याकुब् 2 - चेपाङ1 लौ पुःचोङ् हौचोङ्य नीङ् सबैइ ङीकोः पेओमा ताङ्ह्ओ प्रभु येसु ख्रीस्कायः ङ्हाम्तेःनानी ओउःत झ्यान्ते सबै मान्तालम्कायः घार्गार्तोलेः योनु। पेओ नाय् लावओलम्मा पेओ नाय् नाःमालो मान्तालम्कायःमा थेथेलेः रोम्तेःचानी। 2 नीङ् हुम्ती मुतोक्हाङः यात्चाक् पेओ नाय् लावओ सुन्कोः औथी दुप्ओ साहु मान्तामा अरु यात्चाक् नाय् नाःमालो ह्र्यात् मान्तामा वाङ्नाःच त खेःया 3 ओउः साहु मान्ताखेकायः योती “लौ इ पेओ थाव्हाङः च्युङःती मुचाक्अ दै” त दाय्ह्ती तोतेःचनै त खेःयामा ओउः ह्र्यात्खेकायः “लौ ओउःहाङः चीङ्अ उया ङाकोः दोम्हाङः च्युङःअ” त तोतेःचनै। 4 ओउःत हायःओ त खेःयामा नीङ् ङ्हाम्ओलम्कायः थेथे योती पेमालो ल्हुङ्इ छीह्तेःनानी। 5 लौ ङाइ राप्ओ पुःचोङ् हौचोङ्य ओउः ल्हाव्ह्दैबाङ्कोः मीओ नाःतो नाःमालोलम्कायः परमेस्वर्इ आन ङ्हाम्साकायः छ्युङ्ह्माआथास। लयःकायः राप्ओ मान्तालम्कायः तोती गम्ओ राजीमा ह्र्यात्लम्कायः बयःमाआथास। 6 ओउः खाल्कोः मान्तालम्कायः परमेस्वर्खेइ पेतोलेः हायःउतो नीङ्खेइ ओउःमयःकायः मीतो योती झ्यान्ते पेमालोतेः हायःतेःनानी बा। फेरी साहुलम्इ नीङ्कोः पैसा जेःबत्तेःनै माःर। नीङ्कायः मुत्ध जाङ्ह्ती न्यादेस्कःताङ् लात्ती आलःतेःनै। 7 नीङ्कायः बयःओ ख्रीस्कोः पेओ ताङ्ह्ओ मय्ङ्कायः ओउःमयःइ हेला क्लाःनानी। 8 परमेस्वर्कोः राजीकोः नीयम् आखरःहाङः इलेः लेखती मुनाः “नाङ्कोः लयःकोः वेङ्ह्ग चेङ्ह्गकोः मान्तालम्कायः लयःकायः धेःती राप्ती स्यास्सा खेःतो” त दाय्ह्ओ मुलेःनाः। ओउः नीयम् नीङ्इ जाङ्ह्तेःनानी त खेःया ओउःखे पेलेःनाः। 9 खेःल नाःतो नाःमालो मान्ता साहुसै थेलेः हायःतेःनानी त खेःया नीङ्इ रेव्तो जाङ्ह्ती ऐन्कोः हुकुम्कः चाप्ती वाय्ओलम् स्याव्तेःनै ओउःत झ्यान्ते न्युम्ह्तोतेः स्याव्तेःनै। 10 सुसुइ ऐन्कोः यातैज्योः हुकुम् ह जाङ्ह्उलु ओउःइ सबै ऐन्कोः हुकुम्लम्कः चाप्ती क्लेत्ती वाय्लेःनौ 11 दोह् हायःती दाय्ह्सा “अरुकोः बुधीकुस् एनःतेःचनै” त दाय्ह्ती तोओ परमेस्वर्इ “लौ मान्ताकायः सात्तेःचानी” तमा दाय्ह्तीलेः तोआकान्। ओउःत खेःओ नीङ्इ अरुकोः बुधीकुस् एनःमाःत अरुकायः सात्तेःचानी त खेःया नीङ्इ परमेस्वर्कोः ऐन्पाय् जुदालेः क्लेत्ती चाप्ती वाय्तेःनानी। 12 तय्छनःती योतोक्हाङः परमेस्वर्इ नीङ्कायः योनःती योतेःनै ओउःत झ्यान्ते अरु मान्तालम्कायः योनःतीलेः नोःसामा जाङ्ह्सामा खेःतेःइतो। 13 अरुकायः योनःती योसा ग्यामालो मान्ताखेकायः परमेस्वर्इमा ओउः मान्ताकायः योनःमाःत न्युम्ह्ताक्नाःथै। अरुकायः योनःती योओ मान्ताखेपाय् परमेस्वर्कोः न्युम्ह्ताक्ओकः रैसा परल। 14 लौ पुःचोङ् हौचोङ्य यातैचाक्इ “लौ ङाइ परमेस्वर्कायः ङ्हाम्नाङः” त दाय्ह्ती नोःचनौ ओउःइ परमेस्वर्कोः काम्पाय् दोह्मा जाङ्ह्उलु त खेःया ओउःकोः ङ्हाम्ओपाय् आह्रे लेःआः ओउः मान्ताइपाय् न्युम्ह्ओसै दल्सा खाय्उलु। 15 यात्चाक् ङ्हाम्ओ पुःचोङ् नाःचोङ् नाय् नाःमाःत जेःगा नाःमाःत मुओ नीङ्इ च्यवःती 16 “लौ पेतो आम्ह् जेःलाङ् म्हेः गारःलाङ् आल्अ दा” त दाय्ह्ती दोह्मा बयःमामाःत छ्योक्ती ल्होक्तेःचानी त खेःया ओउःत हायःओ काम्इ लोतेःइली आह्रे लेःआः। 17 ओउःलो लेखालेः मान्ताइ ओउःकोः पेओ काम्लम् जाङ्ह्मामाःत परमेस्वर्कायः ङ्हाम्ओ ह त खेःयामा ओउःत हायःओमा लोल आह्रे लेःआः। 18 “लौ ङाखे ङ्हाम्ओ मान्ता लेःआः ङ नाङ्खे पेओ काम् जाङ्ह्ओ मान्ता लेःतेःआः” त दाय्ह्ती यात्चाक्इ दाय्ह्नाः यादो। नाङ्खेइ पेओ काम् आःताः जाङ्ह्माःत गत हायःती नाङ्इ परमेस्वर्कायः ङ्हाम्ओ छ्यानःसा खाय्तेःचौ र। ङाखेइ पेओ काम् जाङ्ह्धार्ना “परमेस्वर्कायः ङ्हाम्आलाङः” त छ्यानःसा खाय्नाङः। 19 “यातैज्याङ् परमेस्वर् लेःआः” त दाय्ह्ओ नाङ्इ ङ्हाम्तेःनौया ओउःपाय् पेसापाय् पेलेःनाः बुरु लान्लम्इमा ओउःतलेः ङ्हाम्ती “लोनेः ङी न्युम्ह्तो स्याव्नाङी” त चीःती ओउः लान्लम् रैतीलेः रीङ्ह्नै। 20 नाङ्इ चीःतेःउलु बा काम्लम् आःताः जाङ्ह्माःत ङ्हाम्सापाय् आह्रे लेःआः ओउःत नाङ्कायः छ्यानःसा खेःतो यादो। 21 ङीकोः तोकानः आब्राहाम्इ लयःकोः यातैज्याङ् इसाक् त तोओ चोःलेः परमेस्वर्कायः ल्हाआकान् ओउःत हायःती झ्यान्ते ओउःपाय् परमेस्वर्कोः मीक्हाङः पेतोलेः स्याव्आ माःर। 22 ओउःकोः ङ्हाम्ओमा ओउःकोः काम्मा ब्रक्त ग्राम्ह्तो खेःतो। काम् आःताः जाङ्ह्माःत ओउःकोः ङ्हाम्ओपाय् पेतो पुत्तोलेः स्याव्सा खाय्ल। 23 ओहाङःसैको ओउःत हायःती “आब्राहाम्इ परमेस्वर्कायः ङ्हाम्ती ओउःकोः मीक्हाङः पेतोलेः स्याव्आ” त आखरःहाङः लेखओ कुरापाय् ताप्ताक्आकान्। फेरी ओउःत स्याव्आक्तीको आब्राहाम्कायः “परमेस्वर्कोः साथी लेःआः” त तोओ खेःतो। 24 मान्ताकोः ङ्हाम्ओकायः ह खेःल ओउःइ जाङ्ह्ओ कुराकायः परमेस्वर्कोः मीक्हाङः ओउःपाय् पेतो स्याव्नाः। 25 ओउः बेस्या राहाब् त तोओइमा यहुदीलम्सै वाङ्ओ देस् कनःती योओ मान्तालम्कायः ग्याती लव्ह्माआकान् ओउःमयःकायः दल्ताक्साकायः पेओ ल्याम्हाङः ल्होक्माआकान्। ओउःत पेओ काम् जाङ्ह्माधार्नालेः ओउः मोमःचोःमा परमेस्वर्कोः मीक्हाङः पेतो स्याव्आ। 26 जीङः ज्याल्आक्तीको मान्ताकोः आङ्पाय् सीती वाय्ओ म्हाङ्लेः स्याव्नाः ओउःतलेः पेओ काम् आःताः जाङ्ह्माःत मान्ताकोः ङ्हाम्ओमा वाय्तोलेः स्याव्नाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.