हेब्रैनी 8 - चेपाङ1 ङीइ तोओ कुराकोः तुङः इलेःआः। ओउःलो खेःओ प्रधान् पुरोहीत्पाय् ङीकायः ओउः सबैसै ताङ्ह्ओ परमेस्वर्कोः गुल्ह्दाङ्लो लेखा ओउःकोः राजा च्युङःसा थाव्हाङः लाङ्काहाङः मुलेःनाः। 2 फेरी ख्रीस्खेइपाय् अरु मान्ताखे पोक्सा दोःमालो मन्दीर्कोः दोङ् दुङ्हाङः पुरोहीत्कोः काम् जाङ्ह्लेःनौ। ओउः दोङ् मन्दीर्पाय् मान्ताइ जाङ्ह्ओ खेःल प्रभुइ जाङ्ह्ओ लेःआः बा। 3 सबै प्रधान् पुरोहीत्लम्पाय् रेव्ओ काम् क्युम्ह्ताक्सा थेङा वाःमा मेत्छ्याःमा अरु थोक्मा परमेस्वर्कायः ल्हानानी ओउःत हायःसाकायः ओउःमयः छीङ्ह्ती गम्ओलेः मुनै। ङीकोः प्रधान् पुरोहीत्मा परमेस्वर्कायः दोह्लाङः ल्हासा खेःतो। 4 ओउःपाय् लाङ्काहाङः मुलेःनाः ल्हाव्ह्दैबाङ्हाङः मुओ त खेःया ओउःकोः पुरोहीत् काम्पाय् परमालो खेःतो दोह् हायःती दाय्ह्सा ऐन्इ तोओ थोक्लम् ल्हासाकायः ओउः अरु मान्ताकोः पुरोहीत्लम् मुधाङ्लेःनै। 5 ओउः पुरोहीत्लम्इ ल्हाव्ह्दैबाङ्हाङः मुओ मन्दीर् कीम्कोः दुङ्हाङः ल्हासा काम् जाङ्ह्नानी। ओउःमयःकोः काम्मा लाङ्काकोः काम् तेःनाः ओउःमयःकोः मन्दीर्मा लाङ्काकोः मन्दीर्कोः क्वालाङःलो लेखालेः मुओ लेःआः। मोसाइ ओउः लात्सा खाय्ओ मन्दीर् जाङ्ह्तोक् बेलाहाङः परमेस्वर्इ इतलेः गानाक्ती तोआथै “लौ इ मन्दीर्पाय् नाङ्कायः स्यालुङ्हाङः छ्यानःओ मन्दीर्कोः रुप्कुस् घार्ती जाङ्ह्उ दा” त दाय्ह्ती परमेस्वर्इ तोआथै। 6 येसुइ परमेस्वर्सै वानःओ ङीकायः बयःसा होम्काय्ओ कुरापाय् ओउः ङ्हाकोः होम्काय्ओ कुरासै आन पेओ लेःआः दोह् हायःती दाय्ह्सा ओउः ङ्हाकोः कुरासै न्हाङ्तोलेः पेतो दोःनाःतय्ही। ओउःलो लेखालेः येसुपाय् ओउः अरु पुरोहीत्लम्सै न्हाङ्तोलेः ताङ्ह्ओ काम् दोःओआः बा। 7 ओउः ङ्हाकोः होम्काय्ती गम्ओ कुरापाय् जुगाङ् पेओलेः खेःतो त खेःया ओउः नया होम्काय्ती गम्ओ कुरापाय् जाङ्ह्सा परमालो खेःतो। 8 ओउः ङ्हाकोः होम्काय्ती तोओ मान्तालम्कायः परमेस्वर्पाय् “नीङ्तो खेःइली” त दाय्ह्ती “लौ लोनेः वाङ्सा दीन्लम्हाङः इस्राएल्कोः मान्तालम्कुस् यहुदाकोः मान्तालम्कुस् ङाइ नया होम्काय्ओ कुरा जाङ्ह्लेःनाङः” त दाय्ह्ती प्रभुलेः दाय्ह्आ। 9 “ओउः नया कुरापाय् ङ्हाकोः आय्कानः तोकानःलम्कुस् होम्काय्ओ कुरासै थेथेलेः खेःनाः। ओउः बेलाहाङःपाय् ओउःमयःकायः ङाइ मीस्रा देस्सै क्रुत्इ ज्योतीलेः लात्ती ग्ल्युनःआलाङःसु। ओउःत हायःआलाङःसु ओउः ङाकुस् होम्काय्ओ कुरापाय् ओउःमयःइ सेती गम्नीली फेलेःआकानी। ओउःत झ्यान्ते ओउःमयःकायः पेङ्कलःआलाङःसु” तमा दाय्ह्ती प्रभु दाय्ह्आ। 10 “द्याह् ओउः वाङ्सा खेःओ दीन्लम्हाङः ओउः इस्राएल् त तोओलम्कुस् इ नया कुरा होम्काय्ती गम्नाङः ङाकोः हुकुम्लम्पाय् ओउःमयः ल्हुङ्तुक्हाङः सेती गम्ताक्लेःनाङःसु। ङापाय् ओउःमयःकोः परमेस्वर्लेः स्याव्नाङः ओउःमयःपाय् ङाकोः मान्तालेः स्याव्नै। 11 ओहाङःसैको ओउःमयःपाय् सुइमा अरु लयःकोः मान्तालम्कायः ‘लौ प्रभुकायः तय्ह्उ’ त स्यान्ती तोसा परकाय्इली दोह् हायःती दाय्ह्सा सबै मान्तालम्इ मीमीओलम्इमा ताङ्ह्ताङ्ह्ओलम्इमा सबैइलेः ङाकायः तय्ह्नाःताङः। 12 ओउःमयःकायः योनःती योती झ्यान्ते ओउःमयःइ जाङ्ह्ओ रेव्ओ काम्लम् ङाइ क्युम्ह्तीलेः वाय्नाङःसु। ओउःमयःकोः रेव्तो हायःओ ङाइ म्हेःलेःनाङः” त दाय्ह्ती प्रभुलेः दाय्ह्ओआः। 13 ओहाङःसैको ओउः नया होम्काय्ओ कुरा गम्आक्तीको ओउः ङ्हाकोः कुरा द्याह् आय्मा स्याव्ताक्आकान् आह्रे स्याव्ताक्आकान्। ओहाङःसैको ओउः आय् कुरापाय् म्हीत्तीलेः वाय्खेःनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.