गालाती 4 - चेपाङ1 ओहाङःसै साहु मान्ताकोः चोःपाय् हौलम् मुधाङ्तोक्हाङः आपाकोः राङ्लम् माल्ताल्लम् लयःकोः स्याव्धाङ्ल ओउःत झ्यान्ते ओउः चोःपाय् आपाकोः नोकरीलो लेखा मुनाः। ओउःत मुसापाय् मुलेःनाः लोने ताङ्ह्आक्तीको ओउः चोःपाय् सबैकोः मालीक् स्याव्नाः। 2 फेरी आपाइ तोओच्युक्कायः साहुकोः चोःइपाय् ओउःकायः योताक्ती गम्ओ मान्ताइ गानाक्ती तोओ कुरालेः सायःती जाङ्ह्सा खेःतो। 3 ङीइमा व्हक्मालो हौलम्लो लेखा मुतोक्हाङः ल्हाव्ह्दैबाङ्कोः द्यव्तालम्कोः कुरा सायःती जाङ्ह्आतय्ह्नी। 4 ओउःतलेः जाङ्ह्तय्ह्नीतो क्रोःओ दीन् पुत्आक्तीको परमेस्वर्इ लयःकोः चोः ल्होक्आथै। ओउःकोः चोःपाय् मोमःचोःसै दोःओआः ऐन्कोः कुरा जाङ्ह्सा खेःओ मान्ता खेःतो। 5 ओउःत हायःती ओउः ऐन् जाङ्ह्ओलम्कायः परमेस्वर्कोः चोःइ लयःलेः ल्हाङ्ती बयःती ङीकायः ऐन्कोः काम् जाङ्ह्ओसै फेताक्आतय्ही। ओहाङःसैको फेओ स्याव्आक्तीको ङी परमेस्वर्कोः चोःलम् स्याव्ती ओउःकोः चोःकोः कुरा दोःसा खाय्ताक्नाःतय्ही। 6 ओहाङःसैको नीङ्पाय् ओउःकोः चोःलम् स्याव्तेःआकाय् त छ्यानःसाकायः परमेस्वर्इ लयःकोः चोःकोः ग्वालामःलेः नीङ्कोः ल्हुङ्हाङः ल्होक्तेःआकाय्। ओउःहाङः ओउः ग्वालामःइ “अ आपा ङाकोः आपाय” त गोःताक्नाःतय्ही। 7 ओउःत हायःती द्याह्गोते नीङ्पाय् परमेस्वर्कोः नोकरी खेःतेःइली ओउःकोः चोःलेःतेः स्याव्तेःआकाय्। फेरी चोः स्याव्तेःआकाय् त खेःओ दोह्लो परमेस्वर्इ लयःकोः चोःलम्कायः बयःसा लेःआः ओउःलेः नीङ्कायः बयःतेःनै बा। 8 ङ्हापाय् परमेस्वर्कायः तय्ह्मालो बेलाहाङःपाय् नीङ् परमेस्वर् खेःमालो दीङ्लम्कायःमा द्यव्तालम्कायःमा मानती ओउःमयःकोः नोकरीलो लेखा खेःतेःइतो 9 द्याह् नीङ्इ परमेस्वर्कायः तय्ह्तेःनानी। नीङ्इमा ओउःकायःलेः तय्ह्तेःनीतो न्हाङ्तोलेः ओउःइ नीङ्कायःलेः तय्ह्तेःनै। ओउःत झ्यान्ते दोह् हायःतीतेः ओउः दोह्मा जाङ्ह्सा खाय्मालो द्यव्तालम्कायः फेरीलेः मानसा बोङःतेःनानी एत हायःती ओउःमयःकोः नोकरी फेरीलेः स्याव्तेःनै। 10 फेरी द्याह्पाय् नीङ्इ यात्नीस् दीन्लम् जवती मानतेःनानी महीनालम्मा साल्लम्मा अरु अरु बेलालम्मा जवती मानतेःनानी। 11 नीङ्इ एतलेः हायःतेःनानी त खेःओ ङाइ नीङ्कायः आन जाङ्ह्ओ काम्पाय् “द्याह् आह्रे लेःआः यादो” त म्हर्ती ल्हुङ् र्याङःनाङः बा। 12 लौ पुःचोङ् हौचोङ्य एत जवओ फेती ङालो लेखालेः स्याव्न दोह् हायःती दाय्ह्सा ङापाय् यहुदीलम्कोः कुरा फेती नीङ् यहुदी खेःमालोलम्लो लेखा स्याव्आलाङः। ङाकायः नीङ्इ दोह्मा पेमालो हायःआक्तेःनाङ्सल। 13 नीङ्कःताङ् तोहा वाङ्तोक्हाङः ङा आङ् जीक्तो स्याव्आलाङः। ङा आङ् जीक्आलाङः त झ्यान्ते नीङ्कायः परमेस्वर्कोः पेओ समचार् थोल्ह्ती तोसा दोःआलाङः इत चीःतेःनानी। 14 फेरी ङा एत जीक्ओहाङः नीङ्कायः आन कोन्नेःनाङ्सतो नीङ्इ ङाकायः अह्र्मामाःत ल्हेत्मामाःत च्यवःती परमेस्वर्कोः लाङ्काकोः ल्होक्ओमयःलो लेखालेः रोम्तेःआनाङ्स बा। माः रैस ङाकायः येसु ख्रीस्कायःलो लेखालेः रोम्तेःआनाङ्स। 15 नीङ्इ द्याह् दोह् हायःतीतेः ङाकायः ओउःतलेः म्रोतीलेः झाह्तेःनाङ्सल। दोङ्सी दाय्ह्भनाङ् ओउः ङ्हा वाङ्ओ बेलाहाङः ङाकायः ओउःच्युक् राप्ती झ्यान्ते नीङ्इ लयःकोः मीक् त्युत्ती बयःतेःचाःचाःनाङ्स खेःतो त तोनेःनाङ्स। 16 नीङ्इ ङ्हापाय् ओउःतलेः राप्तेःनाङ्सतो दोह् हायःतीतेः नीङ् द्याह् ल्हुङ् क्लोय्क्तेःनै। ङाइ दोङ् कुरालेः स्यान्ती तोती झ्यान्ते द्याह् ङाकोः बीरोत् स्याव्तेःनै यादो। 17 ओउः अरु मान्तालम्इ नीङ्कायः झाह्तेःइतो ओउःकोः झाह्ओ ल्हुङ् पेलेःल दोह् हायःती दाय्ह्सा नीङ्कायः ङाकःसै वेङःताक्सा बोङःनानी। वेङःआक्तीको ङाकायः खेःल ओउःमयःकायः ह “झाह्पाःतय्ही” त दाय्ह्ती ओउःमयःइ झाक्तीलेः बोङःनानी। 18 ओउःमयःइपाय् पेमालो हायःसाखे बोङःनानी पेतो हायःसा थेङा अरुकायः झाह्ताक्सा बोङःओपाय् गलकायःमा स्याव्लेःनाः। ङा नीङ्कुस् मुओहाङः ह खेःल मुमालो बेलाहाङःमा ओउःत हायःसा स्याव्लेःनाः बा। 19 लौ हौलम्य चोः ओत्ओ मोमःचोःलो लेखा ङामा ल्हुङ् स्युङ्लेःती मुनाङः नीङ् ख्रीस्लो लेखा स्याव्धाङ्माखाहाङः ओउःत लीह्सीःओ गोरःलेःनाङः 20 नीङ्कुस् मुसा आनलेः छ्युप्नाङः। नीङ्कुस् मुआलाङः त खेःया ङाइ इतलेः दोङ्ह्ती तोसा परङल मुमाःत झ्यान्ते नीङ्कोः कुरा ङाकोः ल्हुङ्हाङः लाय्ती आन रुःनाःताङः। 21 लौ नीङ् ऐन्कोः कुरा जाङ्ह्सा झाक्ओलम्य ऐन्कोः कुरा व्हक्तोलेः सायःसापाय् सायःतेःनीलीया। 22 आब्राहाम् त तोओ नीस्ज्याङ् गोय्चोःचोः नाःओ खेःतो। यात्ज्योः चोःखेपाय् नोकरी आमासै दोःओ अरु चोःखे नोकरी खेःमालो आमासै दोःओ खेःतो त दाय्ह्ओ ऐन्कोः आखरःहाङः लेखती मुनाः। 23 ओउः नोकरी आमासै दोःओ चोःखे माझ्यार्मा स्याव्धाङ्मालो मोमःचोःखेसै दोःओ खेःतो ओउः अरु चोःखे परमेस्वर्इ तोती गम्ओ कुरा ताप्ती दोःओ खेःतो। 24 इ कुरापाय् ङीकायः स्यान्सा थेङा लेखती मुनाः। ओउःनीस् मोमःचोःपाय् परमेस्वर्कोः नीस्ज्योः बयःओ होम्काय्ती गम्ओ कुरालो लेखा मुनाःच। ओउः ऐन्कोः कुरापाय् सीनाय् त तोओ बुम्हाङः दोःओ खेःतो ओउःपाय् हगार् त तोओ आमालो लेखालेः। हगार्कोः चोःलम् नोकरी खेःइतो। 25 ओउःमयः सीनाय् बुम् नाःओ अराबीया देस्हाङः याक्नै। तेन्छ्याङ्कोः यरुसालेम् सहर्हाङः मुओलम्खे ओउः सीनाय्हाङः मुओलम्लो लेखा ऐन्कोः नोकरी स्याव्आकाय्। 26 ङी लाङ्काहाङः मुओ यरुसालेम्कोः मान्तालम्खेपाय् नोकरी खेःतय्हीली ङी ओउः सहर्कोः चोःलम् मुनाःतय्ही। 27 “लौ नीङ् चोः लात्सा खाय्मालो मोमःचोःलम्य चोङाय्न नीङ् चोः ओत्सा खाय्मालोलम्मा आसती दाय्ह्न। दोह् हायःती दाय्ह्सा बुधाइ फेओ मोमःचोःखे बुधाकुस् मुधाङ्ओ मोमःचोःखेसै नाःतो प्लोमःदाने दोःनाः” त परमेस्वर्कोः आखरःहाङः लेखती मुनाः। 28 लौ पुःचोङ् हौचोङ्य नीङ्पाय् इसाक्लो लेखालेः आब्राहाम्कायः तोती गम्ओ प्लोमःदाने मोमःदाने लेःतेः इ। 29 ओउः माझ्यार्मा स्याव्धाङ्मालो आमासै दोःओ चोःइपाय् ओउः अरु परमेस्वर्कोः ग्वालामःइ दोःताक्ओ चोःकायःपाय् लीह्सीःओ बयःताङःआकान्। एतलेः तेन्छ्याङ्मा परमेस्वर्कोः ग्वालामःइ दोःताक्ओलम्कायःपाय् अरुलम्इ लीह्सीःओ बयःनाःथास। 30 ओउःत हायःनानी बा परमेस्वर्कोः आखरःहाङः दोह्त लेखओ दाय्ह्सा “ओउः नोकरी नीस् आमाचाःकायः ल्होक्उ दा। ओउःकोः चोःपाय् नोकरी खेःमालो आमाकोः चोःकुस्लेः आपाकोः माल्ताल्लम् राङ्लम् दोह्लम् त्याक्सा गलमा दोःल” त दाय्ह्ओ आखरःहाङः लेखती मुनाः। 31 लौ उया पुःचोङ् हौचोङ्य ङीपाय् नोकरी आमाकोः प्लोमःदाने मोमःदाने खेःतय्हीली ओउः अरु नोकरी खेःमालो आमाकोः प्लोमःदाने मोमःदाने खेःनाःतय्ही। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.