खबरदुत 28 - चेपाङ1 ङी सबै साःताङ् त्यात्ती दाह्आक्तीको ओउः देस्पाय् “माल्त त तोओ तीःकोः बुम् लेःआः” त दाय्ह्ती ओहाङःकोः मान्तालम्इ छ्यानःआताङी। 2 ओहाङःसैको ओउःतोक्हाङः तीः वाखयःआ त झ्यान्ते ङीपाय् आन नीक्आलाङी। ओउःत च्यवःती ओउः माल्तकोः मान्तालम्इ ङीकायः योती योनःती सबैकायः म्हेः फोह्र्तो मुत्ती “इहाङः गारःलाङ् वाङ्न” त दाय्ह्ती ङीकायः गोत्ती त्याक्आताङी। 3 म्हेः गारःओहाङः पावुल्इ सीङःलम् रोत्ती वानःती म्हेःहाङः तुस्आकान्। तुस्तोक् बेलाहाङः रुलेः म्हेःकः रैती सीङःसै ग्ल्युङ्ह्ती पावुल्कोः क्रुत्हाङः पोतोलःआथै। 4 रुपाय् पावुल्कोः क्रुत्हाङः नेःती पोतोलःती मुओ च्यवःती “इपाय् मान्ताकायः सात्ओ चाक् लेःआः यादो ओउःत झ्यान्ते द्युम्मालो तीः ज्युप्ती सीओसै दल्आक्तीको द्याह् ओउःकायः रुइ नेःती सीसा दसआः थाङ्आ रैस” त दाय्ह्ती ओउः देस्कोः मान्तालम्खे नोःकाय्आकाय्। 5 पावुल्खेइ रुकायः म्हेःहाङः ह्रान्ह्ती वाय्ती पेतो सेलः मुआ दोह्मा दयःताक्थाल। 6 “इपाय् माङ्ती सीनाःया कोन्ह्ती सीनाःया” त दाय्ह्ती मान्तालम् पावुल्कायः योती म्हर्इतो ज्याङःतो स्याव्तीमा दोह्मा दयःमालो च्यवःती “अहः इपाय् द्यव्ता लेःआः रैस बा” त दाय्ह्ती ल्हुङ् द्यान्ह्तीलेः नोःकाय्आकाय्। 7 ओहाङःसैको ओउःमयः मुओ थाव् द्याङ्तोलेः ओउः तीः बुम्कोः हाकीम् पुब्लीयस् त तोओकोः राङ्लम् खेःतो। ओउः पुब्लीयस् त तोओइ ङीकायः योती योनःती लयःकोः कीम्ताङ् गोत्ती रोम्आताङी। ओउःकोः कीम्ताङ् आल्आक्तीको सुम्दीन्कायः ङी ओहाङः जेःसा दोह्सा एनःसा दोःआलाङी। 8 ओहाङःसैको ओउःकोः कीम्हाङः मुतोक्हाङः पुब्लीयस् त तोओकोः आपा अय्ती स्योरोती आन जीक्ती मुओ खेःतो। ओउः जीक्ओ मान्ताकःताङ् वाङ्ती पावुल्इ लयः क्रुत् झाम्ह्ती परमेस्वर्कायः “लौ इ स्याक्पाः” त दाय्ह्ती झाह्ती तेती तोआकान्। ओउःत तोआक्तीको ओउः मान्तापाय् स्याक्लेःआ। 9 पुब्लीयस्कोः आपा स्याक्आक्तीको ओउः देस्कोः अरु जीक्ओ मान्तालम् पावुल्कःताङ् वाङ्ती ओउःमयःमा स्याक्ताक्ओ खेःइतो। 10 ओउःमयःकोः जीक्ओलम् स्याक्आक्तीको ओहाङःकोः मान्तालम्इ ङीकायः आन बयःआताङी ङी आल्सा खेःओ बेलाहाङःमा ङीकायः आल्ती वाह्सा चीङ्ओकायः जेःगालम् तुङ्गालम् दोह्लम्मा तीःजहास्हाङः वानःती गम्ती बयःआताङी। 11 ओहाङःसैको ओउः माल्त त तोओ तीःबुम्हाङः सुम् महीनाच्युक् मुआलाङी। सुम् महीना पुत्आक्तीको अरु तीःजहास् वाङ्ती झ्यान्ते ङी लन्ह्ती आल्सा दोःआलाङी। ओउः तीःजहास्पाय् “जव्ले पुःचाः” त मय्ङ्ओ खेःतो। ओउः तीःजहास् मीस्रा देस्कोः आलेक्जान्द्रीया सहर्सै वाङ्ती दाह्आक्तीको य्हुदा महीनालम्कोः जोक्तो मारुः वाङ्तोक् बेलाहाङःकायः माल्त त तोओ बुम्हाङः न्यास्आ। 12 ओहाङःसैको तीःजहास्हाङः लन्ह्आक्तीको ङी माल्त तीःबुम्सै आल्ती सीराकुस् सहर्ताङ् दाह्ती ओहाङः सुम् दीन्कायः मुआलाङी। 13 सुम्दीन् पुत्आक्तीको सीराकुस्सै वीकोल्ती आल्ती ह्रेगीयुम् सहर्ताङ् दाह्आलाङी। ह्रेगीयुम् त तोओ सहर् दाह्आक्तीको उनम्ह्कोः स्याङ्ह्लो दक्सीन्सै पेओ मारुः वाङ्ती ङी आल्ती चीत्सैलो पोतेयोली सहर्ताङ् दाह्आलाङी। 14 पोतेयोली सहर्हाङः ङी तीःजहास्सै ग्ल्युङ्ह्ती ओहाङः यात्नीस् येसुकायः ङ्हाम्ओलम्कुस् क्रुस्काय्आलाङी। क्रुस्काय्आक्तीको “ङीकुस् सात्दीन्कायःच्युक् मुन” त दाय्ह्ती तोआताङी। ओउःत हायःती ओउःमयःकुस् सात्दीन्कायः मुआक्तीको ङी आल्ती ल्याम्इ ल्याम्इ वाह्ती रोम् त तोओ ओउः सीजर् राजाकोः सबैसै ताङ्ह्ओ सहर्ताङ् दाह्खेःआलाङी। 15 ओहाङः दाह्खेःतोक्हाङः ओउः रोम् सहर्हाङः मुओ येसुकायः ङ्हाम्ओलम्इ “पावुल् दाह्ती वाङ्नाः” त दाय्ह्ओ सायःती चीःआक्तीको आपीयस् बजार्कोः सुम् होतेल् मुओ थाव्ताङ् ङीकायः त्याक्लाङ् वाङ्आकाय्। ओउःमयः क्रुस्आक्तीको पावुल् चोङाय्ती झ्यान्ते परमेस्वर्कायः आन लुङ्ती तोआकान्। 16 ओहाङःसैको रोम् सहर्ताङ् आल्ती दाह्ती वाङ्आक्तीको पावुल् लयःकोः कोथाहाङः याक्सा ताक्आकानी ओउःकायः झ्याल्खानहाङः काती गम्थाल। यात्चाक् सीपाहीइ ह ओउःकायः कीम्हाङः योती मुओ खेःतो। 17 ओहाङःसैको दाह्आक्तीको सुम्दीन् पुत्ओहाङः ओउः रोम् सहर्हाङः मुओ ताङ्ह्ओ यहुदीलम्कायः पावुल्इ गोत्आकान्। ओउःमयः गोत्ती हुम्आक्तीको “लौ पुःचोङ् हौचोङ्य ङी यहुदी जात्कोः आय्कानः तोकानःइ जवओ ऐन्लम् छ्यात्लम् ङाइ दोह्मा बीक्रताक्माःत मुङोतो यरुसालेम्कोः मान्तालम्इ ङाकायः चुम्ती पानःती रोमी मान्तालम्कायः दाक्ती ल्हाआताङः। 18 ङाकोः कुरा सायःतोक् बेलाहाङः ङाकायःपाय् ‘सात्सा खेःओ काम्पाय् दोह्मा जाङ्ह्उलु’ त चीःती ओउः रोमीलम्इ ङाकायः फेसा बोङःताङःसतो 19 ‘ओउःकायः फेसा स्याव्नाः जुगु’ त दाय्ह्ती ओउः यहुदी मान्तालम् आन नोःती तोआकानी। ओउःत झ्यान्ते ‘लौ ङाकोः कुरा सीजर् राजाइ लयः सायःती तात्पौ’ त ङाइ तोसा खेःआलाङः। ओउःत तोसा खेःसापाय् खेःआलाङः ङाकोः लयःकोः जात्कोः मान्तालम्कायः ङाइ दर्कास् बयःङुसुलु। 20 लौ इ कुरा नोःती छ्यानःसा थेङा ङाइ नीङ्कायः गोत्ती हुम्ताक्नेःआलाङ्स। ‘ङी इस्राएल्कोः मान्तालम्इ ल्युङ्ह्ती मुओ ख्रीस् त तोओपाय् ओउःलेः दाह्ती वाङ्ओआः’ त ङाइ आन छ्यानःती तोआलाङः ओउःत झ्यान्ते तेन्छ्याङ् ङा इ साङ्लाइ पानःतीलेः मुनाङः” त दाय्ह्ती पावुल्इ यहुदीलम्कोः ताङ्ह्ओ मान्तालम्कायः ल्हाक्ती तोआथास। 21 ओउःत तोओ सायःआक्तीको “यहुदी देस्सै नाङ्कोः कुरा ल्हाक्ती छ्यानःसा चेतीलम् दोह्मा दोःधाङ्इली ओउःसै वाङ्ओ यहुदी मान्तालम्मा नाङ्कायः गाल्तुम्ओ कुराकायः दोह्मा ल्हाक्ती तोताङीली दर्कास्मा बयःनीली। 22 अरु अरु मान्तालम्खेइ ‘इ ख्रीस्त्यान् त तोओलम् पेमालो’ त आन दाय्ह्ती तोनानी ओउःत झ्यान्ते नीङ् ख्रीस्त्यान्लम्इ ङ्हाम्ओ येसुकोः कुरा दोह्लो त नाङ्खेइ लयः तोओइ ङी आन सायःसा झाक्नाङी” त दाय्ह्ती पावुल्कायः तोआकानी। 23 ओउःत झ्यान्ते पावुल्इ येसुकोः कुरा तोती छ्यानःसा दीन् दोक्ती गम्आक्तीको ओउःनम् दीन्हाङः नाःतो यहुदीलम् पावुल् मुओ कीम्ताङ् हुम्ती वाङ्आकाय्। हुम्ती वाङ्आक्ती पावुल्इ येसुकोः कुरामा परमेस्वर्कोः राजीकोः कुरामा प्रीमाहाङःसै याह्दीङ्मा दाह्तोलेः स्यान्ती ओउः हुम्ओ मान्तालम्कायः तोआथास। उय्ह्लेहाङः लेखओ मोसाइ तोओ कुराहाङःमा परमेस्वर्कोः कुरा छ्यानःओमयःकोः कुराहाङःमा “ख्रीस्कायः दोह् दोह् लेखती मुनाः” त स्यान्ती तोती ओउःमयःकायः होम्सा बोङःआकान्। 24 ओहाङःसैको पावुल्इ तोओ कुरा सायःआक्तीको यात्नीस् मान्तालम्खेइ ङ्हाम्आकानी अरुखेइ ङ्हाम्नीली। 25 ओउःत झ्यान्ते लयःमयःकःताङ् आन नोःकाय्ती काय्काय्ती पाय्ह्सा चीङ्आकाय्। ओउःमयः पाय्ह्ती चीङ्तोक् बेलाहाङः “लौ परमेस्वर्कोः कुरा छ्यानःओ एसाया त तोओइ नीङ्कोः आय्कानः तोकानःलम्कायः दोङ् परमेस्वर्कोः ग्वालामःइ स्यान्ओ कुरा तोआथास बा। 26 ओउः कुरापाय् इतलेः ‘लौ इ यहुदी जात्लम्कःताङ् आल्ती इत तोसा खेःतो “लौ नीङ्इ सायःसामा सायःतेःनीतो चीःतेःनीली। च्यवःसामा च्यवःतेःनीतो तय्ह्तेःनीली” त दाय्ह्ती ओउःमयःकायः तोनु दा। 27 ङाकोः पेओ कुरा ओउःमयःइ चीःसामा तय्ह्सामा ग्याइली त झ्यान्ते ओउःमयःकोः नोलम् ल्होप्माआकायःइसी ओउःमयःकोः मीक्लम् मेल्माआकायःइसी। सायःनानी च्यवःनानी त खेःया ओउःमयःइ ङाकोः कुरा चीःती तय्ह्ती झ्यान्ते ङाकःताङ् द्यान्ह्ती दल्ताक्साकायः तोचाःताङः खेःतो’ त परमेस्वर्इ छ्यानःओ कुरा एसायाइ नीङ्कोः आय्कानः तोकानःलम्कायः तोआथास। 28 ‘लौ द्याह् इ परमेस्वर्इ दल्ताक्सा कुरापाय् यहुदी खेःमालो जात्लम्कायः तोती मुनाः’ त नीङ्इ चीःतेःपानी। ओउः जात्लम्इ ग्याती सायःनानी बा” त दाय्ह्ती पावुल्इ ओउः पाय्ह्सा बोङःओ यहुदीलम्कायः तोआथास। 29 ओउःत तोआक्तीको ओउः यहुदीलम् आन तोकाय्ती कायःकाय्ती पाय्ह्आकाय्। 30 ओहाङःसैको नीस् बर्सकायः पावुल्पाय् बाहाल् पाय्क्सा खेःओ कीम्हाङः याक्ती मुआ। ओहाङः याक्ती मुओ बेलाहाङः ओउःकायः क्रुस्लाङ् वाङ्ओ मान्तालम्कायः पावुल्इ झाक्ती रोम्आथास। 31 ओउः वाङ्ओ मान्तालम्कायः सुकःमा रैमाःत येसु ख्रीस्कोः कुरामा परमेस्वर्कोः राजीकोः कुरामा फुतीलेः स्यान्ती तोआथास। ओउःत स्यान्तोक् बेलाहाङः सुइमा ओउःकायः त्याःसा दोःइली। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.