एफेसस् 4 - चेपाङ1 ङा पावुल् त तोओ प्रभुकोः काम् जाङ्ह्साकायः थुनती मुनाङः। थुनती मुतोक्हाङः ङाइ द्याह् इत तेती तोनेःनाङ्स। लौ गतलो पेतो स्याव्साकायः परमेस्वर्इ गोत्तेःआकाय् ओउःतलेः पेतो वाह्ती मुन। 2 मीओ ल्हुङ् दोःती अरुकायः राप्ती झ्यान्ते खह्र्तो तोलाम् अरुकः रेन्ह्तोलेः ल्हुङ् मल्ह्तेःचनै। 3 परमेस्वर्कोः ग्वालामःइ ब्राङ्तेःताक्तेःआकाय् ओउःत झ्यान्ते गलमा काय्काय्माःत यातैज्योः स्याव्ती मुसाकायः बोङःनु। 4 ख्रीस्कोः आङ्मा यातैज्योःलेः ओउःकोः ग्वालामःमा यातैज्योःलेः। नीङ्कायःपाय् परमेस्वर्इ यातैज्योः लोने दोःसा पेओ कुरा त्याक्सा थेङामा गोत्तेःआकाय्। 5 प्रभुमा यातैज्योःलेः ङ्हाम्ओ कुरामा यातैज्योःलेः बाप्तीस्मामा यातैज्योः लेःआः। 6 फेरी सबैकोः परमेस्वर् आपामा यातैज्योः लेःआः। ओउःपाय् सबैकोः प्रभु लेःआः सबै काम् जाङ्ह्ताक्लेःनौ सबैहाङः मुलेःनाः। 7 ओहाङःसैको ङीकायःपाय् ख्रीस्इलेः लःलयः जोक्कायः छ्युङ्ह्तीलेः बयःआतय्ही। 8 “त्यावःअ लाङ्काताङ् लन्ह्ओ बेलाहाङः ओउःइ नाःतो क्लीमःओ बीरोत्लम्खेकायः लात्ती स्यालःआकान् मान्तालम्खेकायः थोक्लम् बयःआथास” त दाय्ह्ओ आखरःहाङः लेखती मुनाः। 9 द्याह् “ओउःपाय् लन्ह्आ” त दाय्ह्ओ मुनाः ओउःत खेःओ लन्ह्ओकोः ङ्हासै ओउःपाय् कामःअ ल्हाव्ह्दैबाङ्ताङ् ग्ल्युङ्ह्आ। ग्ल्युङ्ह्आक्तीको ओउःसै लन्ह्आ। 10 फेरी ओउः ग्ल्युङ्ह्ओचाक्पाय् लोने जुगाङ् लाङ्काकोः त्यावःअ लन्ह्आ ओहाङः जुदा जोय्तोलेः आल्आ। 11 ओहाङःसैको ख्रीस्इलेः यात्नीस्चाक्कायः लयःकोः ल्होक्सा मान्तालम् स्याव्साकायः छ्युङ्ह्ती ग्वम् बयःआथास। अरुकायः लयःकोः कुरा छ्यानःती नोःसाकायः ग्वम् बयःआथास। अरुकायः ओउःकोः पेओ समचार् थोल्ह्ती तोसा ग्वम् बयःआथास अरुकायः ङ्हाम्ओलम्कायः स्यास्सामा स्यान्सा ग्वम्मा बयःआथास। 12 दोह्कायः बयःओ दाय्ह्सा परमेस्वर्कोः काम् पेतो जाङ्ह्सा थेङा ख्रीस्इलेः लयःकोः ङ्हाम्ओलम्कायः पेतो स्याव्ताक्साकायः बयःआथास। 13 ओहाङःसै ङी सबै ब्राङ्तोलेः परमेस्वर्कोः चोःकायः ङ्हाम्तीमा तय्ह्तीमा लोने ओउःलो लेखालेः ल्हुङ्तुक् चोक्तो स्याव्नाःतय्ही। 14 ओउःत स्याव्आक्तीको ङीपाय् व्हाय्धाङ्मालो हौलम्लो लेखा खेःतय्हीली। मारुःइ साङ्ह्ताक्ओ तीःलो लेखालेः इहाङः उहाङः स्यान्लाङ् आल्मामाःत पेमालो मान्ताकोः माःती स्यान्ओ कुराखे ङ्हाम्मामाःत 15 ङी दोङ् कुराखे अरुलम्कायः राप्तोलेः नोःती ङीकायः स्यालःओ ख्रीस्लो लेखा ताङ्ह्नाःतय्ही। ओउःखेपाय् तालाङ्लो लेखा मुनाः 16 ङी ङ्हाम्ओलम्खेपाय् आङ्लो लेखालेः मुनाःतय्ही। आङ्हाङः सबै क्रुत्लम् दोम्लम् तालाङ् यातैज्याङ् द्योप्काय्तीलेः मुनाः। ओउःत खेःओ ङी सबै यातैज्योः स्याव्ती लयःमयः राप्काय्ती काम् पेतो जाङ्ह्ती ताङ्ह्तोलेः स्याव्नाःतय्ही। 17 लौ इ प्रभुकोः कुरा तोनेःनाङ्स। द्याह्गोते परमेस्वर्कायः तय्ह्मालोलम्लो लखालेः आह्रे म्हर्ओ ल्हुङ्मा 18 च्याक्ओ ल्हुङ्मा स्याव्ती वाह्तेःचनै। ओउःमयः परमेस्वर्कःसै भेती मुनै। ओउःइ बयःसा जीङःपाय् दोःइली ओउःमयः ल्हुङ् चीःमाःत झ्यान्ते परमेस्वर्कःताङ् वाङ्सा ग्याइली। 19 फेरी ओउःमयःइ रास्सा चीःमाःत झ्यान्ते चन्ह्ओ ल्हुङ् दोःती सबै रेव्ओ ल्हुङ्कोः मोह्हाय्ओ ल्हास्या काम्लम् दोह्मा म्हर्माःत जाङ्ह्लेःनानी। 20 ओउःमयःखे ओउःतलेः मुइतो नीङ्खेइ ख्रीस्सै थे कुरालेः स्यान्तेःआकानी बा। 21 नीङ्कायः स्यान्ओ येसुकोः दोङ् कुरापाय् नीङ्इ सायःतेःआकानी माःर। 22 ओउःत झ्यान्ते नीङ्कोः ङ्हाकोः रेव्ओ ल्हुङ् फेती ओउः खाल्कोः ल्हुङ्कोः मोह्हाय्ओ काम् जाङ्ह्तेःचानी। ओउः ङ्हाकोः ल्हुङ्पाय् रेव्ती वाय्लेःनाः। 23 आने ओउः पेमालो ल्हुङ् फेती जुगाङ् पेओ रौ ल्हुङ् त्याक्नु। 24 ओहाङःसै नया मान्ता स्याव्तेःपै। ओउःपाय् दोङ् पेओ छय्ङ्तो परमेस्वर्लो लेखा लेःआः। 25 ओउःत झ्यान्ते माःओ कुरा फेती लयःमयःकुस् दोङ् कुरा ह नोःकाय्न ङी सबैलेः ख्रीस्कोः आङ् स्याव्ती यातैज्योः मुनाःतय्ही। 26 ल्हुङ् मल्ह्तोक्हाङः रेव्ओ काम् जाङ्ह्तेःचानी। न्याम् ब्लक्धाङ्माखा नीङ्कोः ल्हुङ् मल्ह्ओ क्युम्ह्ती वाय्पाः। 27 सैतान्कायः नीङ्इ पुःसा जुगाङ् ताक्लाम्। 28 क्रुत् ह्रन्ह्ओ मान्तापाय् ताः ताः कुःताःनुलु ओउःइ लयःकोः क्रुत्इ पेओ काम् जाङ्ह्पानी। ओहाङःसै ओउःइपाय् लयःकोः जेःगा तुङ्गा लेःसामा खाय्नानी नाःतो नाःमालोलम्कायः बयःसामा खाय्नानी। 29 नोःओ बेलाहाङः पेमालो खह्र्ओ कुरा नोःलाम् लुङ्ती छेङःकलःती पेताक्सा कुरा ह नोःन। 30 फेरी परमेस्वर्कोः छय्ङ्ओ ग्वालामःकायः लीह्ताक्लाम्। ओउःकोः ग्वालामःपाय् दोःआ त खेःया लोने वाङ्सा दीन्कायः नीङ् “ख्रीस्कोःलेः ल्हाङःती दल्ओ मान्ता स्याव्नै” त सबैकायः छ्यानःओ लेःआः। 31 लौ सबै लओ ल्हुङ् जीक्ओ ल्हुङ्पाय् फेनु। रेव्ओ खह्र्ओ कुरामा नोःलाम् अरुकायः रेव्तो हायःसा म्हर्लाम्। 32 ओउःत हायःमाःत अरु अरुकायः योनःती योती ओउःमयःइ नीङ्कायः ल्हुङ् मल्ह्ताक्तेःनै त खेःया लौ नीङ्कोः ल्हुङ् मल्ह्ओ स्याक्तेःपै। दोह् हायःती दाय्ह्सा नीङ्कःहाङः परमेस्वर् ल्हुङ् मल्ह्ओपाय् ख्रीस्इलेः स्याक्ताक्तेःआकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.