हेब्रैनी 4 - चेपाङ1 ओउःमयःखे पोक्सा दोःइली परमेस्वर्कोः पेतो मुसा राजीहाङः ङीखेकायः “लौ पोक्सा दोःओ लेःआः” त ओउःइ तोती गम्आतय्ही। ओउःत झ्यान्ते नीङ्कःहाङः “यात्नीस्चाक् पोक्लाङ् दाह्साकायः दोःइली यादो” त दाय्ह्ती ल्हुङ् र्याङःती झ्यान्ते ङी घीःती मुसा खेःनाःतय्ही। 2 ङीकोः आय्कानः तोकानःलो लेखालेः ङीइमा परमेस्वर्कोः पेओ समचार् सायःआतय्ह्नी। ओउःमयःखेइ सायःआक्तीको दोह्मा खेःइली आह्रेलेः सायःनीतो दोह् हायःती दाय्ह्सा ओउःमयःइ ओउः कुरापाय् ङ्हाम्नीली। 3 ङीइ ङ्हाम्ओलम्खेइ ओउः राजीहाङः पोक्सा दोःलेःनाःतय्ही। एतलेः परमेस्वर्कोः कुरा आखरःहाङः लेखती मुनाः “लौ ‘ओउःमयःपाय् ङाकुस् ङाकोः य्हाङःती मुसा राजीहाङः पोक्सा गलमा दोःइली’ त ल्हुङ् मल्ह्तो स्याव्ती तोती गम्आलाङः” त दाय्ह्ती परमेस्वर् कीरीया जेःती दाय्ह्ओआः। ओउःतलेः परमेस्वर्इ ङ्हाम्मालोलम्खेकायः तोतीलेः गम्तो ल्हाव्ह्दैबाङ् जापीनःती न्यास्ओहाङःसै ओउःकोः काम् द्योक्लेःआ बा। 4 सात्गोता स्याव्ओ दीन्कायः “ओउःकोः काम्पाय् जुगाङ् द्योक्आक्तीको ओउः सात्गोता स्याव्ओ दीन्हाङःपाय् परमेस्वर्इ काम् जाङ्ह्ओ न्यास्आकान्” त दाय्ह्ती दाय्ह्ओ परमेस्वर्कोः आखरःहाङः लेखती मुनाः। 5 फेरी “ओउःमयः ङाकुस् ङाकोः पेतो य्हाङःती मुसा राजीहाङः गलमा पोक्सा दोःइली” तमा ङ्हाखालेः दाय्ह्ती दाय्ह्ओआः बा। 6 परमेस्वर्कोः पेओ समचार् ङ्हा सायःओलम् ङ्हाम्नीली त झ्यान्ते परमेस्वर्कुस् ओउःकोः राजीहाङः पोक्सा दोःइली। ओउःमयःखे पोक्सा दोःइली अरुखे परमेस्वर्कुस् मुसाकायः पोक्सा दोःलेःनै। 7 “तेन्पाय् मान्तालम् ङाकःताङ् वाङ्पै” त दाय्ह्ती परमेस्वर्इ अरु वाङ्सा खेःओ दीन्लम् गम्आकान् ओउः दीन्लम्पाय् तेन्छ्याङ्कोः दीन्लम् लेःआः बा। ओउः दीन्लम्कायः लोनेः दावुद् राजाइ परमेस्वर्कोः कुरा दाय्ह्ती तोआकान् “लौ तेन्पाय् परमेस्वर्कोः नोःओ नीङ्इ सायःतेःनानी त खेःया ओउःकोः कुरा ग्यामाःत ल्हुङ् चाक्तो मुलाम्” त दाय्ह्ती दाय्ह्ओ आखरःहाङः लेखती मुनाः। एतलेः ङ्हा तोओ खेःतो। 8 ओहाङःसै मोसाकायः गुल्ह्ओ यहोस्युआइ नीङ्कोः आय्कानः तोकानःलम्कायः परमेस्वर्कोः पेतो मुसा राजीहाङः पोस्साकायः दप्तीलेः दाक्जेःआकान् त खेःया परमेस्वर्इ लोनेःकोः दीन्हाङः ओउः कुरा कोदीङःती नोःसा परमालो खेःतो। 9 खेःल परमेस्वर्कोः मान्तालम्पाय् जुदालेः पोक्धाङ्इली ओउःत झ्यान्ते परमेस्वर्कोः मान्तालम्कायःपाय् अरु य्हाङःतो मुसा राजीपाय् मुलेःधाङ्नाः बा। 10 ओउःकोः काम् द्योक्आक्तीको परमेस्वर्पाय् काम् कोरःतीलेः मुओ ओउःलो लेखालेः सुसु ओउःकोः राजीहाङः पोक्लेःनै ओउःकुस् काम् कोरःतो धोती मुसा दोःनै। 11 लौ उया ङीइमा ओउःकोः राजीहाङः पोक्सा पेतो बोङःनी ओहाङःसै ङी काम् कोरःती मुसा खाय्नाःतय्ह्नी। सुमा ओउः पोक्सा दोःमालो आय्कानः तोकानःलो लेखालेः ल्हुङ् ग्यामाःत मुती वाय्तो स्याव्लाम्। 12 परमेस्वर्कोः नोःराय्इपाय् जीङः नाःओलो लेखालेः आन जाङ्ह्सा खाय्नौ। व्हानःओ नाःसुयःइ ह्रुस् मायः तात्ती वेङ्काय्सा खाय्नौ ओउःसै न्हाङ्तोलेः परमेस्वर्कोः नोःराय्इ मान्ताकोः ल्हुङ्तुक् तात्ती पोक्सा खाय्नौ मान्ताकोः ल्हुङ्तुक्कोः झाक्ओ कुरामा म्हर्ओ कुरामा छीङ्गलःती योसा खाय्मानौ। 13 सबै कुरा ल्हुङ्तुक्कोः कुरामा दोह् खेःयामा परमेस्वर्सै नुस्ती गम्सा खाय्ल बा। जापीनःती न्यास्ओ थोक्लम्पाय् सबै ओउःकोः मीक्हाङः ल्हाःतीलेः मुनाः। ओउःकायःपाय् ङीइ जाङ्ह्ओ काम्लम् सबै घोती ल्हाक्सा खेःनाःतय्ही। 14 ओउःत खेःओ ङीइ थोल्ह्ती तोओ कुरापाय् पेतो ग्रमःत मुती ङ्हाम्पानाःतय्ही दोह् हायःती दाय्ह्सा लाङ्काताङ् ज्योय्ती दाह्ओ परमेस्वर्कोः चोः येसुपाय् ङीकायः आन ताङ्ह्ओ प्रधान् पुरोहीत् मुलेःनाः। 15 ङीकोः प्रधान् पुरोहीत् येसुकायःपाय् गतलो ङीकायः ल्हुङ्तुक् थ्योन्ह्ती योओ खेःतो ओउःतलेः थ्योन्ह्ओ खेःतो ओउःइपाय् रेव्ओ काम् दोह्मा जाङ्ह्उलु। ओउःइ ङीकायः लयः धेःती झ्यान्ते ङीकायः थ्योन्ह्ओ चीःती आन योनःतीलेः योसा खाय्नाःतय्ही। 16 ओउःत खेःओ परमेस्वर्कोः राजालो खेःओ मुओ थाव्ताङ् ल्हुङ् फवःतोलेः आल्इ। ओहाङः ओउःइ ङीकायः योनःती योती ङी दोह् दोह् राह्ओ बेलाहाङः आय्ह्तो ल्हुङ्इ बयःनाःतय्ही। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.