खबरदुत 9 - चेपाङ1 फीलीप्खे सीजारीया देस्ताङ् दाह्ती वाङ्आ ओहाङःसैको यरुसालेम् सहर्हाङः सावुल् त तोओपाय् येसुकायः ङ्हाम्ओमयः “सात्पाःथास” त दाय्ह्ती प्रधान् पुरोहीत्कःताङ् दर्कास् तोलाङ् आल्आ। 2 “लौ ‘ओउः येसुकायः ङ्हाम्ओमयःकायः थुनपाःथास’ दाय्ह्ती ङाकायः चेती लेखधाङ्ची” त दाय्ह्ती सावुल्इ प्रधान् पुरोहीत्कायः दर्कास् बयःआकान्। “ओउः चेती लात्ती ङाइ दामास्कस् सहर्कोः थनःओ कीम्कोः मान्तालम्कायः छ्यानःआक्तीको ओउःमयःइ ओउःहाङः मुओ येसुकायः ङ्हाम्ओमयः चुम्सा ताक्चाःताङः। ओउः ङ्हाम्ओमयःपाय् मोमःचोःलम्मा गोय्चोःलम्मा चुम्ती दोःआक्तीको ओउःमयःकायः ङाइ पानःती इहाङः वानःचाङःसु” त दाय्ह्ती प्रधान् पुरोहीत्कः चेती तेआ। 3 चेती तेती दोःआक्तीको सावुल्पाय् यरुसालेम् सहर्सै ग्ल्युङ्ह्ती आल्दा आल्दा दामास्कस् सहर्ताङ् दाह्खेःतो सहर् दाह्खेःतोक्हाङः रोमो तोकोलेः फेल्बाङ्सै आन थोङ्तो स्याव्ताङःआ। 4 सावुल्कःहाङः आन थोङ्तो स्याव्ती लयःकायः साःताङ् क्लाःआकास। साःहाङः मुतोक्हाङः “अ सावुल्य दोह् हायःतीतेः नाङ्इ ङाकायः एत रेव्तो जाङ्ह्सा बोङःतेःनाःची” त हाव्नयः दाय्ह्ती सावुल्इ सायःआकान्। 5 “अ प्रभु नाङ् सुलोतेः” त दाय्ह्ती सावुल् व्हत्आथै। “ङापाय् नाङ्इ रेव्तो जाङ्ह्ओ येसु लेःआः ङ” त दाय्ह्ती त्याङ्ओआः। 6 “लौ चीङ्ती सहर्ताङ् आल्धाङ्अ। आल्आक्तीको नाङ्इ दोह् हायःसा त ङाइ ओहाङः स्यान्नेःनाङ्” त दाय्ह्ती सावुल्कायः तोआथै। 7 एत तोतोक्हाङः सावुल्कुस् वाह्ओ साथीलम्खेइ ओउः हाव्नयः सायःनीतो नोःओ मान्ता सुकायःमा च्यवःमाःत झ्यान्ते आन ग्याङ्ह्आकाय्। 8 ओहाङःसैको साःसै च्योक्ती चीङ्ती सावुल्खेइ मीक् प्र्याङ्ती योउतो मीक्इ दोह्मा च्यवःसा खाय्उलु। ओउःइ च्यवःसा खाय्माःत झ्यान्ते सावुल्कोः साथीलम्इ ओउःकायः क्रुत् ज्योतीलेः दामास्कस्ताङ् आलःआथै। 9 दामास्कस् सहर्ताङ् आलःआक्तीको सुम्दीन्कायः सावुल्पाय् मीक्इ च्यवःमाःत दोह्मा जेःउलु तुङ्उलु। 10 सावुल्पाय् ओउःत हायःदा हायःदा ओहाङःसैको दामास्कस् सहर्हाङः यात्चाक् येसुकोः कुरा ङ्हाम्ओ मान्ता हननाया त तोओ याक्ओ खेःतो। हननाया त तोओकःताङ् प्रभु येसु माङःखाहाङः तोलाङ् वाङ्आ “अ हननायाय” त दाय्ह्ती गोःआकान् “दोह्लो प्रभु” त त्याङ्ती 11 “लौ चीङ्ती ओउः धेङ्तो त तोआ रोत्ताङ् आल्अ। ओहाङः यात्चाक् यहुदा त तोओकोः कीम्हाङः तार्सुस् सहर्सै वाङ्ओ सावुल्कायः बोङःउ दा। 12 ओउःइ ङाकायः तेती तोतोक्हाङः नाङ्इतेः ओउःकायः च्यवःताक्साकायः ‘तालाङ्हाङः क्रुत् झाम्ह्ती मुओ’ त माङःखाहाङः च्यवःती मुलेःनाः” त दाय्ह्ती प्रभु येसुइ हननायाकायः तोआथै। 13 “अ प्रभुय यरुसालेम्हाङः ओउः सावुल् त तोओइपाय् नाङ्कोः मान्तालम्कायः आन पेमालो जाङ्ह्ताङःआकान्। 14 द्याह् ओउःइ ताङ्ह्ओ पुरोहीत्लम्इ लेखओ चेती लात्ती इहाङःमा नाङ्कायः झाह्ओ मान्तालम्कायः पानःलाङ् दाह्ताङःआ। एत नाःतोलम्इ तोती मुनै” त दाय्ह्तीताङः हननाया दाय्ह्ती त्याङ्तो 15 “खेःल नाङ् आल्अ दा। ओउः मान्तापाय् अरु इस्राएल्कोः मान्तालम्कायः ङाकोः कुरा तोसाकायः छ्युङ्ह्आलाङः बा। ङाकोः कुरा अरु यहुदी खेःमालो जात्लम्कायःमा ओउःमयःकोः राजालम्कायःमा ओउःइलेः तोसा खेःतो। 16 ङाकोः काम् जाङ्ह्साकायः ओउःइ आन लीह्सीःओ च्यवःसा खेःनाः इत ङाइ ओउःकायः चीःताक्लेःनाङः” त दाय्ह्ती प्रभु येसुइ हननायाकायः तोआथै। 17 एत तोआक्तीको हननायापाय् सावुल् मुओ कीम्ताङ् आल्ती पोक्ती ओउःकःताङ् क्रुस्लाङ् वाङ्आ। क्रुस्आक्तीको सावुल्कोः तालाङ्हाङः क्रुत् झाम्ह्ती “लौ सावुल् हौय नाङ् इहाङः वाङ्तोक्हाङः ल्याम्हाङः थाती च्यवःओ प्रभु येसुइलेः ङाकायः द्याह् नाङ्कःताङ् ल्होक्आताङः बा। नाङ्कायः मीक्इ च्यवःताक्सामा परमेस्वर्कोः ग्वालामः दोःताक्साकायःमा ल्होक्आताङः” त दाय्ह्ती 18 हननाया तोओ कुस्ब्रक्त सावुल्कोः मीक्सै ल्ह्युन्लो लेखा ग्लेःती ओउःइ मीक्इ पेतो च्यवःआकान्। च्यवःती खाय्आक्तीको सावुल्कायः बाप्तीस्मा जाङ्ह्आथै। 19 ओहाङःसैको जेःती तुङ्आक्तीको सावुल्पाय् म्र्याआ। ओहाङःसैको येसुकायः ङ्हाम्ओमयःकुस् चार् पास्दीन्कायः सावुल् मुओ खेःतो। 20 ओउःमयःकुस् मुतोक् बेलाहाङः सावुल्पाय् थनःओ कीम्लम्हाङः येसुकोः कुरा नोःलाङ् आल्आ। “येसु त तोओपाय् परमेस्वर्कोः गोय्चोःचोः लेःआः बा” त दाय्ह्ती नोःती मुओ खेःतो। 21 ओउःत नोःओ सायःती ओउः सायःओ मान्तालम् आन ग्याङ्ह्आकाय्। “ओउः यरुसालेम्हाङः मुओ येसुकायः ङ्हाम्ओमयःकायः सात्सा बोङःओचाक्पाय् इलेःआः माःर। इहाङः वाङ्ती ओउः ङ्हाम्ओमयःकायः पानःती ताङ्ह्ओ पुरोहीत्लम्कःताङ् दाक्सा बोङःओआः” त दाय्ह्ती नोःकाय्आकाय्। “ओउःपाय् द्याह् येसुकायः ‘परमेस्वर्कोः गोय्चोःचोः लेःआः’ त दाय्ह्ती तोनौ” त दाय्ह्ती ओउःमयः ग्याङ्ह्ती मुआकाय्। 22 ओउःतलेः नोःकाय्इतो सावुल्पाय् न्हाङ्तोलेः व्हाय्ती नोःती “येसुपाय् परमेस्वर्इ तोती गम्ओ ख्रीस् लेःआः बा” त तोती झ्यान्ते अरु दामास्कस्हाङः याक्ओ यहुदीलम्इ त्यानःसा खाय्नीली। 23 ओउःमयःइ त्यानःसा खाय्नीली ओहाङःसैको नाःतो दीन् पुत्आक्तीको ओउः यहुदीलम्इ हुम्काय्ती सावुल्कायः सात्सा बोङःनीतो 24 “ङाकायः सात्सा बोङःनाःताङः” त सावुल्इ चीःआकान्। न्हीदीङ्मा याह्दीङ्मा ओउः यहुदीलम्इ सावुल् चुम्ती सात्साकायः ओउः सहर्कोः धोकालम्हाङः ल्युङ्ह्ती मुइतो 25 यात्दीन्कोः याह्दीङ्हाङः सावुल्कोः साथीलम्इ ओउःकायः धाकर्हाङः काआक्तीको लाइ छुःती ओउः धाकर्पाय् सहर्कोः खोओ बार्कोः बाहीरताङ् क्लाःआथै। साःहाङः क्लाःआक्तीको सावुल्पाय् धाकर्सै ग्ल्युङ्ह्ती क्रव्ती ज्याल्आ। 26 ज्याल्आक्तीको सावुल्पाय् यरुसालेम्ताङ् आल्ती ओहाङः मुओ येसुकायः ङ्हाम्ओमयःकुस्इ वाह्सा बोङःउतो “इपाय् दोङ् येसुकोः मान्ता खेःल” त म्हर्ती ओउःमयः सावुल्कः रैआकाय्। 27 अरुलम् रैआकाय् यात्चाक् बर्नाबास् त तोओखेइ सावुल्कोः कुरा ङ्हाम्ती ओउःकायः रोम्ती येसुकोः छ्युङ्ह्ओमयःकःताङ् वानःआथै। वानःआक्तीको “लौ दामास्कस्ताङ् वाह्ओ ल्याम्हाङः सावुल्इ ङीकोः प्रभु येसुकायः च्यवःआकान् येसुकुस् नोःकाय्आकाय् बा। ओहाङःसैको दामास्कस् सहर्हाङः सावुल्इ जुगाङ् रैमाःत येसुकोः कुरा तोमाआकान्” त दाय्ह्ती बर्नाबास्इ सावुल्कोः कुरा सबै ल्हाक्ती छ्यानःआथास। 28 एत सायःआक्तीको येसुकोः छ्युङ्ह्ओमयः सावुल्कायः रोम्आथै ओहाङःसैको ओउःमयःकुस् ब्राङ्ती मुओ खेःतो। 29 ओउःमयःकुस् मुओहाङः सावुल्इ यरुसालेम्हाङः वाह्ती गतमा रैमाःत प्रभु येसुकोः कुरा ल्हाक्ती छ्यानःआथास। फेरी एलेनी भासा नोःओ यहुदी मान्तालम्कुस् नोःकाय्ती येसुकोः कुरा तोउतो ओउःमयःइमा सावुल्कायः सात्सा बोङःआकानी। 30 सावुल्कायः “सात्सा बोङःनानी” त चीःआक्ती ओउः येसुकायः ङ्हाम्ओलम्इ सावुल्कायः सीजारीया सहर्ताङ् वानःती ओउःकोः लयःकोः तार्सुस् त तोओ सहर्ताङ् ल्होक्आथै। 31 सावुल् आल्आक्तीको ओउः यहुदीया अन्चल्हाङः गालील अन्चल्हाङःमा समारीया अन्चल्हाङःमा येसुकायः ङ्हाम्ओमयः पेतोलेः मुआकाय्। ओउःमयःकायः अरुलम्इ पानःसा सात्सा सुइमा बोङःनीली। येसुकायः ङ्हाम्ओमयःइपाय् परमेस्वर्कायः लुङ्ती झाह्ती तोआकानी। ओउःमयःकायः परमेस्वर्कोः ग्वालामःइ पेतो स्याव्ताक्ती झ्यान्ते ओउःमयः नाःतोलेः ब्याव्आकाय्। 32 ओउःमयः नाःतोलेः ब्याव्आकाय् ओहाङःसैको ओउःतोक् बेलाहाङःमा पत्रुस् त तोओ येसुकायः झाह्ओलम्कायः सबै क्रुस्साकायः देस् देस्ताङ् इःताङ् उःताङ् तोमःती वाह्आ। तोमःती वाह्तोक्हाङः पत्रुस्पाय् लीदा त तोआ देस्ताङ् दाह्आ। 33 ओहाङः दाह्आक्तीको यात्चाक् जुगाङ् वाह्सा खाय्मालो मान्ता च्यवःआकान्। ओउः मान्तापाय् एनीयास् त तोओलेः आत् बर्सकायः ओउःपाय् जुगाङ् च्योक्ती वाह्सा खाय्मालो खेःतो। 34 ओउःकायः च्यवःआक्तीको “अ एनीयास् नाङ्कायःपाय् येसु ख्रीस् त तोओइ स्याक्तेः ताक्तेःनाः बा। लौ च्योक्ती नाङ्कोः न्हाप्नाय्लम् खुम्ती वाह्अ” त दाय्ह्तीताङः पत्रुस्इ तोआथै। एत तोओ कुस्ब्रक्त एनीयास् च्योक्आ। 35 च्योक्आक्तीको ओउः ङ्हा वाह्सा खाय्मालो मान्तापाय् वाह्ओलेः च्यवःती लीदा सहर्हाङःमा स्यारोन् सहर्हाङःमा मान्तालम्इ प्रभु येसुकोः कुरा ङ्हाम्आकानी। 36 ओहाङःसैको जोपा त तोओ सहर्हाङः यात्चाक् येसुकोः कुरा ङ्हाम्ओ मोमःचोः तबीथा त तोओ खेःतो। एलेनी भासाहाङः ओउःकोः मय्ङ् दोर्कस् त तोओलेः। दोर्कस् त तोओकोः माने “मुन्दुली” लेःआः। इ तबीथा त तोओइ ह्र्यात्लम्कायःमा स्यास्ती गम्ओ अरु मान्तालम्कायःमा पेतोलेः जाङ्ह्ओ खेःतो। 37 ओहाङःसैको पत्रुस् त तोओ लीदा सहर्हाङः मुतोक् बेलाहाङः तबीथा त तोओपाय् जीक्ती सीआ। सीआक्तीको ओउःकोः म्हाङ् जेस्ती कीम्कोः त्यावःअ कोथाहाङः गम्आकानी। 38 ओहाङःसैको द्याङ्तो मुओ लीदा सहर्हाङः “पत्रुस् दाह्आ” त सायःती ओउः जोपा सहर्कोः येसुकायः ङ्हाम्ओमयःइ पत्रुस्कायः गोत्सा थेङा नीस्चाक् ल्होक्आकानी “लौ ङीकःताङ् रेन्ह्तोलेः वाङ्अ दा” त दाय्ह्ती पत्रुस्कायः तोती ल्होक्आथाच। 39 ओउः नीस्चाक् ल्होक्आक्तीको ओउःकोः ल्हाक्राय् सायःती पत्रुस्पाय् ओउः नीस्चाक्कुस् जोपा सहर्ताङ् आल्आकाय्। पत्रुस्पाय् आल्ती ओउः तबीथा मुओ कोथाहाङः दाह्ती पोक्आ। पोक्ती वाङ्आक्तीको सबै ह्र्यात् मोमःचोःलम् पत्रुस्कःताङ् र्याःती क्रेस्लाङ् हुम्ती “लौ इ नाय्जा इ सीओ तबीथाइ जाङ्ह्ती बयःआबत्ताङः बा” त दाय्ह्ती सबै तबीथाइ जाङ्ह्ओ नाय्लम् थोक्लम् ओउःकायः छ्यानःथातो ओउः मोमःचोःलम्कायः पत्रुस्इ बाहीरताङ् ल्होक्आथास। 40 ओउःमयः सबैकायः बाहीरताङ् ल्होक्आक्तीको पत्रुस्इ घ्रुस्ती परमेस्वर्कः तेती तोआकान्। तेती तोआक्तीको तबीथा त तोओकोः म्हाङ्ताङ् ल्हेःती “लौ तबीथा च्योक्अ” त दाय्ह्ती पत्रुस्इ तोउतो ती तबीथा लेती पत्रुस् च्यवःती च्योक्आ। 41 च्योक्आक्तीको तबीथाकोः क्रुत् चुम्ती ओउःकायः पत्रुस्इ चीङ्ताक्आथै। ओहाङःसैको ओउः ह्र्यात् मोमःचोःलम्कायःमा अरु येसुकायः ङ्हाम्ओ मान्तालम्कायःमा गोत्ती “लौ योउ दा इ द्याह् सेलः मुनाः” त दाय्ह्ती ओउःमयःकायः तबीथा सेलः मुओ छ्यानःआथास। 42 तबीथाकायः स्याक्ताक्आक्तीको इ कुरा सबै जोपा सहर्कोः मान्तालम्इ सायःती चीःआकानी। चीःआक्तीको नाःतोलम् येसुकोः कुरा ङ्हाम्आकानी। 43 ओहाङःसैको नाःतो दीन्कायः जोपाहाङः मुती पत्रुस्पाय् सीमोन् त तोओ सर्कीकोः कीम्हाङः याक्आ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.