खबरदुत 27 - चेपाङ1 ओहाङःसैको “पावुल्कायः तीःजहास्हाङः सीजर् राजाकोः इताली देस्ताङ् आलःपाःथै” त गानाक्ती तोआकानी। ओउःत तोआक्तीको यात्चाक् सीजर् राजाकोः लयःकोः पल्तन्कोः सीपाही जुलीयुस् त तोओकायः पावुल्मा यात्नीस् अरु राक्ती गम्ओ मान्तालम्मा ल्हाओ खेःतो। 2 ओउः जुलीयुस् त तोओ सीपाहीकोः सुबेदार्कायः ल्हाआक्तीको ओउःमयः अन्द्रामीतीसै वाङ्ओ तीःजहास्हाङः लन्ह्आकाय्। ओउः तीःजहास् असीया देस्कोः द्युम्मालो तीःकोः छेव्हाङः मुओ सहर् सहर्लम्ताङ् आल्सा बोङःआकान्। ओउः जहास्हाङः ङा लुका त तोओमा यात्चाक् मासीदोनीया देस्कोः थेसालोनीका सहर्सै वाङ्ओ येसुकायः ङ्हाम्ओ मान्ता आरीस्तार्कस् त तोओमा पावुल्कुस् लन्ह्आलाङी। 3 ओहाङःसैको लन्ह्आक्तीको आल्दा आल्दा अनम्ह्कोः स्याङ्ह्लो ङी सीदोन् सहर्ताङ् दाह्आलाङी। दाह्आक्तीको ओउः सुबेदार् जुलीयुस् त तोओइ पावुल्कायः योनःती ओउःकायः ओउः सहर्हाङः मुओ येसुकायः ङ्हाम्ओ साथीलम्कुस् क्रुस्सा ताक्आथै। पावुल्पाय् दोह् दोह् राह्ओलेः ओउःमयःइ बयःसा खाय्ओ खेःतो। 4 ओउःमयःकुस् क्रुस्काय्आक्तीको ङी तीःजहास्ताङ् द्यान्ह्ती लन्ह्आलाङी। लन्ह्आक्तीको ङी सीदोन्सै आल्ती वाह्ती ङीकःताङ् स्यालःमारुः वाङ्ती झ्यान्ते ङीकोः तीःजहास्पाय् क्युप्रस् त तोओ तीःकोः बुम्इ कोओहाङः वीकोल्ती आल्आ। 5 ओहाङःसैको आल्दा आल्दा ङी सीलीसीया पाम्फील्या जील्लानीस्कोः तीःकोः छेव्इ छेव्इ च्योल्तीलेः आल्ती ङीकोः तीःजहास्पाय् लुसीया जील्लाकोः म्युर सहर्ताङ् दाह्ती न्यास्आ। ओहाङः न्यास्तोक् बेलाहाङः ङी ग्ल्युङ्ह्ती ओउः जहास्कायः फेआलाङःसु। 6 ओउः जहास्खे फेती म्युर सहर्हाङः यात्ज्योः मीस्रा देस्कोः आलेक्जान्द्रीया सहर्सै वाङ्ओ तीःजहास्खे सुबेदार्इ ङायःआकान्। ओउः जहास् इताली देस्ताङ् आल्सा बोङःओ त झ्यान्ते ओउः सुबेदार्इ ओउः तीःजहास्हाङः लन्ह्ताक्आताङी। 7-8 लन्ह्आक्तीको स्यालःमारुःइ ओउः तीःजहास्कायः त्याःती झ्यान्ते ओउःपाय् गुनी गुनी वाह्दा वाह्दा स्नीदुस् सहर् द्याङ्तो दाह्आ। ओहाङः दाह्ती फेरीलेः स्यालःमारुः वाङ्ती ङी फेरी वीकोल्ती क्रेते त तोओ तीः बुम्इ कोओहाङः वाह्ती आल्आलाङी। ओहाङः वाह्ती साल्मोने त तोओ बाङ्लम् च्योल्ती क्रेते त तोओकोः छेव् छेव्हाङः आन दुक्तो वाह्ती ङी सुबन्द्र त तोओ थाव्ताङ् दाह्आलाङी। ओउः थाव्पाय् लासीया सहर् द्याङ्तो खेःतो। 9 सुबन्द्र थाव्हाङः दाह्आक्तीको बल ज्याङःतो मुती ओहाङः मुतोक् बेलाहाङः तीःजहास्लम् वाह्सा स्याव्ओ समै ज्याल्खेःआ। ओउः समै ज्याल्आक्तीको आन गाय्ध वाङ्ती झ्यान्ते ओउः द्युम्मालो तीःहाङः वाह्सा आन दुक्नाः। 10 ओउःत झ्यान्ते पावुल्पाय् सुबेदार्लम्कःताङ् वाङ्ती “हजुर्लम् ङी इहाङःसै आल्चाङी त खेःया आन दुख स्याव्नाङी। इ तीःजहास्मा जहास्हाङः लात्ओ चीस्लम्मा जुदालेः वाय्नाः ङी मान्तालम्मा तीःहाङः ज्युप्ती सीती वाय्नाःतय्ही” त दाय्ह्ती पावुल् तोउतो। 11 ओउःइ तोओ कुराखे ओउः सुबेदार्इ ङ्हाम्उलु। ओउः तीःजहास्कोः कप्दन्मा धनी मान्तामा “लौ आल्इ” त दाय्ह्ती तोआकाजु ओउःत खेःओ ओउः सुबेदार्इ ओउःनीस्कोः कुराखे ङ्हाम्आकान्। 12 “लौ जोक्तो मारुः वाङ्तोक्हाङः तीःजहास्पाय् इहाङः मुसा स्याव्ल मारुःसै पेतो कोल। ओउःत झ्यान्ते फीनीकस् सहर्ताङ् आल्इ। ङी ओहाङः दाह्सा खाय्नाःतय्ही ओहाङःसैको य्हुदा महीनाच्युक्कायः ङी ओहाङः पेतो कोती मुसा स्याव्नाः” त दाय्ह्ती नाःतोलम् नोःकाय्आकाय्। ओउः फीनीकस् त तोओ सहर्पाय् दान्दाइ पेतो कोओ खेःतो। 13 ओहाङःसैको लोन्ते दक्सीन्सै पेओ मारुः वाङ्ती ओउः तीःजहास् चलावओमयः “लौ इ पेलेःनाः” त म्हर्ती तीःजहास्कायः फास्आक्तीको वाह्ताक्सा बोङःआकानी। ओउः तीःजहास्पाय् वाह्ती आल्ती ङी क्रेते त तोओ तीः बुम्कोः छेव्इ छेव्इ आल्आलाङी। 14 ओहाङः वाह्तोक् बेलाहाङः ओउः तीः बुम्सै आन जोक्तो ङोय्क्तो मारुः वाङ्आ। 15 ओउः मारुः वाङ्आक्तीको ङीकोः जहास्पाय् बुम्कोः छेव्हाङः मुसा खाय्माःत झ्यान्ते ओउः जहास्कायः मारुःइ दक्सीन्ताङ् लात्ती आलःआथै। 16 दक्सीन्ताङ् लात्ती ङी मारुःकुस् आल्दा आल्दा कौदा त तोओ मीओ तीः बुम्कोः कोओहाङः दाह्ती ओउः जहास्कोः मीओ दोङ्गा तीःजहास्हाङः लाइ च्युन्ती छाय्ती गम्आकानी। 17 दोङ्गा छाय्ती गम्आक्तीको ओउः तीःजहास्कायः लाइ ग्रापाःती पानःआकानी। ओहाङःसैको आफ्रीका त तोओ देस्कोः छेव्हाङः मुओ तीः ज्युम्ह्तो क्लीम्माःतो बलुवा साःलम्हाङः “इ तीःजहास् ओहाङः आल्ती ह्रप्ती वाय्ताक्चौ” त म्हर्ती रैती ओउः चलावओ मान्तालम्इ तीःजहास्कोः वाह्ताक्ओ नाय्लम् ल्ह्युन्ती खुम्आकानी। 18 नाय् खुम्आक्तीको स्याङ्ह्लो मारुःइ ल्यङःकर्ताक्ओ तीः न्हाङ्तोलेः नाःतो वाङ्ओ त झ्यान्ते “अहः तीःलम्पाय् ङीकोः जहास्हाङः पोक्ती ज्युप्ताक्नाःतय्ही” त म्हर्ती ओउःमयःइ तीःजहास्हाङः काओ चीस्लम् थोक्लम् तीःहाङः क्लाःती वाय्खेःआकानी। 19 चीत्सैलोहाङः ओउः मारुः न्हाङ्तोलेः जोक्तो स्याव्ती झ्यान्ते ओउः तीःजहास्कोः वाह्ताक्ओ नाय्लम् लालम् दोह्लम् सबै तीःहाङः क्लाःती वाय्आकानी। 20 ओहाङःसैको नाःतो दीन्कायः न्याम् लाह् दोह्मा च्यवःमाःत झ्यान्ते “ङी द्याह् दल्ङीली रैस” त म्हर्आलाङी। 21 ओहाङःसैको बल नाःतो दीन्कायः ओउः तीःजहास् चलावओलम्इ रैती जेःसा कोनीली। ओउःत हायःतोक्हाङः पावुल्पाय् ओउःमयःकःताङ् वाङ्ती “लौ ङाइ ङ्हालेः ‘क्रेते बुम्सै आल्लाम्’ त नीङ्कायः तोनेःआलाङ्स। ओउः ङाइ तोओ कुरा नीङ्इ सायःयामा खेःतेःइतो। नीङ्इ सायःआकानी त खेःया इच्युक् चीस् वाय्आक्ल। 22 ओउःत स्याव्सापाय् स्याव्तय्हीतो द्याह् रैमाःत र्याङःमाःत मुन दा। इ तीःजहास् ह ह्र्योङःतीलेः वाय्नाः। ङी मान्तालम्पाय् सुमा सीती वाय्तय्हीली। 23 तेन् याह्दीङ्हाङः ओउः ङाकायः राप्ओ ङाइ झाह्ती तोओ परमेस्वर्इ लयःकोः ल्होक्ओमयः ङाकःताङ् ल्होक्आताङः। 24 ल्होक्ती वाङ्आक्तीको ‘अ पावुल्य रैतेःचाः। नाङ्पाय् रोमी राजाकःताङ् आल्सा खेःतेःनाः। नाङ्मा सीतेःल नाङ्कुस् वाह्ओ मान्तालम्कायःमा परमेस्वर्इ योनःती योतीलेः सुकायःमा सीसा ताक्उलु’ त दाय्ह्ती ओउः ल्होक्ओमयःइ तोआताङः। 25 ओउः झ्यान्ते नीङ्इ सायःओलम् रैतेःचै। ङाकायः छ्यानःओ लेखालेः लोन्ते जुगाङ्लेः ताप्तो स्याव्नाः। इत हायःसाकायः ङाइ परमेस्वर्कायः ङ्हाम्नाङः। 26 लोनेः इ तीःजहास् यात्ज्योः तीः बुम्कायः थुङ्ती वाय्ती झ्यान्ते ङी चीची बीबी स्याव्नाङी” त दाय्ह्ती पावुल्इ तोआथास। 27 ओउःत तोआक्तीको चौध दीन् पुत्आक्तीको ङीकोः तीःजहास् आद्रीया त तोओ द्युम्मालो तीःहाङः वाह्ओ खेःतो। ओहाङःसैको दोङ् याह्दीङ्हाङः “ङीपाय् साःकोः छेव् द्याङ्तो दाह्आतय्ही यादो” त ओउः चलावओ मान्तालम्इ चीःआकानी। 28 ओउःत चीःआक्तीको इ तीःपाय् “गुच्युक् ज्युम्ह्तो” त योती ङ्हा आसी क्रु दीक्आकानी। ओहाङःसैको आल्ती फेरी क्रुती योतोक्हाङः साथी क्रु दीक्आकानी। 29 ओउःत दीक्आक्तीको “इ तीःजहास्पाय् बाङ्हाङः थुङ्ती होल्ह्ती ज्युप्चाः” त रैती म्हर्ती ओउः तीःजहास् न्यास्ताक्साकायः चार्गोता लाइ छीत्ओ ताङ्ह्ओ क्वेःलेः ओउः नाःतो ज्युम्ह्मालो तीःहाङः जहास्कोः पोर्सै क्लाःती ल्होक्आकानी। ल्होक्आक्तीको ओउः ताङ्ह्ओ क्वेःइ साःबाङ्हाङः त्योयःती ओउः तीःजहास् न्यास्ताक्सा खेःतो। क्वेःलम् क्लाःआक्तीको “रेन्ह्तोलेः न्याम् थोङ्पाः” त दाय्ह्ती परमेस्वर्कायः तेती तोआकानी। 30 ओहाङःसैको न्याम् थोङ्धाङ्माखाहाङः ओउः तीःजहास् चलावओमयःइ “लौ ङीइ जहास्कोः म्होतोङ्सैमा द्याह् क्वेःलम् क्लाःचाङःसु” त दाय्ह्ती माःती लयःमयः “इ जहास्पाय् फेती मीओ दोङ्गाहाङः दल्पाङी” त म्हर्ती अरु मान्तालम्कायः तीःजहास्हाङः फेती लयः क्रव्सा बोङःआकानी। 31 एत चीःती पावुल्इपाय् सीपाहीकोः सुबेदार्ताङ् वाङ्ती “इ मान्तालम्पाय् क्रव्ती तीःजहास्हाङः मुइली त खेःया नीङ् सबै दल्तेःइली” त पावुल्इ दाय्ह्ती तोआथै। 32 ओउःत तोआक्तीको सीपाहीलम्इ दोङ्गाकायः पेन्ह्ओ लालम् तात्ती ओउः दोङ्गाकायः सोह् रेस्आकानी। 33 ओहाङःसैको न्याम् थोङ्खेःतोक्हाङः “तेन्पाय् नीङ्इ पन्र दीन्च्युक्कायः जेःसा कोतेःनीली। 34 लौ द्याह्पाय् जेःनु दा उया योङ्क्राय् ग्र्यातेःनै। नीङ्कायः लोने दोह्मा दयःतेःइली” त दाय्ह्ती पावुल्इ तोआथास। 35 ओउः त तोआक्तीको पावुल्इ लाङ् त्याक्ती परमेस्वर्कायः लुङ्ती “च्युता” त तोती ओउः लाङ् जेःआकान्। 36 ओउःत हायःओ च्यवःती अरुलम्इ ल्हुङ्तुक् पोक्ती लयःमयः जेःमाआकानी। 37 ङी तीःजहास्हाङः मुओलम्पाय् दुय्सै छौहत्रजन स्याव्आलाङी। 38 ओहाङःसैको कोस्तो जेःआक्तीको “इ जहास् हाःपाः” त दाय्ह्ती जहास्हाङः लात्ओ गहुङ्कोः चुय्लम् तीःहाङः क्लाःती वाय्आकानी। 39 ओहाङःसैको न्याम् थोङ्आक्तीको यात्ज्योः देस्कोः ध्याप् च्यवःओ खेःतो “इ देस् दोह् देस्लो खेःनाः ती” त दाय्ह्ती जहास्कोः मान्तालम्इ चीःनीली। देस्कायः चीःनीली ओउः द्युम्मालो तीःकोः छेव्हाङः यात्ज्योः सल्तो बाङ् नाःमालो थाव् च्यवःती “इ जहास्पाय् ओहाङः न्यास्ताक्सा खाय्नाङःसु यादो” त दाय्ह्ती म्हर्आकाय्। 40 ओउःत हायःसाकायः ओउः तीःजहास्कायः न्यास्ताक्सा क्वेःलम्कायः ला तात्ती तीःहाङः फेआकानी। फेआक्तीको जहास्कोः धेङ्तो वाह्ताक्ओ सीङःलम् फास्तीमा जहास् वाह्ताक्ओ नाय्लम् फीह्तीमा मारुःइ तीःजहास् साःगन आलःताक्आकानी। 41 साःगन आल्तोक् बेलाहाङः ओउः तीःजहास् बल ज्युम्ह्मालो थाव्हाङः साः ङायःती ओहाङः छास्ती न्यास्आ। छास्ती न्यास्आ त झ्यान्ते ओउः जहास्कोः पोर्कायः मारुःइ ल्यङःकर्ताक्ओ तीःइ ह्र्योङःती वाय्खेःआथै। 42 ओहाङःसैको “ङीइ पानःती वानःओ मान्तालम् तीःहाङः लाःती क्रव्नै यादो ओउःत खेःओ ओउःमयःकायः सबै सात्साआः” त दाय्ह्ती सीपाहीलम्खेइ नोःकाय्इतो 43 ओउः सुबेदार्खेइ पावुल्कायः “दल्ताक्चाङः” त म्हर्ती सुकायःमा सात्सा ताक्उलु। “लौ तीःहाङः लाःसा चीःओलम्खे ङ्हासै तीःहाङः ज्योस्ती लाःती ब्योङ्ह्ती वाह्न। 44 अरुलम्इ सीङःलम् दोह्लम् चुम्ती लोने साःगन वाह्न” त दाय्ह्ती ओउः सुबेदार्इ गानाक्ती तीःजहास्हाङः मुओलम्कायः तोआथास। ओउःत हायःती झ्यान्ते सबै मान्तालम् दल्ती साःताङ् त्यात्लाङ् दाह्आकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.