एफेसस् 5 - चेपाङ1 नीङ्पाय् परमेस्वर्इ आन राप्ओ चोःलम्लेःतेःइ ओउःत झ्यान्ते ओउःलो लेखालेः पेओ जाङ्ह्नु दा। 2 ख्रीस्इपाय् ङीकायः राप्ती ङीकायः रौ जीङः दोःताक्साकायः सीती लयःकोः जीङःपाय् पेतो सय्ङ्ओ धुप् उलःओलो लेखालेः परमेस्वर्कायः म्रोताक्ती ल्हाआकान्। इतलेः ङीमा राप्ओ ल्हुङ् दोःती गलकायःमा वाह्इ। 3 नीङ्पाय् परमेस्वर्कोः छय्ङ्ओ मान्तालेःतेःइ ओउःत झ्यान्ते नीङ्कःहाङः सु खेःआमा ल्हास्या ल्हुङ्या चोरःओ लुङ्या रेव्ओ ल्हुङ्या दोह्या स्याव्लाम्। 4 रेव्तो नोःओमा थ्यावःओ कुरामा गलमा नोःमाःत सबैकायः परमेस्वर्कायः “च्युता” त तोतेःपानी। 5 इ दोङ् कुरा लेःआः बा ल्हास्या मान्तामा चोरःओ मान्तामा रेव्ओ मान्तामा ओउःमयः द्यव्ता मानओ मान्तालो लेखालेः परमेस्वर्मा ख्रीस्कोःमा राजीहाङः दोह्मा दोःइली। 6 “ओउःत हायःसा पेमालो खेःल” त माःती नोःओपाय् सायःतेःचानी ओउःत पेमालो हायःओलम्कायः परमेस्वर्इ ल्हुङ् मल्ह्ती झ्यान्ते न्युम्ह्ताक्नाःथास। 7 ओउःत माःओलम्कुस् गलमा वाह्लाम्। 8 नीङ्पाय् ङ्हाखे च्याक्ओ ल्हुङ्लेः नाःती वाह्ओ खेःतेःइतो द्याह्खे प्रभुइ बयःओ थोङ्ओ ल्हुङ्लेः दोःती वाह्तेःनै। 9 ओउःत वाह्ओ त खेःया दोङ् पेओ काम् स्याव्नाः। 10 ओहाङःसैको परमेस्वर्कायः म्रोताक्सा कुराकायः बोङःनु दा। 11 च्याक्ओ ल्हुङ् नाःओलम्इ आह्रे काम् जाङ्ह्नानी। ओउःमयःकुस् ब्राङ्ती वाह्माःत ओउःमयःकोः रेव्ओ काम्लम्मा फुःसा खेःतो। 12 ओउःमयःइ नुस्ती जाङ्ह्ओ काम्लम्पाय् ओउःच्युक् रेव्ओलेः त झ्यान्ते ल्हाक्ती नोःसाकायः रास्सीःओ लेःआः बा। 13 दोह् दोह्लो थोङ्ओहाङः फोल्ह्तीलेः मुनाः ओउःकोः दोङ् रुप्लेः पेतो च्यवःनाः। 14 फेरी पेतो च्यवःताक्ओपाय् थोङ्ओ लेःआः। एतलेः लेखती मुनाः “अ नाङ् एनःती मुओ चाक्य सीओलम्सै उह्ती च्योक्तेःपाः ओहाङःसै ख्रीस्इपाय् थोङ्तेःताक्तेःनाः” त दाय्ह्ओ लेखती मुनाः। 15 नीङ् थोङ्ओहाङः वाह्लेःतेःनै ओउःत झ्यान्ते पेतो व्हाय्तो चीःती वाह्न आह्रे चीःओ मनःओ मान्तालो लेखा वाह्तेःचनै। 16 तेन्छ्याङ्पाय् पेमालो साल्लम् वाङ्ती मुधाङ्नाः ओउःत झ्यान्ते पेओ काम्लम् म्ह्याङ्ती जाङ्ह्नु दा। 17 एत चीःमाःत जाङ्ह्तेःचानी परमेस्वर्कोः ल्हुङ्तुक् पेतो चीःती जाङ्ह्सा खेःतो। 18 ओहाङःसैको हान् तुङ्ती ङोतेःचनै। हान्इ ङोताक्ओलम् आन ब्रःती रेव्तो जाङ्ह्नानी। ओउःत हायःमाःत परमेस्वर्कोः ग्वालामः दोःती 19 लयःमयःकुस् परमेस्वर्कोः भजन् गीत्लम्कोः कुरा नोःकाय्न लयःकोः ल्हुङ्हाङः परमेस्वर्कायः ताङ्ह्ताक्ओ गीत्लम्मा मेन। 20 गलकायःमा दोह् खेःयाकायःमा प्रभु येसु ख्रीस्कोः मय्ङ् पेह्ती ङीकोः परमेस्वर् आपाकायः “च्युता” त दाय्ह्ती तोचाक्नु। 21 नीङ्पाय् परमेस्वर्कः एङःती झ्यान्ते नीङ्कःहाङः याःयात्चाक्इ अरुइ तोकाय्ओ कुरा सायःती ग्याकाय्न। 22 लौ मोमःचोःलम्य नीङ् प्रभुइ तोओ कुरापाय् ग्याती सायःतेःनानी ओउःतलेः नीङ्कोः लयःकोः बुधाइ तोओ कुरामा ग्याती सायःतेःपानी। 23 दोह् हायःती दाय्ह्सा ङ्हाम्ओमयःपाय् ख्रीस्कोः आङ्लो लेखा मुनै। ओउःमयःकोः पुःओमा दल्ताक्ओमा ख्रीस् लेःआः ओउःतलेः बुधाइ बुधीकायःमा पुःनौ। 24 ओउःत झ्यान्ते दोह् खेःयाकायःमा लयःकोः बुधाइ तोओ कुरा बुधीलम्इ सायःसा खेःतो ओउः ङ्हाम्ओलम्इ ख्रीस्कायः सायःओलो लेखालेः। 25 ख्रीस्इपाय् लयःकोः ङ्हाम्ओलम्कायः आन राप्ती झ्यान्ते ओउःतलेः नीङ् गोय्चोःलम्इमा लयःकोः बुधीकायः राप्ती नाक्नु। ख्रीस्इपाय् ङ्हाम्ओलम्कायः आन राप्ती झ्यान्ते ओउःमयःकायः दल्ताक्साकायः सीलेःआ। 26 ओउःत हायःती ओउःमयःकायः तीःइमा नोःराय्इमा जय्लनःती सबै जय्कुमःत स्याव्ताक्आकान्। 27 ओहाङःसै दोह्मा पेमालो दोह्मा रेव्तो मुमाःत जुगाङ् पेतो नीङ्तोलेः स्याव्ती झ्यान्ते लयःकःताङ् रोम्नौ। 28 ओउःतलेः गोय्चोःलम्इ लयःकोः आङ्लो लेखालेः लयःकोः बुधीकायः नाक्ती गम्सा खेःइतो। 29 लयःकोः आङ्कायः सुमा झाक्माःत मुइली। खेःल मान्तालम् लयःकोः आङ्कायः पेतो नाक्ती स्यास्ती जेःगामा दोह्मा बयःनाःइसी। ओउःलो लेखालेः प्रभुइ ङ्हाम्ओलम्कायः नाक्ती स्यास्नाःथास। 30 दोह् हायःती दाय्ह्सा ङी ङ्हाम्ओलम्पाय् ख्रीस्कोः आङ्ज्याङ्लो लेखा मुनाःतय्ही। 31 “लौ ओउःत झ्यान्ते गोय्चोःपाय् लयःकोः आमा आपाकोः कीम् फेती लयःकोः बुधीकुस् भेनाःच। ओहाङःसैको ओउःनीस् पय्क्चाःपाय् आङ् ब्राङ्ती काःतय्ङ्ह्ती यातैज्योः मान्तालो लेखा स्याव्नाःच” त दाय्ह्ओ परमेस्वर्कोः आखरःहाङः लेखती मुनाः। 32 इ कुराकोः तुङः आन जोआयःतो लेःआः खेःनाः बा। ङाइ द्याह् ख्रीस्कायःमा ओउःकायः ङ्हाम्ओलम्कायःमा नोःनाङः। 33 ओउःतलेः नोःङोतो सबै गोय्चोःलम्इ लःलयःकोः बुधीकायः लयःकोः आङ्लो लेखालेः राप्पानी। मोमःचोःलम्इमा लःलयःकोः बुधाकः एङःपनै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.