याकुब् 5 - चेपाङ1 ओहाङःसैको नीङ्कःहाङः साहु मान्ता मुनै। लौ नीङ् नाःतो नाःओलम्पाय् नीङ्कःहाङः आन लीह्सीःओ वाङ्नाः ओउःत झ्यान्ते नीङ् क्रेस्ती र्याःसा खेःतो। 2 नीङ्कोः पैसा मीह्बत्तेःआकाय् नीङ्कोः पेओ नाय्लम् स्यान्इ जेःतीमा ओत्ती वाय्ओ बत्तेःआकाय्। 3 नीङ्कोः सुन् चान्दी खय्इ जेःओ बत्तेःआकाय्। एत स्याव्बत्तेःआकाय् त खेःओ नीङ् पेमालोतेः हायःतेःआकानी त अरुकायः छ्यानःओलेः स्याव्नाः। म्हेःइ जेःओलो लेखालेः नीङ् न्युम्ह्तोलेः वाय्तोतेः स्याव्तेःनै। इ लोने वाङ्सा खेःओ दीन्लम्कायः आनतेः त्युम्ह्तेःआकायःइसी। 4 नीङ्इपाय् नीङ्कोः लयःकोः राङ्हाङः काम् जाङ्ह्ओ खेत्ल्यालम्कोः ज्याला माःती जेःतेःआकानी। लौ नीङ्इ ओउःमयःकायः पेमालो हायःतेःआकान् त झ्यान्ते ओउःमयःकोः काय्ह्य्हाव्ती नोःओ कुरा सायःनु दा। ओउःमयःकोः कुरापाय् ओउः जुगाङ् ग्वम् नाःओ प्रभुइलेः सायःआकान् बा। 5 ल्हाव्ह्दैबाङ्हाङः मुतोक्हाङः नीङ् आन ङोस्तोलेः चोङाय्ती मुतेःआकाय्। आन भोरःती जेःती तुङ्ती झ्यान्ते नीङ् द्युन्तोतेः स्याव्तेःइतो द्युन्ओ मेत्छ्याःलो लेखालेः नीङ्कोः सात्ती वाय्सा दीन् वाङ्आनाः। 6 पेओ नीङ्ओ मान्तालम्कायः गाल्तुम्ती सात्तेःताक्तेःआकानी। सात्सा बोङःओ बेलाहाङः नीङ्कायः ओउः मान्तालम्इ दोह्मा हायःतेःइली। 7 लौ पुःचोङ् हौचोङ्य प्रभु द्यान्ह्ती वाङ्धाङ्माःखाहाङः ल्हुङ् धोमाय्तोलेः ल्युङ्ह्ती मुन। राङ्हाङः सुक्ओ बीया चोया दुङ्ताक्साकायः सायःताक्साकायः तीः परनाः ओउःत झ्यान्ते तीः वासा बेलाहाङः च्युक्कायः ओउः बीया चोया सुक्ओ मान्ता गुह्र्माःत ल्युङ्ह्ती मुनाः। 8 नीङ्मा गुह्र्माःत पेतो म्रोती ल्युङ्ह्ती मुन प्रभु वाङ्सा बेलापाय् दाह्खेःनाः बा। 9 लःलयःमयःकःताङ् काय्ह्य्हाव्काय्लाम् ओहाङःसैको परमेस्वर्इ नीङ्कायःमा गाल्तुम्ती तोतेःइली। ओउः तय्छनःती योसा प्रभुपाय् द्याङ्तोलेः मुनाः वाङ्खेःआ बा। 10 ओउः पेतो ल्युङ्ह्ती मुओमा लीह्सीःओ गोरःओ प्रभुकोः कुरा छ्यानःओलम्पाय् गतलो खेःइतो त ल्हुङ्हाङः गीलनु पुःचोङ् हौचोङ्य। 11 ओउःमयःइ आन लीह्सीःओ गोरःआकानी ओउःत झ्यान्ते ओउःमयःकायः परमेस्वर्इ पेतोलेः हायःनाःथास त दाय्ह्ती तोनाःतय्ह्नी। अयुब त तोओइमा लीह्सीःओ ग्रमःतलेः गोरःआकान्। ओहाङःसैको ओउःकायः प्रभुइ पेतोलेः बयःआथै ओउःत नीङ्इ चीःतेःनानी। प्रभुइ सबैकायः योनःतीलेः योनौ बा। 12 लौ पुःचोङ् हौचोङ्य नीङ्इ कुरा तोती गम्ओ बेलाहाङः ल्हाव्ह्दैबाङ्कोः मय्ङ्मा फेल्बाङ्कोः मय्ङ्मा दोह् खेःयाकोः मय्ङ्मा पेह्ती कीरीया जेःतेःचानी। नीङ् “माः” त त्याङ्सा ग्यातेःनै त खेःया “माः” तलेः दाय्ह्ती त्याङ्न। “खेःल” त त्याङ्सा त खेःया “खेःल” तलेः त्याङ्न ओउःच्युक् ह तोनु दा उया परमेस्वर्इ गाल्तुम्तेःनै। 13 नीङ्कःहाङः सुकःताङ् पेमालो लीह्सीःओ बेलाहाङः वाङ्नाः त खेःया ओउःखेपाय् परमेस्वर्कः तेती तोपाःस। अरु सुखे चोङाय्ती मुनाः त खेःया ओउःपाय् परमेस्वर्कोः गीत् मेपाः। 14 अरु जीक्ती ग्रुती मुनाः त खेःया ओउःइ ङ्हाम्ओलम्कोः थालवःपालम्कायः काःहाल्ती गोत्पौ। गोत्आक्तीको ओउःमयःइ ओउः जीक्ओ मान्ताकायः प्रभुकोः मय्ङ् पेह्ती आङ्हाङः साती ल्यानःती परमेस्वर्कायः तेती तोपानी। 15 ओउः मान्तालम्इ पेओ ङ्हाम्ओ ल्हुङ्इ तेती तोनानी त खेःयाकायः ओउः जीक्ओपाय् सेलः स्याव्नाः। प्रभुइ ओउःकायः उह्ती च्योक्ताक्नाःथै। फेरी ओउः मान्ताइ रेव्तोलेः जाङ्ह्आकान् त खेःया ओउः रेव्ओपाय् क्युम्ह्ती वाय्तो स्याव्नाः। 16 ओउःत झ्यान्ते लःलयःकायः रेव्ओ काम्लम् घोती परमेस्वर्कायः लःलयःमयःकायः तेती तोनु ओहाङःसैको नीङ् स्याक्तेःनै। ओजायःत नीङ्ओ मान्ताइ परमेस्वर्कः तेती तोधार्नालेः आन पेतो स्याव्ताक्नौ। 17 एलीया त तोओपाय् ङीलो लेखालेः मान्ता खेःतो ओउःइ “इहाङः तीः वालाम्” त दाय्ह्ती परमेस्वर्कः तेती तोआकान् तोआक्तीको ओउः देस्हाङः सुम् बर्स आधाच्युक्कायः तीःपाय् दोह्मा वाल। 18 ओहाङःसैको लोने “द्याह् तीः वापाः” तमा तेती तोमाआकान् ओहाङःसै ओउः देस्हाङः तीःपाय् आन वाओआः। साःसै सबै सुक्ओ थोक्लम् फेरी दुङ्ती पेतोलेः लन्ह्आकाय्। 19 लौ उया पुःचोङ् हौचोङ्य नीङ्कःहाङः यात्चाक् दोङ् कुरा जाङ्ह्ती वाह्ओकायः फेलेःनौ त खेःया अरुइ ओउःकायः दोङ् कुरा जाङ्ह्ती वाह्साकायः द्यानःपाःथै। 20 सुसुइ रेव्ओ काम् जाङ्ह्ओ मान्ताकायः ओउःकोः रेव्ओ काम् फेताक्नौ ओउःइ ओउः मान्ताकायः सीओसैमा दल्ताक्मानौ नाःतो रेव्ओ काम्लम्मा क्युम्ह्ताक्तीलेः वाय्मानौ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.