गालाती 2 - चेपाङ1 ओहाङःसैको चौध बर्स स्याव्आक्तीको ङा बर्नाबास्कुस्इ यरुसालेम्ताङ् द्यान्ह्आलाङः तीतस्कायःमा लात्ती आलःआलाङः। 2 परमेस्वर्इ ङाकायः “लौ आल्अ दा” त तोती झ्यान्ते यरुसालेम्ताङ् आल्आलाङः। ओहाङः आल्ती ङ्हाम्ओलम्कोः ताङ्ह्ओ मान्ता त तोओलम्कुस् क्रुस्आलाङः। ओउःमयःकुस् झुङ्आले क्रुस्ती क्रुस्तोक्हाङः “ङाइ ङ्हा जाङ्ह्ओ काम्मा जाङ्ह्धै मुओ काम्मा आह्रे स्याव्लाम्” त दाय्ह्ती म्हर्ती यहुदी खेःमालोलम्कायः ङाइ दोह् दोह् पेओ समचार् तोओ खेःतो ओउः सबैलेः ओउः ताङ्ह्ओ मान्तालम्कायः ल्हाक्ती छ्यानःआलाङःसु। 3-4 ओउः बेलाहाङःपाय् यात्नीस्चाक् दोङ् ङ्हाम्ओ खेःमालो मान्तालम्इ अरुइ चीःमाःत वाङ्ती ङाकुस् मुओ एलेनी देस्सै वाङ्ओ तीतस्कायः यहुदीकोः पुन् तात्सा जवओलेः जाङ्ह्ताक्सा बोङःनीतो ओउःत हायःसा ओउः ताङ्ह्ओ मान्तालम्इ ङाइ छ्यानःओ कुराकुस् ङ्र्याःती झ्यान्ते ताक्थासल। ओउः दोङ् ङ्हाम्मालो मान्तालम्इपाय् “ओउःमयःइ येसु ख्रीस्कायः ङ्हाम्आक्तीको यहुदीकोः ऐन् फेआकानी यादो” त गाल्तुम्ती योसाकायः वाङ्ती ङीकायः फेरीलेः ऐन् जाङ्ह्ओलम् जाङ्ह्सा बोङःताङीतो 5 ङीपाय् येसु ख्रीस्इ तोओ कुराखे पेतो चीःती ओउःमयःइ तोओखे दोह्मा सायःङुसुलु ओउःत झ्यान्ते ख्रीस्कोः पेओ समचार्पाय् नीङ्कायः दोङ्सीलेःतेः मुबत्तेःनै बा। 6 ओउः ताङ्ह्ओ त तोओ मान्तालम्पाय् ओउःमयः ङ्हा सुखेलो खेःइतो ङापाय् दोह्तमा ताःङल परमेस्वर्इ सुकायःमा घार्तोलेः योनौ। ओउः मान्तालम्इपाय् ङाइ छ्यानःओ कुराहाङःसै चाङःती तोसा दोह्मा खाय्नीली। 7 यहुदीलम्कायः ओउः पेओ समचार् थोल्ह्ती तोसाकायः परमेस्वर्इ पत्रुस्खेकायः छ्युङ्ह्आकान्। ओउःलो लेखालेः यहुदी खेःमालोलम्कायः थोल्ह्ती तोसाकायः परमेस्वर्इ ङाखेकायः छ्युङ्ह्आताङः एत ओउः ताङ्ह्ओलम्इ चीःआकानी। 8 फेरी परमेस्वर्इलेः पत्रुस्कायः यहुदीलम्कःताङ् ल्होक्आक्तीको ओउःकोः काम् पेतो जाङ्ह्ताक्आथै। ओउःलो लेखालेः ङाकायःमा यहुदी खेःमालोलम्कायः ल्होक्आक्तीको ङाकोः काम् पेतो जाङ्ह्ताक्आताङः। 9 परमेस्वर्इ ङाकायः एत हायःआताङः त चीःती याकुब् पत्रुस् युहना ओउः सुम्चाक् ताङ्ह्ओ त तोओलम्इ ङाकायःमा बर्नाबास्कायःमा नीची नीस्चाक्कुस् क्रुत् थ्योक्ती ब्राङ्काय्आलाङी। नीचीखेकायः यहुदी खेःमालोलम्कःताङ् आल्सा ल्होक्आताङःच ओउःमयःखे यहुदीलम्कःताङ् काम् जाङ्ह्लाङ् मुआकाय् 10 एत ल्होक्ताङःचतो “ङीकःहाङः मुओ नाःतो नाःमालो ह्र्यात् मान्तालम् बयःसाकायः म्हेःमाःत बयःनु” त दाय्ह्ती तोआताङःच ओउःत हायःसा ङा आन ग्याओ खेःङोतो। 11 ओउःतलेः हायःआकानी लोने अन्तीयोक् सहर्ताङ् वाङ्तोक्हाङः पत्रुस्इ पेमालो जाङ्ह्आकान् त झ्यान्ते ओउःकायः क्लुनःतीलेः जान्आलाङः 12 ङ्हाखे पत्रुस्पाय् ओउः यहुदी खेःमालो ङ्हाम्ओलम्कुस् जेःसा ग्याओ खेःतो लोनेखे यात्नीस्चाक् याकुब्इ ल्होक्ओ मान्तालम् वाङ्आक्तीको ओउः यहुदीकोः ऐन् जाङ्ह्ओलम्कः रैती पत्रुस्पाय् यहुदी खेःमालोलम्कःसै वेङःआकास। 13 ओहाङःसै ओउः अरु यहुदीकोः ङ्हाम्ओलम्मा पत्रुस्लो लेखा रैती पेतो हायःओ फेती वेङःआकायःइसी बर्नाबास्मा ब्रःती ओउःतलेः यहुदी खेःमालोलम्कःसै वेङःआकास। 14 ओउःमयःइ ख्रीस्कोः दोङ् पेओ समचार् सायःमाःत एत रेव्ओ काम् जाङ्ह्ओ च्यवःती ङाइ सबैकोः मीक्हाङः पत्रुस्कायः जान्ती “लौ नाङ्पाय् यहुदी मान्ता लेःतेःआः। तेन्छ्याङ्तेः यहुदी मान्तालो लेखा वाह्तेःल यहुदी खेःमालोलम्लो लेखा वाह्धै मुतेःनाः ओउःत झ्यान्ते दोह् हायःतीतेः यहुदी खेःमालोलम्कायः यहुदीकोः ऐन् जाङ्ह्तेःताक्तेःनौ” त दाय्ह्ती ओउःकायः तोआलाङः। 15 ङीपाय् ओत्ओहाङःसै यहुदीलम्आः खेःनाःतय्ही यहुदी खेःमालो परमेस्वर्कोः काम् जाङ्ह्मालोलम् खेःतय्हीली। 16 ओउःतलेः खेःनाःतय्ही ऐन्कोः कुरा जाङ्ह्ती परमेस्वर्कोः मीक्हाङः सुइमा जुगाङ् पेतोलेः स्याव्सा खाय्तय्ह्नीली। येसु ख्रीस्कोः कुरा ङ्हाम्आक्तीको ह पेतो छय्ङ्तोलेः स्याव्नाःतय्ही। एत चीःती ङी यहुदीलम्इमा परमेस्वर्कोः मीक्हाङः पेतो स्याव्साकायः येसु ख्रीस्कोः कुरा ङ्हाम्नाःतय्ह्नी ऐन्कोः कुरा जाङ्ह्तय्ह्नीली दोह् हायःती दाय्ह्सा ऐन्कोः कुरा जाङ्ह्ती परमेस्वर्कोः मीक्हाङः सुमा पेतो स्याव्इली। 17 ख्रीस्कायः ङ्हाम्ती ओउःकोः मीक्हाङः पेतो स्याव्सा बोङःतोक्हाङः ङी यहुदीलम्पाय् यहुदी खेःमालो ऐन् जाङ्ह्मालोलम्लो लेखालेः स्याव्नाःतय्ही त खेःया यात्नीस्चाक् “ख्रीस्इलेः मान्ताकायः रेव्तो जाङ्ह्ताक्चौ” त दाय्ह्ती दाय्ह्नै यादो। ओउःपाय् खेःल बा। 18 ओउः ङ्हा फेती वाय्ओ ऐन्कोः कुरा ङाइपाय् फेरीलेः जाङ्ह्चाङः त खेःया ओउःत हायःतीलेः रेव्तो स्याव्नाङः। 19 ऐन् जाङ्ह्सा बोङःतोक्हाङः ऐन्कोः कुरा पेतो जाङ्ह्माःत झ्यान्ते ङा सीतो स्याव्ङोतो द्याह् ऐन्कोः कुरा फेती ङा परमेस्वर्कोः काम् जाङ्ह्ती झ्यान्ते स्याक्नाङः। 20 ख्रीस्कुस् ङा क्ल्याय्ओ सीङःहाङः सीङोतो द्याह् ङा उह्ती रौ जीङः दोःतीलेः मुनाङः। लयः ह खेःल ख्रीस्कुस् ब्राङःती रौ जीङः दोःतीलेः मुनाङः बा। द्याह्पाय् ङाकायः राप्ती सीओ परमेस्वर्कोः चोःकायःलेः ङ्हाम्ती ङा आङ्हाङः मुतोक्हाङः रौ जीङः नाःती वाह्नाङः। 21 परमेस्वर्इ ङीकायः योनःती बयःओ कुरापाय् त्याक्माःत मुसा ङा गलकायःमा ग्याङल। ऐन्कोः कुरा जाङ्ह्धार्नालेः ङी पेतो स्याव्नाःतय्ही त खेःया लौ ख्रीस्पाय् आह्रेलेः सीओआः बा। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.