हेब्रैनी 7 - चेपाङ1 ङ मेल्कीसेदेक् त तोओपाय् सालेम् सहर्कोः राजामा खेःतो सबैसै ताङ्ह्ओ ग्वम् नाःओ परमेस्वर्कोः पुरोहीत्मा खेःमाःतो। ओहाङःसैको अरु राजालम्कायः क्लीमःती सात्ती वाय्आक्तीको आब्राहाम् पाय्ह्ती वाङ्ओ खेःतो। पाय्ह्ती वाङ्तोक्हाङः मेल्कीसेदेक्इ ओउःकायः क्रुस्ती आसीक् बयःआथै। 2 ओहाङःसैको आब्राहाम्इ सबै राजासै ल्हाओ थोक्लम्कोः दस् फाक् जाङ्ह्आक्तीको यातै फाक् मेल्कीसेदेक्कायः बयःआकान्। मेल्कीसेदेक् त तोओकोः मय्ङ्कोः माने “नीङ्ओकोः राजालेः” ओहाङःसै ओउःपाय् सालेम्कोः राजालेः खेःतो। सालेम्कोः राजा त तोओकोः माने “गोय्खामःओकोः राजालेः” 3 परमेस्वर्कोः आखरःहाङः मेल्कीसेदेक्पाय् आमा आपामा होह्र्मा नाःमालो मान्ता खेःतो। आखरःहाङःमा ओउःकोः सीओ दीन्मा दोःओ दीन्मा दोह् कुरामा लेखल परमेस्वर्कोः चोःलो लेखालेः ओउःपाय् गलकायःमा पुरोहीत् मुलेःनाः। 4 मेल्कीसेदेक्पाय् गुच्युक् ताङ्ह्ओ खेःतो दाय्ह्सा। ङीकोः ताङ्ह्ओ तोकानः आब्राहाम्इ सबै ओउः राजासै ल्हाओ थोक्लम्कोः दस् भाक्कोः यात्ज्याङ् भाक् बयःआकान्। 5 ओहाङःसै ओउःकोः प्लोमः लेवी त तोओकोः प्लोमःदानेकोःपाय् सुलो पुरोहीत् स्याव्नै ओउःइलेः अरु हेब्रैनीलम्सै दस् भाक्कोः यात् भाक्खे त्याक्सा खेःतो। ओउःत मोसाइ बयःओ ऐन्हाङः लेखती मुनाः। ओउः हेब्रैनीलम्मा आब्राहाम्सै ग्ल्युङ्ह्ओ लेःआः ओउःमयः लेवीकोः प्लोमःदानेसै पुःचोङ् हौचोङ्लेः मुनै। ओउःतलेः मुइतो “ओउःमयःइ लेवीलम्कायः बयःसा खेःतो” त लेखती मुनाः। 6 ओउः पुरोहीत् मेल्कीसेदेक्पाय् लेवीसै ग्ल्युङ्ह्ओ खेःआक्ल बुरु परमेस्वर्इ तोती गम्ओ आब्राहाम्सै ओउःइ यात् भाक् त्याक्सा दोःओजेःआः। फेरी आब्राहाम्कायः आसीक् बयःमाआकान्। 7 ओहाङःसै दोङ्सीलेः आसीक् बयःओ मान्तापाय् आसीक् त्याक्ओ मान्तासै ताङ्ह्ओ लेःआः एतपाय् सुइमा त्याःती तोसा खाय्नीली। 8 फेरी ओउः अरुसै त्याक्सा पुरोहीत्लम्खे सीसा खेःओ मान्तालम् लेःआः इ। ओउः आब्राहाम्सै त्याक्ओ मेल्कीसेदेक्खे आखरःहाङः “सीओआः” त ओउः कुरापाय् दोह्मा लेखल ओउःपाय् सेलः मुलेःनाः। 9 माः रैस अरुसै त्याक्सा खेःओ लेवीइमा मेल्कीसेदेक्कायः बयःआकान् तमा तोसा स्याव्नाः। 10 दोह् हायःती दाय्ह्सा मेल्कीसेदेक्इ आब्राहाम्कायः क्रुस्तोक् बेलाहाङः लेवीपाय् ओत्धाङ्आक्ल ओउःकोः तोकानः आब्राहाम्कोः आङ्हाङः मुओ खेःधाङ्तो। ओउःतलेः आब्राहाम्इ क्रुत् बयःओ थोक्पाय् “लेवीमा बयःओआः” त दाय्ह्सा खाय्नाः। 11 हेब्रैनीलम्पाय् लेवीत तोओ पुरोहीत्लम् मुओ बेलाहाङः ऐन् दोःआकाय्। ओउः लेवीकोः खाल्कोः पुरोहीत्लम्इपाय् परमेस्वर्कोः काम् जुगाङ् केह्तोलेः जाङ्ह्सा खाय्ओ खेःतो त खेःया अरु थे मेल्कीसेदेक् खाल्कोः पुरोहीत् थाती वाङ्सा परआक्ल बा। ओउः थे खाल्कोः पुरोहीत्पाय् लेवीकोः प्लोमःदाने हारन्त तोओसै ग्ल्युङ्ह्ओ खेःआक्इली ओउःपाय् मेल्कीसेदेक्कोः खाल्लेः। 12 ओहाङःसै थे खाल्कोः पुरोहीत्लम् थाआक्तीको अरु नया खाल्कोः ऐन्मा खेःतो। 13-14 ओहाङःसैको आने इ कुरापाय् सुकायः तोओलेः दाय्ह्सा ङीकोः प्रभु येसुकायः तोओलेः खेःतो ओउःपाय् लेवीकोः होह्र्सै ग्ल्युङ्ह्ओपाय् खेःल यहुदाकोः होह्र्सै ग्ल्युङ्ह्ओआः। फेरी यहुदाकोः होह्र्कोः मान्तालम्इपाय् पुरोहीत्कोः काम् जाङ्ह्सा सुमा दोःल। पुरोहीत् छ्युङ्ह्ओ बेलाहाङः मोसाइ यहुदाकोः होह्र्पाय् दोह्तमा तोउलु। 15 इ कुरापाय् द्याह् न्हाङ्तोलेः पेतो चीःसा खाय्नाःतय्ह्नी दोह् हायःती दाय्ह्सा यात्चाक् मेल्कीसेदेक्लो लेखा थे खाल्कोः पुरोहीत् थाती वाङ्ओलेः मुनाः। 16 ओउःपाय् मान्ताइ जवओ ज्योओ होह्र्कोः हुकुम् जाङ्ह्धार्नालेः पुरोहीत् स्याव्ओ खेःल ओउः गलमा द्योक्मालो जीङःकोः ग्वम् दोःती झ्यान्ते ओउःपाय् पुरोहीत् स्याव्ओ। 17 ओउःकायःपाय् “मेल्कीसेदेक्कोः खाल्लो लेखालेः नाङ् गलकायःमा पुरोहीत् स्याव्लेःतेःनाः बा” त दाय्ह्ती दाय्ह्ओ आखरःहाङः लेखती मुनाः। 18 ओउः ङ्हा बयःओ ऐन्पाय् लोल दोह्मा हायःसा खाय्उलु ओउःत झ्यान्ते द्याह्पाय् ओउः ऐन् वाय्ओ लेःआः। 19 ओउः मोसाइ बयःओ ऐन्इपाय् दोह्कायःमा जुगाङ् पेतो नीङ्तो स्याव्ताक्सा खाय्उलु ओहाङःसैको द्याह् ओउः ऐन्सै पेओ ल्याम् दोःआतय्ही। दोःआक्तीको ओउः ल्याम्इपाय् परमेस्वर्कःताङ् द्याङ्तोलेः दाक्नाःतय्ही। 20 ओहाङःसैको ङ्हापाय् येसुकायः परमेस्वर्इ कीरीया जेःती तोती गम्ओ कुरा मुलेःनाः। अरु मान्तालम्खे पुरोहीत् स्याव्ताक्साकायः परमेस्वर्इ तोती गम्ओ कुरापाय् परआक्ल। 21 येसु ख्रीस्खेकायः परमेस्वर्इपाय् तोती गम्ओ कुराइ पुरोहीत् स्याव्ताक्आथै। परमेस्वर्कोः आखरःहाङः “लौ ‘नाङ्पाय् गलकायःमा पुरोहीत् स्याव्लेःतेःनाः’ त दाय्ह्ती ल्हुङ् द्यान्ह्सा खाय्मालो कुरालेः प्रभुइ तोती गम्आकान्” त दाय्ह्ती दाय्ह्ओ लेखती मुनाः। 22 ओउःत झ्यान्ते येसुइपाय् अरुसै पेओ ङ्र्याःती होम्काय्ओ कुराकायः “स्याव्ताक्नौ” त तोती गम्सा खाय्लेःनौ। 23 ओहाङःसैको इत झ्यान्तेमा ओउः अरु पुरोहीत्लम्पाय् येसुसै थेथे खेःलेःनै। ओउः पुरोहीत्लम्खे सीती सीती वाय्ती झ्यान्ते ओउःमयःकोः यात्चाक् झुङ्आले काम् जाङ्ह्धै मुसा खाय्उलु क्लोत्ती क्लोत्तीलेः जाङ्ह्ती नाःतोलेः खेःनै। 24 येसुखे गलकायःमा सेलः मुलेःनाः ओउःकोः पुरोहीत्कोः काम् अरुइ गलमा ल्होनःती जाङ्ह्सा परल। 25 द्याह्मा लोनेःमा गलकायःमा ओउःकायः ङ्हाम्ती परमेस्वर्कःताङ् वाङ्ह्ओलम्कायः ओउःइ पेतोलेः दल्ताक्सा खाय्नौ दोह् हायःती दाय्ह्सा ओउःमयःकायः परमेस्वर्कःताङ् तेती तोसाकायः येसुपाय् गलकायःमा मुलेःनाः। 26 ओउःत प्रधान् पुरोहीत्पाय् ङीकायः जुगाङ् स्याव्ओ लेःआः बा। ओउःपाय् जुगाङ् छय्ङ्ती केह्ओ रेव्मालो पुरोहीत् खेःतो। रेव्तो जाङ्ह्ओलम्कःसै पेङ्कलःतो स्याव्ती सबै त्यावःअ लाङ्काहाङः लनःओलेः मुलेःनाः। 27 अरु प्रधान् पुरोहीत्लम्खेइ दीन्का दीन् स्योत्तीलेः ङ्हापाय् लयःकोः रेव्ओ काम्लम् वाय्साकायः लोने अरुकोः रेव्ओ काम्लम् वाय्साकायः परमेस्वर्कायः थोक् ल्हासा खेःइतो येसुखेइ इत हायःसा परल दोह् हायःती दाय्ह्सा ओउःइ गलकायःमा यातै पेन्ह्कायः लयःकोः आङ् ल्हाआकास। 28 ओउः ऐन्कोः कुराखेहाङःपाय् जुगाङ् पेतो हायःसा खाय्मालो मान्तालम्कायः “ओउःमयः प्रधान् पुरोहीत् स्याव्पै” त दाय्ह्ती तोनाःथास। लोने परमेस्वर्इ कीरीया जेःती तोती गम्ओ कुराखेहाङः लयःकोः चोःकायः “प्रधान् पुरोहीत् स्याव्पाः” त दाय्ह्ती दाय्ह्नाः ओउः चोःपाय् गलकायःमा ओजायः जय्कुमःत मुलेःनाः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.