यहुदा 1 - चेपाङ1 ङा याकुब्कोः हौमा येसु ख्रीस्कोः काम् जाङ्ह्ओ नोकरी यहुदाइ इ चेतीलेः परमेस्वर्इ राप्ती छीङ्ह्ओ येसु ख्रीस्इ स्यास्ती गम्ओ मान्तालम्कायः लेखती ल्होक्नेःनाङ्स। 2 परमेस्वर्इ नीङ्कायः योनःती योती आन राप्ती जुगाङ् ल्हुङ् धोमाय्ताक्तेःपै। 3 लौ ङाइ राप्ओलम्य ङ्हापाय् ङी सबैकायः गत हायःती दल्ताक्नाःतय्ही त लेखसा ल्हुङ् रोती बोङःङोतो ओउः बेलाहाङः “अरु कुरामा लेखसा खेःतो” त म्हर्आलाङः। दोह् हायःती दाय्ह्सा परमेस्वर्इ यातै पेन्ह्हाङःलेः ङ्हाम्ओलम्कायः बयःओ ङ्हाम्राय् कुराकायः नीङ्इ दोङ्ह्तोलेः तानःकाय्सा खेःतो। 4 दोह् हायःती दाय्ह्सा यात् नीस् परमेस्वर्कोः कुरा ग्यामालोलम् नीङ्कःहाङः अरुइ चीःमाःत वाङ्आकाय्। ओउःमयःइपाय् परमेस्वर्इ योनःती योओ कुरा ङोय्ह्तोलेः स्यान्ती “लौ ङीइ ङ्हाम्ओलम्कायः द्याह् सबै काम् जाङ्ह्सा स्याव्नाः दोह्मा रेव्ओलेः खेःल” त माःती ल्हास्या काम् जाङ्ह्साकायः तोनानी। एत हायःती ङीकोः यातैज्योः प्रभुमा मालीक्मा येसु ख्रीस्कः झाक्माःत मुनै। ओउः खाल्कोः मान्तालम्कायः “न्युम्ह्तोलेः स्याव्नै” त दाय्ह्ओ उय्ह्लेहाङःसै आखरःहाङः लेखओआः बा। 5 नीङ्इ ङ्हा चीःओ कुरा ङाइ पुछ्युङःती तोनेःनाङ्स। उय्ह्लेहाङः प्रभुइ लयःकोः मान्तालम्कायः मीस्रा देस्सै वानःती दल्ताक्आथास। ओउःमयःकायः दल्सापाय् दल्ताक्थासतो ओउःमयःकःहाङः सुसुइ लोने ओउःकायः ङ्हाम्सा ग्यामालो खेःतो ओउःमयःकायःलेः प्रभुइ लोनेः वाय्ताक्आथास। 6 फेरी यात्नीस् लाङ्काकोः ल्होक्ओमयः उय्ह्लेहाङः लयःकोः काम्कायःमा मुसा थाव्कायःमा फेआकानी। ओउःमयःकायः प्रभुइ न्युम्ह्ताक्सा दीन्च्युक्कायः गलमा फास्मालो लाइ पानःती कामःअकोः च्याक्ओहाङः गम्आथास। 7 फेरी ओउःमयःलो लेखालेः सोदोम् गोमोरा नीस् सहर्हाङः मुओलम्मा ओउःकुस् द्याङ्काय्ओ सहर्कोः मान्तालम्इमा आन रेव्तो लुःर्यव् काम् जाङ्ह्आकानी। ओउःमयःकोः काम्लम् “रेव्ओ लेःआः” त सबैकायः छ्यानःसाकायः प्रभुइ गलमा सीमालो म्हेःइलेः न्युम्ह्ताक्आथास एत नीङ्इ चीःतेःनानी। 8 एत चीःसापाय् चीःतेःनानी ओउः नीङ्कःहाङः वाङ्ओ रेव्तो स्यान्ओलम्इ “एत हायःसा स्याव्नाः त माङःखाहाङः च्यवःआलाङःसु” त दाय्ह्ती ओउःमयःइ सोदोम् गोमोराकोः मान्तालम्लो लेखालेः लयःकोः आङ् रेव्ताक्नाःइसी। ओउःमयःइमा गानाक्ती तोओ कुरा सायःसा जुगाङ् ग्याइली आने ताङ्ह्ओ लाङ्काहाङः मुओलम्कायः रेव्तो नोःनानी। 9 ओउःमयःइ एत हायःसा जुगाङ् रास्इली ओउः सबैसै ताङ्ह्ओ लाङ्काकोः ल्होक्ओमयः मीकाएल् त तोओपाय् मोसाकोः म्हाङ् त्याक्साकायः सैतान्कुस् काय्काय्ओ बेलाहाङः ओउःइ सैतान्कायः हेला क्लाःसामा दोङ्ह्ती गाल्तुम्सा ग्याल “लौ प्रभुइ जान्तेःपाः” त दाय्ह्ओ ह तोआथै। 10 मीकाएल्खेइपाय् हेला क्लाःउलु इ रेव्तो स्यान्ओलम्खेइ दोह्मा म्हर्माःत लयः चीःताङ् चीःमालो कुराकायः हेला क्लाःनानी ओउःमयःइ चीःओपाय् स्याःलम् जाःलम्च्युक् ह चीःनानी ओउःच्युक् चीःओझम्कोःपाय् वाय्तोलेः स्याव्नै। 11 ओउःमयः लोनेः न्युम्ह्तोलेः स्याव्नै। ओउःमयःपाय् उय्ह्लेकोः कैन् त तोओलो लेखालेः रेव्तो जाङ्ह्ती वाह्नै। पैसा क्युसाकायः ओउःमयःइ बालाम्लो लेखालेः पेमालो जाङ्ह्आकानी फेरी परमेस्वर्कोः कुरा सायःसा ग्यामालो कोराह्लो लेखालेः ओउःमयःमा वाय्तोलेः स्याव्नै। 12 ओउः खाल्कोः मान्तालम् नीङ्कोः प्रभु भोस् वाङ्ती ओउः भोस्कायः गाल्ताक्नानी। अरुलम्कायः गतमा म्हर्मामाःत लयःकायः ह जेःती कोस्ताक्नाःइसी। ओउःमयःपाय् मारुःइ वानःओ तीः लात्मालो हाःओ मुस्लो लेखालेः मुनाः। ओउःमयःपाय् सायःसा चीःमालो सीङःलो लेखालेः मुनै। ओउः खाल्कोः सीङःलम्पाय् च्योङ्ती फुक्ती जुगाङ् सीती वाय्ताक्साआः। 13 ओउःमयःकोः रेव्तो रास्सीःओ काम्लम्पाय् रैसीःतो साङ्ह्ओ तीःइ लात्ओ भोप्लो लेखा च्यवःनाः। ओउःमयःपाय् त्यावःसै ग्लेःओ रेखुकार्लो लेखा लेःआः इ। ओउःकायः परमेस्वर्इ जुगाङ् च्याक्ओहाङः क्लाःती ओउःहाङः गलकायःमा गम्नाःथास। 14 हनोक् त तोओपाय् आदम्सै ग्ल्युङ्ह्ती सात् होह्र् खेःतो ओउःइ इ खाल्कोः रेव्ओ काम् जाङ्ह्ओलम्कोः कुरा ङ्हासै चीःती “लौ हजारै हजारै ओउःकोः लाङ्काकोः ल्होक्ओमयःकुस् प्रभुपाय् 15 सबैकायः तय्छनःती योलाङ् वाङ्नै। ओउः ङ्हाम्मालोलम्इ जाङ्ह्ओ रेव्तो काम्लम्मा सबै ओउःमयः हेला क्लाःओ काम्कायःमा प्रभुइ ओउःमयःकायः गाल्तुम्तीलेः नोःनौ” त दाय्ह्ती हनोक् दाय्ह्आ। 16 ओउः मान्तालम्पाय् अरुलम्कायः गलमा काय्ह्य्हाव्ती गाल्तुम्ती मुनै। ओउःमयः लयः ल्हुङ्कोः मोह्हाय्ओलम् जाङ्ह्नानी लःलयःकोः नेह्रो ओर्ताक्नाःइसी लयः झाक्ओ कुरा दोःसाकायः अरुलम्कायः फोल्यावःती होम्नानी। 17 ओउःमयःखेइ ओउःतलेः हायःनानी लौ ङाइ राप्ओलम्य नाङ्खेइ ङीकोः प्रभु येसु ख्रीस्इ छ्युङ्ह्ओ ल्होक्ओमयःलम्इ तोओ कुरा द्याह् गीलती मुन 18 “लौ ओउः लोनेकोः दीन्लम्हाङः लयःकोः ल्हुङ्कोः रेव्तो मोह्हाय्ओ जाङ्ह्ओलम् थाती परमेस्वर्कोः कुराकायः आन हेला क्लाःलाङ् वाङ्नै” त दाय्ह्ती तोओ कुरा नीङ् गीलती घीःती मुसा खेःतो। 19 ओउः रेव्तो जाङ्ह्ओलम्इपाय् ङ्हाम्ओलम्कायः वेङ्काय्ताक्नानी। परमेस्वर्कोः ग्वालामः दोःमाःत झ्यान्ते लयःकोः ल्हुङ्कोः रेव्तो मोह्हाय्ओ कुरा ह जाङ्ह्सा चीःनानी। 20 नीङ्पाय् ङाइ राप्ओलम्खेइपाय् परमेस्वर्कायः न्हाङ्तोलेः ङ्हाम्ती ग्रमःत मुन। परमेस्वर्कोः ग्वालामः दोःती ओउःकायः तेती तोनु। 21 प्रभु येसु ख्रीस्इ योनःती योती नीङ्कायः लोने रौ गलमा द्युम्मालो जीङः बयःतेःनै। ओउः जीङः बयःसा दीन्कायः परमेस्वर्इ राप्ओकायः फेमामाःत ल्युङ्ह्ती मुन। 22 ध्यव्ओ ङ्हाम्ओलम्कायः नीङ्इतेः योनःती योनु दा 23 अरुकायः नरककोः म्हेःसै दल्ताक्नु। यात्नीस् अरुकायः योनःती योतोक्हाङः नीङ् पेतो घीःती मुसा खेःतो ओउःमयःकोः रेव्ओपाय् नीङ्कःताङ् त्योम्सा ताक्तेःचानी। 24 लौ नीङ्कायः त्योक्साकायः त्याःसा खाय्ओमा नीङ्कायः नीङ्तो चोङाय्तो स्याव्ताक्ती लयःकोः पेओ थाव्कोः दाक्ती गम्सा खाय्ओपाय् परमेस्वर् लेःआः। 25 ङीकायः दल्ताक्सा यातैज्योः परमेस्वर्कायः ङीकोः प्रभु येसु ख्रीस्कुस्इलेः जुगाङ् ताङ्ह्ओ पेओ ग्वम् नाःओलेः ङ्हामा द्याह्मा लोनेःकायःमा मुताक्पाः। ओउःतलेः स्याव्पाः दै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.