खबरदुत 8 - चेपाङ1 ओहाङःसैको ओउःनम् दीन्हाङः यरुसालेम् सहर्हाङः मुओ येसुकायः ङ्हाम्ओमयःकायः अरुलम्इ आन लीह्सीःओ बयःआथास ओउःत झ्यान्ते ओउः येसुकायः ङ्हाम्ओमयः रुनःधती स्रीदी बेदी त यहुदीयामा समारीयामा ओउः नीस्देस्ताङ् क्रव्आकाय्। येसुकोः बारजन छ्युङ्ह्ओमयः झुङ्आले यरुसालेम्हाङः मुइतो। 2 ओहाङःसैको परमेस्वर्कायः पेतो ङ्हाम्ओ मान्तालम्इ स्तीफन्कायः क्रेस्ती पाम्ह्आथै। 3 ओउःमयःखेइ स्तीफन्कायः पाम्ह्आथै सावुल् त तोओखेइ येसुकायः ङ्हाम्ओमयःकोः कीम् कीम्ताङ् पोक्ती गोय्चोःलम्मा मोमःचोःलम्कायःमा चुम्ती झ्याल्खानहाङः थुनती ओउःमयःकायः सोय्ह्ताक्सा बोङःआकान्। 4 ओहाङःसैको ओउः रुनःधती क्रव्ओ ङ्हाम्ओमयःइ इःताङ् उःताङ् आल्ती येसुकोः पेओ कुरा थोल्ह्ती तोआकानी। 5 फीलीप् त तोओखे समारीया देस्कोः सहर्ताङ् आल्ती ओउः सहर्कोः मान्तालम्कायः येसु ख्रीस्कोः कुरा छ्यानःती तोआथास। 6 एत छ्यानःती तोतोक् बेलाहाङः नाःतो मान्तालम् हुम्ती येसुकोः कुरा सायःतीमा ग्याङ्ह्राय् च्यवःतीमा ओउःकोः कुरा ङ्हाम्आकानी। 7 ओउः बेलाहाङः नाःतो लान्इ ङायःओ मान्तालम्कायः ओउःइ लान् ल्हेस्ताक्आथास। ल्हेस्तोक्हाङः ओउः लान्लम् हीह्ती ज्याल्आकाय्। फेरी नाःतो क्रुत् दोम् साङ्ह्सा खाय्मालो मान्तालम्कायःमा क्ल्योय्ओ मान्तालम्कायःमा स्याक्ताक्ओ खेःतो। 8 एत हायःआक्तीको ओउः सहर्कोः मान्तालम् आन चोङाय्ओ खेःइतो। 9 ओहाङःसैको ओउः सहर्हाङः यात्चाक् सीमोन् त तोओ आन धाबास् झ्याओ पान्दे याक्ओ खेःतो। ओउः सीमोन् त तोओ पान्देइ सबै समारीया देस्कोः मान्तालम्कायः ग्याङ्ह्ताक्ती “ङापाय् ताङ्ह्ओ ग्वम् दोःओ मान्ता लेःआः ङ” त दाय्ह्ती सीमोन्मा ङाःती नोःआ। 10 अरुलम्मा “माः रैस इ मान्तापाय् परमेस्वर्च्युक्लेः जोओ ग्वम् दोःआ बा” त दाय्ह्ती नोःकाय्ती ओउः देस्कोः मीओ मान्तालम्मा ताङ्ह्ओ मान्तालम्मा ओउःकायः आन योआकानी। 11-12 आन ज्याङःतोहाङःसै सीमोन् पान्देकायःपाय् मान्तालम्इ ङ्हाम्नीतो लोन्ते फीलीप् वाङ्आक्तीको येसु ख्रीस्कोः कुरामा परमेस्वर्कोः राजीकोः कुरामा सायःआक्तीको ओउःमयःइ सीमोन्कायः फेती येसुकोः कुरा ङ्हाम्ती गोय्चोःलम्इमा मोमःचोःलम्इमा बाप्तीस्मा त्याक्आकानी। 13 बाप्तीस्मा त्याक्आकानी ओउः सीमोन् त तोओ पान्देमा येसुकोः कुरा ङ्हाम्ती बाप्तीस्मा त्याक्आकान्। बाप्तीस्मा त्याक्आक्तीको सीमोन्पाय् फीलीप्कुस् वाह्ती फीलीप्इ जाङ्ह्ओ ग्याङ्ह्राय् च्यवःती आन ग्याङ्ह्ओ खेःतो। 14 ओहाङःसैको इ समारीया देस्हाङः स्याव्ओ कुरा सायःती ओउः यरुसालेम्हाङः मुओ येसुकोः छ्युङ्ह्ओमयःइ लयःमयःहाङः पत्रुस् युहना त तोओ नीस्कायः छ्युङ्ह्ती “लौ समारीया देस्हाङःताङः नाःतो मान्तालम्इ परमेस्वर्कोः कुरा ङ्हाम्ती मुताङःनै” त दाय्ह्ती पत्रुस् युहनाकायः समारीया देस्ताङ् ल्होक्आथाच। 15-17 ओउः बेलाहाङः समारीया देस्कोः मान्तालम्इ येसु ख्रीस्कोः मय्ङ् ह पेह्ती बाप्तीस्मा त्याक्आकानी ओउःमयः परमेस्वर्कोः ग्वालामः दोःआक्इली। ओउःत झ्यान्ते पत्रुस् युहनानीस् दाह्आक्तीको ओउः समारीया देस्कोः ङ्हाम्ओमयःकायः “लौ इमयः नाङ्कोः ग्वालामः दोःपै” त परमेस्वर्कायः तोती ओउः मान्तालम्कायः क्रुत्इ झाम्ह्आथास। एत हायःआक्तीको ओउः समारीयाकोः मान्तालम् परमेस्वर्कोः ग्वालामः दोःआकाय्। 18 ओहाङःसैको ओउःनीस् येसुकोः छ्युङ्ह्ओमयःइ क्रुत् झाम्ह्ती परमेस्वर्कोः ग्वालामः दोःताक्ओ च्यवःती सीमोन् त तोओइ पैसा लात्ती वानःती ओउःनीस्कःताङ् तेलाङ् वाङ्आ। 19 “लौ इ परमेस्वर्कोः ग्वालामः दोःताक्सा ग्वम् ङाकायःमा बयःनाङ्ज दा। ओहाङःसै सुकायःलो ङाइ क्रुत् झाम्ह्ती गम्चाङः ओउःलेः परमेस्वर्कोः ग्वालामः दोःनै” त दाय्ह्ती ओउः सीमोन्पाय् पैसा ल्हालाङ् वाङ्तो 20 “खेःल ल्हुङ्हाङः नाङ् एत ताःतेःआ त झ्यान्ते नाङ्कोः पैसाकुस्लेःतेः सीतेःपाः। पैसाइ परमेस्वर्कोः ग्वम् लेःनाः र जुगु। 21 लौ परमेस्वर्इ नाङ्कोः ल्हुङ्तुक् योओहाङः नाङ्कोः ल्हुङ्पाय् चोरःतीलेः पेमालो मुनाः बा। ओउःत झ्यान्ते नाङ् ङीकुस्इ परमेस्वर्कोः ग्वालामः दोःताक्ओ काम् जाङ्ह्सा स्याव्तेःल। 22 इ ल्हुङ् लओ फेती परमेस्वर्कः ‘लौ ङाकायःतेः न्युम्ह्तेःताक्चाःची दै’ त तेती तोउ दा। ओहाङःसैको ओउःइ नाङ्कोः रेव्ओ काम् क्युम्ह्ताक्तेःनाः यादो। 23 नाङ् ल्हुङ्हाङः आन लतीतेः रेव्तो जाङ्ह्सा बोङःतेःनौ त ङाइ चीःनाङः बा” त दाय्ह्ती पत्रुस्इ जान्ती तोआथै। 24 एत तोआक्तीको “लौ नीङ्जीइ ङाकायःपाय् इत रेव्तो ‘स्याव्ताक्लाम्’ ततेः परमेस्वर्कायः तेती तोतेःनाः बत्नानाङ्ज” त दाय्ह्तीताङः ओउःनीस्कायः सीमोन्इ तोआथाच। 25 ओहाङःसैको पत्रुस् नीस्साथीचाः येसुइ स्यान्ओ कुरामा जाङ्ह्ओ कुरामा गतलो ओउःनीस्इ सायःआकाचु च्यवःआकाचु ओउःतलेः समारीया देस्कोः मान्तालम्कायः छ्यानःती तोआकाचु। येसुकोः कुरा एत तोआक्तीको ओउःनीस् यरुसालेम्ताङ् पाय्ह्आकाच। यरुसालेम्ताङ् पाय्ह्तोक् बेलाहाङः समारीयाकोः गाव् गाव्ताङ्मा इ कुरा छ्यानःतीलेः तोआकाचु। 26 ओहाङःसैको ओउःनीस्खे यरुसालेम्ताङ् पाय्ह्आकाच फीलीप्खेकायः यात्ज्योः परमेस्वर्कोः लाङ्कासै ल्होक्ओमयः थाती “लौ चीङ्अ यरुसालेम्सै ग्ल्युङ्ह्ओ गाजा त तोओ सहर्ताङ् आल्सा ल्याम्ताङ् आल्अ। ओउः ल्याम्पाय् मान्ता याक्गार्सीःमालो बेलाङ्हाङः प्लाक्ती आल्नाः” त दाय्ह्तीताङः फीलीप्कायः परमेस्वर्कोः ल्होक्ओमयःइ तोआथै। 27 एत तोआक्तीको फीलीप् चीङ्ती ओहाङः आल्आ। ओहाङः आल्तोक् बेलाहाङः ओउः ल्याम्हाङः यात्चाक् एथीयोपीया देस्कोः सर्कार्कोः मन्तरी यरुसालेम् सहर्सै लयःकोः देस्ताङ् पाय्ह्ती वाह्ओ खेःतो। ओउः मान्तापाय् एथीयोपीया माहारानी कान्दासी त तोओकोः सर्कार्हाङः ताङ्ह्ओ पैसा उथावती गम्ओ मान्ता खेःतो। ओउःलेः यरुसालेम्ताङ् परमेस्वर्कायः झाह्ती तोलाङ् आल्आ। आल्आक्तीको लयःकोः घोराइ वाह्ताक्ओ राथ्हाङः च्युङःती द्यानःती पाय्ह्ती वाङ्आ। 28 पाय्ह्ती वाङ्तोक्हाङः ओउःइ एसायाइ लेखओ परमेस्वर्कोः कुरा पह्रओ खेःतो। 29 ओउः पह्रती मुमुबालेहाङः “लौ ओउः राथ्कोः चीनःसै वाह्अ” त दाय्ह्ती फीलीप्कायः परमेस्वर्कोः ग्वालामःइ तोआथै। 30 इत तोआक्तीको फीलीप् तन्ती ओउः राथ् क्रुस्लाङ् दाह्ती ओउः एथीयोपीयाकोः मन्तरीइपाय् परमेस्वर्कोः कुरा पह्रती मुओ सायःआकान्। सायःआक्तीको “इ नाङ्इ पह्रओ कुराकोः माने चीःतेःनौया चीःतेःउलुया” त दाय्ह्ती फीलीप्इ व्हत्आथै। 31 “इ कुराकोः माने छ्यानःओ मान्ताइ छ्यानःमाया दुक्लेःनाः” त दाय्ह्ती ओउः मन्तरी त्याङ्आ। “लौ इ राथ्हाङः लन्ह्ती वाह्साकायः ङाकोः चीनःसै च्युङःअ” त तोती फीलीप्कायः गोत्आथै। 32 फीलीप्कायः गोत्तोक्हाङः ओउः मन्तरी परमेस्वर्कोः आखरःहाङः इतलेः पह्रओ खेःतो “पाल्साकायः वानःओ भेदामेत्छ्याःमा मेनः खुर्साकायः वानःओ भेदामेत्छ्याःकोः चोःलेः ओउःकायः सात्सा खुर्सा बोङःओ मान्ताकायः नोःसामा जान्सामा खाय्उलु ओउःलो लेखालेः ओउः मान्ताइलेः ओउःकायः सात्सा बोङःओ मान्तालम्कायः नोःउलु। 33 ओउःकायःपाय् ल्हुङ् मीताक्ती आन लीह्सीःओ बयःनीतो ओउःकोः कुरा अरुइ सायःनीली। ओउःकायःपाय् इ ल्हाव्ह्दैबाङ्सै आलःओआः ओउःत झ्यान्ते ओउःकोः प्लोमःदाने मोमःदाने गतलो स्याव्नै” त लेखओ पह्रती मुओ। 34 “इ एसायाइ सुकायः लेखओ लयःकायःया अरुकायःया” त दाय्ह्ती ओउः मन्तरी व्हत्आकान्। 35 एत व्हत्आक्तीको फीलीप्इ इ एसायाइ लेखओ कुरा छ्यानःती सबै येसुकोः पेओ कुरा ओउः मन्तरीकायः स्यान्आथै। 36 ओहाङःसैको एत स्यान्ती नोःतोक्हाङःपाय् ल्याम्हाङः आल्दा आल्दा तीःहाङः दाह्आकाच। तीःहाङः दाह्ती “लौ इहाङः तीः मुनाः। ङाकायः बाप्तीस्मा जाङ्ह्सा स्याव्नाः यादो” त दाय्ह्ती ओउः मन्तरी दाय्ह्आ। 37 “नाङ् ल्हुङ्हाङः पेतो ङ्हाम्नौ त खेःया बाप्तीस्मा त्याक्सा स्याव्नाः” त दाय्ह्ती फीलीप् त्याङ्आ। “स्याव्आनाः येसु ख्रीस् त तोओ परमेस्वर्कोः चोः लेःआः एत ङ्हाम्नाङः बा” त दाय्ह्ती ओउः मन्तरी दाय्ह्आ। 38 ओउःत दाय्ह्आक्तीको ओउःकोः राथ् न्यास्ताक्ती ओउः मान्तापाय् फीलीप्कुस् तीःहाङः ग्ल्युङ्ह्आकाच। तीःहाङः पोक्ती ओउः मन्तरीकायः फीलीप्इ बाप्तीस्मा जाङ्ह्आथै। 39 तीःहाङः बाप्तीस्मा जाङ्ह्ती खाय्आक्तीको ओउःनीस् तीःसै ग्ल्युङ्ह्ती फीलीप्खेकायः परमेस्वर्कोः ग्वालामःइ आलःआथै। आलःआक्तीको ओउःकायःपाय् ओउः मन्तरीखेइ फेरी च्यवःउलु लयःकोः देस्ताङ् चोङाय्तीलेः पाय्ह्ताङःआ। 40 फीलीप्खे आस्दोद् सहर्ताङ् दाह्ती ओहाङःसै ओहाङःकोः वेङ्ह्ग चीङ्ह्ग मुओ गाव् गाव्गन आल्ती येसुकोः पेओ कुरा थोल्ह्ती तोदा तोदा सीजारीया देस्ताङ् दाह्ती वाङ्आ। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.