एफेसस् 1 - चेपाङ1 इ चेती ङा पावुल् त तोओइ नीङ् एफेसस्हाङः मुओ येसु ख्रीस्कायः ङ्हाम्तो वाह्ओलम्कायः लेखती ल्होक्नेःनाङ्स। ङाकायःपाय् परमेस्वर्इ लयः झाक्ती छ्युङ्ह्ती ल्होक्आताङः। 2 लौ ङाकोः परमेस्वर् आपाइमा ङाकोः प्रभु येसु ख्रीस्इमा नीङ्कायः योनःती योती झ्यान्ते ल्हुङ् धोमाय्तो स्याव्ताक्तेःपै। 3 ङीकोः प्रभु येसुकोः परमेस्वर् आपाकायः ताङ्ह्ताक्ती तोपाङःसु दोह् हायःती दाय्ह्सा ओउःइ ख्रीस्पाय् ल्होक्ती सबै लाङ्कासै दोःओ पेओ कुरा बयःआतय्ही। 4 ल्हाव्ह्दैबाङ् जाङ्ह्धाङ्मालोहाङःपाय् ओउःकोः मीक्हाङः पेतो छय्ङ्तो स्याव्ताक्सा थेङालेः परमेस्वर्इ ङीकायः छीङ्ह्आतय्ही। 5 ङीकायः राप्ती झ्यान्ते ख्रीस्कुस् ब्राङ्ताक्ती परमेस्वर्इ ङीकायः छीङ्ह्ती लयःकोः चोःलम् जाङ्ह्आतय्ही। ओउःत हायःओपाय् परमेस्वर्इ ङ्हाहाङःसैलेः लयः झाक्ती लोने जाङ्ह्आतय्ही। 6 ङीकायःपाय् ओउःतलेः आन पेतो योनःती योती झ्यान्ते लयःकोः ल्हुङ् गोरे चोःपाय् ल्होक्आतय्ही ओउःत हायःओकायः परमेस्वर्कायः जुगाङ् ताङ्ह्ताक्पाःथै। 7-8 ख्रीस्कोः लयःकोः वयःइलेः ङीकायः ल्हाङःती झ्यान्ते ङीकोः रेव्तो जाङ्ह्झ्याङ्कायः क्युम्ह्ती रेव्ओसै पेङ्कलःआतय्ही। एतलेः ओउःइ ङीकायः आन योनःती योती न्हाङ्तोलेः बयःआतय्ही। ओउःइ सबै व्हाय्तोलेः चीःती 9 ओउःइ ङ्हा झाक्ओ ख्रीस्इ जाङ्ह्ताक्सा कुरालेः रय्ह्तीलेः गम्आकान्. ओउः कुरापाय् ङ्हापाय् अरुकायः चीःताक्मालो खेःतो लोनेः ङीकायःलेः छ्यानःआतय्ही। 10 ओहाङःसैको क्रोःओ बेलाहाङःपाय् परमेस्वर्इ लाङ्काहाङःमा ल्हाव्ह्दैबाङ्हाङःमा ओउःहाङःकोः सबै थोक्लम्मा ख्रीस्कोः मीक्हाङः हुम्ती वानःसालेः खेःनाः ओहाङःसैको ख्रीस्पाय् सबैकःसै पुःनाः। ओउःत हायःसापाय् परमेस्वर्इ ङ्हाहाङःसै रय्ह्ती गम्ओ कुरा लेःआः। 11 सबै कुरालेः परमेस्वर्इ लयः झाक्ती जाङ्ह्नौ ओउःतलेः ङीकायःमा ङ्हाहाङःसै छीङ्ह्ती लोनेः ख्रीस्कुस् ब्राङ्ताक्ती लयःकोः मान्तालम् जाङ्ह्आतय्ही। 12 ओहाङःसैको ङी ख्रीस्कोः कुरा ङ्हा ङ्हाम्ओलम्इपाय् ओउःकायः लुङ्ती ताङ्ह्ताक्सा खाय्नाङःसु। 13 एतलेः नीङ्कायः दल्ताक्सा खाय्ओ दोङ् पेओ ख्रीस्कोः समचार्लेः नीङ्इमा सायःआक्तीको ङ्हाम्तेःआकानी। ङ्हाम्आक्तीको नीङ् मान्तालम्पाय् “ङाकोः मान्तालम् लेःआः इ” त छ्यानःसा थेङा परमेस्वर्इपाय् लयःकोः ङ्हाहाङःसै तोती गम्ओ ग्वालामः बयःतेःआकाय्। 14 ओहाङःसैको ओउः परमेस्वर्कोः धुर्ती गम्ओ ग्वालामः दोःआक्तीको ङी लोनेः दल्ताक्सा स्याव्ओ बेलाहाङः “परमेस्वर्कःसै दोःलेःनाः” त पेतोलेः चीःनाःतय्ह्नी ओउःत झ्यान्ते ङी सबैइलेः परमेस्वर्कायः ताङ्ह्ताक्नाःतय्ह्नी। 15 फेरी नीङ्कायःपाय् “येसु ख्रीस्कायः ङ्हाम्माताङःनानी अरु ङ्हाम्ओलम्कायः राप्माताङःनानी” त दाय्ह्ओ ल्हाक्ती तोओ कुरा सायःआलाङः। 16 ओउः कुरा सायःती झ्यान्ते ङाइ गलकायःमा परमेस्वर्कायः ताङ्ह्ताक्लेःनाङः। फेरी नीङ्कायःपाय् ङाइ आन तेती तोनेःनाङ्स। 17 ङीकोः प्रभु येसु ख्रीस्कोः ताङ्ह्ओ परमेस्वर् आपाकः तेतोक्हाङः दोह् कुरा तोनेःनाङ्स दाय्ह्सा ओउःइ लयः छ्यानःसा थेङामा नीङ्कायः व्हाय्तो चीःताक्सा थेङामा “लौ नाङ्कोः ग्वालामःपाय् बयःउसु” त आन परमेस्वर्कः तेती तोलेःनाङः। 18 ओहाङःसैको ल्हुङ् पेतो व्हाय्तो स्याव्आक्तीको परमेस्वर्कायः पेतो तय्ह्ती झ्यान्ते “लोनेः दोह् दोह् पेओ कुरालम् त्याक्लाङ् वाङ्साकायः ओउःइ गोत्आतय्ही” त चीःतीलेः नीङ्इ आसती ल्युङ्ह्सा खाय्तेःनानी। “ङी ओउःच्युक् पेओ दोःनाःतय्ही” त चीःसामा 19 “ङी ङ्हाम्ओलम्कायः गुच्युक् पेओ ग्वम्इलेः काम् जाङ्ह्आतय्ही” त चीःसामा खाय्तेःनानी। 20 ओउःच्युक् ताङ्ह्ओ ग्वम्इपाय् ख्रीस् सीओ बेलाहाङः परमेस्वर्इ ओउःकायः उह्ती च्योक्ताक्ती ओउःकुस् लाङ्काहाङः लयःकोः ङोय्सैहाङः गुल्ह्दाङ् स्याव्ताक्ती गम्आथै। 21 ओहाङः ख्रीस्पाय् सबै द्यव्तालम्सै पुःमानाः सबै राजालम् प्रभुलम् तेन्छ्याङ्कोः हुकुम् बयःओलम्मा लोनेकोः हुकुम् बयःओलम्मा इ सबैकायः ख्रीस्पाय् पुःलेःनाः बा। 22 परमेस्वर्इ ख्रीस्कायः सबैकोः हुकुम् बयःसाचाक्लेः जाङ्ह्आथै सबै ङ्हाम्ओलम् पुःसाकायःमा परमेस्वर्इ बयःआथै। 23 मान्ताकोः तालाङ्कुस् ओउःकोः आङ्ज्याङ् यातैज्योः लेःआः। ओउःलो लेखालेः ख्रीस्कुस्लेः ङ्हाम्ओलम् यातैज्योः स्याव्नै। ओहाङःसैको ख्रीस्इपाय् सबै कुरा यातैज्योः ब्राङ्ताक्ती स्याव्ताक्नौ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.