याकुब् 3 - चेपाङ1 लौ पुःचोङ् हौचोङ्य नीङ्कःहाङः नाःतो मान्तालम् “लौ अरुकायः स्यान्ओ मान्ता स्याव्पाङः” त दाय्ह्ती नोःसा स्याव्ल। दोह् हायःती दाय्ह्सा ङी अरुकायः स्यान्ओ मान्तालम्इ अरुसै न्हाङ्तोलेः पेतो हायःसा खेःतो उया न्हाङ्तोलेः न्युम्ह्तो स्याव्नाःतय्ही। 2 ङीइ सबै आन ब्रःझुङ्नाःतय्ही। सु मान्ताखे गलमा ब्रःतीलेः नोःल ओउःपाय् जुगाङ् नीङ्ओ मान्ता लेःआः सबै कुरा ल्हुङ् व्हाय्तोलेः जाङ्ह्नौ। 3 घोरा ग्याताक्ती वाह्ताक्साकायः ओउःकोः म्होतोङ्हाङः मीओ लगाम्कोः सीङः गम्नाःतय्ह्नी त खेःया ओउः घोराकायः ङीइ लयः झाक्ओहाङः वाह्ताक्सा खाय्नाःतय्ह्नी। 4 फेरी ताङ्ह्ओ तीःजहास्कायः जोक्तो मारुः वाङ्तोक्हाङः ताङ्ह्मालो कल्दारेइलेः पेतो वाह्ताक्सा खाय्नानी। जहास् चलावओ मान्ताइ लयः झाक्ओहाङः आल्नाः। 5 ओउःलो लेखालेः मान्ताकोः ले मुनाः। ओउः लेपाय् मीसापाय् मीतो लेःआः ताङ्ह्ओ ताङ्ह्ओ कुरा ङाःती नोःसा खाय्नौ। फेरी मीओ म्हेःइ ताङ्ह्ओ सीङःकोः बन्कायः आराहा जेःती मीह्ताक्सा खाय्नौ। 6 मान्ताकोः लेमा म्हेःलो लेखालेः मुनाः। ओउः लेइपाय् आङ्हाङः मुती मान्तापाय् सबै रेव्तोलेः स्याव्ताक्सामा खाय्नौ। लेइपाय् नरकसै दोःओ म्हेः लेःती ङीकोः जीङःकोः ओघकायः सबै रेव्ताक्सा खाय्नौ। 7 सबै सास् नाःओ जात्लम्कायः मान्ताइ पुःआकान् जाःलम् वाःलम् ङाःलम्कायः सबै पुःसा खाय्नौ। 8 ओउःखेकायः मान्ताइ पुःसा खाय्मानौ लयःकोः लेखेकायः पुःसा खाय्उलु। लेपाय् पेमालो लेःआः पेतो स्याव्ताक्सा सुइमा खाय्नीली बीख्लो लेखालेः रेव्ताक्नौ। 9 लेइलेः ङीकोः प्रभुमा परमेस्वर् आपाकायःमा “च्युता” त दाय्ह्ती तोनाःतय्ह्नी ओउः लेइमा परमेस्वर्इ लयःलो लेखा जाङ्ह्ओ मान्तालम्कायःमा प्रनःनाःतय्ह्नी। 10 यातैज्योः म्होतोङ्सै “च्युता” त तोआ कुरामा प्रनःआ कुरामा नीस्ज्योः खाल् वाङ्नाः। लौ पुःचोङ् हौचोङ्य ओउःपाय् स्याव्ल। 11 यातैज्योः पन्ध्यारोसै स्योक्ओ तीःमा य्हाक्ओ तीःमा नीस् खाल्कोः तीःलम् ग्ल्युङ्ह्सा जुगाङ् खाय्उलु। 12 फेरी न्याम्सी सीङःसै यसायः सायःसा खाय्उलु धाक्सायःमा दुम्बुरी सायः सायःसा खाय्उलु। ओउःतलेः छेः राव्ओ तीःसै पेओ तीःमा दोःल बा। 13 नीङ्कःहाङः व्हाय्तो चीःओ मान्तालम् मुनै त खेःया लौ ओउःमयः पेओ काम्लम् जाङ्ह्ती ल्हुङ् मीतो घ्युम्ती वाह्ती लयःकोः ल्हुङ् व्हाय्तोलेः त छ्यानःपानी। 14 नीङ् लयःकायः मोह्हाय्ओ चोरःओ ल्हुङ् मुतेःनै त खेःया लयःकोः नेह्रो ओर्ताक्तेःचाःइसी दोङ् कुरा नोःओलम्कः माःती तानःती तोलाम्। 15 ओउः माःती तानःकाय्ओ खाल्कोः चीःसा कुरा लाङ्कासै दोःओ खेःबाय्ल ओउःपाय् ल्हाव्ह्दैबाङ्कोः लेःआः। परमेस्वर्कःसै खेःल सैतान्सै दोःओआः बा। 16 गाःहाङःलो लयःकायः मोह्हाय्ओ लओ ल्हुङ् नाःओ मान्ता मुनै ओहाङःलेः सबै खाल्कोः कायःकाय्ओमा रेव्ओ काम्लम्मा मुनाः। 17 ओउः त्यावःअसै दोःओ व्हाय्तो चीःओ ल्हुङ्पाय् नीङ्ओ लेःआः। ओउःत व्हाय्तोलेः चीःओ ल्हुङ् नाःओ मान्तापाय् खह्र्ओ काय्काय्ओ मान्तापाय् खेःल। ओउःपाय् काङ्ओलेः अरुकुस् ब्राङ्ती वाह्ओ लेःआः अरुकायः योनःती योओ मान्ता लेःआः बा ओउःइ पेओ काम्लम् आन जाङ्ह्नौ। ताङ्ह्ओ मान्तामा मीओ मान्तामा सुकायःमा घार्ताक्तीलेः योनौ ओउःइपाय् ब्रेह्तो लेइ नोःउलु। 18 सुसुइ काय्काय्ओ तारःपाङःनानी ओउःमयः पेओ काम्लम् ब्याव्ताक्नानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.