एफेसस् 3 - चेपाङ1 लौ ओउःत हायःतीलेः ङा पावुल् त तोओपाय् नीङ्कःहाङः येसु ख्रीस्कोः काम् जाङ्ह्साकायः थुनती मुओ मान्ताइपाय् नीङ्कायः परमेस्वर्कः तेती तोनेःनाङ्स। 2 नीङ् यहुदी खेःमालोलम्कायः “परमेस्वर्इ सबैकायः योनःती योतेःनै” त स्यान्ती तोसा काम्लेः ओउःइ बयःआताङः। ओउःपाय् नीङ्इ चीःतेःनानी माःर। 3 परमेस्वर्इ लयःकोः ल्हुङ्हाङः रय्ह्ओ अरुइ चीःमालो कुरापाय् ङाकायः छ्यान्ह्आताङः। इत ङाइ ङ्हाहाङः बल लेखनेःआलाङ्स। 4 ओउः ङाइ लेखओ कुरा पह्रआक्तीको ख्रीस्कोः ल्हुङ्हाङः रय्ह्ती गम्ओ कुरापाय् “ओउःइ इच्युक् चीःतीलेः लेखनौ” त ङाकायःतेः चीःसा खाय्तेःनेःनानाङ्स। 5 ओउः कुरापाय् उय्ह्लेकोः मान्तालम्खेकायः छ्यान्ह्आक्मालो खेःतो। द्याह् परमेस्वर्कोः ग्वालामःइ ओउःकोः छय्ङ्ओ छ्युङ्ह्ती ल्होक्ओ मान्तालम्खेकायःमा ओउःकोः कुरा छ्यानःती तोओलम्खेकायःमा छ्यान्ह्नाःथास। 6 ओउः कुरापाय् इलेःआः। ख्रीस्कोः पेओ समचार् ङ्हाम्आकानी त खेःया यहुदी खेःमालोलम् यहुदीलम्कुस् ब्राङ्ती यातैज्योः आङ्लो लेखा स्याव्ती येसु ख्रीस्कोः तोती गम्ओ पेओ कुरापाय् सबैलेः दोःआनै। 7 ओउः पेओ समचार् तोसा काम्पाय् परमेस्वर्इ ओउःकोः ग्वम् दोःताक्ती बयःआताङः। 8 ङापाय् परमेस्वर्कोः मान्तालम्कःहाङः अरुसै मीओ लेःआः ङ। अरुसै मीसापाय् मीलेःनाङः ओउः यहुदी खेःमालोलम्कायः ख्रीस्कोः आन पेओ दप्सा खाय्मालो कुरालम्पाय् “नीङ्कायःमा मुलेःनाः” त थोल्ह्ती तोसाकायःमा ङाकायःलेः छ्युङ्ह्ती बयःआताङः। 9 फेरी परमेस्वर्कोः रय्ह्ती गम्ओ कुरापाय् “गत स्याव्नाः” त सबैकायः छ्यानःसाकायःमा बयःआताङः। ओउः रय्ह्ओ कुरापाय् उय्ह्लेहाङःसै ओउः ख्रीस्कुस् सबै थोक् जाङ्ह्ओ परमेस्वर्इपाय् नुस्ती गम्आकान् ओउःत झ्यान्ते मान्तालम्कायः छ्यानःसा ताक्आक्मालो खेःतो। 10 ओउःत हायःधार्नालेः ख्रीस्कायः ङ्हाम्ओलम्इ तेन्छ्याङ् परमेस्वर्कोः सबै व्हाय्ओ कुरालेः लाङ्काकोः प्रभुलम्कायःमा ताङ्ह्ओलम्कायःमा चीःताक्सा खाय्नानी। 11 एतलेः परमेस्वर्इ ङ्हाहाङःसै रय्ह्ती गम्ओ कुरापाय् ङीकोः प्रभु येसु ख्रीस्इ जाङ्ह्सा थेङा ल्होक्आथै। 12 येसु ख्रीस्कायः ङ्हाम्ती ओउःकुस् ब्राङःती परमेस्वर्कःताङ् फवःतीलेः आल्सा खाय्नाःतय्ह्नी। 13 ओउःत झ्यान्ते नीङ्कायः ङा लीह्सीःओ गोरःनाङः त खेःया “लौ ल्हुङ् घ्युम्तेःचनै” त तोनेःनाङ्स। इ लीह्सीःओपाय् सबै नीङ्कायः पेतो स्याव्ताक्सा थेङालेः गोरःनाङः। 14 ओउःत झ्यान्ते नीङ्कायः ङाइ परमेस्वर् आपाकःताङ् बाःती आन तेती तोनेःनाङ्स। 15 ओउः आपाकोः मय्ङ्पाय् लाङ्काहाङःमा ल्हाव्ह्दैबाङ्हाङःमा सबै कीम्कोः आपालम्इ त्याक्नानी। 16 ओउःकोः नाःतो नाःओ गह्र्सै नीङ्कायः ओउःकोः ग्वालामःइ ग्वम् दोःताक्तेःपै ओहाङःसै नीङ् ल्हुङ् ग्रमःत स्याव्तेःनै। 17 फेरी नीङ्इ ख्रीस्कायः ङ्हाम्ती झ्यान्ते ओउःपाय् नीङ्कोः ल्हुङ्हाङः पोक्ती मुबत्तेःपै ओउःत ङाइ परमेस्वर्कः तेती तोनेःनाङ्स। ओहाङःसैको पेओ राप्ओ ल्हुङ् दोःती 18 ख्रीस्कोः राप्ओपाय् गुच्युक् ताङ्ह्जम् ताङ्ह्ओलेः खेःमाल त नीङ्मा अरु ङ्हाम्ओलम्कुस्इ चीःसातेः खाय्तेःनानी। 19 ओउःकोः राप्ओ चीःसापाय् चीःतेःनानी जुगाङ्लेः चीःसा खाय्तेःनीली। ओहाङःसै परमेस्वर्कःसै सबै दोःतेःपै तमा तेती तोनेःनाङ्स। 20 ङी झाक्ती तेती तोओ कुरासै न्हाङ्तोलेः जाङ्ह्साकायः परमेस्वर्इ ओउःकोः ग्वम् बयःनाःतय्ही। 21 ओउःत ग्वम् बयःओ परमेस्वर्कायःपाय् सबै ङ्हाम्ओलम्इमा येसु ख्रीस्इमा तेन्छ्याङ्मा लोनेःमा गलकायःमा ताङ्ह्ताक्पाःथै। ओउःच्युक्लेः तेनाङः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.