गालाती 5 - चेपाङ1 ऐन्कोः काम् जाङ्ह्ओसै ख्रीस्इपाय् फेन्ताक्आतय्ही ओउःत झ्यान्ते ग्रमःत मुन ऐन्कोः नोकरी काम्पाय् द्यान्ह्ती जाङ्ह्लाम्। 2 लौ इत ङा पावुल्इ तोनेःनाङ्स बा। सुसुइ यहुदीलम्कोः पुन् तात्ओ जवनानी ओउःकायःलेः ख्रीस्इ जाङ्ह्ओ काम्पाय् दोह्मा हायःथासल। 3 माः है “ओउःत जवओ मान्तापाय् ऐन्कोः कुरामा जुदालेः जाङ्ह्सा खेःतो” त क्लुनःतीलेः तोनेःनाङ्स बा। 4 ऐन्कोः कुरा जाङ्ह्ती परमेस्वर्कोः मीक्हाङः पेतो स्याव्सा बोङःतेःनानी त झ्यान्ते नीङ्इ ख्रीस्कःसै जुगाङ्लेः वेङःतेःआकानी ओउःइ नीङ्खेकायः द्याह् योनःती योतेःइली। 5 ङीखेइ ख्रीस्कोः कुरा ङ्हाम्ती परमेस्वर्कोः ग्वालामः दोःती परमेस्वर्कोः मीक्हाङः पेतो स्याव्साकायः चोङाय्तीलेः ल्युङ्ह्ती मुनाङी। 6 येसु ख्रीस्कोः मान्तालम्कायःपाय् यहुदीकोः पुन् तात्सा जवओ जाङ्ह्ओया जाङ्ह्मालोया दोह्मा दयःल। ओउःपाय् दोह्मा दयःल दोह् स्याव्नाः दाय्ह्सा ख्रीस्कायः ङ्हाम्ती सबैकायः राप्ओ काम् जाङ्ह्ती ओउःलेः स्याव्नाः। 7 ङ्हापाय् नीङ् पेतो हायःती वाह्तेःआकाय् द्याह् सुइलो दोङ् कुरा फेसाकायः होम्तेःआकाय्। 8 इत होम्ओचाक्पाय् नीङ्कायः ङ्हा गोत्ओ परमेस्वर्लेः खेःल बा। 9 “इची मीतो फताक्सा ओखोत्इ लाङ् जुदालेः फताक्सा खाय्नौ” त दाय्ह्ओलेः मुनाः। इतलेः यात्चाक् रेव्ओ काम् जाङ्ह्ओ मान्ताइ साथीलम्कायः जुदालेः रेव्ताक्सालेः खाय्नौ। 10 ओउःत स्याव्सापाय् स्याव्लेःनाः ओउः पेमालो मान्ताइ नीङ्कायःपाय् “जुगाङ् रेव्तो जाङ्ह्साकायः होम्सा खाय्तेःइली” त प्रभुइ ताःताक्लेःनाङः। फेरी ओउः नीङ्कायः ब्रःताक्सा मान्तापाय् सुखेलो मुनाः ओउःकायःपाय् परमेस्वर्इ लोने न्युम्ह्ताक्नाःथै बा। 11 लौ पुःचोङ् हौचोङ्य ङाखेइ “यहुदीलम्कोः पुन् तात्ओ जाङ्ह्सा खेःतो” त दाय्ह्ती सुकायःमा थोल्ह्ती तोङल। ङाइ ओउःत तोदीक् ओउः यहुदीलम्कोः ऐन् जवओलम्इ ङाकायः ओउःच्युक् लीह्सीःओ बयःचाक्ताङःल खेःतो। ओहाङःसै “ख्रीस्लेः क्ल्याय्ओ सीङःहाङः सीओआः” त तोओ कुरा सुइमा सायःसा ग्याचै खेःतो। 12 ओउः नीङ्कायः ब्रःताक्ओलम्पाय् लयःकोः आङ् जुगाङ्लेः तात्पाःइसी त झाक्नाङः बा। 13 लौ पुःचोङ् हौचोङ्य ओउः ऐन् जाङ्ह्ओ फेसाकायः परमेस्वर्इ गोत्तेःआकाय्। ओहाङःसैको ओउः ऐन् फेसापाय् फेताक्तेःआकाय् ओउःत स्याव्आक्तीको लयःकोः ल्हुङ्कोः पेमालो मोह्हाय्ओ कुरा जाङ्ह्माःत अरुकायः राप्ती पेओ काम् जाङ्ह्नु दा। 14 दोह् हायःती दाय्ह्सा ओउः ऐन्कोः कुरापाय् सबैलेः याःआःज्याङ् कुराहाङः तोसा खाय्नौ। ओउः कुरापाय् इलेःआः “नाङ्कुस् ब्रेङःकाय्ती याक्ओ मान्तालम् लयःकायःलो धेःती राप्ती स्यास्उसु दा” 15 ओउःत हायःसा ग्यातेःइली त खेःया कुयःलो लेखालेः नीङ् लःलयःकुस् कायःकाय्ती मीन्ह्काय्तीतेः मुतेःनै। लौ घीःतीलेः मुन उया जुगाङ्लेः वाय्तोतेः स्याव्तेःनै। 16 लौ परमेस्वर्कोः ग्वालामःकोः कुरा जाङ्ह्ती वाह्न लयःकोः ल्हुङ्कोः पेमालो मोह्हाय्ओ जाङ्ह्लाम् त तोनेःनाङ्स। 17 मान्ताकोः ल्हुङ्हाङः झाक्ओ कुरा थेलेः परमेस्वर्कोः ग्वालामः झाक्ओ कुरा थेलेः इ नीस् कुरापाय् ङ्र्याःचल बीरोत्लेः खेःकाय्नाःच। ओउःत झ्यान्ते नीङ् लयः झाक्ओ कुरातेः जाङ्ह्सा खाय्तेःउलु। 18 खेःल नीङ्पाय् परमेस्वर्कोः ग्वालामःइ स्यालःओतेःआः त खेःया ऐन्कोः नोकरी खेःतेःइली। 19 मान्ताकोः ल्हुङ्इ मोह्हाय्ती जाङ्ह्ओ काम्लम्पाय् इलेः। जार् जाङ्ह्ओ काम् ल्हास्या जाङ्ह्ओ काम् अरु सबै रेव्तो अह्र्सीःओ काम् लेःआः बा। 20 फेरी मुर्तीकायः स्यवती मानओमा झ्याओ काम्मा मुनाः। ओउः ल्हुङ्कोः मोह्हाय्ओ जाङ्ह्ओलम्पाय् लयःमयःकः लती चोरःकाय्ती ल्हुङ् मल्ह्ती झ्यान्ते अरुकुस् कायःकाय्ती वेङःकाय्ती मुनै। 21 ओउःमयःमा हान् तुङ्ती ङोती जात्रमा जाङ्ह्नानी अरु इलो खेःओ पेमालो काम्लम्मा जाङ्ह्नानी। दोङ्सी दाय्ह्भनाङ् ङाइ ङ्हा तोओ कुरा कोदीङःतोलेः तोनेःनाङ्स। ओउःलो खेःओ जाङ्ह्ओलम्पाय् परमेस्वर्कोः राजीहाङः मुसा जुगाङ् दोःइली। 22-23 ओउःपाय् ल्हुङ्खेकोः रेव्ओ कुराखे लेःआः। परमेस्वर्कोः ग्वालामःखेकोः पेओ कुराखे इलेःआः। राप्ओ ल्हुङ्मा चोङाय्ओ धोमाय्ओ ल्हुङ्मा लीह्सीःओ गोरःओ पेओ योनःती योओ ल्हुङ्मा ङ्हाम्सीःओ काङ्ओ रेव्तो जाङ्ह्सा ग्यामालो ल्हुङ्मा लयःकायः मीतो योओमा ओउः सबैलेः परमेस्वर्कोः ग्वालामःइ बयःओ कुरालेः ऐन्इ ताक्मालो कुरा खेःल। 24 ख्रीस्कोः मान्तालम्इ लयःकोः ल्हुङ्कोः रेव्तो मोह्हाय्ओलम् ख्रीस्कोः क्ल्याय्ओ सीङःहाङः जुगाङ् म्हीत्ताक्तीलेः वाय्आकानी बा। 25 परमेस्वर्कोः ग्वालामःइ ङीकायः रौ जीङः बयःआतय्ही ओउःत खेःओ ओउःकोः ग्वालामःकोः कुरा जाङ्ह्ती वाह्इ दा। 26 अरुकः लती लयःकोः नेह्रो ओर्ताक्सा बोङःलाम् अरुलम्कायः काय्काय्ताक्तेःचानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.