खबरदुत 6 - चेपाङ1 ओहाङःसैको ओउःतोक् बेलाहाङः येसुकोः कुरा ङ्हाम्ओ मान्तालम्कःताङ् अरुलम् न्हाङ्तोलेः त्योम्ती वाङ्ती नाःतो स्याव्आकाय्। ओहाङःसैको ह्र्यात् मान्तालम्कायःमा बुधा सीओ मोमःचोःलम्कायःमा दीन्का दीन् जेःगालम् वेःती बयःओ खेःतो। ओउः जेःगा वेःती बयःओ बेलाहाङःलम् “लौ ओउः यहुदी मोमःचोःलम्खेकायः भोरःती बयःनाःथास ङी एलेनीकोः मोमःचोःलम्खेकायः य्हुर्ती बयःनाःथास” त दाय्ह्तीताङः ओउः एलेनी भासा नोःओलम् यव्ह्ती त्याङ्आकाय्। 2 ओउःत झ्यान्ते ओउः बारजन छ्युङ्ह्ओमयःलम्इ अरु येसुकायः ङ्हाम्ओ मान्तालम् सबैकायः हुम्ह्आथास। हुम्ह्आक्तीको “लौ ङी बारजनइ परमेस्वर्कोः कुरा थोल्ह्ती तोसा फेती जेःगा वेःती बयःओ काम् जाङ्ह्सा स्याव्ल। 3 ओउःत खेःओ पुःचोङ् हौचोङ्य नीङ्कःसै सात्गोता पेओ काम् जाङ्ह्ओलम् छ्युङ्ह्नु। इ नीङ्इ छ्युङ्ह्ओ मान्तालम् परमेस्वर्कोः ग्वालामः दोःओ म्हुक्ती चीःओ मान्तालम् खेःतो। ओउःमयःखेइ इ जेःगा वेःओ काम् जाङ्ह्पानी। 4 ङीखेइ परमेस्वर्कः तेती तोओमा ओउःकोः कुरा स्यान्ती तोओ काम्मा जाङ्ह्नाङःसु” त दाय्ह्ती ओउः बारजनइ तोआकानी। 5 एत तोओ कुरा सबै म्रोती सायःआकानी ओहाङःसैको ओउःमयःइ सात्जन छ्युङ्ह्आथास। यात्चाक् स्तीफन् त तोओ ओउःखे परमेस्वर्कायः आन ङ्हाम्ती परमेस्वर्कोः ग्वालामःमा आन दोःओ खेःतो। स्तीफन् त तोआमा फीलीप् प्रोखुरस् नीकानोर् तीमोन् पार्मेनास्मा यात्चाक् अन्तीयोक् सहर्सै वाङ्ओ परमेस्वर्कायः झाह्ओ नीकोलवुस् त तोओमा इ सात्जनकायः छ्युङ्ह्ती ओउः बारजन येसुइ छ्युङ्ह्ओमयःकःताङ् वानःती चीङ्ताक्आथास। 6 चीङ्ताक्आक्तीको ओउः बारजनखेइ ओउः सात्जन मेस्लो छ्युङ्ह्ओ मान्तालम्खेकायः क्रुत् झाम्ह्ती “लौ इ सात्जनलम्कायः काम् पेतो जाङ्ह्ताक्उसु” त दाय्ह्ती परमेस्वर्कः तेती तोआकानी। 7 ओहाङःसैको परमेस्वर्कोः कुरा न्हाङ्तोलेः छालःतो स्याव्माआ। यरुसालेम् सहर्हाङः येसुकायः ङ्हाम्ओमयःकःताङ् अरुलम् त्योम्ती ओउःमयः नाःतो ब्याव्आकाय्। फेरी नाःतो पुरोहीत्लम्इमा येसुकोः कुरा ग्याती ङ्हाम्आकानी। 8 ओहाङःसैको स्तीफन् त तोओकायः परमेस्वर्इ आन ग्वम् दोःताक्ओ खेःतो। परमेस्वर्कःसै ग्वम् दोःआक्तीको स्तीफन्इ सबै मान्तालम्कोः मीक्हाङः आन ग्याङ्ह्सीःओ काम् छ्यानःओ खेःतो। 9 ओहाङःसैको यात्नीस् लीबर्तीन् त तोओलम्मा अरु क्युरीनी देस्कोः मान्तालम्मा आलेक्जान्द्रीया देस्कोःमा सीलीसीया असीया देस्कोः मान्तालम्मा स्तीफन्कुस् आन काय्काय्सा तानःकाय्ती नोःनीतो 10 स्तीफन् त तोओपाय् परमेस्वर्कोः ग्वालामः दोःती ओउःच्युक् ज्योङःती नोःसा खाय्ओ त झ्यान्ते अरुइ क्लीमःसा खाय्नीली। 11 ओउःत झ्यान्ते स्तीफन्कुस् काय्काय्ओलम् यात्नीस् ओउःकायः माःती तुम्ती नोःसा मान्तालम् हुन्द्यावःती “लौ ‘इ स्तीफन् त तोओइ मोसाकायःमा परमेस्वर्कायःमा पेमालो नोःती स्यान्ओ ङीइ सायःआलाङःसु’ त नीङ्इ दाय्ह्ती तोनु दा” त दाय्ह्ती ओउः काय्काय्ओलम्इ अरु पेमालो मान्तालम्कायः गाल्तुम्ओ कुरा नोःसा स्यान्आथास। 12 ओउःत स्यान्ती तोताक्आक्तीको ओउःमयःइ सहर्कोः मान्तालम्मा ताङ्ह्ओ मान्तालम्मा धर्मा स्यान्ओमयःकायःमा स्तीफन्कः ल्हुङ् मल्ह्ताक्आकानी। ओहाङःसैको इ स्तीफन्कायः पेमालो तुम्ओ कुरा सायःती ओउः ताङ्ह्ओ मान्तालम्इ ल्हुङ् मल्ह्तो स्याव्आक्तीको स्तीफन्कायः चुम्ती पानःती ओउः सभा कीम्ताङ् लात्ती वानःआथै। 13 सभाताङ् वानःआक्तीको स्तीफन्कोः दुस्मान्लम्इ ओउः अरु माःती तुम्ती तोसा मान्तालम्कायः ङ्हा चीङ्ताक्आथास। ओउः मान्तालम् नोःसाकायः चीङ्ती “लौ इ मान्तापाय् ङीकोः मन्दीर्कायःमा परमेस्वर्कायःमा ओउःकोः हुकुम्कायःमा गलमा दीःमाःत आन रेव्ओ कुरा नोःनाः रैस। 14 इ मन्दीर्कायः ‘नासरेत् गाव्कोः येसु त तोओइ लोन्ह्ते ह्र्योङःती वाय्नौ’ त ओउःइ तोओमा सायःआलाङःसु ‘मोसाइ ङीकोः तोकानःलम्कायः बयःओ हुकुम्लम्कायः येसुइ “इ वाय्पाः” त दाय्ह्ती नया ऐन् बयःनौ’ त स्यान्ती तोओमा ङीइ सायःआलाङःसु” त दाय्ह्ती ओउःमयःइ स्याक्गाल् तुम्ती तोआकानी। 15 एत तुम्ती तोआक्तीको ओउः सभाहाङः मुओ मान्तालम्इ स्तीफन्कायः सबै योती ओउःकोः खेन्पाय् लाङ्काकोः लोक्ओमयःलो लेखा स्याव्ओ च्यवःआकानी। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.