खबरदुत 24 - चेपाङ1 पावुल्कायः हेरोद् राजाकोः दर्बाल्हाङः राक्ओ खेःतो ओहाङःसैको पास्दीन् पुत्आक्तीको ओउः प्रधान् पुरोहीत् हननाया त तोओ यात्नीस् अरु ताङ्ह्ओ मान्तालम्कुस् सीजारीयाताङ् दाह्आकाय्। ओउःमयःइ यात्चाक् तर्तुलस् त तोओ आधीकारी काम् जाङ्ह्ओ मान्ताकायः वानःआकानी। ओहाङःसैको पावुल्कायः गाल्तुम्ती नोःती ओउःमयःकोः दर्कास् अन्चलादीस्कायः बयःआथै। 2 दर्कास् बयःतोक्हाङः ओउः अन्चलादीस्इ पावुल्कायः गोत्आथै। पावुल्कायः गोत्ती वानःआक्तीको तर्तुलस्पाय् ओउःकोः गाल्तुम्ती तोसा कुरा नोःसाकायः चीङ्ताक्आथै। तर्तुलस्पाय् चीङ्ती “लौ नाङ् फेलीकस् अन्चलादीस्य इ देस्हाङः नाङ्इ व्हाय्ओ हुकुम् बयःओ बेलाहाङः ङी आन पेतो स्याव्आलाङी आन पेओ काम्लम्मा नाङ्इ जाङ्ह्तेःनाःताङी। 3 ओउःत झ्यान्ते नाङ्इ जाङ्ह्ओ काम्कः ङी आन ग्याती म्रोआलाङी। 4 ओउःत स्याव्लेःनाः ङाइ ज्याङःतोलेः तोसा परङल। द्याह् ङाकायः योनःती यात् चीच्योक्कायः ङाकोः कुरा सायःआक्ची दा। 5 इ मान्तापाय् आन रेव्तो लेःआः बा। ओउःपाय् ओउः नासरीन् त तोओलम्कोः स्यालःओ मान्ता स्याव्ती ओउःइ देस् देस्हाङः यहुदीलम्कायः फोल्यावःती तोती अरुलम्कुस् कायःकाय्ताक्सा मीन्ह्काय्ताक्सा बोङःनौ। 6 अनम्ह्काल ङीकोः मन्दीर्कायःमा क्रीसीःओ जाङ्ह्सा बोङःनीतो ओउःत हायःतोक्हाङः ङीइ ओउःकायः चुम्ती पानःआलाङःसु। 7 पानःआक्तीको ङीइ लयःकोः ऐन् तोती ओउःकोः कुरा सायःती तात्आलाङी खेःङीतो लुसीयस् त तोओ हाकीम्इ वाङ्ती ङीकुस् मीन्ह्काय्ती पावुल्कायः ङीकःसै लाती आलःआथै। 8 ओहाङःसैको ‘लौ अन्चलादीस् फेलीकस्कःताङ् गाल्तुम्लाङ् आल्अ’ त दाय्ह्ती हाकीम्इ तोआताङी। ओउःत खेःओ नाङ्इ उया ओउःकायः ल्हुङ्तुक् योती ओउःकायः गाल्तुम्ओ कुराकायः दोङ् कुरालेः त नाङ्इ चीःतेःनौ” त दाय्ह्ती तर्तुलस्इ तोआथै। 9 ओउःत तोआक्तीको “माः ओउःत लेःआः” त दाय्ह्ती अरु यहुदीलम् पाःती नोःआकाय्। 10 ओहाङःसैको अन्चलादीस्इ पावुल्कायः नोःताक्आथै। नोःताक्आक्तीको पावुल् चीङ्ती “लौ नाःतो साल्कायः नाङ्इ इ देस्हाङः हुकुम्लम्मा बयःतेःआकान् कुरालम्मा सायःमातेःआकान् त ङाइ चीःनाङः ओउःत झ्यान्ते ङाइ द्याह् म्रोतीलेः लयःकोः कुरा तोनेःनाङ्। 11 दस् बारदीन् स्याव्ओहाङः ह ङा यरुसालेम्ताङ् परमेस्वर्कायः झाह्ती तोलाङ् आल्आलाङः इच्युक् नाङ्इ अरुलम्कायः व्हत्ती ‘दोङ् कुरा लेःआः’ त चीःसा खाय्तेःनौ। 12 ओउः बेलाहाङः मन्दीर्हाङः थनःओ कीम्हाङः ङा सुकुस्मा काय्काय्ङल सुसुकायःमा ङाइ फोल्यावःती तोङुसुलु। इत हायःओ ङाकायः गाल्तुम्ओलम्इ दोह्मा च्यवःताङःल 13 ङाकायः गाल्तुम्ती नोःसाकायः पेमालो काम् जाङ्ह्ओ च्यवःमाःत झ्यान्ते ओउःमयःइ ङाकायः दोह्मा नोःसा खाय्ताङःल। 14 ङाइ इतलेः ह जाङ्ह्आलाङः बा। येसु त तोओकोः कुराकायः ङ्हाम्ती जाङ्ह्ती ङाइ ङीकोः आय्कानः तोकानःकोः परमेस्वर्कायः झाह्ती तोलेःनाङः। येसुकोः कुराकायःपाय् इ यहुदीलम्खेइ ‘ङीइ स्यान्ओ कुरासै थे कुरा लेःआः’ त दाय्ह्ती तोनानी। ङाइ परमेस्वर्कायःमा झाह्ती तोलेःनाङः सबै मोसाकोः ऐन्कोः कुरामा उय्ह्लेकोः परमेस्वर्कोः कुरा छ्यानःओमयःइ तोओ कुरामा ङाइ सबै ङ्हाम्मानाङः। 15 इ ङाकायः गाल्तुम्ती तोओ मान्तालम्लो लेखालेः ‘स्याङ्ह्ससै परमेस्वर्इ सबै मान्तालम्कायःपाय् पेओ मान्तालम्कायःमा पेमालो मान्तालम्कायःमा सीआक्तीको च्योक्नाःतय्ही’ त ङामा ताःलेःनाङः। 16 ओउःत झ्यान्ते परमेस्वर्कोः मीक्हाङःमा सबै मान्तालम्कोः मीक्हाङःमा ङाइ परमेस्वर्कोः कुरा जुदालेः पेतो जाङ्ह्सा बोङःनाङः। 17 ओउःत हायःती ङा यरुसालेम् सहर्सै बल ज्याङःतो बर्सकायः भेक्ती झ्यान्ते ङाकोः लयःकोः मान्ताकोः ह्र्यात्लम्कायः पैसा वानःसाकायःमा मन्दीर्हाङः परमेस्वर्कायः ल्हाती बयःसाकायःमा ङा यरुसालेम्ताङ् फेरीलेः वाङ्आलाङः। 18-19 वाङ्आक्तीको मन्दीर्हाङः जय्लनःती जाङ्ह्ती खाय्तोक्हाङः यात्नीस् असीया देस्सै वाङ्ओ यहुदीलम्इ ङाकायः तय्ह्ती च्यवःआताङः। ङाकायः च्यवःओ बेलाहाङः ङाइ ङैताक्ती हुम्ओ मान्तालम् ङाकुस् सुमा नाःआक्इली। फेरी च्यवःतोक्हाङः यात्नीस् असीयासै वाङ्ओ यहुदीलम्इ मुओ खेःइतो ओउः मान्तालम्इ ङाकायः गाल्तुम्ती नोःसा खाय्नानी त खेःया इहाङः वानःसा खेःइतो। 20 ओउःमयः इहाङः वाङ्मालो त झ्यान्ते ङा सभाहाङः चीङ्ती मुओ बेलाहाङः ङाइ जाङ्ह्ओ रेव्ओ कुरा दोह् खेःतो त इ मान्तालम्इ नोःती गाल्तुम्सा तोपाःताङः। 21 इ ह ङाइ सभाहाङः सोतोलेः तोआलाङः ‘सीआक्तीको मान्ताकायः रौ जीङःलेः दोःनाः’ त दाय्ह्आलाङः ओउःत दाय्ह्ओकायः ह ङाकायः इहाङः पानःती वानःओआः अरु ङाइ पेमालो जाङ्ह्ओ दोह्मा नाःल” त दाय्ह्ती पावुल्इ लयःकोः कुरा नोःती तोआकान्। 22 ओउःतलेः पावुल्इ नोःआकास ओहाङःसैको येसुकायः गुल्ह्ओलम्इ दोह् दोह् काम् जाङ्ह्नानी त पेतो चीःती फेलीकस्इ सबै मान्तालम्कायः ल्होक्आथास। “लौ ओउः हाकीम् लुसीयस् दाह्ती वाङ्आक्तीको नीङ्कोः मुत्धकोः कुरा ङाइ तात्ती वाय्नाङः” त दाय्ह्ती सबै मान्तालम्कायः ल्होक्आथास। 23 अरुलम् ल्होक्आक्तीको “इ पावुल्कायः ल्होक्लाम् ओउःकायः राक्ती गम्नु। गम्तोक् बेलाहाङः ओउःकोः साथीलम् ओउःकायः क्रुस्लाङ् स्यास्लाङ् वाङ्पै” त अन्चलादीस्इ पावुल्कायः योती गम्ओ सुबेदार्कायः गानाक्ती तोआकान्। 24 ओहाङःसैको लोन्ते फेलीकस्पाय् ओउःकोः यहुदी जात्कोः बुधी द्रुसीला त तोओकुस् द्यान्ह्ती वाङ्ती पावुल्कायः गोत्ती ओउःइ तोओ कुरा फेरीलेः सायःआकाच। 25 तोतोक् बेलाहाङः “येसुकोः कुरा दोह् दोह् ङ्हाम्सा खेःतो” त पावुल्इ स्यान्ती “मान्तालम्इ लयःकोः रेव्ओकायः जाङ्ह्सामा म्हर्सामा स्याव्ल। सुसुलोइ पेमालो काम् फेसा ग्याइली लोनेः वाङ्सा दीन्हाङः ओउःमयःकायःलेः परमेस्वर्इ न्युम्ह्ताक्नाःथास” तमा पावुल्इ स्यान्ती तोतोक्हाङः फेलीकस्पाय् ल्हुङ् र्याङःती रैती “लौ छ्यो द्याह् इच्युक्लेः स्याव्पाः। आल्अ दा अरु काम् नाःमाःत य्हाङःओ बेलाहाङः ङाइ फेरी सायःलाङ् गोत्चेःनाङ्” त दाय्ह्ती पावुल्कायः ल्होक्आथै। 26 “ओउःकायः फेती ल्होक्साकायः पावुल्इ घुस् पैसा बयःनाःताङः यादो” त म्हर्ती ओउः अन्चलादीस्इ यात्नीस् बेलाहाङः पावुल्कायः गोत्झुङ्आथै। 27 ओहाङःसैको नीस् बर्स पुत्आक्तीको फेलीकस् त तोओपाय् अन्चलादीस् काम् फेती झ्यान्ते यात्चाक् पोर्स्युस् फेस्तस् त तोओ नया अन्चलादीस् स्याव्आ। फेलीकस् त तोओइ अरु यहुदी मान्तालम्कायः म्रोताक्साकायः पावुल्कायः झ्याल्खानहाङः गम्आकान्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.