ताप्तोलेः स्याव्नाः एत नाङ्इ ङ्हाम्तेःउलु ओउःत झ्यान्ते ओउः कुरा स्याव्धाङ्माखाहाङः नाङ् ले गोलोम्तोलेः स्याव्ती नोःसा खाय्तेःउलु” त दाय्ह्ती ओउः ल्होक्ओमयःइ तोआथै। 21 ओहाङःसैको इत तोतोक्हाङः ओउः बाहीरसै ल्युङ्ह्ती मुओ मान्तालम् “जखरीयापाय् दोह् हायःती मन्दीर् कीम् दुङ्हाङः इच्युक् ज्याङःतोकायः मुधाङ्आ” त म्हर्आकाय्। 22 ओहाङःसैको ग्ल्युङ्ह्ती वाङ्तोक्हाङः जखरीयाइ ओउः ल्युङ्ह्ती मुओ मान्तालम्कायः म्होतोङ्इ नोःसा खाय्उलु क्रुत्इ ह दोती नोःआ ओउःत झ्यान्ते मान्तालम्इ “ओउःइ मन्दीर्हाङः माङःखा च्यवःआकान्” त चीःआकानी। 23 ओहाङःसैको ओउःकोः मन्दीर्हाङः काम् जाङ्ह्ओ पालो द्योक्आक्तीको जखरीयापाय् लयःकोः कीम्ताङ् पाय्ह्आ। 24 कीम्ताङ् पाय्ह्आक्तीको लोने ओउःकोः इलीसबा त तोओ बुधी चोःतुक् स्याव्ती झ्यान्ते पास् महीनाच्युक्कायः ओउः मोमःचोःपाय् लयःकोः कीम्हाङः नुकुती मुओ खेःतो 25 “लौ इत हायःती प्रभु परमेस्वर्इ ङाकायः योनःती योजेःआताङः बा। द्याह्हाङःसैकोः मान्तालम्इ ङाकायः हेला क्लाःसा खाय्नीली” त दाय्ह्ती इलीसबा ल्हुङ्ताङ् म्हर्आ। 26 ओहाङःसैको इलीसबा चोःतुक्पाय् छ महीना स्याव्तोक्हाङः ओउः गब्रीएल् त तोओ ताङ्ह्ओ ल्होक्ओमयःकायः परमेस्वर्इ गालील जील्लाकोः नासरेत् त तोओ सहर्ताङ् ल्होक्आथै। 27 ओउः नासरेत् सहर्हाङः यात्चाक् मरीयम् त तोओ मोमःचोः खेःतो। मरीयम्कायः यात्चाक् युसेफ् त तोओ गोय्चोःइ वानःसा धयःती गम्ओ खेःतो। ओउः युसेफ्पाय् उय्ह्लेकोः दावुद् राजाकोः प्लोमःदाने लेःआः। 28 ओहाङःसैको परमेस्वर्इ ल्होक्आक्तीको गब्रीएल्पाय् मरीयम्कःताङ् थाती वाङ्आ “लौ नाङ् पेतोतेः स्याव्जेःआ। नाङ्कः परमेस्वर्पाय् आन म्रोती झ्यान्ते नाङ्कुस् मुलेःनाः” त दाय्ह्ती ओउः गब्रीएल् त तोओ ल्होक्ओमयःइ तोआथै। 29 एत तोओ सायःआक्तीको “लौ इपाय् दोह् कुरालो” त मरीयम् आन ल्हुङ् रीङ्ह्ती म्हर्आ। 30 एत म्हर्तोक्हाङः “लौ मरीयम् रैतेःचाःनाः। परमेस्वर्इ नाङ्कायः आन पेतो जाङ्ह्सा बोङःओतेःआः बा नाङ् रैसा परतेःल। 31 नाङ् लोन्ते चोःतुक् स्याव्आक्तीको गोय्चोःतेः दोःतेःनाः। ओउः चोःकायः येसु त मय्ङ्उ। 32-33 ओउःपाय् आन ताङ्ह्तो मान्ता लेःआः स्याव्नाः ओउःकायःपाय् ‘सबैसै ताङ्ह्ओ परमेस्वर्कोः चोःलेः’ त अरुइ तोनानी। फेरी ओउःकोः दावुद् त तोओ तोकानःलो लेखा परमेस्वर्इ ओउःकायः इस्राएल् मान्तालम्कोः हुकुम् बयःसा राजा स्याव्ताक्नाःथै। ओहाङःसैको ओउःकोः राजी गलमा द्युम्ल” त दाय्ह्ती ओउः ल्होक्ओमयःइ तोआथै। 34 एत तोओ सायःती “लौ ङापाय् सुकुस्मा एनःधाङ्ङल गत हायःती ङाइ लात्सा खाय्चाङः र” त दाय्ह्ती मरीयम् त्याङ्लेःआ। 35 “लौ नाङ्कःताङ् परमेस्वर्कोः ग्वालामः ग्ल्युङ्ह्ती खुप्लाङ् वाङ्ती ओउःकोः ग्वम् दोःआक्तीको इ परमेस्वर्इ तोती गम्ओ कुरा स्याव्नाः। ओउःत झ्यान्ते नाङ्कोः लोने वाङ्सा खेःओ चोःपाय् छय्ङ्ओ लेःआः ओउःकायः ‘परमेस्वर्कोः चोः लेःआः’ त तोनाः। 36 ओहाङःसैको नाङ्कोः इलीसबा त तोओ मह्आमा चोःतुक् लात्ती मुलेःनाः। ओउःकायःपाय् सबै मान्तालम्इ ‘चोः लात्सा खाय्उलु’ त तोथातो ओउःपाय् बुधी स्याव्तोक्हाङः द्याह् ६ महीनाकोः चोःतुक् लात्ती मुनाः 37 दोह् हायःती दाय्ह्सा परमेस्वर्इ जाङ्ह्सा खाय्मालो थोक्पाय् दोह्मा नाःल बा” त दाय्ह्ती ओउः ल्होक्ओमयःइ तोआथै। 38 “लौ उया ङाकायः परमेस्वर्इ तोओ कुरापाय् स्याव्जेःपाः। ओउःकोः काम् ङा जाङ्ह्सा ग्यालेःनाङः” त दाय्ह्ती मरीयम् त्याङ्आ। एत त्याङ्आक्तीको ओउः ल्होक्ओमयः पाय्ह्आ। 39 ओउः ल्होक्ओमयःखे पाय्ह्आ मरीयम्खे यहुदीया देस्कोः स्यालुङ्हाङः जखरीया त तोओकोः कीम्ताङ् दाह्ती वाङ्आ। 40 ओहाङः दाह्आक्तीको इलीसबा त तोओकायः मरीयम्इ स्यवआथै। 41 ओउःत स्यवती नोःतोक्हाङः इलीसबाकोः तुक्कोः चोः जोक्तो साङ्ह्लेःआ। 42 ओहाङःसैको इलीसबापाय् परमेस्वर्कोः ग्वालामः दोःती “लौ अरु मोमःचोःलम्कःसै नाङ्कायः परमेस्वर्इ आन पेतो जाङ्ह्तेःआ बा। नाङ्इ लात्ओ चोःमा आन पेतोमा ताङ्ह्तोमा स्याव्आनाः। 43 ङापाय्जा मीओ मान्ता खेःङोतो इ ङाकोः प्रभुकोः आमापाय् ङाकायः क्रुस्लाङ् वाङ्साकायः दोह् दयःती दोःताक्नाःताङः ती। 44 नाङ्इ स्यवती नोःओ सायःओ कुस्ब्रक्त ङाकोः तुक्कोः चोःपाय् चोङाय्तीलेः त्योनःमाआ। 45 ओउः परमेस्वर्इ तोती गम्ओ कुरा ङ्हाम्ती झ्यान्ते नाङ्पाय् आन म्रोतोतेः स्याव्तेःनाः” त दाय्ह्ती इलीसबाइ सोतो नोःती मरीयम्कायः तोआथै। 46 एत तोओ मरीयम्इ सायःती “लौ ङापाय् ल्हुङ्हाङः परमेस्वर्कायः ‘गुच्युक् पेओमा ताङ्ह्ओमा लेःआः’ त लुङ्ती म्हर्नाङः। 47 ङाकायः दल्ताक्सा परमेस्वर्इ आन म्रोताक्आताङः बा। 48-49 दोह् हायःती दाय्ह्सा ङाच्युक् मीओ मोमःचोःकायः योनःती योआक्तीको ओउःइ आन पेतो जाङ्ह्आताङः बा ओउःत खेःओ ङाकायःपाय् ‘नाङ्जा भालातेः पेतो स्याव्जेःतेःआ दै’ त सबैइ तोनाःताङः। परमेस्वर्पाय् गलमा पेतो छय्ङ्तो लेःआः बा। 50 ओउःकायः एङःती मुओलम्कायः परमेस्वर्इ गलकायःमा योनःनाःथास। आपालम्कायःमा चोःलम्कायःमा ओउःइ योनःती योनाःथास। 51 लयःकोः नेह्रो ओर्ताक्ओ मान्तालम्खेकायः परमेस्वर्इ लयःकोः ग्वम् छ्यानःती मीतो स्याव्ताक्नाःथास। 52 राजालम्मा ताङ्ह्ओ मान्तालम्खेकायःमा ओउःइ मीताक्थासतो बाःती याक्ओ मान्तालम्खेकायः ओउः अरु लयःकायः नेह्रो ओर्ताक्ओ मान्तासै ताङ्ह्तो स्याव्ताक्नौ बा। 53 ओउः योङ्क्राय्ओलम्खेकायः परमेस्वर्इ जेःसा बयःनौ नाःतो नाःओलम्खेकायः ओउःइ बयःमाःत ल्होक्नौ। 54-55 ओउःइ उय्ह्लेकोः आब्राहाम्कायःमा आब्राहाम्कोः प्लोमःदाने मोमःदानेकायःमा तोती गम्ओ कुरापाय् परमेस्वर्इ द्याह् ताप्तो स्याव्ताक्आकान्। ओउःकोः काम् जाङ्ह्ओ इस्राएल् मान्तालम्कायः परमेस्वर्इ योनःती योती द्याह् गलकायःमा पेतो जाङ्ह्नाःथास” त दाय्ह्ती मरीयम् झाह्ती दाय्ह्आ। 56 एत दाय्ह्आक्तीको मरीयम्पाय् इलीसबाकुस् सुम् महीनाकायःच्युक् मुआ ओहाङःसैको लयःकोः कीम्ताङ् द्यान्ह्ती पाय्ह्आ। 57 मरीयम्खे लयःकोः कीम्ताङ् पाय्ह्आ ओहाङःसैको इलीसबाखेकोः चोः धुङ्ओ दीन् दाह्आक्तीको गोय्चोःचोः ओत्आकान्। 58 गोय्चोःचोः ओत्आक्तीको “लौ इलीसबाकायःजा आन पेतो योनःती योती परमेस्वर्इ गोय्चोःचोः दोःताक्आथै रैस” त सायःती ओउःकोः लयःकोः मान्तालम्मा गाव्कोः मान्तालम्मा म्रोती चोङाय्ती हुम्लाङ् वाङ्आकाय्। 59 फेरी चोः दोःओहाङःसै आत् दीन् स्याव्आक्तीको ओउः चोःकायः मय्ङ् बयःसा दीन् दाह्आ। ओउः दीन्हाङः ओउःकोः लयःमयःकोः मान्तालम् वाङ्ती “लौ इ चोःकायःपाय् लयःकोः आपाकोः मय्ङ् बयःती ‘जखरीया’ त मय्ङ्उ दा” त दाय्ह्ती तोनीतो 60 “खेःल ओउःकायः ‘युहना’ त मय्ङ्पाः” त दाय्ह्ती ओउःकोः आमाइ तोआकान्। 61 “अहै इकायः ‘युहना’ त मय्ङ्सा दोह् हायःतीतेः तोतेःनौ। इकोः नालीङ्कोः सुमा ‘युहना’ त मय्ङ्ओ नाःबाय्इली” त दाय्ह्ती ओउः वाङ्ओलम् चोःकोः आपाकःताङ् ल्हेत्ती 62 “लौ इकायः गत मय्ङ्पाः” त दाय्ह्ती ओउः चोःकोः आपाखेकायः क्रुत्इ क्वालःती व्हत्आकानी। 63 आपाइ लेखसा सीलत् तेती “ओउःपाय् ‘युहना’ त मय्ङ्ओ लेःआः” त तोती सीलत्हाङः लेखआकान्। ओउः लेखओ कुरा च्यवःती ओउःमयः आन ग्याङ्ह्आकाय्। 64 ओहाङःसैको मय्ङ् लेखओ कुस्ब्रक्त जखरीया फेरीलेः नोःसा खाय्ती झ्यान्ते परमेस्वर्कायः लुङ्ती तोआकान्। 65 ओउःत नोःओ सायःती ओउः गाव्कोः मान्तालम् रैती ओउः कुरा छ्यानःती ल्हाक्ती सबै यहुदीया देस्कोः स्यालुङ्हाङः थोल्ह्ती नोःकाय्आकाय्। 66 ओहाङःसैको ओउः कुरा सायःओलम् “लौ इलो खेःओ चोःपाय् गत ताङ्ह्ओ स्याव्चाः ओउःपाय् परमेस्वर्कोः ग्वालामः दोःओजेःआः बा” त दाय्ह्ती ओउःमयः ल्हुङ्हाङः म्हर्आकाय्। 67 ओहाङःसैको ओउः चोःकोः आपा जखरीया त तोओपाय् परमेस्वर्कोः ग्वालामः दोःती परमेस्वर्कोः कुरा दाय्ह्आ। 68 “लौ इस्राएल्कोः प्रभु परमेस्वर्कायः लुङ्ती ताङ्ह्ताक्ती तोनी दा। ओउःइ लयः छीङ्ह्ओ मान्तालम्कःताङ् वाङ्ती ओउःमयःकायः पेमालोसै दल्ताक्आथास। 69 ङीकायः दल्ताक्सा खेःओ मान्तापाय् प्रभु परमेस्वर्इ यात्चाक् ओउःकोः लयः झाह्ओ दावुद् राजाकोः होह्र्सै ल्होक्आतय्ही। 70 ओउः कुरापाय् उय्ह्लेकोः परमेस्वर्कोः कुरा छ्यानःओ मान्तालम्इ तोनीतो द्याह् ओउः कुरा ताप्तो स्याव्आनाः। 71 एत हायःती ङीपाय् लयःकोः दुस्मान्सैमा ङीकायः अह्र्तो योओलम्सैमा दल्तो स्याव्नाःतय्ही। 72 ङीकोः आय्कानः तोकानःलम्कायः योनःती ओउःमयःकायः तोती गम्ओ कुरा ओउःइ जाङ्ह्लेःनौ। 73-75 ङीकोः तोकानः आब्राहाम्कायः तोती ‘लौ नीङ्कोः दुस्मान्सै ङाइ दोङ्सीलेः दल्ताक्नेःनाङ्स’ त दाय्ह्ती परमेस्वर्इ कीरीया जेःआकान्। ओउःत खेःओ ङी दोह्कःमा रैमाःत परमेस्वर्कोः काम् ङीकोः सीमाःच्युक्कायः ओउःकोः मीक्हाङः पेतो छय्ङ्तोलेः जाङ्ह्सा खाय्नाङःसु। 76 लौ नाङ्जा ङाकोः मीओ चोःपाय् नाङ्कायःपाय् ‘सबैसै ताङ्ह्ओ परमेस्वर्कोः कुरा छ्यानःती तोओ मान्ता लेःआः’ त तोतेःनाः बा दोह् हायःती दाय्ह्सा प्रभु त तोओकोः ङ्हासै वाह्ती ओउःकायः रोम्ताक्साकायः मान्तालम्कोः ल्हुङ्लम् ग्याताक्तेःनौ। 77 परमेस्वर्कोः मान्तालम्कायः ‘लौ परमेस्वर्इ योनःती योती झ्यान्ते नीङ्कोः रेव्झ्याङ्कोः क्युम्ह्ती वाय्आक्तीको नीङ्कायः रौ गलमा द्योक्मालो जीङः बयःतेःनै’ त दाय्ह्ती नाङ्इ मान्तालम्कायः स्यान्ती तोसातेः खेःतेःनाः। 78-79 एतलेः ङीकोः पेओ काङ्ओ परमेस्वर्इ नया दीन्कोः न्याम् थोङ्ताक्ती झ्यान्ते च्याक्ओपाय् क्रव्ताक्लेःनाः। ओउःलो लेखालेः परमेस्वर्कोः नया कुरा वाङ्आक्तीको लयः सीओकः रैती वाह्ओ मान्तालम् ओउः कुरा ङ्हाम्आक्तीको सीओकः रैमाःत ल्हुङ् धोमाय्तो मुनै” त दाय्ह्ती युहनाकोः आपा दाय्ह्आ। 80 ओउःतलेः आपा दाय्ह्आ ओहाङःसैको ओउःकोः चोः युहना त तोओपाय् आङ्मा ब्राव्ती ल्हुङ्मा व्हक्तो स्याव्ती परमेस्वर्कोः कुरा दीन्का दीन् न्हाङ्तोलेः चीःआकान्। आने यहुदी मान्तालम्कःताङ् तोलाङ् वाङ्सा दीन् दाह्धाङ्माःखाहाङः युहनापाय् याक्गार्सीःमालो राङ्हाङः मुओ खेःतो। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.