खबरदुत 4 - चेपाङ1 एत तोतोक् बेलाहाङः पुरोहीत्लम्मा ओउः मन्दीर्कोः ताङ्ह्ओ मान्तालम्मा सादुकी त तोओलम्मा दाह्ती सायःलाङ् वाङ्आकाय्। ओउः सादुकी त तोओ मान्तालम्इ मान्ता सीआक्तीको गलमा च्योक्इली त स्यान्ओ खेःइतो। 2 ओउःत झ्यान्ते पत्रुस्इ तोतोक् बेलाहाङः “लौ इ येसुपाय् सीआक्तीको उह्ती च्योक्ताक्ओ ङी च्यवःआलाङःसु ओउःत झ्यान्ते ओउःलो लेखालेः ङी मान्तालम् सीआक्तीको सबै उह्ती च्योक्तो स्याव्नाःतय्ही” त दाय्ह्ती तोओ सायःती ओउः सादुकीलम् ल्हुङ् क्लस्अङ्ओ खेःइतो। 3 ओउःमयः ल्हुङ् क्लस्अङ्तो स्याव्ती पत्रुस्कायःमा युहनाकायःमा चुम्ती पानःआकानी। चुम्आक्तीको न्याम् याह्ती झ्यान्ते उनम्ह्कोः स्याङ्ह्च्युक्कायः झ्याल्खानहाङः थुनती गम्आथाच। 4 ओहाङःसैको ओउः पत्रुस्इ नोःओ सायःओलम्हाङः नाःतो मान्तालम्इ ओउःकोः कुरा ङ्हाम्ती सायःआकानी गोय्चोःलम्पाय् पास् हजार्च्युक् मान्तालम्इ ङ्हाम्ती सायःआकानी। 5 ओहाङःसैको स्याङ्ह्लोहाङः ओउः यहुदीलम्कोः ताङ्ह्ओ मान्तालम्मा स्यान्ओ मान्तालम्मा यरुसालेम्कोः सभाहाङः हुम्ती वाङ्आकाय्। 6 ओउःमयःकुस् ओउः प्रधान् पुरोहीत् आनास् त तोओमा कयाफामा युहनामा सीकन्दर्मा अरु प्रधान् पुरोहीत्कोः मान्तालम्मा हुम्ती वाङ्आकाय्। 7 ओहाङःसैको ओउःमयः हुम्तोक् बेलाहाङः पत्रुस्मा युहनाकायःमा वानःती ओउः सभाकोः पीस्हाङः चीङ्ताक्आथाच। ओउःनीस्कायः चीङ्ताक्आक्तीको “लौ नीङ्जीइ सुकोः हुकुम् सायःती इ काम् जाङ्ह्तेःआकाजु। सुकोः ग्वम्इ नीङ्जीइ इत जाङ्ह्तेःआकाजु” त दाय्ह्ती व्हत्आथाच। 8 ओउःनीस्कायः व्हत्आक्तीको पत्रुस्इ परमेस्वर्कोः ग्वालामः दोःती त्याङ्आ “लौ नीङ् इस्राएल्कोः थालवःपालम्य ताङ्ह्ओ मान्तालम्य 9 ओउः क्ल्योय्बाङ्कायः स्याक्ताक्ओ कुरा छ्यानःसा थेङा नीची तेन् नीङ्कःहाङः वानःओ लेःआः ङच माःर। ओउःपाय् गत हायःती स्याक्ताक्ओ त नीङ्इ चीःसा बोङःतेःनानी यादो। 10 ओउःत खेःया इ कुरा पेतो चीःती सायःनु दा। नीङ् इस्राएल्कोः मान्तालम्इ क्ल्याय्ओ सीङःहाङः सात्ओ नासरेत् गाव्सै वाङ्ओ येसुपाय् ओउःकायःलेः परमेस्वर्इ च्योक्ताक्आथै। ओउः येसु ख्रीस्कोः मय्ङ् पेह्ती झ्यान्ते इ ङ्हा क्ल्योय्बाङ् खेःओ मान्तापाय् द्याह् नीङ्कःहाङः पेतो सेलःलेः चीङ्ती मुनाः। 11 नीङ्कोः आखरःहाङः इतलेः लेखती मुनाः ‘दोह् बाङ्लो नीङ् मान्तालम्इ “इ पेमालो” त दाय्ह्ती ताती वाय्तेःनीतो ओउः बाङ्लेः लोन्ह्ते कीम् गाराकोः मुल्बाङ् स्याव्आनाः’ इलो लेखालेः नीङ्इ ङ्हा वाय्ओ येसुपाय् द्याह् ताङ्ह्तोलेः स्याव्आ। 12 ओहाङःसैको येसुकः तेती ह मान्तालम् सीआक्तीको नया गलमा द्योक्मालो जीङः दोःनै ल्हाव्ह्दैबाङ्हाङः अरु पेह्ती तेसा मय्ङ्पाय् दोह्मा नाःबाय्ल” त दाय्ह्ती पत्रुस्इ सबै हुम्ओलम्कायः तोआथास। 13 एत तोआथास ओहाङःसैको पत्रुस्इ एतलेः फुती नोःओ सायःआक्तीको “लौ इनीस्इ गलमा इस्कुल्हाङः पह्रधाङ्चल गत हायःती इत व्हाय्ती चीःती नोःसा खाय्नाःचु र” त ओउःमयः ग्याङ्ह्ती म्हर्ती “इनीस्जा येसुकुस् वाह्ओ लेःआः च रैस बा” त म्हर्ती चीःनीतो 14 ओउः ङ्हा क्ल्योय्ओ मान्ता देङेलो ओउःमयःकुस् सेलः स्याव्ती मुओ त झ्यान्ते ओउः यहुदीलम्कोः ताङ्ह्ओ मान्तालम्इ त्याङ्सा खाय्नीली। 15 ओहाङःसैको “लौ नीङ्जी इ सभाकःसै ग्ल्युङ्ह्ज” त दाय्ह्ती पत्रुस् साथीनीस्चाक् बाहीरताङ् ल्होक्आक्तीको ओउः सभाहाङः हुम्ओ मान्तालम् ओउःनीस्कोः कुरा नोःकाय्आकाय्। 16 “लौ इनीस्कायः दोह् हायःनी। इनीस्इपाय् ‘आन ताङ्ह्ओ ग्याङ्ह्राय् जाङ्ह्आकाचु’ त यरुसालेम्कोः मान्तालम्इ सबै चीःनानी रैस ओउःत झ्यान्ते ओउः नीस्चाक्इ तोओ कुरापाय् ‘दोङ् कुरा खेःल’ त मान्तालम्कायः तोसा खाय्ङुसुलु। 17 लौ द्याह् ओउःनीस्कायः वानःती ‘येसुकोः कुरा गलमा तोलाम्’ त गानाक्ती तोनी दा। ओहाङःसैको इ कुरा छालःती ल्हाक्सा दोःल” त दाय्ह्ती नोःकाय्आकाय्। 18 ओउःत नोःकाय्आक्तीको युहनामा पत्रुस्कायःमा गोत्ती सभाकःताङ् द्यानःती वानःती “लौ येसुकोः मय्ङ् पेह्ती इ कुरापाय् गलमा स्यान्ती नोःलाम्” त दाय्ह्ती ओउःमयःइ स्योत्ती स्योत्ती गानाक्ती तोआथाच। 19 ओउःत तोआक्तीको “लौ नाङ्खेइ गानाक्ती तोओ कुराया परमेस्वर्खेइ गानाक्ती तोओ कुराया गाव्खे सायःसा पेनाः त नीङ्इ चीःनीङ्सी। 20 नीचीइ लयः च्यवःओमा सायःओमा इ कुरा नीचीइ नोःमाःत छ्यानःमाःत मुसा खाय्धै खाय्ङुसुलु” त दाय्ह्ती पत्रुस्मा युहनामा त्याङ्आकाच। 21-22 ओउःत त्याङ्आक्तीको ओउः हुम्ओ मान्तालम्इ पत्रुस्नीस्कायः पानःसामा घान्सामा दोःइली। ओउः स्याक्ताक्ओ मान्तापाय् चालीस् बर्स चेन्ह् खेःतो ओउःत झ्यान्ते नाःतो सहर्कोः मान्तालम्इ पत्रुस्कोः कुरा योती “लौ इनीस्कायः परमेस्वर्इ पेतो जाङ्ह्ताक्आथाच बा” त दाय्ह्ती परमेस्वर्कायः लुङ्ती तोती मुओ खेःइतो। एत चीःती ओउः सहर्कोः मान्तालम्कः रैती झ्यान्ते ओउः सभाहाङः हुम्ओ मान्तालम्इ पत्रुस् नीस् साथीचाःकायः फेरीलेः गानाक्ती तोआक्तीको पानःमामाःत घान्मामाःत फेआथाच। 23 ओहाङःसैको फेआक्तीको ओउःनीस् लयःकोः साथीलम्कःताङ् पाय्ह्ती ओउः सभाकोः ताङ्ह्ओ मान्तालम्इ मेस्लो तोओ कुरा साथीलम्कायः सबै ल्हाक्ती छ्यानःआकाचु। 24 ओउः ल्हाक्ओ कुरा सायःआक्तीको सबै येसुकायः ङ्हाम्ओमयःइ ब्राङ्ती परमेस्वर्कायः तोती “अ प्रभु परमेस्वर्य इ ल्हाव्ह्दैबाङ् फेल्बाङ् तीःलम् ओहाङः दोह् दोह् नाःनाः चीरीगीनी मीरीगीनी नाङ्इलेः सबै जाङ्ह्ओतेःआः बा। 25 उय्ह्लेहाङः नाङ् प्रभु परमेस्वर्पाय् लयःकोः ग्वालामःइ ङीकोः तोकानः दावुद्कायः इतलेः छ्यानःती तोतेःआकान् ‘लौ अरु अरु देस्कोः मान्तालम्इ परमेस्वर्कः आह्रे ह रीस् जाङ्ह्नानी। मान्तालम्इ आह्रेलेः “क्लीमःनाङःसु” त ताःती 26 इ ल्हाव्ह्दैबाङ्कोः राजालम्इ परमेस्वर्कुस्मा ओउःकोः ख्रीस्कुस्मा काय्काय्सा मीन्ह्काय्सा बोङःनानी’ त दाय्ह्ती परमेस्वर्कोः नोकरी त तोओ दावुद् नोःतो 27 दोङ्सीलेः तेन्छ्याङ्पाय् नाङ्इ छ्युङ्ह्ओ ख्रीस् त तोओ येसुकःताङ् ल्हुङ् मल्ह्तो स्याव्ती झ्यान्ते यहुदीयाकोः हेरोद् राजामा रोमी देस्कोः अन्चलादीस् पोन्तस् पीलातस्मा इस्राएल्कोः मान्तालम्कुस्मा इस्राएल् जात् खेःमालो मान्तालम्कुस्मा हुम्ती सबैइ नाङ्कोः लयः छ्युङ्ह्ओ जय्कुमःओ काम् जाङ्ह्ओ येसुकायः सात्सा बोङःनीतो 28 ओउःमयः जाङ्ह्सा बोङःओ कुरापाय् नाङ्इ ङ्हासै चीःती लयः झाक्तीलेः रय्ह्ती गम्ओ खेःतो। 29 द्याह् ओउः मान्तालम्कोः गानाक्ती तारःपाङःसा बोङःओ कुरा सायःती ङी नाङ्कोः नोकरीलम्कायः नाङ्कोः कुरा रैमाःत फुती नोःताक्ताङी। 30 नाङ्कोः काम् जाङ्ह्ओ येसुकोः ग्वम्इ स्याक्ताक्ओमा अरु ग्याङ्ह्राय्मा जाङ्ह्ताक्ताङी दा” त दाय्ह्ती सबै येसुकायः ङ्हाम्ओ मान्तालम्इ ब्राङ्ती परमेस्वर्कायः तेती तोआकानी। 31 एतलेः परमेस्वर्कायः तेती तोआक्तीको ओउःमयः हुम्ती मुओ थाव्हाङः साः ल्हङ्तो स्याव्आ। ओउःमयः सबै परमेस्वर्कोः ग्वालामः दोःती ओउःकोः कुरा रैमाःत फुतीलेः नोःआकाय्। 32 ओहाङःसैको येसुकोः कुरा ङ्हाम्ओलम् सबै लयःमयः लयःमयः ल्हुङ् ब्राङ्ती मुओ खेःतो। ओउःमयःलम् पैसा खेःयामा भान्दा कुन्दा माल्ताल्लम् खेःयामा “इ ङाकोःआः” त दाय्ह्ती दोक्ती सुमा नोःकाय्आक्इली सबैकोः माल्ताल्लम् यातैज्योःलेः स्याव्आ। 33 फेरी प्रभु येसु सीआक्तीको उह्ती च्योक्ओ कुरा आन व्हाय्ओ ग्वम्इ येसुकोः छ्युङ्ह्ओमयःइ थोल्ह्ती तोआकानी ओउःमयःकायः परमेस्वर्इ आन पेतो जाङ्ह्ताक्आथास। 34 फेरी ओउःमयःकःहाङः ह्र्यात् मान्ता सुमा नाःआक्इली। यात्नीस् राङ् नाःओ मान्ता कीम् नाःओ मान्तालम्इ लयःकोः राङ्लम् कीम्लम् वीनःती ओउःकोः मोल् पैसा येसुकोः छ्युङ्ह्ओमयःकःताङ् ल्हालाङ् वानःआकानी। 35 वानःआक्तीको सुखेलोकायः पैसा नाःमालो खेःतो ओउःकायःलेः वेःती बयःआकानी। 36-37 इतलेः यात्चाक् क्युप्रस् देस्सै वाङ्ओ लेवी थर्कोः युसेफ् त तोओइ लयःकोः राङ्लम् वीनःती ओउः राङ्कोः मोल् पैसा येसुकोः छ्युङ्ह्ओमयःकायः ल्हालाङ् वानःआकान्। ओउः युसेफ् त तोओकायः ओउः छ्युङ्ह्ओमयःइ बर्नाबास् त हाल् मय्ङ् बयःआथै। बर्नाबास् त तोओकोः माने “अरुकायः लुङ्ओ मान्तालेः” |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.