एफेसस् 2 - चेपाङ1 ङ्हापाय् नीङ्इ रेव्तो काम् जाङ्ह्ती झ्यान्ते सीती वाय्ओलम् खेःतेःइतो। 2 ओउः बेलाहाङः नीङ् ल्हाव्ह्दैबाङ्कोः मान्तालम्लो लेखा पेमाःतो वाह्ती ओउः लान्कोः राजाकोः कुरा ङ्हाम्तेःआकानी। ओउः लान्कोः राजापाय् तेन्छ्याङ्कोः परमेस्वर्कायः ङ्हाम्मालो मान्तालम्कोः हुकुम् बयःसा राजा लेःआः। 3 ङीमा ङ्हापाय् ओउःमयःकुस् वाह्ती लयःकोः ल्हुङ्कोः रेव्तो मोह्हाय्ओ झाक्ती जाङ्ह्आतय्ह्नी। ओउःत हायःती झ्यान्ते अरु मान्तालो लेखा ङीकःमा परमेस्वर् ल्हुङ् मल्ह्तो मुओ खेःतो। 4 ओउःत स्याव्तय्हीतो परमेस्वर्इपाय् ङीकायः ओउःच्युक् राप्ती झ्यान्ते ङीकायः आन योनःती योतीलेः 5 ङी रेव्ओ काम् जाङ्ह्ती सीती वाय्सा खेःओ बेलाहाङः ओउःइ ख्रीस्कुस्लेः रौ जीङः बयःआतय्ही। ओउःतलेः परमेस्वर्इ नीङ्कायः राप्तीमा योनःती योती दल्तेःताक्तेःआकाय्। 6 ओहाङःसैको ङीकायःपाय् येसु ख्रीस्कुस् ब्राङ्ताक्आक्तीको ओउःकुस्लेः ङीकायः उह्ती रौ जीङः दोःताक्ती लाङ्काकोः थाव्हाङः च्युङःताक्आतय्ही। 7 एतलेः येसु ख्रीस्कुस् परमेस्वर्इ ङीकायः गुच्युक् पेतो राप्ती बयःआतय्ही त गलकायःमा छ्यानःसा थेङा लाङ्काहाङः च्युङःताक्आतय्ही। 8 नीङ् ख्रीस्कोः कुरा ङ्हाम्ओलम्पाय् परमेस्वर्इ योनःती योती दल्तेःताक्तेःआकाय् ओउःत हायःओपाय् नीङ्इ जाङ्ह्ओ काम् खेःल परमेस्वर्इ लयः जाङ्ह्ओआः बा। 9 सुइ खेःयामा लयःकोः काम् जाङ्ह्ती दल्तो स्याव्इली ओउःत झ्यान्ते सुइमा लयःकोः नेह्रो ओर्ताक्सा खाय्इसीली। 10 ङीकायःपाय् ओउःइ ङ्हा रय्ह्ती गम्ओ काम्लम् जाङ्ह्ती वाह्साकायःलेः परमेस्वर्इ ख्रीस्कुस्इ जाङ्ह्आतय्ही। 11 लौ नीङ् यहुदी मान्ता खेःमालोलम्पाय् “पुन् तात्ओ जवमालोलम्” त दाय्ह्ती यहुदीलम्इ तोतेःआकाय्। ङ्हापाय् नीङ् गतलो खेःतेःइतो दाय्ह्सा। 12 ओउः ङ्हाम्धाङ्मालो बेलाहाङःपाय् नीङ् ख्रीस्सै थेथे खेःआक्तेःइतो फेरी यहुदीलम् खेःतेःइली त झ्यान्ते परमेस्वर्इ तोती गम्ओ कुरा दोःतेःआक्तेःइली। ल्हाव्ह्दैबाङ्हाङः वाह्तोक्हाङः नीङ्इ परमेस्वर्कायः चीःमाःत “ङीजा गलमा पेतोलेः स्याव्तय्हीली” त म्हर्तेःआकाय्। 13 ओउःतलेः खेःआक्तेःइतो ख्रीस्इपाय् लयःकोः वयः होती सीधार्नालेः द्याह् ओउःकुस् ब्राङ्ती ङी यहुदीलम्कुस् ङ्र्याःतोलेःतेः स्याव्तेःनै द्याह्पाय् थेथे खेःतेःइली। 14 येसु ख्रीस्इलेः ङी यहुदीलम्पाय् नीङ् यहुदी खेःमालोलम्कुस् ब्राङ्ताक्आतय्ही। ङीकायः फाःकाय्ओ बार् वाय्ती झ्यान्ते द्याह् नीङ्पाय् ङीकोः बीरोत्लम् खेःतेःइली। 15 ओउःइ लयःकोः आङ् बयःती ऐन्कोः कुरा वाय्आक्तीको यहुदीलम्मा यहुदी खेःमालोलम्मा यातैज्योः स्याव्ताक्आतय्ही। 16 ओहाङःसैको सबै यात्ज्योः स्याव्ताक्आक्तीको येसु ख्रीस्इ ओउःमयःकायः परमेस्वर्कुस् ब्राङ्ताक्आकान्। ओउः नीस् जात्पाय् द्याह् क्रुम्ह्काय्चल। 17 ओहाङःसैको ल्हाव्ह्दैबाङ्ताङ् वाङ्तोक्हाङः “लौ परमेस्वर्कःताङ् वाङ्सा दोःतेःनै” त दाय्ह्ती ख्रीस्इलेः परमेस्वर्कः द्याङ्तो मुओ यहुदीलम्कायःमा नीङ् लोक्तो मुओ यहुदी खेःमालोलम्कायःमा ओउः पेओ समचार्लेः थोल्ह्ती तोतेःआकाय्। 18 ओउःत तोधार्नालेः द्याह् ङी सबैकायः परमेस्वर्कोः ग्वालामःइ परमेस्वर् आपाकःताङ् वाङ्सा दोःताक्नाःतय्ही। 19 ओउःत हायःओलेः नीङ्पाय् द्याह् थे मान्तालम् खेःतेःइली द्याह्पाय् परमेस्वर्कोः मान्तालम्कुस्इ ओउःकोः चोःलम्मा राजीकोः मान्तालम्मा स्याव्तेःनै। 20 नीङ्पाय् ङीकुस्लेः परमेस्वर्इ लयःकोः मन्दीर् कीम्लो लेखा जाङ्ह्नौ। ओउः कीम्कोः तोस्बाङ्पाय् येसुइ छ्युङ्ह्ती ल्होक्ओमयःमा ओउःकोः कुरा छ्यानःती तोओलम्मा स्याव्नै। कीम्कोः मुल्बाङ्पाय् येसु ख्रीस् लेःआः। 21 ओउःइपाय् सबै ब्रक्तलेः यातैज्योः प्रभुकोः मन्दीर् कीम्लो लेखा स्याव्ताक्नै। 22 नीङ्मा सबैकुस् परमेस्वर्कोः ग्वालामःइ परमेस्वर्कोः याक्सा कीम् जाङ्ह्नौ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.