हेब्रैनी 5 - चेपाङ1 सबै प्रधान् पुरोहीत्लम् मान्ताकःसै छ्युङ्ह्ओ लेःआः। ओउःमयःइपाय् अरु मान्ताकोः होन्त परमेस्वर्कःताङ् वाङ्ती मान्ताकोः रेव्ओ काम् क्युम्ह्ती वाय्साकायः परमेस्वर्कायः बयःसा थोक्लम् ल्हानानी। 2 प्रधान् पुरोहीत्पाय् अरु मान्तालो लेखालेः जुगाङ् नीङ्तो खेःबाय्ल ओउःत झ्यान्ते ओउःइ व्हक्मालो रेव्तो जाङ्ह्ओलम्कायः काङ्तोलेः नोःसा खाय्नौ। 3 ओहाङःसैको ओउःइ अरुकोः रेव्ओ काम् क्युम्ह्ती वाय्साकायः परमेस्वर्कायः थोक् ल्हानौ ओउःतलेः लयःकोः रेव्ओ काम्मा क्युम्ह्ती वाय्साकायः ओउः प्रधान् पुरोहीत्इ थोक् ल्हासा खेःसतो। 4 फेरी ताङ्ह्ओ प्रधान् पुरोहीत् स्याव्साकायः सुमा लयःकायः छ्युङ्ह्इसीली अरुसै ङ्हा छ्युङ्ह्ओ हारन्लो लेखा परमेस्वर्इलेः प्रधान् पुरोहीत्लम्कायः छ्युङ्ह्ती दोक्ती गोत्नाःथास। 5 एतलेः ख्रीस्मा प्रधान् पुरोहीत् स्याव्साकायः लयःकायः ताङ्ह्ताक्ती छ्युङ्ह्सल ओउःकायःपाय् परमेस्वर्इ “लौ नाङ्पाय् ङाकोः चोः लेःतेःआः तेन्पाय् नाङ्कोः आपा स्याव्लेःआलाङः” त दाय्ह्ती छ्युङ्ह्ती तोआथै। 6 फेरी ओउःकोः आखरःहाङःमा “लौ मेल्कीसेदेक्कोः खाल्कोः पुरोहीत्लो लेखालेः नाङ् गलकायःमा मुसा पुरोहीत् खेःतेःनाः” त दाय्ह्ती अरु अध्यय्हाङः लेखती मुनाः। 7 ल्हाव्ह्दैबाङ्हाङः मान्ता मुतोक्हाङः येसुइ आन र्याःतीमा गोःतीमा ओउःकायः सीओसै दल्ताक्सा खाय्ओ परमेस्वर्कायः तेती तोआकान्। येसुइपाय् मीओमा ग्याओ ल्हुङ्इमा तेआ त खेःओ ओउःकोः कुरा परमेस्वर्इ सायःआकान्। 8 ओउःपाय् परमेस्वर्कोः चोःलेः खेःतो परमेस्वर्कोः कुरा ग्यासाकायः लीह्सीःओ लयःलेः धेःती गोरःआकास। 9 ओहाङःसैको ओउःपाय् जुगाङ् नीङ्तोलेः स्याव्आक्तीको सबै ओउःकोः कुरा ग्याओलम्कायः येसुइ गलकायःमा दल्तो स्याव्सा दोःताक्आकान्। 10 ओउःकायःपाय् परमेस्वर्इलेः मेल्कीसेदेक्कोः खाल्कोः प्रधान् पुरोहीत् छीङ्ह्ती दोक्आथै। 11 इ कुरापाय् ङाइ नाःतो तोसा खेःतो नीङ्इपाय् पेतो सायःतेःनीली त झ्यान्ते नीङ्कायः स्यान्सा चाक्लेःनाः। 12 द्याह्पाय् नीङ्इ अरुकायः स्यान्ती खाय्सा खेःतेःइतो। खेःल नीङ्कायःलेः अरुइ परमेस्वर्कोः दोङ् तुङःकोः कुरालेः कोदीङःती स्यान्सा खेःधाङ्तेःनै मीओ चोःलो लेखालेः नीङ्इ दुत् तुनःसालेः खेःधाङ्तेःनै मायः जेःसा खाय्धाङ्तेःनीली। 13 दुत् तुनःओ मान्तापाय् व्हक्धाङ्मालो लेःआः बा। दोह् दोह्खे पेतोलेः दोह् दोह्खे रेव्तो हायःसालेः त चीःसा खाय्धाङ्नीली। 14 दुत्खेपाय् व्हक्मालो चोःकायः बयःसा स्याव्लेःनाः मायःखे ताङ्ह्ओ मान्ताकायः स्याव्लेःनाः। ताङ्ह्ओ मान्ताइ पेओ काम्लम् जुपायःतीलेः जाङ्ह्ती लयः धेःती दोह् काम्खे पेतोलेः दोह् काम्खे रेव्तोलेः त व्हाय्तोलेः चीःनानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.