याकुब् 1 - चेपाङ1 लौ नीङ् चार् दोवागन रुनःधओ परमेस्वर्कोः बार खलक्कोः ङ्हाम्ओलम्य इ चेती परमेस्वर्कोःमा प्रभु येसु ख्रीस्कोः नोकरीमा ङा याकुब्इ लेखती सबैकायःलेः नमस्ते ल्होक्नेःनाङ्स। 2 लौ पुःचोङ् हौचोङ्य नीङ्इ दोह् दोह् खाल्कोः लीह्सीःओ च्यवःतेःनानी त खेःया ओउः बेलाहाङः “चोङाय्तोलेः मुपाङी” त दाय्ह्ती ताःइसी 3 दोह् हायःती दाय्ह्सा लीह्सीःओ बेलाहाङः नीङ् पेतोलेः गोरःतेःनानी त खेःया नीङ्इ ल्हुङ् क्रोङ्तीलेः ङ्हाम्ती मुसा खाय्तेःनानी एत नीङ्इ चीःसा खेःतो। 4 ओहाङःसैको पेतो ङ्हाम्ओ फेमाःत वाह्तेःनै त खेःया नीङ् जुगाङ् ल्हुङ् नीङ्तोमा चोक्तो स्याव्लेःतेःजेःनै दोह्मा राह्तेःल। 5 नीङ्कःहाङः यात्चाक् ल्हुङ् व्हाय्मालो मुनाः त खेःया ओउःपाय् परमेस्वर्कः तेती तोसा खेःतो। परमेस्वर्इ आय्ह्ओ खह्र्मालो ल्हुङ्इ सबैकायः बयःनौ ओउःत झ्यान्ते ओउः तेती तोओ कुरामा ओउःइ बयःलेःनौ। 6 परमेस्वर्इ बयःसापाय् बयःलेःनौ ओउःकः तेओ मान्ताइ पेतो ङ्हाम्सा खेःतो। पेतो ङ्हाम्सा खेःमालो मान्ता मारुःइ लङ्हाय्ताक्ओ तीःकोः भव्री लेखालेः मुनाः इताङः उताङः आल्ती ग्रमःत मुसा खाय्उलु। 7 एत खेःओ मान्तापाय् “लौ ङा परमेस्वर्कःसै दोह् खेःयामा दोःनाङः” त आह्रेलेः म्हर्नाः 8 ओउःपाय् ल्हुङ् ब्रेस्तोलेः मुनाः। गल खेःयामा जुगाङ् ग्रमःत मुसा खाय्उलु। 9 ह्र्यात् मान्ताखे “लौ परमेस्वर्कोः मीक्हाङः ङा एत ताङ्ह्ओ लेःआः ङ ओउःत खेःओ भालालेः स्याव्आलाङः” त दाय्ह्ती म्रोतोलेः दाय्ह्सा खेःतो। 10 साहु मान्ताखे “लौ परमेस्वर्कोः मीक्हाङः ङा इच्युक् मीओ लेःआः ङ ओउःत स्याव्ओ ङाकायः पेलेःनाः” त दाय्ह्ती म्रोतीलेः दाय्ह्सा खेःतो दोह् हायःती दाय्ह्सा ओउःपाय् रोलो लेखालेः रेन्ह्तोलेः झ्योम्ती वाय्नाः। 11 न्याम् रवःतोक्हाङः रोकोः बीरुवामा झ्योम्नाः रोमा झ्योम्ती ग्लेःनाः ओहाङःसैको ओउः पेओ रोपाय् जुदालेः वाय्तोलेः स्याव्नाः। एतलेः साहु मान्तापाय् पैसा क्युओ बेलाहाङःलेः झ्योम्ती ग्लेःओ रोलो लेखालेः सीती वाय्तोलेः स्याव्नाः। 12 लीह्सीःओ च्यवःओ बेलाहाङः सुसु ग्रमःत मुनै ओउःपाय् चोङाय्तोलेः स्याव्नै दोह् हायःती दाय्ह्सा ओउःकोः हायःझ्याङ्कायः ओउःपाय् पेओ रौ जीङः दोःलेःनाः। ओउः जीङःपाय् “लौ ङाकायः राप्ओलम्कायः बयःनाङःसु” त दाय्ह्ती परमेस्वर्इ तोती गम्आकान्। 13 फेरी थ्योन्ह्तोक् बेलाहाङःपाय् “परमेस्वर्इलेः थ्योन्ह्आताङः” त दाय्ह्ती सुइमा तोलाम्। परमेस्वर्कायः सुइमा रेव्तो जाङ्ह्साकायः थ्योन्ह्ती तोसा खाय्नीली ओउःइमा मान्तालम्कायः थ्योन्ह्उलु। 14 लयःकोः ल्हुङ्कोः पेमालो मोह्हाय्ओ झाक्ती झ्यान्ते ह मान्ता थ्योन्ह्तोलेः मुनाः। 15 इत झाक्ओ थाङ्ती झ्यान्ते लोने पेमालो काम्लम् वाङ्नाः। पेमालो काम्लम् ब्याव्तो स्याव्ती झ्यान्ते सीतो स्याव्ओलेः वाङ्नाः। 16 लौ ङाकोः राप्ओ पुःचोङ् हौचोङ्य इ कुरा ब्रःमाःत चीःसा खेःतो। 17 सबै पेओ कुरा त्यावःअसै वाङ्नाः ओउः फेल्बाङ्कोः थोङ्ओलम् जाङ्ह्ओ परमेस्वर्इलेः इ सबै बयःनौ। ओउःपाय् गलकायःमा ल्हुङ् क्लोय्क्नाःस र जुगु। 18 ओउःइपाय् लयः झाक्ती लयःकोः दोङ् नोःराय्इ रौ जीङः बयःआतय्ही ओहाङःसैको सबै ओउःइ जाङ्ह्ओ थोक्लम्सै ङ्हालेः ङीपाय् ओउःकोःलेः स्याव्नाःतय्ही। 19 लौ ङाकोः राप्ओ पुःचोङ् हौचोङ्य इ कुरा म्हेःतेःचानी। सायःतोक्खेहाङः होङ्तीलेः सायःउ नोःतोक्खेहाङः जोतोलेः नोःउ दा। ल्हुङ् मल्ह्ओ बेलाहाङः ल्हुङ् जोक्तोलेः मल्ह्तेःचनै 20 दोह् हायःती दाय्ह्सा ल्हुङ् मल्ह्ओहाङः मान्ताइ परमेस्वर् झाक्ओ काम् पेतो जाङ्ह्सा खाय्उलु। 21 ओउःत झ्यान्ते सबै रेव्ओमा अह्र्सीःओ काम् जवओ फेती नीङ्कोः ल्हुङ्हाङः सेती गम्ओ पेओ नोःराय् ग्यातीलेः सायःनु ओहाङःसैको ओउः नोःराय्इ नीङ् दल्तेःनै। 22 ओउः नोःराय्कोः कुरा सायःसा ह खेःल ल्हुङ्हाङः रोत्ती जाङ्ह्सामा खेःतो। सायःसा ह त खेःया आह्रे लेःआः। 23 सुसुखेइ ओउः नोःराय् सायःआक्तीको दोह्मा जाङ्ह्नीली ओउःपाय् ऐनाहाङः लयःकोः खेन् योओजम्कोः ह योओ मान्तालो लेखालेः मुनै। 24 ऐनाहाङः योतोक्हाङः “लौ ङापाय् इतलेः मुनाङः रैस” त चीःसतो योओ फेआक्तीको ओउःइपाय् “गतलो खेःङोतो” त म्हर्साकायः रेन्ह्तोलेः म्हेःनाःस। 25 सुसुखेइ परमेस्वर्कोः नीङ्ओ रेव्ओसै दल्ताक्सा नीयम्कोः कुरा म्हेःमामाःत जाङ्ह्धै मुलेःनाः ओउःखेलेः चोङाय्तो स्याव्नाः। 26 फेरी सुसुइ “लौ ङापाय् धर्मा जाङ्ह्ओ मान्ता लेःआः ङ” त दाय्ह्ती ताःनाःइसी बुरु लयःकोः लेइ पेमालो कुरा नोःनौ त खेःया ओउः मान्ताइ जुगाङ् चीःनीली ओउःइ जाङ्ह्ओ धर्मा आह्रे खाल् स्याव्नाः। 27 ङीकोः परमेस्वर् आपाकोः मीक्हाङः दोह् दोह्लो पेओ नीङ्ओ धर्मा लेःआः त दाय्ह्सा। लौ ह्र्यात्लम्कायःमा बुधा नाःमालो मोमःचोःलम्कायःमा लव्ह्ती बयःसामा ल्हाव्ह्दैबाङ्कोः पेमालो कुरा जाङ्ह्माःत वाह्सामा इ नीस् जाङ्ह्ओपाय् पेओ नीङ्ओ धर्मा लेःआः बा। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.