हेब्रैनी 6 - चेपाङ1 ओउःत झ्यान्ते ओउः तुङःकोः स्यान्ओ कुराखे द्याह् स्यान्साकायः फेती ख्रीस्कोः ताङ्ह्ओ कुराखे म्हुक्तीलेः चीःपाःतय्ह्नी। ङ्हापाय् सीताक्सा खाय्ओ काम्लम् जाङ्ह्ओकायः फेआक्तीको ङीइ परमेस्वर्कायः ङ्हाम्आतय्ह्नी। ओउः कुरा पुछ्युङःती स्यान्सा परल। 2 बाप्तीस्माकोः कुरालम्मा क्रुत् झाम्ह्ओ कुरामा सीओसै उह्ती च्योक्ओ कुरामा ओउः लोने तय्छनःती योसा कुरामा इ सबै ङ्हा स्यान्ओ कुरा लेःआः। 3 द्याह् परमेस्वर्इ ताक्नाःतय्ही त खेःया अरु ताङ्ह्ओ कुरा स्यान्इसी। 4 यात्चाक् ङ्हापाय् परमेस्वर्इ थोङ्ताक्ओहाङः वाह्ती परमेस्वर्इ बयःओ पेओ जीङःमा ग्वालामःमा दोःआक्तीकोमा 5 परमेस्वर्कोः पेओ नोःराय्मा लोने वाङ्सा दीन्लम्कोः ग्वम्लम्मा चीःआक्तीकोमा 6 ओउःइ सबै जुगाङ् फेनौ त खेःया ओउः मान्ता लोने गत हायःती परमेस्वर्कःताङ् द्यान्ह्सा खाय्चौ र। द्यान्ह्सा खाय्उलु दोह् हायःती दाय्ह्सा ओउःत हायःसाकायः ओउःइ फेरीलेः परमेस्वर्कोः चोःकायः क्ल्याय्ओ सीङःहाङः गम्ती ओउःकायः सबैकोः मीक्हाङः मीताक्नाःथै। 7 ङ्हाम्ओलम्पाय् राङ्कोः साःलो लेखा मुनै। न्याम्लाङ् तीःइ न्यात्ताक्ओ साःपाय् गाव्खेइ राङ् तव्ह्ओलम्कायः पेतो सायःओ खाल्लम् दुङ्ताक्नौ ओउः साःपाय् परमेस्वर्कोः आसीक् दोःओ लेःआः 8 गाव्खे साःइ बन्मा घ्र्यान्ह् ह दुङ्ताक्नौ ओउःपाय् मल्ह्ओ साः लेःआः ओउःकायः परमेस्वर्इ प्रनःनौ यादो लोने म्हेःइ झ्योम्ह्ती वाय्ताक्नौ। 9 ङीइ एतलेः गानाक्ती तोसापाय् तोनेःनाङ्सतो राप्ओ पुःचोङ् हौचोङ्य नीङ्खे पेतोलेः हायःतेःनानी दल्तो स्याव्तेःनै त म्हर्नाङी। 10 परमेस्वर्इ गलकायःमा पेतोलेः हायःनौ। नीङ्इ ओउःकायः राप्ती अरु ङ्हाम्ओलम्कायः लव्ह्ती बयःतेःआकानी। माः रैस बयःधैलेः मुतेःनै। ओउः राप्ती जाङ्ह्ओ काम्पाय् परमेस्वर्इ म्हेःउलु। 11 ओउःत हायःओ काम्पाय् “सबै द्युम्ती खाय्च्युक्हाङः म्ह्याङ्तीलेः जाङ्ह्तेःपानी” त झाक्नाङी ओहाङःसै नाङ्कोः झाह्ओ सबै दोःतेःनै। 12 बाय्तो स्याव्माःत ओउः जुगाङ् गुह्र्माःत ङ्हाम्ओलम्कः तेःनु। ओउःमयः परमेस्वर्इ तोती गम्ओ कुरा दोःलेःनै। 13 परमेस्वर्इ आब्राहाम्कायः तोती गम्ओ बेलाहाङः ओउःइ लयःकोः मय्ङ् पेह्ती कीरीया जेःआकान् दोह् हायःती दाय्ह्सा कीरीया जेःतोक्हाङः लयःसै ताङ्ह्ओचाक्कोः मय्ङ् पेह्सा खेःतो। खेःसापाय् खेःतो परमेस्वर्सै ताङ्ह्ओचाक्पाय् सुमा नाःइली लयःकोः मय्ङ् ह पेह्ती तोसा खेःतो। 14 फेरी तोती गम्तोक्हाङः “लौ दोङ्सी दाय्ह्भनाङ् नाङ्कायः ङाइ आन पेतो बयःनेःनाङ् बा। नाङ्कायःपाय् प्लोमःदाने मोमःदाने आन नाःतो दोःताक्नेःनाङ्” त दाय्ह्ती परमेस्वर्इ तोआथै। 15 आब्राहाम्इपाय् इ तोती गम्ओ कुरा ताप्साकायः पेतो गुह्र्माःत ल्युङ्ह्आकान् ओउःत झ्यान्ते परमेस्वर्सै आन दोःआ। 16 मान्ताइ कीरीया जेःतोक्हाङः लयःसै ताङ्ह्ओकोः मय्ङ् पेह्नौ ओहाङःसैको अरुइ ब्रेह्ती काय्काय्सा खाय्नीली। 17 एतलेः ओउःइ तोती गम्ओ कुरा दोःओलम्कायः “ङाइ तोती गम्ओपाय् गलमा फेङल ल्हुङ् गलमा क्लोय्क्ङल” त छ्यानःसाकायः परमेस्वर्इ कीरीया जेःआकान्। 18 एतलेः तोतीमा कीरीया जेःतीमा परमेस्वर्इ नीस्ज्योः जुगाङ् क्लोय्क्सा खाय्मालो कुरा गम्आकान्। इनीस् कुराकायःमा दोह् कुराकायःमा ओउःइ गलमा माःसा खाय्उलु। ओउःत झ्यान्ते “ङी परमेस्वर्कःताङ् दल्साकायः वाङ्ओलम् ओउःकोः तोती गम्ओ कुरा दोःनाःतय्ही” त दाय्ह्ती चीःती ल्हुङ् धोमाय्तो स्याव्नाःतय्ही। 19 एत दोङ् कुरा चीःधार्ना ङी ल्हुङ् ग्रमःत ङ्हाम्ओलेः मुनाःतय्ही। ङीइ ङ्हाम्ओ परमेस्वर्पाय् ङ्हापाय् मन्दीर्कोः दोङ् दुङ्हाङः क्रुस्सा दोःओ खेःतो ओउःत झ्यान्ते सबै मान्ताकोः होन्त प्रधान् पुरोहीत्लम्पाय् ओउः मन्दीर्कोः हेङ्केओ नाय् उःसै आल्ओ खेःतो। 20 द्याह् ङीकोः होन्त येसुलेः ङीकायः स्यालःती ओउःहाङः पोक्ती मुओआः। मेल्कीसेदेक् त तोओकोः खाल्कोः पुरोहीत्लो लेखालेः ओउःपाय् गलकायःमा मुओ प्रधान् पुरोहीत् स्याव्ओआः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.