हेब्रैनी 10 - चेपाङ1 हेब्रैनीलम्कोः ऐन्कोः कुरापाय् ओउः लोनेः वाङ्सा दोङ् कुरा खेःल। ओउःपाय् लोनेः वाङ्सा कुराकोः क्वालाङः ह। ऐन्कोः कुरा जवओलम्इ साल् साल्हाङः यातैज्योः खाल्कोः थोक्पाय् ज्युङ्ह्ती ज्युङ्ह्ती ल्हानानी। ओउःपाय् साल् साल्कायः ल्हासा खेःतो ओउःत खेःया ओउः खाल्कोः ल्हाधार्नापाय् परमेस्वर्कःताङ् वाङ्सा मान्तालम्कोः ल्हुङ्तुक् जुगाङ् पेताक्सा खाय्उलु। 2 ओउः पेताक्सा खाय्चाः खेःतो त खेःया ज्युङ्ह्तीलेः ल्हासा परआक्ल दोह् हायःती दाय्ह्सा यातै पेन्ह् ह ल्हाआक्तीको ओउःमयःकोः ल्हुङ्तुक् स्याङ्तो स्याव्चाः खेःतो। 3 ऐन्कोः खाल्कोः ल्हाओपाय् साल् साल्कायः मान्ताकोः रेव्ओ काम् गीलसा खेःतो 4 दोह् हायःती दाय्ह्सा स्याः मेत्छ्याःकोः वयःइपाय् मान्ताकोः रेव्तो काम्लम् क्युम्ह्ती जुगाङ् वाय्सा खाय्उलु। 5 ओउःत झ्यान्ते ख्रीस्पाय् ल्हाव्ह्दैबाङ्ताङ् वाङ्खेःतोक्हाङः इतलेः दाय्ह्आ “सात्ओमा ल्हाती बयःओ थोक्लम् नाङ् झाक्तेःल बुरु स्याः मेत्छ्याःकोः होन्त ल्हासाकायः नाङ्इ आङ्तेः जाङ्ह्तेःआ बत्तेःआची। 6 रेव्ओ काम् क्युम्ह्ती वाय्साकायः स्याः मेत्छ्याः अरु सात्ती फुःती ल्हासापाय् दोह्मा म्रोतेःल। 7 ओहाङःसैको ‘लौ परमेस्वर्य ऐन्कोः कीताप्हाङः ङ्हा लेखती गम्ओलो लेखालेः ङापाय् नाङ् झाक्ओ काम् जाङ्ह्लाङ् वाङ्आलाङः’ त दाय्ह्ती तोनेःनाङ्” त दाय्ह्ती ख्रीस्पाय् ङ्हाहाङः दाय्ह्आ। 8 ओउःतलेः ओउः ऐन्हाङः जवती तोओ थोक्लम्कायः “सात्ओमा ल्हाती बयःओ थोक्लम्मा म्हेःहाङः फुःती ल्हाती बयःओ थोक्लम्मा रेव्ओ काम् वाय्साकायः झाक्तेःल म्रोतेःल” त दाय्ह्ती मुनाः। 9 ओहाङःसै “लौ नाङ् झाक्ओ काम् जाङ्ह्लाङ् वाङ्आलाङः” त दाय्ह्ओमा मुनाः ओउःत हायःती ओउः ङ्हा जवओ कुराखेपाय् ख्रीस्इलेः वाय्उतो ओउः कुराकोः होन्त नया पेओ कुराखे गम्लेःनौ। 10 ओउः नया कुराहाङः येसु ख्रीस्इपाय् परमेस्वर्कोः झाक्ओ काम् जाङ्ह्ती लयःकोः आङ् यातै पेन्ह्कायःलेः ल्हाती झ्यान्ते ङी सबैकायः रेव्ओ काम्सै छय्ङ्ताक्आतय्ही। 11 सबै हेब्रैनीकोः पुरोहीत्लम्खेपाय् ओउःकोः काम् जाङ्ह्साकायः दीन् दीन्कायः ल्हाती चीङ्ती मुलेःनै ओहाङःसैको यातै खाल्कोः ज्युङ्ह्तोलेः ल्हाओआः। ओउः खाल्कोः थोक्लम्खेइ बुरु रेव्ओ काम् क्युम्ह्ती वाय्सा गलमा खाय्उलु। 12 ख्रीस्खेइ रेव्ओ काम्लम् गलकायः वाय्सा थेङा यातै पेन्हकायः ह ल्हाआक्तीको परमेस्वर्कोः गुल्ह्दाङ् स्याव्ती ओउःकुस् मुलेःनाः। 13 ओहाङः लयःकोः बीरोत्लम् क्लीमःधाङ्माःच्युक्कायः ख्रीस्पाय् ल्युङ्ह्तीलेः मुनाः 14 ओउःतलेः यातै हायःधार्ना ख्रीस्इलेः ओउः रेव्ओसै पेङ्कलःतो स्याव्ओलम्कायः गलकायःमा जुगाङ् छय्ङ्ताक्आथास। 15 परमेस्वर्कोः ग्वालामःइमा ङीइ तोओ कुरापाय् पाःतीलेः तोमानौ। 16 ङ्हापाय् परमेस्वर्कोः आखरःहाङः “लौ लोनेः वाङ्सा दीन्हाङः ओउःमयःकुस् जाङ्ह्सा होम्काय्ओ कुरापाय् इलेःआः ‘ङाकोः ऐन्पाय् ओउःमयःकोः ल्हुङ्तुक्हाङः लेखती गम्लेःनाङः’ त दाय्ह्ती प्रभुलेः दाय्ह्आ” त दाय्ह्ती ओउःकोः ग्वालामःइ छ्यानःआतय्ही। 17 ओहाङःसै “लौ ओउःमयःकोः रेव्ओ काम्लम्पाय् ङाइ द्याह् ल्हुङ्हाङः सेती गम्ङल ओउःपाय् जुगाङ् म्हयःलेःनाङः” तमा दाय्ह्ती प्रभुकोः कुरा ङीकायः छ्यानःओ लेःआः। 18 ओउःत झ्यान्ते ओउः सबै रेव्ओ कुरापाय् वाय्तोलेः स्याव्आक्तीको रेव्ओ काम्कायः क्युम्ह्ती वाय्साकायः अरु ल्हाती बयःसा जुगाङ् परल। 19 ओउःत झ्यान्ते पुःचोङ् हौचोङ्य येसु ख्रीस् सीती वयः बयःधार्नालेः ङीपाय् ओउः जुगाङ् नीङ्ओ थाव्हाङः सोकार्तोलेः पोक्सा दोःनाःतय्ही। 20 येसुकोः ल्हाती बयःओ आङ्पाय् ओउः थाव्कोः खोती गम्ओ नाय् फेल्ती नया रौ तारःओ जीङः दोःताक्सा ल्याम् स्याव्ओ लेःआः। 21 परमेस्वर् मुओ थाव्हाङःपाय् ङीकोः ताङ्ह्ओ पुरोहीत्पाय् हुकुम् बयःसालेः मुनाः। 22 ओउःत झ्यान्ते ङीकोः ल्हुङ्तुक्कायः ख्रीस्कोः वयःइ रेव्ओ वाय्ती छय्ङ्ताक्आक्तीकोमा ङीकोः आङ्पाय् छय्ङ्ओ तीःइ जेस्आक्तीकोमा नीङ्ओ ल्हुङ् दोःती पेतो ङ्हाम्ती परमेस्वर्कःहाङः सोकार्तोलेः द्याङ्तो आल्इ। 23 ङीइ ङ्हाम्ती तोओ कुरापाय् क्रोङ्ओ ल्हुङ्इ ङ्हाम्नी दोह् हायःती दाय्ह्सा परमेस्वर्इ तोती गम्ओ कुरापाय् ओउःइ गलमा म्हेःमाःत दोङ्सीलेः ताप्ताक्नौ बा। 24 ओहाङःसैको ङीपाय् लःलयःकायः योनःतीमा राप्तीमा “पेतो हायःनी” त दाय्ह्ती लव्ह्काय्इ। 25 यात्नीस्चाक्इलेः अरु ङ्हाम्ओलम्कुस् हुम्ती थनःसाकायः फेआकानी ओउःमयःलो लेखालेः हायःलाम् ओहाङःसैको प्रभु वाङ्सा खेःओ दीन् द्याङ्तो दाह्ती वाङ्खेःओहाङः न्हाङ्तोलेः “हुम्लाङ् आल्इ” त दाय्ह्ती लव्ह्काय्ती तोकाय्न। 26 दोङ् कुरा चीःआक्तीको ङीइ चीःतीमा झाक्तीमा रेव्ओ काम् जाङ्ह्धै मुनाःतय्ही त खेःया ओउः रेव्ओ काम् क्युम्ह्ती वाय्साकायः ल्हासा थोक्पाय् दोह्मा नाःबाय्ल। 27 सुसुइ ओउःतलेः रेव्तो काम् जाङ्ह्चनौ ओउःपाय् लोनेः परमेस्वर्कोः बीरोत्लम्कुस् ओउःकोः रैसीःओ न्युम्ह्ताक्ओ दोःनै। म्हेःहाङः काओ थोक्लो लेखालेः ओउःमयःपाय् वाय्तोलेः स्याव्नै। 28 मोसाइ बयःओ ऐन् जाङ्ह्सा जुगाङ् ग्यामालो मान्ताकायः “ओउःकोः रेव्ओ काम् नीस् सुम्चाक्इ च्यवःओ त खेःया ओउःकायः अरुइ योनःमामाःत सात्पाःथै” त ऐन्कोः दाय्ह्ओ कुरा मुनाः। 29 मोसाकोः ऐन् ग्यामालो मान्ताकायः एत न्युम्ह्तो स्याव्नाः त खेःओ सुसुइ परमेस्वर्कोः चोः अह्र्तोलेः योचानी ओउःपाय् न्हाङ्तोलेः न्युम्ह्नै बा। दोह् हायःती दाय्ह्सा ओउः मान्ताइपाय् छय्ङ्ताक्ओ ख्रीस्कोः होम्काय्ती बयःओ वयःपाय् अरुइ बयःओ वयःलो लेखा मीतोलेः ताःमानौ ओउःकायः योनःती योओ परमेस्वर्कोः ग्वालामःकायःमा हेला क्लाःमानौ। 30 ओहाङःसैको “लौ पेमालो हायःझ्याङ्कोः ङाइलेः पाय्क्ती बयःनाङःसु” त दाय्ह्ती तोओ परमेस्वर्कायः ङीइ तय्ह्नाङःसु बा। फेरी “लौ ओउःकोः मान्तालम्कायः प्रभुइ तय्छनःतीलेः योनौ” तमा दाय्ह्ओलेः मुनाः। 31 दोङ्सीलेः मान्ताकायः ओउः जीङः नाःओ परमेस्वर्इ न्युम्ह्ताक्नौ त खेःया आन रैसीःओ लेःआः बा। 32 द्याह् ख्रीस्कोः कुरा ङ्हा चीःओ दीन्लम्पाय् गीलनु। ओउःनम् दीन्लम्पाय् अरुइ आनतेः लीह्सीःओ बयःतेःइतो ओउःत हायःओ नीङ्इ ग्रमःतलेः गोरःतेःआकानी। 33 कोय् बेलाहाङः सबैकोः मीक्हाङः अरुइ हेलामा क्लाःतेःआकाय् लीह्सीःओमा बयःतेःआकाय्। अरु बेलाहाङः अरु मान्ताइमा लीह्सीःओ गोरःतोक्हाङःमा नीङ्इ ओउःमयःकुस् ब्राङ्ती मुती लव्ह्सा ग्यातेःआकाय्। 34 झ्याल्खानहाङः थुनती काओलम्कायःमा नीङ्इ लव्ह्तेःआकानी। नीङ्कोः माल्ताल्लम् लाती आलःओ बेलाहाङः नीङ् चोङाय्तोलेः मुधाङ्तेःइतो दोह् हायःती दाय्ह्सा ओउःसै न्हाङ्तोलेः पेओमा गलमा वाय्मालो खाल् “ङीकायः गम्ओलेः मुनाः” त चीःतेःआकानी। 35 लौ उया नीङ् ल्हुङ् क्रोङ्तोलेः मुन इत हायःओ फेलाम् ओहाङःसै नीङ् लोनेः आन पेतोलेः दोःतेःनै। 36 एत ङाइ दोह् हायःती दाय्ह्नाङः दाय्ह्सा परमेस्वर् झाक्ओ काम् जाङ्ह्साकायः नीङ् ग्रमःत गुह्र्माःतोलेः मुधाङ्सालेः खेःतो। ओहाङःसैको ओउःइ तोती गम्ओ कुरापाय् नीङ् दोःतेःनै बा। 37 “लौ ओउः वाङ्सा खेःओ चाक्पाय् देङेलेः वाङ्नाः ओउःपाय् वाङ्साकायः भेक्ल। 38 ङाकोः पेओ मान्तालम्पाय् पेतो ङ्हाम्ती झ्यान्ते दल्तोलेः वाह्लेःनै। ओउःतलेः वाह्लेःइतो यात्चाक्इ ङाकायः फेलेःनाःताङः त खेःया ओउःइ ङाकायः म्रोताक्ताङःल” त दाय्ह्ती दाय्ह्ओ परमेस्वर्कोः कुरा आखरःहाङः लेखती मुनाः। 39 यात्नीस्चाक्खे ओउःत वाय्तोलेः मुनै ङीखेपाय् प्रभुकायः फेती वाय्ओलम् खेःतय्हीली। ङीइ ओउःकायः ङ्हाम्ती झ्यान्ते दल्तोलेः स्याव्लेःनाःतय्ही। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.