कोलसी 4 - चेपाङ1 मालीक्लम्मा नीङ्कोः नोकरीलम्कायः पेतो हायःउसु। लाङ्काहाङः नीङ्कोः मालीक्मा मुलेःनाः एत नीङ्इ चीःसा खेःतो। 2 गलकायःमा परमेस्वर्कायः व्हक्तोलेः तेती तोझुङ्नु दा। ओउःकायः “च्युता” त दाय्ह्ती 3 ङीकायःमा परमेस्वर्कः तेती तोमानु। “ओउःमयःइ ख्रीस्कोः ङ्हा चीःआक्मालो नोःराय् थोल्ह्ती तोसा दोःताक्उ दै” त दाय्ह्ती ङाकायःमा ङाकुस् मुओलम्कायःमा परमेस्वर्कः तेती तोनु। ओउः कुरा थोल्ह्ती तोओकायः ङा द्याह् थुनती मुनाङः। 4 फेरी “ख्रीस्कोः कुरा दोङ्ह्तोलेः छ्यानःती नोःताक्उ” त दाय्ह्ती ङाकायः परमेस्वर्कः तेती तोमानु। ङापाय् एत दोङ्ह्तीलेः नोःसा खेःनाङः। 5 ङ्हाम्मालो मान्तालम्कायः तोतोक्हाङः आह्रे नोःमाःत व्हाय्तोलेः तोउसु। 6 ओउःत नोःओ कुरापाय् सायःगार्सीःआ स्याव्पाः ओहाङःसैको सबै मान्तालम्कोः व्हत्ओ कुराकायः पेतो त्याङ्नु दा। 7 ङा पावुल्कायः “गतलो मुनाः” त दाय्ह्सा ङीकोः आन राप्ओ हौ त्युखीकुस् त तोओ नीङ्कायः ल्होक्साकायः ल्होक्नेःनाङ्स। ओउःइपाय् ङीकुस् प्रभुकोः काम् पेतोलेः जाङ्ह्नौ। 8 ङीकोः कुरा सायःआक्तीको “ल्हुङ् धोमाय्तो स्याव्पै” त दाय्ह्ती ओउःपाय् नीङ्कायः ल्होक्नेःनाङ्स। 9 ओउःकुस्इ ङीकोः आन राप्ओ पेतो ङ्हाम्ओ हौ ओनेसीमस् त तोओ आल्नाः। ओउःपाय् ङ्हा नीङ्कःसै वाङ्ओ लेःआः। ओउःनीस्इ दाह्आक्तीको सबै कुरा ल्हाक्ती छ्यानःतेःनै। 10 ङाकुस् झ्याल्खानहाङः गम्ओ आरीस्तार्कस्मा बर्नाबास्कोः हौ मर्कस् त तोओमा ओउःनीस्इ नमस्ते ल्होक्तेःनै। मर्कस्कोः कुरा ङ्हालेः छ्यानःङोतो नीङ्कःताङ् वाङ्नाः त खेःया ओउःकायः रोम्नु दा। 11 फेरी जुस्तस् त तोओ यहोस्युआइमा नमस्ते ल्होक्तेःनै। आरीस्तार्कस्मा मर्कस्मा जुस्तस्मा यहुदी मान्तालम्कोः ओउः सुम्चाक् ह ङाकुस्इ परमेस्वर्कोः राजीकोः काम् जाङ्ह्नानी। ओउःमयःइ ङाकायः आन लव्ह्आताङः। 12 नीङ्कःसै वाङ्ओ एपाफ्रास्इमा नमस्ते ल्होक्तेःनै। ओउःइ ख्रीस्कोः काम् आन जाङ्ह्नौ नीङ्कायः परमेस्वर्कः आन ग्याती तेती तोभनाङ् मुलेःनाः। “ओउःमयःइ नाङ् झाक्ओ काम् जाङ्ह्ती जुगाङ् पेतो ङ्हाम्ती ल्हुङ् चोक्तो ग्रमःत मुपनै” त नीङ्कायः दाय्ह्ती परमेस्वर्कः तेती तोझुङ्नौ। 13 दोङ्सी दाय्ह्भनाङ् नीङ्कायःमा लाओदीकीयाहाङः मुओ ङ्हाम्ओलम्कायःमा हीएरापोलीस्हाङः मुओ ङ्हाम्ओलम्कायःमा ओउःइ आन त्युस्तीलेः काम् जाङ्ह्तेःनै। 14 फेरी ङीइ आन राप्ओ दाक्तर् लुका त तोओइमा देमस् त तोओइमा नीङ्कायः नमस्ते ल्होक्तेःनै। 15 लौ ओउः लाओदीकीयाहाङः मुओ पुःचोङ् हौचोङ्लम्कायः नमस्ते बयःनु। न्युम्फस्कायःमा ओउःकोः कीम्हाङः हुम्लाङ् वाङ्ओ ङ्हाम्ओलम्कायःमा नमस्ते बयःनु। 16 नीङ्इ इ चेती पह्रआक्तीको ओउः लाओदीकीयाहाङः मुओ ङ्हाम्ओलम्कःताङ् पह्रसाकायः ल्होक्नु। आने ओउःमयःकः ल्होक्ओ चेतीमा नीङ्इमा पह्रती योनु। 17 “प्रभुइ बयःओ काम्पाय् दप्ती जाङ्ह्उ दा” त दाय्ह्ती आर्खीपस्कायः तोनु। 18 ङा पावुल्इ नमस्ते त लयःकोः क्रुत्इलेः लेखती ल्होक्नेःनाङ्स। ङाकायः थुनती मुलेःनाः त म्हेःलाम्। लौ नीङ्कायः परमेस्वर्इ योनःती योतेःपै। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.