हेब्रैनी 3 - चेपाङ1 लौ उया नीङ् छय्ङ्तो स्याव्ओ पुःचोङ् हौचोङ्य नीङ्कायःमा परमेस्वर्इ छीङ्ह्तेःआकाय् ओउःत झ्यान्ते ङीइ छ्यानःती तोओ परमेस्वर्इ छ्युङ्ह्ती ल्होक्ओ प्रधान् पुरोहीत् येसुकोः कुरापाय् ल्हुङ्हाङः लाय्नु दा। 2 मोसा त तोओइपाय् सबै परमेस्वर्कोः मान्तालम्कःहाङः काम् पेतोलेः जाङ्ह्आकान् ओउःलो लेखालेः ओउःकायः छ्युङ्ह्ओ परमेस्वर्कायःलेः येसुइमा काम् पेतोलेः जाङ्ह्आकान्। 3 मान्ताइ जाङ्ह्ओ कीम्सै ओउः कीम् जाङ्ह्ओ मान्ताकायःलेः लुङ्ती तोसा त्याक्नौ ओउःलो लेखालेः मोसासै येसुकायः आन लुङ्सा स्याव्नाः। 4 सबै कीम्लम्पाय् सुलाङःइ जाङ्ह्ओ लेःआः सबै थोक्पाय् परमेस्वर्इलेः जाङ्ह्आकान्। 5 मोसाखेपाय् परमेस्वर्कोः नोकरीलेः खेःती ओउःइलेः सबै परमेस्वर्कोः मान्तालम्कःहाङः ओउःकोः काम्मा पेतो जाङ्ह्ती परमेस्वर्इ लोनेः तोसा खेःओ कुरामा छ्यानःआकान्। 6 येसु ख्रीस्खेपाय् परमेस्वर्कोः चोःलेः खेःती झ्यान्ते परमेस्वर्कोः मान्तालम्सै पुःती ओउःकोः काम् पेतो जाङ्ह्नौ। फेरी ङीइपाय् ग्रमःत मुती लोनेः वाङ्सा कुराकायः पेतो चोङाय्तोलेः ङ्हाम्पाःतय्ह्नी ओउःत खेःया परमेस्वर्कोः मान्तापाय् ङीलेः खेःनाःतय्ही। 7 लौ उया परमेस्वर्कोः ग्वालामः इतलेः दाय्ह्नाः “लौ तेन्पाय् परमेस्वर्कोः नोःओ नीङ्इ सायःतेःनानी त खेःया 8 नीङ्कोः आय्कानः तोकानःलम्लो लेखालेः परमेस्वर्कोः कुरा ग्यामाःत ल्हुङ् चाक्तो मुलाम्। याक्गार्सीःमालोहाङः नीङ्कोः आय्कानः तोकानःलम्इ परमेस्वर्कोः ल्हुङ्तुक् वेलःती ओउःकोः कुरा ङ्हाम्सा ग्यामालो खेःइतो। 9 ‘चालीस् बर्सकायः ङाइ ग्वम्इ जाङ्ह्ओ कुरापाय् ओउःमयःइ च्यवःनीतो ङाकायः ङ्हाम्माःत ङाकोः ल्हुङ्तुक् योआताङः’ त दाय्ह्ती परमेस्वर् दाय्ह्आ। 10 ओउःत झ्यान्ते ओउःमयःकः आन ल्हुङ् मल्ह्आलाङः ‘लौ ङाकोः ल्याम्कायः आन फेनानी ङाइ तोओ कुरापाय् गलमा सायःसा ग्याइली’ त दाय्ह्ती दाय्ह्ङोतो 11 ल्हुङ् मल्ह्तो स्याव्आलाङः त खेःओ ‘लौ ओउःमयः ङाकुस् ङाकोः पेतो य्हाङःती मुसा राजीहाङः पोक्सा गलमा दोःइली’ त दाय्ह्ती तोती गम्आलाङः” त दाय्ह्ती परमेस्वर् कीरीया जेःती दाय्ह्ओ लेःआः। 12 लौ पुःचोङ् हौचोङ्य घीःती मुन दा उया यात्नीस्चाक्इ रेव्ओ ङ्हाम्मालो ल्हुङ् दोःती ओउः जीङः नाःओ परमेस्वर्कायः फेतेःचानी यादो। 13 ओउःत झ्यान्ते तेन्छ्याङ्कोः दीन्लम्हाङः “सुकायःमा रेव्ओइ थ्योन्ह्ती ल्हुङ् चाक्तोलेः स्याव्ताक्लाम्” त दाय्ह्ती दीन् दीन्कायः स्योत्ती स्योत्ती लःलयःमयःकायः लव्ह्काय्न दा। 14 ङी लोनेःकोः वाङ्सा खेःओ दीन्च्युक्कायः ङ्हालो लेखालेः येसुकोः ङ्हाम्सीःओ कुरा ग्रमःतलेः ङ्हाम्ती मुनाःतय्ही त खेःया ङी येसुकुस् ब्राङ्तोलेः मुसा दोःनाःतय्ही। 15 “लौ तेन्पाय् परमेस्वर्कोः नोःओ नीङ्इ सायःतेःनानी त खेःया नीङ्कोः आय्कानः तोकानःलो लेखालेः ओउःकोः कुरा ग्यामाःत ल्हुङ् चाक्तो मुलाम्” त दाय्ह्ती परमेस्वर्कोः आखरःहाङः दाय्ह्ओ कुरापाय् ङ्हाखा तोओ लेःआः बा। 16 ओउः परमेस्वर्कोः नोःओपाय् सायःसा ग्यामालो मान्तालम् सुलो दाय्ह्सा। ओउःमयःपाय् सबै मोसाइ मीस्रा देस्सै स्यालःती वानःओ मान्तालम् खेःनै र आने। 17 फेरी सुलोकः परमेस्वर् चालीस् बर्सकायः ल्हुङ् मल्ह्तो स्याव्ओ खेःतो दाय्ह्सा ओउः याक्गार्सीःमालोहाङः सीती वाय्ओ रेव्तो जाङ्ह्ओलम्लेः खेःतो माःदै। 18 ओहाङःसै ओउः सायःसा ग्यामालोलम्कायः “लौ ओउःमयः ङाकुस् ङाकोः पेतो य्हाङःती मुसा राजीहाङः पोक्सा गलमा दोःइली” त दाय्ह्ती परमेस्वर्इ कीरीया जेःती तोती गम्आकान् खेःल तब आने। 19 ओउःतलेः ओउःमयःइ ङ्हाम्नीली त झ्यान्ते पोक्सा दोःइली ओउःत चीःसा खाय्नाःतय्ह्नी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.