हेब्रैनी 1 - चेपाङ1 उय्ह्लेखेहाङः परमेस्वर्इ लयःकोः नोःराय्लेः ओउःकोः कुरा छ्यानःओमयःकायः बयःआथास। नाःतो बेलाहाङः नाःतो खाल्कोः कुरालम् दाय्ह्ती ङीकोः आय्कानः तोकानःलम्कायः तोसा थेङा ओउःइ बयःथासतो 2 द्याह् इ लोनेकोः दीन्खेहाङः ओउःइ लयःकोः चोःकायःलेः ङीकायः तोसा थेङा ल्होक्आथै। ओउः चोःकुस्लेः परमेस्वर्इ सबै थोक् जापीनःती न्यास्आकान् लोनेः सबै थोक् ओउः चोःकोःलेः स्याव्नाः एत हायःसाकायः परमेस्वर्इ चोःकायः छ्युङ्ह्आथै। 3 ओउः चोःपाय् परमेस्वर्सै दोःती न्याम्कोः रोलो लेखालेः अङ्गाय् थङ्गाय् त आन पेतोलेः थोङ्नाः। ओहाङःसै गतलो परमेस्वर्लेः मुनाः चोःपाय् ओउःतलेः घार्तोलेः मुनाः। ओउःकोः ग्वम् नाःओ नोःराय्इ सबै थोक्लम् स्यास्तीलेः मुनाः। सबैकायः रेव्ओ काम्सै छय्ङ्ताक्आक्तीको ओउःपाय् सबैसै ताङ्ह्ओ परमेस्वर्कायः गुल्ह्दाङ् स्याव्ती ओउःकोः ङोय्दोहाङः मुलेःनाः। 4 ओउःत हायःती ओउः चोःपाय् परमेस्वर्कोः लाङ्काकोः ल्होक्ओमयःसै आन ताङ्ह्तोलेः स्याव्आ। ओउःकायः बयःओ मय्ङ्मा ओउः लाङ्काकोः ल्होक्ओमयःकोः मय्ङ्सैमा आनलेः पेलेःनाः। 5 दोह् हायःती दाय्ह्सा परमेस्वर्इ “लौ नाङ्पाय् ङाकोः चोः लेःतेःआः। तेन् ङा नाङ्कोः दोङ् आपालेः स्याव्नाङः” त दाय्ह्ती लयःकोः ल्होक्ओमयःकायः सुकायःमा तोथासल ओउःकोः चोःकायः ह एतलेः लयःकोः आखरःहाङः तोआथै। फेरी लयःकोः आखरःहाङः “ङापाय् ओउःकोः आपा स्याव्लेःनाङः ओउःपाय् ङाकोः चोःलेः स्याव्नाः” तमा परमेस्वर्इ ल्होक्ओमयःकायः सुकायःमा तोथासल। 6 परमेस्वर्इ लयःकोः ङ्हाकोः फुह्स्यारेःकोः चोःकायःपाय् ल्हाव्ह्दैबाङ्कःताङ् ल्होक्खेःओ बेलाहाङः “लौ सबै लाङ्काकोः ल्होक्ओमयःइ इकायः बाःती स्यवपानी” तमा परमेस्वर् दाय्ह्ती तोआकान्। 7 ओउःकोः लाङ्काकोः ल्होक्ओमयःखेकायः “परमेस्वर्इ लयःकोः ल्होक्ओमयःकायः मारुःलो लेखालेः थाङ्ताक्नाःथास। ओउःकोः काम् जाङ्ह्ओलम्कायः ल्युङ्ओ म्हेःलो लेखालेः थाङ्ताक्नाःथास” त दाय्ह्ती दाय्ह्आ। 8 ओउःकोः चोःखेकायः दाय्ह्ती “अ परमेस्वर्य नाङ् गलकायःमा राजातेः मुलेःनाः। नाङ्कोः राजीहाङः मुओलम्कायः पेतोतेः तय्छनःती योतेःनौ। 9 पेओ काम्खे झाक्तेःनाः पेमालो काम्खे अह्र्तेःनाः ओउःत झ्यान्ते परमेस्वर्इ नाङ्कोः परमेस्वर्इपाय् नाङ्कायः छीङ्ह्ती नाङ्कोः साथीलम्सै आन पेतोलेः ताङ्ह्ताक्ती चोङाय्ताक्तेःआ बा” तमा परमेस्वर्इ तोआथै। 10 फेरीलेः आखरःहाङः “लौ प्रभुय ङ्हाहाङःपाय् नाङ्इ ल्हाव्ह्दैबाङ्मा जापीनःतीतेः न्यास्तेःआकान् फेल्बाङ्मा लयःइलेःतेः जाङ्ह्तेःआकान्। 11 ओउः फेल्बाङ् ल्हाव्ह्दैबाङ्लम्खेपाय् लोनेः म्हीत्तोलेः स्याव्नाः बा नाङ्खे गलकायःमा मुलेःतेःनाः। ओउःलम्खे नाय्लो लेखालेः ग्रान् स्याव्नै। 12 ताङ्ह्ओ क्रमःनाय्लो लेखालेः नाङ्इ तुलःती खुम्तीतेः गम्तेःनौ ओहाङःसैको ग्रान् नाय् ल्हेत्ती वाय्आक्तीको नया नाय् ल्हेत्ती लावतेःनौ। उतलेः फेल्बाङ् ल्हाव्ह्दैबाङ्खे स्याव्नाः नाङ्खेपाय् एत गलमा थाङ्तेःल जुगुलाङःकायःमा नाङ्पाय् गलकायःमा ङ्हाकोःलो लेखालेःतेः मुलेःतेःनाः बा” तमा दाय्ह्ती चोःखेकायः नोःआथै। 13 ओहाङःसै “लौ नाङ्कोः बीरोत्लम्कायः ग्रक्धाङ्माःच्युक्हाङः ङाकोः ङोय्सै च्युङःती मुअ” त दाय्ह्ती परमेस्वर्इ ओउःकोः लाङ्काकोः ल्होक्ओमयःकायः गलमा तोथासल ओउःकोः चोःकायः ह तोआथै। 14 ओउः लाङ्काकोः ल्होक्ओमयः सुलो दाय्ह्सा ओउःमयःपाय् परमेस्वर्कोः काम् जाङ्ह्सा खेःओ चाक् लेःआःइ ओउःमयःपाय् दल्तो स्याव्सा मान्तालम्कायः लव्ह्सा थेङा परमेस्वर्इ ल्होक्नाःथास। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.