हेब्रैनी 11 - चेपाङ1 ङी ङ्हाम्ओ मान्ताइ लोने वाङ्सा झाक्ओ कुरापाय् “ताप्आनाः बा” तमा दाय्ह्ती दाय्ह्लेःनाङी द्याह् च्यवःसा खाय्मालो कुरापाय् “मुलेःनाः बा” तमा चीःलेःतय्ह्नी। 2 ओउः उय्ह्लेकोः मान्तालम्मा ओउःत ङ्हाम्ओ त झ्यान्ते ओउःमयः परमेस्वर्कोः मीक्हाङः पेतो स्याव्आकाय्। 3 ङीइमा ङ्हाम्ती झ्यान्ते “फेल्बाङ्लम् ल्हाव्ह्दैबाङ्लम्कायः परमेस्वर्इ ओउःकोः नोःराय्इ जापीनःती न्यास्आकान्” तमा चीःनाःतय्ह्नी फेरी “तेन्छ्याङ्कोः योसा च्यवःओ कुरालम्पाय् योसा च्यवःमालो कुरासै थाती वाङ्ओ खेःतो” तमा चीःनाःतय्ह्नी। 4 ओउःमयःकोः परमेस्वर्कायः हाबेल् त तोओइ पेतो ङ्हाम्आकान् त झ्यान्ते ओउःइ परमेस्वर्कायः ल्हाओ थोक्लम्पाय् कैन् त तोओइ ल्हाओ थोक्लम्सै पेओ खेःतो। हाबेल्इ बयःओ थोक्लम् परमेस्वर्इ त्याक्आकान् त झ्यान्ते “ङाकोः मीक्हाङः हाबेल् पेतोलेः स्याव्आ” त परमेस्वर्इ छ्यानःओ लेःआः। हाबेल्पाय् द्याह् सीसापाय् सीओ लेःआः ओउःकोः ङ्हाम्ओ कुराइ तेन्छ्याङ्मा ङीकायः स्यान्लेःनाःतय्ही। 5 फेरी हनोक् त तोओइमा पेतो ङ्हाम्ती वाह्ओ झ्यान्तेलेः ओउःपाय् सीमामाःत परमेस्वर्कःताङ् लात्ती आलःओ खेःतो आलःआक्तीको ओउःकायः सुइमा च्यवःसा खाय्नीली। ओहाङःसैको ङ्हासै “हनोक्इ परमेस्वर्कायः म्रोताक्आकान् ओउःत झ्यान्ते ओउःकायः परमेस्वर्इ लयःकःताङ् आलःआथै” त दाय्ह्ती दाय्ह्ओलेः आखरःहाङः मुनाः। 6 ओहाङःसै मान्ताइ आःताः ङ्हाम्माःत सुइमा परमेस्वर्कायः म्रोताक्सा खाय्नीली दोह् हायःती दाय्ह्सा सुसु परमेस्वर्कःताङ् द्याङ्ती वाङ्नै ओउःपाय् ङ्हासैलेः “लौ परमेस्वर् मुलेःनाः बा” सुसुइ ओउःकायः बोङःलेःनानी ओउःकायः “परमेस्वर्इ पेतोलेः बयःनाःथास” त दाय्ह्ती ङ्हाम्आक्सा खेःतो। 7 ओहाङःसैको नोआह्इमा परमेस्वर्कायः ङ्हाम्ती झ्यान्ते परमेस्वर्इ तोओ लोनेः वाङ्सा खेःओ कुरापाय् ओउः कुरा च्यवःधाङ्माःखाहाङः ओउःइ सायःआकान्। सायःआक्तीको नोआह्इ परमेस्वर्कः रैती लयःकोः कीम्कोः मान्तालम् दल्ताक्साकायः ताङ्ह्ओ “आर्क्” त तोओ तीःजहास् जाङ्ह्आकान्। जाङ्ह्आक्तीको ओउः जहास्हाङः पोस्ती नोआह्मा ओउःकोः कीम्कोः मान्तालम्मा सबै दल्आकाय्। ओउःइ ङ्हाम्आक्तीको दल्आकाय् त झ्यान्ते ओउःइ अरु सीओ ल्हाव्ह्दैबाङ्कोः मान्तालम्कायः “पेमालो हायःआकानी” त छ्यानःआकान्। ओहाङःसैको ओउःकोः ङ्हाम्झ्याङ्कायः परमेस्वर्कोः मीक्हाङः नोआह् पेतो स्याव्लेःआ। 8 आब्राहाम्इमा ङ्हाम्ती झ्यान्ते परमेस्वर्इ तोओ कुरा ग्याती ओउःइ लोनेः त्याक्सा नया देस्ताङ् आल्आकाय्। आल्सापाय् आल्तो ङ्हाहाङः ओउः देस्पाय् “गाःहाङःलो” त चीःआक्उलु। 9 परमेस्वर्इ ओउःकायः तोती गम्ओ थे देस्हाङः आल्ती पाल् कीम्हाङः याक्आकाय्। ओउःलो लेखालेः इसाक् याकुब् नीस् आपाचाःमा ओउः तोती गम्ओ देस्हाङः याक्आकाय्। 10 ओउः देस्हाङःपाय् ओउः वाङ्सा खेःओ परमेस्वर्इ जाङ्ह्ओ गलमा ह्र्योङःमालो सहर्कायः आब्राहाम् ल्युङ्ह्ती मुओ खेःतो। 11 ओउःइ ङ्हाम्ती झ्यान्ते बुधा स्याव्ओहाङः आब्राहाम्पाय् सराह्कुस् चोः दोःसाकायः ग्वम् दोःआ दोह् हायःती दाय्ह्सा परमेस्वर्इ तोओ कुरापाय् ओउःइ ङ्हाम्आकान्। 12 ओउःत झ्यान्ते ओउः सीसा स्याव्खेःओ यात्चाक् मान्तासै फेल्बाङ्कोः कार्लम्च्युक् नाःतो प्लोमःदाने मोमःदानेलम् ब्याव्आकाय्। साःकोः बाङ्च्युक् नाःतो ब्याव्लेःआकाय् सुइमा थेङ्सा खाय्ल। 13 ओउः ङाइ मेस् तोओ मान्तालम्पाय् परमेस्वर्इ तोती गम्ओ कुरा सबैइ पेतोलेः ङ्हाम्आकानी। ङ्हाम्सापाय् ङ्हाम्नीतो ओउः कुरापाय् “लोने वाङ्सा मान्तालम्खे दोःलेःनै ङी ल्हाव्ह्दैबाङ्हाङः यात् चीच्योक्कायः ब्याह्ती वाह्ओमयःखेइ ओउः कुरापाय् लयः दोःमाःत सीनाङी लोक्तोसै ह च्यवःनाङःसु” त म्रोतोलेः दाय्ह्आकाय्। 14 एत नोःओ मान्तालम्पाय् लयःकायः स्याव्सा नया देस् बोङःआकानी इत ङीइ चीःनाःतय्ह्नी 15 दोह् हायःती दाय्ह्सा ओउःमयःइ फेओ देस्पाय् ल्हुङ्हाङः झाह्ती लाय्नीली। ओउः लाय्दीक् ओउःमयः ङ्हा फेओ देस्ताङ् पाय्ह्चाः खेःइतो। 16 ओउःमयः ओउः ङ्हाहाङः फेओ देस्खेताङ् पाय्ह्इली ओउःसै पेओ लाङ्का देस्खेताङ् द्याह् आल्सा झाक्इतो ती ओउःत झ्यान्ते ओउःमयःइ परमेस्वर्कायः “लौ ङीकोः परमेस्वर् लेःआः” त दाय्ह्ती तोतोक्हाङः ओउःमयःकः परमेस्वर् अह्र्ल। ओउःपाय् अह्र्ल ओउः एत ङ्हाम्ओ लयःकोः मान्तालम्कायः याक्सा सहर्लेः जाङ्ह्आथास। 17 ओहाङःसैको आब्राहाम्इ ङ्हाम्ती झ्यान्ते परमेस्वर्इ ओउःकोः ल्हुङ्तुक् योसा बेलाहाङः लयःकोः यातैज्योः ल्हुङ्गोरे इसाक् चोःलेः परमेस्वर्कायः ल्हासा ग्याओ खेःतो। 18 ओउःकायः परमेस्वर्इ “लौ नाङ्कोः इसाक् चोःसै नाङ्कोः प्लोमःदाने लोनेः ब्याव्तो स्याव्नै” त दाय्ह्ती तोती गम्आथै इ कुरापाय् आब्राहाम्इलेः म्रोतोलेः सायःउतो लयःकोः यातैज्योः चोःपाय् परमेस्वर्कायः ल्हासा ग्याओ खेःतो। 19 “लौ ङाकोः चोः सीआ त खेःया ओउःकायः परमेस्वर्इ उह्ती च्योक्ताक्सा खाय्नौ” त दाय्ह्ती ङ्हाम्तीलेः ल्हाउतो ती दोङ्सीलेः ओउः सीसा खेःओ चोःपाय् आब्राहाम् सीओलो लेखा स्याव्ओसै फेरीलेः दोःजेःआ बा। 20 ओहाङःसैको इसाक्इमा ङ्हाम्ती झ्यान्ते लयःकोः चोःनीस् याकुब् एसाव्त तोओनीस्कायः “लौ लोने नीङ्जी एत पेतो स्याव्तेःनाःज” त दाय्ह्ती आसीक् बयःआकान्। 21 याकुब्इमा पेतो ङ्हाम्ती लयः सीखेःतोक् बेलाहाङः ओउःकोः दङ्गहाङः ङोलःती परमेस्वर्कायः मानती ओउःकोः चोः युसेफ्कोः चोःनीस्कायः आसीक् बयःआकान्। 22 युसेफ्इमा लयःकोः ओघ द्युम्खेःतोक्हाङः ओउःकोः इस्राएल् त तोओ प्लोमःदाने मोमःदानेलम् मीस्रा देस्कायः लोने फेसा कुरामा ङ्हासै ताप्ताक्साकायः छ्यानःमाआकान्। ओहाङःसै “ङा सीआक्तीको ङाकोः ह्रुस्लम् इसै लात्ती ओउः नया देस्हाङः पाम्ह्पानी” त दाय्ह्ओ कुरामा तोमाआकान्। 23 ओहाङःसैको मोसाकोः आमा आपाइमा ङ्हाम्ती झ्यान्ते ओउःकायः ओत्आक्तीको तीन् महीनाच्युक्कायः नुस्आकाचु। ओउःपाय् “आन पेओ चोः लेःआः” त म्हर्ती आमा आपानीस्इ रैती स्याव्मामाःत ओउः मीस्रा देस्कोः राजाइ “लौ हेब्रैनी जात्कोः चोः सात्पाःथास” त गानाक्ती तोओ कुरापाय् जाङ्ह्चुलु। 24 मोसाइमा ताङ्ह्आक्तीको “लौ ङाकायःपाय् ‘फारोह् राजाकोः चोःद्याङ्कोः चोः लेःतेःआः’ त तोलाम्” त दाय्ह्ती तोती 25 ओउः राजाकोः दर्बाल्हाङः यात्नीस् बर्सकायः लीङ्हायःती रेव्तो काम्लम् जाङ्ह्ओसै परमेस्वर्कोः मान्तालम्कुस् लीह्सीःओ गोरःसा झाक्लेःआ। 26 “ङा लोनेः वाङ्सा खेःओ ख्रीस्लो लेखालेः लीह्सीःओ गोरःनाङः ओउःत हायःझ्याङ्कायः ङा परमेस्वर्सै मीस्रा देस्हाङः मुओ सम्पतीलम्सै पेओ दोःलेःनाङः” त दाय्ह्ती मोसा म्हर्आ। 27 ओहाङःसैको परमेस्वर्कायः ङ्हाम्ती “लौ ङाकः राजा आन ल्हुङ् मल्ह्तो स्याव्चाः” त दाय्ह्ती ओउः राजाकः रैमाःत मोसापाय् मीस्रा देस्कायः फेआकान्। ओउः च्यवःसा खाय्मालो परमेस्वर्कायः च्यवःसा खाय्ओलो लेखालेः गुल्ह्ती ओउःपाय् गलमा द्यान्ह्ल। 28 मोसाइ ङ्हाम्ती झ्यान्तेमा ओउःइ ङ्हाकोः च्योल्ओ दीन्हाङः इस्राएलीकोः कीम् कीम्कोः दय्ह्लौगन वयः स्रोत्ताक्आकान्। ओउःत हायःआक्तीको परमेस्वर्कोः ल्होक्ओमयः वाङ्ओ दीन्हाङः ओउः जेथा चोः सात्ओ ल्होक्ओमयःइ हेब्रैनीलम्कोः जेथा चोःलम्कायः सात्थासल ओउःमयः दल्आकाय्। 29 ओहाङःसैको ओउः इस्राएलीलम्इ ङ्हाम्ती झ्यान्ते ओउःमयःइ दुओ त तोओ तीः त्यात्सा खाय्आकानी। ओउःमयःखे त्यात्ओ बेलाहाङः सोत्ओ साःलो लेखालेः त्यात्ती वाह्इतो ती ओउःमयःकायः गुल्ह्ओ मीस्रा देस्कोः मान्तालम्खेइ त्यात्सा बोङःतोक्हाङः सबै तीः ज्युप्तीलेः सीआकाय्। 30 ओउःमयःइ ङ्हाम्ती झ्यान्तेमा ओउः इस्राएलीलम्इ सात् दीन्कायः यरीखो सहर्कोः तोङःती खोओ बार्लम् वीङ्ह्ती वाह्आकाय्। सात् दीन्कायः वीङ्ह्ती वाह्आक्तीको ओउः बार्लम्पाय् लयः प्रोआकाय्। 31 फेरी ओउः रन्दी राहाब् त तोओमा परमेस्वर्कायः ङ्हाम्ती झ्यान्ते अरु यरीखोहाङः मुओ ङ्हाम्मालोलम्कायः सात्तोक्हाङः ओउःकायःपाय् सात्थाल दल्लेःआ। दोह् हायःती दाय्ह्सा ओउः कनान् देस् योलाङ् वाङ्ओ इस्राएलीकोः नीस्चाक्कायः ओउःइ पेतोलेः रोम्आकान्। 32 अरु दोह्मा तोसा परल यादो सबै तोसा खाय्ङल। गीदेयन् बाराक् साम्सोन् जेफ्थाह्मा दावुद् सामुएल्मा ओउः परमेस्वर्कोः कुरा छ्यानःती तोओलम्मा ओउःमयःकोः कुरा मुलेःनाः बा। 33 ओउःमयःइ ङ्हाम्ती झ्यान्ते अरु देस्कोः मान्तालम्कुस् मीन्ह्काय्ती क्लीमःआकानी। ओउःमयःइ एतलेः पेतो हायःती परमेस्वर्इ तोती गम्ओ कुरा दोःआकाय्। जाःकोः म्होतोङ्कायः उमःताक्ती दल्तो स्याव्माआकाय् 34 म्हेः ल्युङ्ती भोय्ती मुतोक्हाङः म्हेःइलेः ओउःमयःकायः य्हुमःती माक्सामा खाय्थासल ओउःमयःमा तरवाल्इ पाल्ओसै दल्आकाय्। ओउःमयःपाय् बल् नाःआक्मालो खेःइतो ग्वम् दोःती मीन्ह्काय्तोक्हाङः अरु देस्कोः पल्तन्लम्कायःमा सबैकायःमा क्लीमःसा खाय्ओ खेःइतो। 35 परमेस्वर्कायः ङ्हाम्धार्नालेः मोमःचोःलम् लयःकोः सीओ मान्तालम् सीओसै उह्ती च्योक्ओलेः दोःआकाय्। अरु ङ्हाम्ओलम् “लौ सीआक्तीको ङी इ जीङःसै अरु न्हाङ्तोलेः पेओ जीङः दोःनाङी” त दाय्ह्ती अरुइ ओउःमयःकायः घान्ती थोःती सात्तोक्हाङः बेन्सा बोङःनीली। 36 अरु ङ्हाम्ओलम्इपाय् मान्तालम्इ बयःओ हेला क्लाःओमा लाइ स्राप्ओमा गोरःआकानी ओउःमयःकायः अरुइ पानःती झ्याल्खानहाङः थुनती गम्आकानी। 37 अरु ङ्हाम्ओलम्कायः मान्तालम्इ बाङ् आप्ती थोःती सात्माआकानी करन्तीइ ङ्हकःती तात्माआकानी तरवाल्इ पाल्माआकानी। अरु ङ्हाम्ओलम् ह्र्यात् स्याव्ती मेत्छ्याः भेदामेत्छ्याःकोः पुन् ह लावती वाह्आकाय्। ओउःमयःकायः अरुइ पेमालो हायःमाआकानी लीह्सीःओ बयःमाआकानी। 38 ओउःच्युक् पेओ ङ्हाम्ओ मान्तालम्कुस् ल्हाव्ह्दैबाङ्कोः मान्तालम् ङ्र्याःसा खाय्नीली ओउःत झ्यान्ते ओउः ङ्हाम्ओलम्पाय् मान्ता याक्गार्सीःमालो थाव्लम्हाङःमा स्यालुङ्हाङःमा वाह्ती ल्युमःपुक्हाङः घाङ्लम्हाङः नुकुती याक्आकाय्। 39 ओउःमयःपाय् इत ङ्हाम्तीलेः वाह्ती झ्यान्ते ङीकायः स्यान्नाःतय्ही। ङीकायःपाय् स्यान्सापाय् स्यान्तय्हीतो परमेस्वर्इ तोती गम्ओ कुरापाय् दोःधाङ्इली। 40 परमेस्वर्इ ङीइ ख्रीस्कायः ङ्हाम्ओलम्कायः ओउःसै पेतो जाङ्ह्नाःतय्ही। ओउः ङ्हा ङ्हाम्ती वाह्ओलम्पाय् ङीकुस् ह ओउः तोती गम्ओ कुरा दोःती परमेस्वर्कोः मीक्हाङः जुगाङ् पेतो स्याव्नै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.