कोलसी 1 - चेपाङ1-2 इ चेती ङा पावुल्मा ङीकोः हौ तीमोथीमा नीची नीस्चाक्इ नीङ् कोलसी सहर्हाङः मुओ येसु ख्रीस्कायः ङ्हाम्ओ छय्ङ्ओ हौलम्कायः लेखती ल्होक्नेःनाङ्स। ङाकायःपाय् परमेस्वर्इ लयः झाक्ती झ्यान्ते येसु ख्रीस्इ छ्युङ्ह्ती ल्होक्आताङः। लौ ङीकोः परमेस्वर् आपाइ नीङ्कायः योनःती झ्यान्ते ल्हुङ् धोमाय्ताक्तेःपै। 3 ङीकोः प्रभु येसु ख्रीस्कोः परमेस्वर् आपाकायः तेती तोतोक्हाङः नीङ्कोः कुरा गीलती ङीइ गलकायःमा “च्युता” त तोनाङःसु 4 दोह् हायःती दाय्ह्सा “येसु ख्रीस्कायः गुच्युक् पेतो ङ्हाम्मानानी ओउःकोः मान्तालम्कायः गुच्युक् पेतो राप्मानानी” त दाय्ह्ती नीङ्कायः नोःओ सायःआलाङःसु। 5 “लाङ्काहाङः पेओ दोःनाःतय्ही” त दाय्ह्ओ ओउः पेओ समचार्कोः दोङ् कुरा ङ्हालेः सायःआक्तीको नीङ् चोङाय्तो स्याव्ती झ्यान्ते ङ्हाम्मातेःआकानी राप्मातेःआकानी। 6 “परमेस्वर्इ सबैकायः योनःती योती झ्यान्ते पेतो दोःताक्नाःतय्ही” त दाय्ह्ओ दोङ् कुरालेः सायःती चीःआक्तीको नीङ् पेतो वाह्ती ब्याव्तेःआकाय्। ओउः कुरापाय् सबै ल्हाव्ह्दैबाङ्हाङःमा आल्ती नीङ्कःहाङःलो लेखा ब्याव्ताक्नौ। 7 फेरी ओउः कुरापाय् ङीकुस् काम् जाङ्ह्ओ एपाफ्रास् त तोओइ स्यान्तेःआकाय्। ओउःइपाय् ख्रीस्कोः काम् ङीकायः पेतो जाङ्ह्नौ आने सबैइ ओउःकायः राप्नाःथै। 8 “परमेस्वर्कोः ग्वालामःइ आन राप्ताक्नानी” त दाय्ह्ती एपाफ्रास्इ नीङ्कोः कुरा ल्हाक्ती तोआताङी। 9 ओउः कुरा सायःआक्तीको नीङ्कायः ङीइ परमेस्वर्कायः दीःमाःत तेती “ओउःमयःकायः नाङ्कोः ल्हुङ्तुक् पेतो चीःताक्पानी। नाङ्कोः ग्वालामःइ सबै व्हाय्तोलेः चीःताक्पाःथास” त दाय्ह्ती तोनाङःसु। 10 ओहाङःसैको परमेस्वर् झाक्ओ कुरापाय् न्हाङ्तोलेः चीःती नीङ्इ सबै पेओ काम्लम् जाङ्ह्तीलेः वाह्ती झ्यान्ते ओउःकायः गलकायःमा म्रोताक्सा खाय्तेःनानी। 11 फेरी परमेस्वर्कोः सबैसै ताङ्ह्ओ आन पेओ ग्वम्सै नीङ् क्रोङ्तो ल्हुङ् दोःती सबै चोङाय्तोलेः गोरःसा खाय्तेःनानी। 12 ओउःत झ्यान्ते परमेस्वर् आपाकायः “च्युता” त तोनु। ओउःइ लयःकोः पेतो थोङ्ओ राजीकोः ङ्हाम्ओलम्कुस् नीङ्कायःमा मुसा बयःतेःआकाय्। 13 ङीकायःपाय् परमेस्वर्इ पेमालो च्याक्ओ राजीहाङःसै दल्ताक्ती लयःकोः ल्हुङ् गोरे चोःकोः राजीहाङः वानःती पोक्ताक्आतय्ही। 14 ओउःकोः चोःइ ङीकोः रेव्तो जाङ्ह्ओकायः लयःकोः आङ् ल्हाङःती क्युम्ह्ती म्हीत्ताक्आतय्ही। 15 ओउः ख्रीस्इपाय् ओउः च्यवःसा खाय्मालो परमेस्वर्लेः “गतलो खेःनाः” त छ्यानःनौ फेरी ओउः ख्रीस्पाय् सबैसै ङ्हा मुओआः सबैसै पुःलेःनाः। 16 दोह्खेलो नाःनाः लाङ्काहाङःमा ल्हाव्ह्दैबाङ्हाङःमा दोह्खेलो नाःनाः ओउः सबैलेः परमेस्वर्इ ख्रीस्कायः जाङ्ह्ताक्आथै। च्यवःसा खाय्ओ खाल्लम्मा च्यवःसा खाय्मालो खाल्लम्मा राजालम्मा हुकुम् बयःओलम्मा ताङ्ह्ओ खाल्लम्मा सबै परमेस्वर्इ ख्रीस्कायः जाङ्ह्ताक्आथै सबै ख्रीस्कायः थेङालेः जाङ्ह्ओआः बा। 17 ओउःपाय् सबैसै पुःलेःनाः। ओउःकोः ग्वम्इलेः सबै कुरा मुताक्लेःनौ। 18 फेरी ख्रीस्पाय् सबै ङ्हाम्ओलम्सै पुःनाः दोह् हायःती दाय्ह्सा ओउःपाय् सबैसै ङ्हा लेःआः। सीआक्तीको उह्ती च्योक्सा खेःओमा ओउःपाय् पुःलेःनाः ओउःत झ्यान्ते ओउः सबैसै ताङ्ह्लेःनाः। 19 ख्रीस्कायःपाय् परमेस्वर्इ लयःकोः ग्वम्मा ल्हुङ्तुक्मा “सबै ओउःकुस् मुपाः” त झाक्ती म्रोतीलेः तोआथै। 20 ओहाङःसैको ख्रीस्कायः ल्होक्आक्तीको ओउःपाय् क्ल्याय्ओ सीङःहाङः वयःती सीआ त झ्यान्ते परमेस्वर्इ सबै लयःकुस् ब्राङ्ताक्आकान्। लाङ्काहाङः मुओलम्मा ल्हाव्ह्दैबाङ्हाङः मुओलम्कायःमा ओउःइ सबैकायः लयःकुस् ब्राङ्ताक्आकान्। 21 ङ्हाखे नीङ् पेमालो ल्हुङ् नाःती रेव्ओ काम् जाङ्ह्ओ खेःतो ओउःत झ्यान्ते परमेस्वर्कोः बीरोत् स्याव्ती ओउःकुस् ब्राङ्सा खाय्तेःआक्नीली थेथे खेःआक्तेःइतो। 22 द्याह्खे ओउःकोः लयःकोः चोःइ आङ् ल्हाती सीआक्तीको नीङ्कायःपाय् परमेस्वर्इ लयःकुस् ब्राङ्ताक्तेःआकाय्। ओहाङःसैको नीङ् परमेस्वर्कोः मीक्हाङः पेतो छय्ङ्तो स्याव्तेःनै नीङ्कायः गाल्तुम्ओ कुरा दोह्मा नाःल। 23 नीङ् ङ्हाम्साकायः फेमाःत ग्रमःत मुती ओउः पेओ समचार्कोः कुरा चोङाय्ती झाक्तेःनै त खेःया परमेस्वर्कोः मीक्हाङः एतलेः मुसा दोःतेःनै। ओउः नीङ्इ सायःओ पेओ समचार् सबैकायः थोल्ह्ती तोओ लेःआः फेरी ओउः थोल्ह्ती तोओ काम् जाङ्ह्सा मान्ता ङालेः खेःनाङः। 24 नीङ्कायः पेतो स्याव्सा थेङा ङा लीह्तो गोरःसा त खेःया चोङाय्तीलेः मुनाङः दोह् हायःती दाय्ह्सा ख्रीस्कोः आङ् त तोओ सबै ङ्हाम्ओलम्कायः ख्रीस्कोः लीह्ओ दोह् दोह् दाह्धाङ्माःत मुलेःनाः ओउः लीह्ओलेः ङाइ द्याह् लयःकोः आङ्इलेः दप्साकायः गोरःनाङः। 25 लयःकोः मान्तालम्कायः ओउःकोः नोःराय् थोल्ह्ती तोसा काम् जाङ्ह्सा थेङा परमेस्वर्इ ङाकायः छ्युङ्ह्ती नीङ्कःताङ् ल्होक्आताङः ओउःत झ्यान्ते परमेस्वर्कोः नोःराय् ताप्ताक्साकायः ओउः जुदालेः स्यान्नेःनाङ्स। 26 ओउः नोःराय्पाय् उय्ह्लेहाङः सुइमा चीःसा खाय्आक्नीली सुकायःमा छ्यान्ह्आक्मालो खेःतो द्याह्खे ङ्हाम्ओलम्कायः परमेस्वर्इ लयः झाक्तीलेः छ्यान्ह्नाःथास। 27 फेरी ओउः ङ्हाम्ओलम्कायः छ्यान्ह्सा कुरा आन पेओमा ताङ्ह्ओ लेःआः एत परमेस्वर्इ सबै जात्कोः मान्तालम्कायः छ्यान्ह्आथास। ओहाङःसै ओउः छ्यान्ह्राय्पाय् इलेःआः। नीङ्कःहाङः ख्रीस् मुलेःनाः ओउःत झ्यान्ते लोनेः गुच्युक् पेओतेः स्याव्तेःनै त चीःती नीङ्इ आसती ल्युङ्ह्ती मुसा खाय्तेःनानी। 28 ओउः ख्रीस्कोः कुरा ङीइ थोल्ह्ती तोनाङःसु सबैकायः गानाक्ती व्हाय्तोलेः स्यान्नाङःसु। ओहाङःसैको सबै मान्ताकायः ख्रीस्इ छय्ङ्ताक्आक्तीको ङीइ ओउःमयःकायः परमेस्वर्कःताङ् दाक्सा खाय्नाङःसु। 29 ओउःत हायःसाकायः ङाइ आन त्युस्तीलेः काम् जाङ्ह्नाङः जाङ्ह्तोक्हाङः ख्रीस्कोः ताङ्ह्ओ ग्वम् दोःआक्तीको ह एतलेः जाङ्ह्सा खाय्नाङः। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.