गालाती 6 - चेपाङ1 लौ पुःचोङ् हौचोङ्य नीङ्कःहाङः यात्चाक्इ रेव्ओ काम् जाङ्ह्ओ अरुइ च्यवःनानी त खेःया नीङ् परमेस्वर्कोः ग्वालामःकोः कुरा जाङ्ह्ती वाह्ओलम्इ ओउःकायः काङ्तीलेः गानाक्ती पेतो स्याव्ताक्नु दा। एत हायःतोक्हाङः नीङ्मा रेव्ओ काम्हाङः गन्तेःचाःताक्चाःइसी। 2 अरुइ लीह्सीःओ गोरःओ बेलाहाङः ओउःमयःकायः लव्ह्नु दा ओउःत हायःती नीङ्इ ख्रीस्कोः ऐन् जाङ्ह्तेःनानी। 3 यात्चाक् “लौ ङापाय् ताङ्ह्ओचाक् लेःआः ङ” त लयःकायः ताःती म्हर्तोक्हाङः ओउःपाय् ताङ्ह्ओ खेःल त खेःया ओउः मान्ता आह्रेलेः ताःआकास। 4 सबैलम्इ लःलयःकोः काम् योपाःइसी। ओहाङःसैको लयःकोः काम् वेलःती योतोक्हाङः पेनाः त खेःया चोङाय्तेःपै। एतलेः लयःकोः काम् ह योउ अरुकोः काम्पाय् नीङ्कोः लयःकोः काम्कुस् घार्ती योलाम् 5 दोह् हायःती दाय्ह्सा सबै मान्तालम् लःलयःकोः काम्लम्पाय् लःलयःकायः जाङ्ह्सा खेःतो। 6 सुसु ख्रीस्कोः कुरा स्यान्नाःइसी ओउःपाय् दोह् दोह् पेओ थोक्लम् दोःनाः ओउः थोक्लम् ओउःकायः स्यान्ओ मान्ताकायः वेःती बयःपानी। 7 माःती तोओ कुरापाय् ङ्हाम्तेःचानी। परमेस्वर्कायः आःताः चीःताक्माःत सुइमा दोह्मा जाङ्ह्सा खाय्नीली। दोह्लो मान्ताइ वार्नानी ओउःकोः सायः ह काव्ह्ती त्युम्ह्नाः। 8 मान्ताइ पेमालो सायः वार्नौ त खेःया ओउः सायः पेमालो दुङ्लेःनाः। ओहाङःसैको ओउः वार्ओ सायःपाय् वाय्तो लेःआः। ओउःतलेः सुसुखेइ लयः ल्हुङ्कोः पेमालो कुरा बोङःचानी ओउःपाय् वाय्तोलेः स्याव्नै। खेःल मान्ताइ पेओ सायः वार्नौ त खेःया ओउः सायः दुङ्ती तोरःतो लन्ह्ती झ्यान्ते पेतो काव्ह्ती त्युम्ह्सा दोःनाः। ओउःतलेः सुसुखेइ परमेस्वर्कोः ग्वालामःकोः कुरा बोङःनानी ओउःपाय् गलमा द्योक्मालो रौ जीङः दोःनै। 9 पेतो हायःतोक्हाङः ल्हुङ् ब्ल्यवःतेःचनै ग्रमःत मुन। ओहाङःसैको लोनेः नीङ्कोः हायःझ्याङ्कोः दोःतेःनै। 10 ओउःत खेःओ ङी पेतो हायःसा दोःनाःतय्ही त खेःया सबै मान्तालम्कायः पेतोलेः हायःनी ङीकोः ङ्हाम्ओ पुःचोङ् हौचोङ्लम्कायः न्हाङ्तोलेः पेतो जाङ्ह्सा बोङःनु दा। 11 लौ इतलेः ङाइ द्याह् लयःकोः क्रुत्इलेः ताङ्ह्ओ अखर् लेखनेःनाङ्स। 12 नीङ्कायः यहुदीकोः पुन् तात्ओ जाङ्ह्सा बोङःओलम्इ आङ्कोः बाहीरकोः कुरा ह जाङ्ह्सा झाक्नै। ओउःत हायःतीलेः ओउःमयःइ “ ‘ख्रीस्लेः क्ल्याय्ओ सीङःहाङः सीती झ्यान्ते ओउःइ पुन् तात्ओ कुरा वाय्आकान्’ त दाय्ह्ती तोनाःतय्ह्नी त खेःया अरुइ लीह्सीःओ बयःचाःतय्ही ओउःत झ्यान्ते एत तोलाम्” त दाय्ह्ती ओउः क्ल्याय्ओ सीङःकोः कुराखे तोमाःत आङ्कोः पुन् तात्ओ कुराखे जाङ्ह्नानी। 13 ओहाङःसै ओउः पुन् तात्ओ जवती जाङ्ह्ओलम्इमा ऐन्कोः कुरा जुगाङ् जाङ्ह्नीली। ओउःमयःइपाय् “लौ योउ दा इमयः द्याह् ङीलो लेखा जवनानी” त दाय्ह्ती लयःकोः नेह्रो ओर्ताक्सा थेङा ह नीङ्कायः पुन् तात्ओ जाङ्ह्सा बोङःनानी। 14 ओउःमयःखेइ ओउःतलेः लयःकायः ताङ्ह्ताक्सा बोङःनीतो ङाखे “ङीकोः प्रभु येसु ख्रीस्लेः ङीकायः दल्ताक्सा थेङा क्ल्याय्ओ सीङःहाङः सीओआः” त दाय्ह्ओ कुरा ह ताङ्ह्ताक्तीलेः तोसा झाक्नाङः। ओउः ख्रीस्पाय् सीआ त दाय्ह्ओ कुराखे चीःती ल्हाव्ह्दैबाङ्कोः कुराखे ङा द्याह् दोह्तमा म्हर्ङल ओउः कुरासै पेङ्कलःती वेङःआलाङःस। 15 पुन् तात्सापाय् जवओया जवमालोया दोह्मा दयःल। गत दाय्ह्सा मान्ताकायः रौ जीङः दोःसालेः खेःतो ओउः ह ताङ्ह्ओ कुरा लेःआः। 16 सुसु एत चीःतीलेः वाह्नै ओउःमयःकायःमा सबै परमेस्वर्कोः मान्तालम्कायःमा परमेस्वर्इ योनःती योती ल्हुङ् धोमाय्तो स्याव्ताक्पै। 17 लौ द्याह् सुइमा ङाकायः अरु लीह्सीःओ बयःलाम्। ङापाय् येसुकोः नोकरी लेःआः ङ त छ्यानःसाकायः ङाकोः आङ्हाङः अरुइ स्याव्ताक्ओ चालम् मुलेःनाः। 18 लौ पुःचोङ् हौचोङ्य येसु ख्रीस्इलेः नीङ्कायः योनःती योती नीङ्कोः ल्हुङ् पेतो स्याव्ताक्तेःबत्तेःपै। ओउःच्युक्लेः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.