हेब्रैनी 9 - चेपाङ1 ओउः ङ्हा जाङ्ह्ओ होम्काय्ओ कुराहाङः परमेस्वर्कायः मानसा कुरामा मुओ ल्हाव्ह्दैबाङ्हाङः जाङ्ह्सा मन्दीर्कोः कुरामा मुओ खेःतो। 2 यात्ज्योः लात्सा खाय्ओ पाल् कीम्कोः मन्दीर् जाङ्ह्आकानी। ओउः मन्दीर्हाङः नीस् कोथा फाःओ खेःतो ओउः ङ्हाकोः कोथाहाङः मयन् बत्तीमा तैबल्मा परमेस्वर्कायः ल्हासा लाङ्मा गम्ओ खेःतो। ओउः कोथापाय् “नीङ्ओ थाव्” त तोती पेङ्कलःती गम्ओ खेःतो। 3 ओहाङःसैको भीत्रहाङः यात्ज्योः अरु हेङ्केती गम्ओ फाःओ नाय् खेःतो ओउः नाय्कोः उःसै अरु कोथा खेःतो। ओउःपाय् “जुगाङ् नीङ्ओ थाव्” त तोओलेः खेःतो। 4 ओहाङः यात्ज्योः धुप् उलःसा सुन्कोः खाती तैबल् गम्ओ खेःतो। यात्ज्योः होम्काय्ती गम्ओ कुरा गीलताक्सा बकीस्मा खेःतो माल्गसै सुन्इ ल्यानःती भीत्रहाङःपाय् सुन्कोः तेव्केराहाङः “मन्न” त तोओमा गम्ओ खेःतो। हारन् त तोओकोः मात् तुरःओ दङ्गमा ऐन् लेखओ नीस्ज्योः पाथालः बाङ्मा गम्ओ खेःतो। 5 ओउः बकीस्कोः थाराय्हाङः नीस्ज्योः परमेस्वर्कोः ग्वम् छ्यानःसा “केरुब्” त तोओकोः रुप् खेःचतो ओउःमयःकोः पाप्नीस्इ ओउः रेव्ओ काम् क्युम्ह्ती वाय्सा थाव्कायः खुप्ती मुओ खेःतो। ओउःतलेः खेःतो ओउः मन्दीर्पाय् “गतलो ताङ्ह्नाः” त दाय्ह्ती द्याह् सबै छ्यानःसा परल। 6 ओउः मन्दीर्पाय् ओउःतलेः जाङ्ह्ओ खेःतो ओहाङःसैको जाङ्ह्आक्तीको ओउः ङ्हाकोः कोथाखेहाङः पुरोहीत्लम् दीन् दीन्हाङः ज्युङ्ह्ती पोक्ती काम् जाङ्ह्धै मुइतो 7 ओउः दोङ् भीत्रकोः कोथाखेहाङः प्रधान् पुरोहीत् ह साल् साल्कोः यातै पेन्ह्कायः पोक्ओ खेःतो। ओउः बेलाहाङः ओउःइ वयः लात्ती लयःकायःमा सबै मान्ताकायःमा ब्रःती चीःमाःत जाङ्ह्ओ रेव्ओ काम्लम् क्युम्ह्ताक्साकायः परमेस्वर्कायः ल्हानौ। 8 इतलेः ओउः ङ्हाकोः नीङ्ओ थाव्हाङः मुधाङ्तोक्हाङः ओउः अरु जुगाङ् नीङ्ओ थाव्ताङ् अरु सुइमा पोक्सा दोःइली त परमेस्वर्कोः ग्वालामःइ छ्यानःनाःतय्ही। 9 ओउः मन्दीर्कोः कुरापाय् ङी तेन्छ्याङ्कोः मान्तालम्कायः ङ्हा जवओ काम्लम् “गतलो” त इतलेः स्यान्नाःतय्ही। ओउः परमेस्वर्कायः ल्हाती बयःओ थोक्लम्इपाय् बयःओ मान्ताकायः ल्हुङ्तुक् छय्ङ्ताक्सा खाय्उलु त द्याह् चीःसा खाय्नाःतय्ही। 10 ओउः कुराखेपाय् जेःगा तुङ्गा आङ् जेस्सा आङ् पेतो हायःसाकोः कुरा ह ओउः नया लोनेः वाङ्सा जुगाङ् पेओ कुरा बयःधाङ्माःच्युक्कायः जवसाजम्कायः ह मुलेःनाः। 11 ओउः बेला द्याह् दाह्ओ लेःआः ख्रीस्पाय् तेन्छ्याङ्कोः पेओ कुरा स्याव्ताक्सा थेङा प्रधान् पुरोहीत् वाङ्ओ लेःआः। फेरी ओउः कुरा स्याव्ताक्साकायः ओउःपाय् अरुसै न्हाङ्तोलेः ताङ्ह्ओमा छय्ङ्ओमा मन्दीर्हाङः पुरोहीत् काम् जाङ्ह्लेःनौ। ओउः मन्दीर्पाय् मान्ताइ जाङ्ह्ओ खेःल इ जापीनःती न्यास्ओ ल्हाव्ह्दैबाङ्कोःमा खेःल लाङ्काकोः लेःआः। 12 ओहाङःसैको ख्रीस्पाय् ओउः पेओ मन्दीर्हाङः पोक्तोक् बेलाहाङः ओउः जुगाङ् नीङ्ओ थाव्हाङः यातै पेन्ह् ह पोक्आ। ओउः बेलाहाङः स्याः मेत्छ्याःकोः वयःखेइपाय् खेःल लयःकोः वयःखे ल्हाती झ्यान्ते ङीकायः गलकायःमा दल्ताक्आतय्ही। 13 दोह् हायःती दाय्ह्सा स्याः मेत्छ्याःकोः वयःइमा म्हेःहाङः फुःओ कोह्र्ली स्याःकोः म्हेःय्होमःइमा ओउःपाय् मन्दीर्हाङः वार्धार्नालेः स्रापनः दीह्ओ मान्ताकायः आङ्खे छय्ङ्ताक्सा खाय्नौ त खेःया 14 गुच्युक् न्हाङ्तोलेः ख्रीस्कोः वयःइपाय् ङीकोः ल्हुङ्तुक्खे छय्ङ्ताक्सा खाय्नौ बा। ओउः जुगाङ् नीङ्तो ख्रीस्इपाय् परमेस्वर्कोः गलकायः मुओ ग्वालामःकोः ग्वम् दोःती लयःकोः आङ्लेः परमेस्वर्कायः ल्हाआकास। ओहाङःसै ख्रीस्कोः वयःइ ङीकायः आह्रे जवओ काम्लम् फेताक्नाःतय्ही ओउःत हायःती ङीइ ओउः जीङः नाःओ परमेस्वर्कायः काम् जाङ्ह्सा खाय्नाःतय्ह्नी। 15 ओउःत हायःआक्तीकोमा ख्रीस्इपाय् नया होम्काय्ती गम्ओ कुरा जाङ्ह्सा खाय्नौ। ओहाङःसैको सुसुकायः परमेस्वर्इ गोत्आथास ओउः मान्तापाय् ओउःइ बयःओ गलमा द्योक्मालो पेओ कुरा दोःनै दोह् हायःती दाय्ह्सा ख्रीस् सीलेःआ ओउःकोः सीधार्नालेः ओउः ङ्हाकोः होम्काय्ओ कुरा गम्तोक्हाङः जाङ्ह्ओ रेव्ओ काम्सै मान्तालम् पेङ्कलःतोलेः स्याव्नै। 16-17 मान्ता सीमाःच्युक् ओउःकोः माल्ताल्लम् राङ्लम् अरुइ त्याक्सा स्याव्ल सीआक्तीको ह त्याक्सा स्याव्लेःनाः। 18 ओउःतलेः ओउः ङ्हाकोः होम्काय्ओ कुरा जाङ्ह्साकायः सीओकोः वयः आःताः ल्हामाःत ओउः कुरापाय् लोल त्याक्सा दोःल। 19 मोसाइ सबै ऐन्कोः हुकुम्लम् सबै मान्तालम्कायः दाय्ह्ती तोआक्तीको ओउःइ दुओ उन्मा तीतेपतीमा त्याक्ती ओउः मान्तालम्कायःमा ओउः ऐन्कोः कीताप्गनमा तीःइमा स्याः मेत्छ्याःकोः वयःइमा वार्ती बयःआथास। 20 ओउःत हायःओ कुस्ब्रक्त “लौ परमेस्वर्इ ‘इत हायःसा खेःतेःनै’ त तोती नीङ्कुस् होम्काय्ती गम्ओ कुरा छ्यानःसाकायः इ वयःलेः वार्ती बयःनाङः” त दाय्ह्ती मोसा दाय्ह्ओ। 21 ओउःतलेःमा ओउःइ मन्दीर्कायःमा मन्दीर्कोः माल्ताल्लम्कायःमा सबै वयःइलेः वार्ती बयःआकान्। 22 दोङ्सीलेः ऐन्कोः कुराहाङः “सबै कुराकायः वयःइ छय्ङ्ताक्सा खेःतो। वयः होताक्माःदीक् रेव्ओ काम्लम् क्युम्ह्ती वाय्सा दोःल” त दाय्ह्ती ऐन्कोः कुराहाङः मुनाः। 23 इ ल्हाव्ह्दैबाङ्कोः थोक्लम् इतलेः छय्ङ्ताक्सा खेःतो। इ थोक्लम्पाय् लाङ्काहाङः मुओ दोङ् थोक्लम्कायः तेःती जाङ्ह्ओ लेःआः इ। ओहाङःसै ओउः लाङ्काकोः थोक्लम् छय्ङ्ताक्साकायः न्हाङ्तोलेः पेओ ल्हाती बयःसा काम् जाङ्ह्सा खेःतो। 24 ख्रीस्पाय् ओउः लाङ्कासै तेःती मान्ताइ जाङ्ह्ओ नीङ्ओ थाव्खेहाङः पोक्ल ओउःपाय् दोङ् लाङ्काहाङः आल्आ। ओहाङः ख्रीस्पाय् ङीकोः होन्त द्याह् परमेस्वर्कोः मीक्हाङः मुलेःनाः। 25 हेब्रैनीलम्कोः प्रधान् पुरोहीत्खे ओउः जुगाङ् नीङ्ओ थाव्हाङः साल् साल्कोः यातै पेन्ह्कायः स्याःकोः वयः ल्हालाङ् पोक्नाः। ख्रीस्खे ज्युङ्ह्ती ज्युङ्ह्तीलेः लयःकायः ल्हालाङ् पोक्ल। 26 ज्युङ्ह्तोलेः वाङ्याकायः त खेःयाकायः ल्हाव्ह्दैबाङ् जाङ्ह्तोक्हाङःसैकोः ख्रीस्पाय् ज्युङ्ह्तोलेः लीह्सीःओ गोरःचाः खेःतो ओउःत हायःओ खेःल। द्याह् इ ल्हाव्ह्दैबाङ् द्युम्खेःओ दीन्लम्हाङः ख्रीस्पाय् सबैकोः रेव्ओ काम्लम् क्युम्ह्ती वाय्साकायः यातै पेन्ह्कायः लयःकोः आङ् ल्हालाङ् वाङ्आ। 27 फेरी सबै मान्तालम् यातै पेन्ह्कायः सीसा खेःनाः सीआक्तीको ओउःमयःकायः परमेस्वर्इ तय्छनःती योनाःथास। 28 ओउःतलेः ख्रीस्मा नाःतोलम्कोः रेव्ओ काम् क्युम्ह्ती वाय्साकायः यातै पेन्ह्हाङः लयःकोः आङ्लेः ल्हाती सीआ। ओहाङःसैको यातै पेन्ह्कायः लयः ल्हाती सीआक्तीको ख्रीस्पाय् फेरीलेः वाङ्नाः। रेव्ओ काम् वाय्साकायः खेःल ओउःकायः ल्युङ्ह्ती मुओलम्कायः दल्ताक्सा थेङा वाङ्लेःनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.