गालाती 3 - चेपाङ1 अ नीङ् चीःमालो गालातीहाङः मुओलम्य सुसुइ नीङ्कायः ब्रःतेःताक्तेःआकाय्। येसु ख्रीस्कायः क्ल्याय्ओ सीङःहाङः सात्ओ त नीङ्कायः पेतोलेः ल्हाक्ती छ्यानःतेःइतो द्याह् ओउः दोङ् पेओ कुरातेः सायःसा ग्यातेःइली। 2 लौ ङाकायः यात्ज्याङ् कुरा तोनाङ्स दा। ऐन्कोः कुरा जाङ्ह्ती परमेस्वर्कोः ग्वालामः दोःतेःआकाय्या ओउःत जाङ्ह्ती नीङ् दोःतेःइली रैस। ख्रीस्कोः कुरा ह ङ्हाम्ती सायःती झ्यान्ते ओउःकोः ग्वालामः दोःओआः बा। 3 नीङ् जुगाङ् चीःमाःत मुतेःनै। ङ्हापाय् परमेस्वर्कोः ग्वालामः दोःती वाह्तेःआकाय् द्याह् “ओउःकोः ग्वालामः परल ङी लयःलेः पेतो वाह्सा खाय्नाङःसु” त दाय्ह्तीतेः ताःतेःनौया। 4 परमेस्वर्कोः काम् जाङ्ह्ओकायः नीङ्इ आन लीह्सीःओ कुरा गोरःतेःआकानी ओउःत गोरःओपाय् आह्रे स्याव्ताक्सा बोङःतेःनानीया। खेःल ओउःत स्याव्ओपाय् बोङःतेःनीली यादो। 5 नीङ्कायः परमेस्वर्इ दोह् हायःतीलेः लयःकोः ग्वालामः बयःती ग्याङ्ह्राय् जाङ्ह्ताक्तेःनानी। नीङ्इ ऐन्कोः कुराखे जाङ्ह्तेःनानी त खेःया ओउःइ बयःतेःनैया। खेःल नीङ्इ ख्रीस्कोः कुराखे ङ्हाम्ती सायःतेःनानी ओउःत झ्यान्तेलेः परमेस्वर्इ एतलेः हायःतेःआकाय्। 6 “परमेस्वर्इ तोओ कुरा आब्राहाम्इ ङ्हाम्ती झ्यान्ते ओउःपाय् परमेस्वर्कोः मीक्हाङः पेतो स्याव्आ” त दाय्ह्ओ परमेस्वर्कोः आखरःहाङः लेखती मुनाः। 7 ओउःत झ्यान्ते ङ्हाम्ओ मान्तालम्पाय् आब्राहाम्कोः प्लोमःदाने मोमःदानेलो लेखा स्याव्नै त चीःनीङ्सी। 8 यहुदी खेःमालोलम्पाय् परमेस्वर्कोः कुरा ङ्हाम्आक्तीको ओउःकोः मीक्हाङः पेतो स्याव्नै त ङ्हा चीःती परमेस्वर्कोः आखरः लेखओलम्इ आब्राहाम्कायः “लौ नाङ्कःसै सबै ल्हाव्ह्दैबाङ्कोः जात्लम् आसीक् दोःनै” त दाय्ह्ओ पेओ समचार्कोः कुरा लेखआकानी। 9 ओउःत हायःती सबै ङ्हाम्ओलम्खेपाय् परमेस्वर्कायः ङ्हाम्ओ आब्राहाम्कुस् पेतोलेः स्याव्नै। 10 ओउः ऐन् जाङ्ह्ओलम्खे पेमालो स्याव्नै दोह् हायःती दाय्ह्सा आखरःहाङः “सुसुइ ऐन् लेखओ कुरा जुगाङ् जाङ्ह्नीली ओउःपाय् प्रनःओ स्याव्नै” त दाय्ह्ओ लेखती मुनाः। 11 ऐन्कोः कुरा जाङ्ह्ती सु खेःयामा परमेस्वर्कोः मीक्हाङः पेतो स्याव्इली। आखरःहाङःपाय् “सुसु ङ्हाम्आक्तीको परमेस्वर्कोः मीक्हाङः पेतो स्याव्नै ओउः मान्तापाय् जीङः दोःनै” त लेखती मुनाः। 12 ऐन्कोः कुरापाय् ङ्हाम्ओ कुरा खेःल ऐन्कोः कुरापाय् जाङ्ह्सा खेःओ कुरा लेःआः। “सुसुइ ऐन्कोः कुरा जुगाङ् जाङ्ह्लेःनौ ओउःपाय् जीङः दोःनै” त दाय्ह्ओमा आखरःहाङः लेखती मुनाः। 13 ख्रीस्इपाय् ङीकोः ऐन्सै दोःओ प्रनःबाङ् लयःलेः ल्हाङःती त्याक्ती झ्यान्ते ङीकायः ओउः प्रनःबाङ् क्युम्ह्ताक्आतय्ही गत हायःती दाय्ह्सा “सुसुखेकायः सीङःहाङः योकोःती सात्ओ खेःतो ओउःइपाय् प्रनःबाङ् लात्नौ” त दाय्ह्ती आखरःहाङःमा लेखती मुनाः। 14 ख्रीस्पाय् सीङःहाङः सात्ओ त झ्यान्ते आब्राहाम्कायः तोओ आसीक्पाय् येसु ख्रीस्इ यहुदी खेःमालोलम्कायः दोःताक्आकान्। ङीमा ख्रीस्कोः कुरा ङ्हाम्ती परमेस्वर्इ तोती गम्ओ ग्वालामः दोःनाःतय्ही। 15 लौ पुःचोङ् हौचोङ्य द्याह् ङाइ ल्हाव्ह्दैबाङ्कोः कुरा तोती स्यान्नेःनाङ्स। नीस्चाक्कोः दोङ् त्योम्काय्ती गम्ओ कुराकायः लोने दोह्मा म्हीत्ताक्सा स्याव्ल दोह्मा पाःसामा स्याव्ल। 16 ओउःलो लेखालेः परमेस्वर्पाय् आब्राहाम्कुस्मा ओउःकोः प्लोमःदानेकुस्मा कुरा त्योम्काय्तीलेः गम्आकानी। ओउः त्योम्काय्ओ कुरापाय् “यात्ज्याङ् प्लोमःदानेकुस् तोतो गम्ओआः” ओउःत आखरःहाङः लेखती मुनाः नाःतो प्लोमःदानेकुस् तोती गम्ओ खेःल। फेरी ओउः यात्ज्याङ् प्लोमःदानेपाय् सुखेलो दाय्ह्सा ओउःपाय् ख्रीस् लेःआः बा। 17 ओउः परमेस्वर्इ ख्रीस्कायः तोती गम्ओ कुराकायःपाय् ओउः अरु चार्सै तीस्बर्स लोने वाङ्ओ ऐन्कोः कुराइ म्हीत्ती वाय्सा खाय्उलु। 18 ओहाङःसै परमेस्वर्इ बयःओ कुरापाय् ऐन् जाङ्ह्ओकायः दोःओ त खेःया ओउः ङ्हा तोती गम्ओ कुरापाय् परल। ओउःपाय् खेःल दोह्लो परमेस्वर्इ आब्राहाम्कायः बयःआकान् ओउःपाय् तोती गम्ती झ्यान्ते बयःओआः। 19 ओउःत खेःओ ऐन्पाय् दोह् हायःती बयःओ खेःतो दाय्ह्सा। ओउः ऐन्पाय् मान्ताकोः रेव्ओ काम्लम् तय्ह्ताक्साकायः बयःओआः। आब्राहाम्कोः तोती गम्ओ प्लोमःदाने वाङ्धाङ्माःखाहाङःकायः बयःओ खेःतो। फेरी ओउः ऐन्पाय् परमेस्वर्कोः लाङ्कासै ल्होक्ओमयःइ यात्चाक् मान्ताकायः तोती बयःआकान्। बयःआक्तीको ओउः ऐन् त्याक्ओ मान्ताइ अरुलम्कायः ल्हाक्ती तोआकान्। 20 तोती गम्ओ बेलाहाङःपाय् यात्चाक् तोती गम्सा मान्ता ह परनाः अरुकायः ल्हाक्ती तोओ मान्ता परल। ओउःतलेः आब्राहाम्कायः तोती गम्ओ बेलाहाङःपाय् तोती गम्साकायः ओउः यातैज्योः परमेस्वर् ह मुओ खेःतो। 21 ओउःत झ्यान्ते ओउः ऐन्पाय् परमेस्वर्कोः तोती गम्ओ कुराकोः बीरोत् लेःआः त यात्नीस्चाक् दाय्ह्नै यादो। खेःल बा। यात्ज्योः ऐन् बयःधार्नालेः मान्ता रौ जीङः दोःनै त खेःया ऐन्कोः कुरा जाङ्ह्ती मान्ताइ परमेस्वर्कोः मीक्हाङः पेतो स्याव्चाः खेःतो। 22 ओउःपाय् खेःल “सबै ल्हाव्ह्दैबाङ्कोः मान्तालम् रेव्तो ल्हुङ् नाःनै” त दाय्ह्ती परमेस्वर्कोः आखरःहाङः लेखती मुनाः ओउःत झ्यान्ते परमेस्वर्इ तोती गम्ओ कुरा ताप्ताक्साकायः येसु ख्रीस्कोः कुरा ङ्हाम्साकायः ह मान्तालम् ओउः रौ जीङः दोःलेःनै। 23 ख्रीस् वाङ्धाङ्माःखाहाङःपाय् ङी सबैकायः ऐन्इ ग्रक्आतय्ही ङीइ ङ्हाम्सा खेःओ येसु ख्रीस्कोः कुरा छ्यानःतोक्हाङः ह ओउः ऐन्इ ग्रक्ओसै दल्ताक्आतय्ही। 24 ओउः ऐन्पाय् दोह्लो लेखा खेःनाः दाय्ह्सा। गुरुलो लेखालेः ङीकायः स्यालःती ख्रीस्कःताङ् आलःआतय्ही। आलःआक्तीको ङी ओउःकायः ङ्हाम्ती परमेस्वर्कोः मीक्हाङः पेतो स्याव्नाःतय्ही। 25 फेरी ओउःत ङ्हाम्आक्तीको ओउः ऐन्पाय् ङीकायः परल 26 दोह् हायःती दाय्ह्सा येसु ख्रीस्कायः ङ्हाम्ती झ्यान्ते द्याह् नीङ् सबै परमेस्वर्कोः चोःलम् स्याव्तीतेः मुतेःनै। 27 नीङ् ख्रीस्कोः बाप्तीस्मा त्याक्तेःआकानी ओउःत खेःओ नीङ् ख्रीस्कुस् ब्राङ्तेःनै। 28 ओउःत ख्रीस्कुस् ब्राङ्तो स्याव्आक्तीको नीङ्पाय् यहुदीया यहुदी खेःमालो मान्ताया परमेस्वर्इ दोक्ती तोउलु। नोकरीया नोकरी खेःमालोया गोय्चोःया मोमःचोःया ओउःइ सु खेःयाकायःमा दोक्ती तोउलु सबै ख्रीस्कुस् यातैज्याङ् स्याव्तेःनै। 29 फेरी सबै ख्रीस्कोः स्याव्तेःनै त खेःया आब्राहाम्कोः प्लोमःदाने मोमःदाने स्याव्ती झ्यान्ते ओउःकायः तोती गम्ओ कुरापाय् नीङ्मा दोःतेःनै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.