एफेसस् 6 - चेपाङ1 लौ हौलम्य परमेस्वर्कोः कुरा सायःती नीङ्कोः आमा आपाइ तोओ कुरा ग्याती जाङ्ह्नुदा 2 “नीङ्कोः आमा आपाकः ग्याती एङःन” त दाय्ह्ओ परमेस्वर्कोः आखरःहाङः लेखती मुनाः। ओउः हुकुम्कुस् तोती गम्ओ कुरामा मुनाः अरु हुकुम्कुस् तोती गम्ओ कुरा नाःआक्ल। 3 ओउः तोती गम्ओ कुरापाय् इलेःआः “ओउःत हायःती नीङ् ल्हाव्ह्दैबाङ्हाङः सेलः स्याव्ती तुतो याक्तेःनै” त दाय्ह्ओ मुनाः। 4 फेरी नीङ् आमालम् आपालम्य लयःकोः चोःलम्कायः ल्हुङ् मल्ह्सीःओ जान्तेःचानी। ओउःमयःकायः पेतोलेः प्रभुकोः कुरालेः स्यान्ती स्यास्नु। 5 ओहाङःसै नीङ् नोकरीलम्य ख्रीस्कः ग्याती एङःओलो लेखालेः नीङ्कोः मालीक्लम्कः ग्याती एङःती ओउःमयःइ बयःओ काम्लम् म्ह्युङ्ती जाङ्ह्नु दा। 6 मालीक्कोः मीक्हाङः झुङ्आले काम् पेतो जाङ्ह्तेःचानी। खेःल परमेस्वर्कायः म्रोताक्ती ख्रीस्कोः नोकरीलो लेखा गलकायःमा ग्याओ ल्हुङ्इ काम् पेतो जाङ्ह्नु दा। 7 मान्ताकायः ह म्रोताक्सा बोङःतेःचानी ल्हुङ् धङ्ती जाङ्ह्ती परमेस्वर्कायः म्रोताक्तेःपानी। 8 ओहाङःसैको नोकरीमा नोकरी खेःमालो मान्तामा सुखेलोइ काम् पेतो जाङ्ह्नानी ओउःखेइ परमेस्वर्कःसै लोनेः दोःलेःनै ओउःत चीःतेःपानी। 9 फेरी नीङ् मालीक्लम्इमा नीङ्कोः नोकरीलम्कायः पेतो हायःती खह्र्तोलेः जान्तेःचानी। ओउःमयःकोः मालीक् नीङ्कोः मालीक्मा लाङ्काहाङः मुओ प्रभु परमेस्वर् लेःआः बा एतलेः चीःतेःपानी। ओउःइ सुकायःमा घार्तीलेः योतेःनै बा। 10 लौ उया पुःचोङ् हौचोङ्य प्रभुकोः ताङ्ह्ओ ग्वम् दोःती ग्रमःत मुन दा। ओउःत हायःती नीङ्इ दोह् खेःयामा हायःसा खाय्तेःनानी। 11 सैतान्इ आन माःरेव् जाङ्ह्ती नाङ्कायः क्लीमःसा बोङःतेःनै ओउःत झ्यान्ते परमेस्वर्इ बयःओ आङ्तर्ज्यु काह्तर्ज्यु नाय् त्याक्ती लावनीङ्सी। 12 ङी मान्ताकुस् ह कायःकाय्सा खेःङीली सबै लाङ्काहाङःसै वाङ्ओ पेमालो हुकुम् बयःओलम्कुस्मा इ ल्हाव्ह्दैबाङ्कोः पेमालो ताङ्ह्ओ ग्वम्लम्कुस्मा कायःकाय्सा खेःनाङी बा। 13 ओउःत झ्यान्ते सीपाहीलो लेखा सबै परमेस्वर्इ बयःओ छ्याःसाकायः नाय् त्याक्नु दा। ओहाङःसैको पेमालोलम् वाङ्तोक्हाङः ओउःमयःइ नीङ्कायः क्लीमःसा जुगाङ् खाय्तेःइली नीङ् रैमाःत ग्रमःत मुसा खाय्तेःनानी। 14 ओउःत हायःती पेतो र्ययःती मुन परमेस्वर्कोः दोङ् कुरालेः त्याक्ती तोङःनाय्लो लेखा नीङ्कोः पाम्हाङः तोङःतेःपाःइसी। ख्रीस्कायः थेङा पेओ काम्लम् ग्ल्युप्ती लावनीङ्सी। 15 दोम्हाङः परमेस्वर्इ ल्हुङ् धोमाय्सीःओ पेओ समचार् दुप्ती गम्नीङ्सी। 16 नीङ् पेतो ङ्हाम्तेःनानी त खेःया ओउः ङ्हाम्ओपाय् परमेस्वर्इ बयःओ चक्वै नीङ्कोः क्रुत्हाङः मुनाः। ओउःत हायःती पेमालोलम्इ आप्ती ल्होक्ओ म्हेःलो खेःओ लाःलम् छ्याःसा खाय्तेःनानी। 17 तालाङ्हाङः परमेस्वर्इ बयःओ दल्ताक्सा खेःओ छत्ती ल्हुप्नीङ्सी अरु क्रुत्हाङः परमेस्वर्कोः ग्वालामःइ बयःओ आखरःलेः च्युपेलो लेखा ह्रीह्ती वाह्न। 18 गलकायःमा परमेस्वर्कोः ग्वालामःइ बयःओ कुराइ परमेस्वर्कः तेती तोनु दा। घीःती योती दीःमामाःत सबै ङ्हाम्ओलम्कायःमा तेती तोनु। 19 ङाकायःमा “लौ ओउःइ पेतोलेः ल्हुङ् फुती तोसा खाय्पनौ” त परमेस्वर्कः तेती तोनाङ्स। ओहाङःसै ङाइ परमेस्वर्कोः पेओ समचार् पेतोलेः छ्यानःसा खाय्नाङः। 20 इ कुरा तोसाकायः ङा ल्होक्ओ खेःतो द्याह्पाय् थुनती मुनाङः। मुसापाय् मुनाङः ङाइ तोसा खेःओ कुरापाय् “फुती नोःपनौ” ओउःतलेः ङाकायः परमेस्वर्कः तेती तोनु दा। 21 फेरी ङाकायःपाय् “गत स्याव्नाः” त नीङ्कायः दाय्ह्ती ल्हाक्साकायः ङीकोः आन राप्ओ हौ त्युखीकुस् त तोओ ल्होक्नेःनाङ्स। ओउःइ परमेस्वर्कोः काम् पेतोलेः युङ्ती जाङ्ह्नौ। 22 ओउःइपाय् ङाकोः कुरामा ङाकुस् मुओलम्कोः कुरामा ल्हाक्ती छ्यानःतेःनै ओहाङःसैको नीङ् ल्हुङ् रुःमाःत स्याव्तेःनै। 23 नीङ् सबै पुःचोङ् हौचोङ्लम्य धोमाय्ओमा अरुकायः राप्ओमा पेतो ङ्हाम्ओ ल्हुङ्मा परमेस्वर् आपाइमा बयःतेःपनै ङीकोः प्रभु येसु ख्रीस्इमा ओउःतलेः बयःतेःपनै। 24 फेरी ङीकोः प्रभु येसुकायः दोङ् दीःमामाःत राप्ओलम्कायः परमेस्वर्इ योनःती योपाःथास। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.