हेब्रैनी 12 - चेपाङ1 ओउःच्युक् नाःतो पेतो हायःओलम् ङीकोः ङ्हासै वाह्आकाय् त खेःओ लौ वाह्तोक्हाङः दोह् दोह् कुराइ लीःनाःतय्ही दोह् दोह्इ रेव्ताक्नाःतय्ही ओउःपाय् जुगाङ् फेती ल्याम्कोः ङ्हाताङ् योती ल्हुङ् क्रोङ्तोलेः पेतो वाह्इ। 2 ङीकायः स्यालःओ येसुकायः जुःतीलेः योनी। ङीइ ङ्हाम्ओकायः येसुइ स्यालःमानाःतय्ही ताप्माताक्नाःतय्ही। ओउःपाय् “लोने पेओ चोङाय्ओ बेला वाङ्नाः” त म्हर्ती ओउः क्ल्याय्ओ सीङःहाङः आन लीह्सीःओ गोरःती लयःकायः दोह्तमा म्हर्माःत अरुकोः मीक्हाङः “मीतो स्याव्पाङः” त म्हर्ती सीलेःआ। द्याह् ओउःपाय् परमेस्वर्कोः गुल्ह्दाङ् स्याव्ती ओउःकोः ङोय्दोसै राजा च्युङःसा थाव्हाङः मुलेःनाः। 3 अरुइ ओउःकायः रेव्ओ काम् जाङ्ह्तोक्हाङः ओउःत पेमालो हायःओ येसुइ गोरःआकान्। ओउःत गीलती नीङ्मा ओउःकोः ल्याम् वाह्तोक्हाङः लीह्सीःओ च्यवःतेःनानी त खेःया ल्हुङ् घ्युम्तो स्याव्लाम् ह्र्याम्ती दोम् घुन्ह्ती ग्र्योक्तो स्याव्तेःइली। 4 दोह् हायःती दाय्ह्सा पेमालो हायःसा थ्योन्ह्ओलम्कायः क्रुस्तोक्हाङः ओउःमयःकोः कुराकः ग्यामाःत झ्यान्ते सीच्युक् सीमाझुङ्कायः काय्काय्सा परधाङ्तेःइली। 5 फेरी परमेस्वर्कोः आखरःहाङः लेखओ कुरा नीङ्इ म्हेःतेःआकानी यादो। “लौ चोःय प्रभुइ जान्ती अह्रावओ कुरापाय् ल्हुङ्इ ल्हेत्लाम् ओउःइ जान्ती तोओ कुरा सायःआक्तीको ल्हुङ् घ्युम्तो स्याव्लाम् 6 दोह् हायःती दाय्ह्सा ओउःइ लयः राप्ओ मान्ताकायः प्रभुइ स्यान्साकायः जान्नाःथास। सुसुकायः ओउःइ लयःकोः चोःलो लेखा स्याव्ताक्नौ ओउःकायःपाय् प्रभुइ पेमालो हायःओसै दल्ताक्साकायः न्युम्ह्ताक्नाःथास” त दाय्ह्ती परमेस्वर्इ ओउःकोः चोःलो लेखा स्याव्ओलम्कायः लव्ह्सा तोनाःथास। 7 ओउःत खेःओ आपाइ न्युम्ह्ताक्ती स्यान्ओ चोःलो लेखालेः लीह्सीःओ गोरःनु दोह् हायःती दाय्ह्सा “परमेस्वर्कोः चोःलो लेखालेः स्याव्आलाङः” त चीःसा खाय्तेःनानी। सबै चोःलम्कायः आपाइ न्युम्ह्ताक्तीलेः स्यान्नानी 8 ओउःत झ्यान्ते परमेस्वर्कोः अरु चोःलम्खेइ च्यवःओ लीह्सीःओ नीङ्खेइ च्यवःतेःनीली त खेःया नीङ्पाय् ओउःकोः दोङ् चोःतेः खेःतेःइली अरुकोः चोःतेः खेःतेःनै। 9 ङीकोः ल्हाव्ह्दैबाङ्कोः आपालम्इ ङीकायः न्युम्ह्ताक्ती स्यान्आतय्ही। ओउःमयःकः ङी पेतो एङःतीलेः सायःआतय्ह्नी ओउःत झ्यान्ते पेओ जीङः दोःसाकायः ङीकोः लाङ्काकोः आपाकायः न्हाङ्तोलेः ग्याती सायःसा खेःतो बा। 10 ङीकोः ल्हाव्ह्दैबाङ्कोः आपालम्खेइ एतलेः “इत हायःसा पेलेःनाः” त दाय्ह्ती यात् नीस् साल्कायः न्युम्ह्ताक्तय्हीतो ङीकोः लाङ्काकोः आपाखेइ “ङालो लेखालेः छय्ङ्पै” त दाय्ह्ती ङीकायः जुदालेः पेताक्आतय्ही। 11 सबै न्युम्ह्ताक्तो स्यान्ओपाय् न्युम्ह्ओ बेलाहाङः लीह्सीःओ लेःआः चोङाय्सीःओ खेःल। चोङाय्सीःओ खेःसापाय् खेःल लोने ओउः न्युम्ह्तो स्याव्ओलम्पाय् पेतो स्याव्ती ल्हुङ् धोमाय्तोलेः मुनै। 12 लौ नीङ्कोः खाम्ओ क्रुत्लम् च्युन्नीङ्सी नीङ्कोः खुन्ह्ओ दोम्लम् क्रोङ्ताक्नीङ्सी। 13 ल्याम्लम्कायः धेङ्ताक्नु सल्ताक्नु दा। ओहाङःसै क्ल्योय्ओ दोम्पाय् जुगाङ् क्ल्योय्तीलेः वाय्लाम् बुरु पेतो सेलः स्याव्पानाः। 14 सबै मान्ताकुस् ब्राङ्काय्ती मुसामा बोङःनु पेओ नीङ्ओ ल्हुङ् दोःसाकायःमा बोङःनु। ओउःत पेओ ल्हुङ् दोःमाःत सुइमा प्रभुकायः योसा खाय्नीली। 15 एत वाह्तोक्हाङः “सुइमा परमेस्वर्कोः योनःती योओकःसै ल्हेत्लाम्” त दाय्ह्ती घीःतीलेः मुन उया ल्हुङ्हाङः छुर्मु दुङ्ती लीह्सीःओ स्याव्ताक्ती नाःतो मान्ताकायःमा रेव्ताक्चाःथास। 16 फेरी एसाव् त तोओलो लेखा परमेस्वर्कायः मानमालो मान्तामा ल्हास्या मान्तामा नीङ्कःहाङः स्याव्ताक्लाम्। एसाव् त तोओइपाय् लयःकोः आपासै दोःसा खेःओ थोक्लम् राङ्लम् यातै पेन्ह्कोः जेःगाकायः वीनःतीलेः वाय्आकान्। 17 ओहाङःसैको लोने ओउःकोः आपाइ बयःसा आसीक् बोङःतोक्हाङः ओउः आसीक्पाय् जुगाङ् दोःल। ओउःकोः आपाकःताङ् र्याःतीलेः आसीक् बोङःउतो ओउःकोः आपाकायः र्याःती र्याःती होम्तीमा आपाकायः ल्हुङ् द्यान्ह्ताक्सा खाय्उलु ओउःत नीङ्इ चीःतेःनानी बा। 18 ओउः इस्राएलीलम्खे ओउः दीन्ह्सा खाय्ओमा म्हेः नाःओ सीनाय् त तोओ बुम्कःताङ् वाङ्इतो ती नीङ्खे ओहाङः वाङ्तेःइली। ओउः बुम्हाङः आन च्याक्ओ गाल्ओ मुस् लात्ओ गाय्ध मुओ खेःतो। 19 ओहाङःसैको ओहाङः ओउः इस्राएलीलम्इ तुरहीकोः हाव्नयःमा परमेस्वर्कोः नोःराय्मा सायःआकानी। ओउः नोःराय्पाय् सायःआक्तीको “लौ ङीइ अरु कुरा सायःसा खाय्ङुसुलु अरु सायःताक्लाम्” त दाय्ह्ती तेआकाय् 20 दोह् हायःती दाय्ह्सा “लौ दोह् दोह्इ इ बुम्ताङ् दीन्ह्चौ मान्ताइया स्याःइया ओउःपाय् बाङ् आप्ती थोःती सात्सा खेःतो” त तोओ खेःतो। ओउःत तोओ हुकुम्पाय् ओउः इस्राएलीलम् आन रैआकाय्। 21 ओहाङःसैको ओउः बुम् योसाकायः आन युमःसीःओ खेःतो। ओउःपाय् ओउःच्युक् युमःसीःओ त झ्यान्ते “लौ ङा आन रैतीलेः रीङ्ह्नाङः” त दाय्ह्ती मोसामा दाय्ह्आ। 22 ओउःमयःलम्खे ओउःत युमःसीःओ सीनाय् बुम्ताङ् वाङ्ओ खेःइतो नीङ्खे ओउः सीओन् त तोओ बुम्ताङ् वाङ्तेःआकाय्। ओउः बुम्पाय् ओउः जीङः नाःओ परमेस्वर्कोः सहर् “लाङ्काकोः यरुसालेम्” त तोओ सहर्लेः खेःनाः बा। ओहाङः आन नाःतो परमेस्वर्कोः ल्होक्ओमयः चोङाय्तीलेः हुम्ती मुनै। 23 नीङ्पाय् ओउः ङ्हासै ङ्हाम्ओ हुम्ती मुओलम्कःताङ्मा वाङ्तेःआकाय् ओउःमयःलम्कोः मय्ङ् लाङ्काहाङः लेखती मुनाः। फेरी नीङ्पाय् ओउः सबैकायः तय्छनःती योसा परमेस्वर्कःताङ्मा वाङ्तेःआकाय्। ओउःकोः मीक्हाङः पेतो स्याव्ओलम्कःताङ्मा 24 ओउः नया तोती गम्ओ कुरा जाङ्ह्ओ येसुकःताङ्मा वाङ्तेःआकाय्। ओउःकोः वयःइपाय् वस्ती छय्ङ्ताक्ती झ्यान्ते हाबेल् त तोओकोः वयःसै पेतोलेः दोःताक्नाःतय्ही। ओउःत चीःती येसुकोः वयःकःताङ्मा वाङ्तेःआकाय्। 25 ओउः तोती गम्ओ कुरापाय् पेतो घीःती सायःसा खेःतो बा। ल्हाव्ह्दैबाङ्हाङः तोतोक्हाङः ओउः कुरा सायःसा ग्यामालोलम्पाय् न्युम्ह्ताक्ओसै दल्सा खाय्आक्नीली। ओउःमयःखे दल्सा खाय्नीली त झ्यान्ते ङीइ ओउः लाङ्कासै गानाक्ती तोओ सायःओलम्खे ग्यातय्हीली त खेःया ङी न्हाङ्तोलेः न्युम्ह्ताक्ओसै दल्सा खाय्तय्ह्नीली। 26 सीनाय् बुम्हाङः तोतोक्खेहाङः परमेस्वर्कोः हाव्नयःइ ल्हाव्ह्दैबाङ् साङ्ह्ताक्आकान्। द्याह्खे “लौ ङाइ फेरी साङ्ह्ताक्सा बेलाहाङः ल्हाव्ह्दैबाङ् झुङ्आले खेःल ओउःकुस् फेल्बाङ्मा यातै पेन्ह्कायः साङ्ह्ताक्लेःनाङः बा” त दाय्ह्ती परमेस्वर्इ द्याह्कायः इतलेः तोती गम्नौ। 27 ओउःइ “लौ फेरी यातै पेन्ह्कायः साङ्ह्लेःताक्नाङः” त दाय्ह्ती तोती झ्यान्ते ओउः लोनेः वाङ्सा साङ्ह्ताक्सा बेलाहाङःपाय् सबै ङ्हा जापीनःती न्यास्ओ थोक्लम्पाय् जुगाङ् वाय्तो स्याव्नै त छ्यानःनाःतय्ही। ओउःखेपाय् वाय्लेःनै ओउः बेलाहाङःपाय् ओउः साङ्ह्तीलेः वाय्सा खाय्मालो कुराखे झुङ्आले मुलेःनाः। 28 लौ उया ङी साङ्ह्तीमा वाय्सा खाय्मालो राजीताङ् पोक्ती मुसा दोःनाःतय्ही त झ्यान्ते परमेस्वर्कायः “च्युता” त दाय्ह्ती तोमानी ओउःकायः एङःतोमा म्रोताक्तीमा मानमानी 29 दोह् हायःती दाय्ह्सा ङीकोः परमेस्वर्पाय् सबैकायः जेःती माक्ती वाय्सा म्हेःलो लेखा मुलेःनाः बा। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.