याकुब् 4 - चेपाङ1 नीङ्कःहाङः दोह् हायःती काय्काय्ओमा मीन्ह्काय्ओमा मुनाः। ओउःत हायःओपाय् लयःकोः ल्हुङ्कोः मोह्हाय्ओसै वाङ्ओआः बा। 2 ओउः मोह्हाय्ओ कुरालम्पाय् दोःसा थेङा पेमालो हायःसाकायः ग्यातेःनै। सात्साकायः ग्यातेःनै अरुकः मीक् लह्ती कायःकाय्तेःनै मीन्ह्काय्तेःनै। नीङ् लयः झाक्ओ कुरा दोह् हायःती दोःल दाय्ह्सा नीङ् परमेस्वर्कः तेतेःइली। 3 ओहाङःसैको तेतोक्हाङः नीङ् लयःकोः मोह्हाय्ओकायः ह तेतेःनै पेओ कुराकायः तेतेःइली ओउःत झ्यान्ते परमेस्वर्इ बयःतेःइली। 4 नीङ्इपाय् व्हाय्तोलेः ङ्हाम्तेःनीली रैस। नीङ् ल्हाव्ह्दैबाङ्कोः चीस् आन झाक्तेःनै त खेःया परमेस्वर्कः झाक्तेःइली ओउःतपाय् चीःतेःनीली यादो। ल्हाव्ह्दैबाङ्कोः मान्तालम्कुस् जुगाङ् ब्राङःतीलेःतेः वाह्नै त खेःया नीङ्पाय् परमेस्वर्कोः बीरोत् स्याव्तेःनै। 5 “मान्ताखेहाङः गम्ओ ल्हुङ्पाय् आन मोह्हाय्ओ झाक्रेव् ल्हुङ् लेःआः” त आखरःहाङः ङीकायः स्यान्सा थेङा लेखती मुनाः माःर। 6 ओउःपाय् दोङ् कुरा खेःसापाय् खेःतो परमेस्वर्इ ङीकायः योनःती झ्यान्ते ओउः मोह्हाय्ओसै पुःसा खाय्ओ ग्वम् बयःनाःतय्ही। “लयःकोः नेह्रो ओर्ताक्ओलम्खेकः परमेस्वर् अह्र्लेःनाः ओउः ल्हुङ् मीओ मान्तालम्खेकायः ओउःइ योनःती योती आन ग्वम् बयःनौ” त आखरःहाङःमा लेखती मुनाः। 7 ओउःत खेःओ परमेस्वर्कोः तोओ कुराखे ग्याती सायःनु। सैतान्कोः कुराखे ग्यातेःचनै ओहाङःसैको ओउःपाय् नीङ्कःसै क्रव्नाः। 8 परमेस्वर्कःताङ् द्याङ्तो वाङ्न ओहाङःसैको परमेस्वर् नीङ्कःताङ् वाङ्मानाः। लौ नीङ् रेव्तो जाङ्ह्ओलम् लयःकोः क्रुत् जल्ह्नीङ्इसी नीङ् ल्हुङ् ब्रेस्ओलम् ल्हुङ्हाङः ग्रमःत मुन। 9 नीङ् पेमालो स्याव्तेःआकाय् त झ्यान्ते क्रेस्ती र्याःन। ङीःसा खेःओखेकायः र्याःसालेः ताप्ती मुन चोङाय्तो मुलाम् लीह्तो मुसा स्याव्नाः। 10 प्रभुकोः मीक्हाङः मीओ ल्हुङ्इ वाह्न ओहाङःसैको ओउःइ नीङ्कायः लव्ह्तेःनै। 11 लौ पुःचोङ् हौचोङ्य अरुकायः पेमालो नोःतेःचनै। सुसुइ लयःकोः ङ्हाम्ओ पुःचोङ्कायः पेमालो तोनौया गाल्तुम्ती नोःनौया ओउःइपाय् नीयम्कायःमा पेमालो नोःती गाल्तुम्नौ। फेरी नीङ्इ नीयम्कायः गाल्तुम्तेःनानी त खेःया ओउः नीयम्कोः कुरा जाङ्ह्ओ मान्ता खेःतेःइली नीयम्कोः कुरा तय्छनःती योसा न्यादेस्लो लेखा मुतेःनै। 12 दोङ् नीयम् बयःओमा गाल्तुम्ती तय्छनःती तोओमा परमेस्वर् ह मुनाः। ओउःइ झुङ्आले दल्ताक्सामा ह्र्योक्ताक्ती वाय्सामा खाय्आनौ। ओउःत झ्यान्ते दोह् हायःतीतेः नीङ्इ अरु मान्तालम्कायः गाल्तुम्तीतेः नोःतेःनानी। 13 अरु कुरा फेरी सायःनाङ्स नीङ्कःहाङः यात्नीस्चाक् “लौ स्याङ्ह् चीत्सै ओउः सहर्ताङ् यात् साल्कायः काम् जाङ्ह्ती पैसा क्युलाङ् आल्नाङी” त दाय्ह्ती ङाःती नोःतेःनै। 14 ओउःत नोःसापाय् नोःतेःनै स्याङ्ह्पाय् “दोह् दयःचाःताङः” ततेः चीःतेःनीली बा। नीङ्कोः ओघपाय् रोलो लेखालेः यात्नीस् दीन्कायः ह मुनाः। 15 ओउःत झ्यान्ते एत ङाःती नोःसापाय् स्याव्ल “लौ परमेस्वर् झाक्नाः त खेःया ङी सेलः मुती इ काम्मा उ काम्मा जाङ्ह्चानी” त दाय्ह्ती नोःसाआः खेःतो। 16 नीङ् द्याह् ङाःतीलेः लयःकोः नेह्रो ओर्तेःताक्नाःइसी ओउःपाय् पेमालो लेःआः बा। 17 फेरी सुखेलोइ दोह् दोह् काम्लम्पाय् “जाङ्ह्सा खेःओ पेओ काम् लेःआः” त चीःचौ बुरु चीःआक्तीको ओउःइ जाङ्ह्उलु त खेःया ओउः मान्तापाय् पेमालो हायःआकान्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.