खबरदुत 23 - चेपाङ1-2 ओउः हुम्ओ मान्तालम्कःहाङः चीङ्ती पावुल्इ ओउःमयःकायः धय्ती योती “लौ पुःचोङ् हौचोङ्य ङाइ गलमा परमेस्वर्कोः मीक्हाङः पेतो जाङ्ह्ती वाह्आलाङः तेन्छ्याङ्मा ओउःतलेः वाह्लयःनाङः” त दाय्ह्ती तोउतो ओउः कुरा सायःती ओउः प्रधान् पुरोहीत् हननाया त तोओइ पावुल्कोः चीनःसै चीङ्ती मुओलम्कायः तोती ओउःकायः पाङःती घान्ताक्आथै। 3 ओउःतलेः पाङःती घान्आक्तीको “अ नाङ् ले ब्रेह्तीलेः आह्रेलेःतेः म्होतोङ्तेः क्ल्याक्तेःनौ रैस। ऐन्कोः कुरा सायःती तात्सा नाङ्लेःतेः खेःतेःनाः। खेःल नाङ्इ लयःलेः ऐन्पाय् बीक्रताक्ती ङाकायः घान्ताक्तेःनाःची रैस। नाङ्कायः परमेस्वर्इ न्युम्ह्तेःताक्तेःनाः” त दाय्ह्तीताङः पावुल्इ प्रधान् पुरोहीत्कायः जान्आकान्। 4 एत जान्आक्तीको पावुल्कोः चीनःसै चीङ्ती मुओलम्इ “दाङ्सीःलेः परमेस्वर्इ गम्ओ प्रधान् पुरोहीत्कायः इतलेः जान्ती तोसा स्याव्ल बा” त दाय्ह्ती पावुल्कायः तोथातो 5 “अ पुःचोङ् हौचोङ्य ओउःपाय् ‘प्रधान् पुरोहीत्लेः’ त ङाइ तय्ह्आक्ङल। परमेस्वर्कोः आखरःहाङः ‘नीङ्कोः हुकुम् बयःसा गम्ओ मान्तालम्कायः नीङ्इ रेव्तो तोतेःचानी’ त लेखती मुन” त दाय्ह्ती पावुल् त्याङ्आ। 6-8 एत त्याङ्आक्तीको ओउः हुम्ओ मान्तालम्हाङः आधाखे सादुकी त तोओलम् खेःइतो आधाखे फरीसी त तोओलम् खेःइतो त पावुल्इ च्यवःआकान्। ओउः फरीसी त तोओलम्खेइ “मान्ता सीआक्तीको नया जीङः दोःनाः” त स्यान्नानी। फेरी “परमेस्वर्कोः लाङ्काकोः ल्होक्ओमयःमा नाःनाः मान्ताकोः गलमा ह्र्योङःमालो जीङःमा नाःलेःनाः” तमा स्यान्ती तोनीतो ओउः सादुकी त तोओलम्खेइ “खेःल इ कुरालम्पाय् दोह्मा नाःल” त स्यान्ती तोनानी। ओउःत झ्यान्ते पावुल् चीङ्ती “लौ पुःचोङ् हौचोङ्य ङापाय् यात्चाक् फरीसी लेःआः ङ। फेरी फरीसीकोः चोःमा ङालेः खेःनाङः। ओहाङःसै ‘मान्ता सीआक्ती रौ जीङः दोःलेःनाः’ त ङाइ स्यान्ती तोओ खेःतो ओउःत झ्यान्ते ङापाय् इहाङःलेः कुरा सायःलाङ् वानःओलेः मुनाङः” त दाय्ह्ती पावुल्इ तोआथास। ओउःत तोआक्तीको ओउः फरीसी त तोओलम्मा सादुकी त तोओलम्मा आन काय्काय्ती तानःकाय्ती ओउः फरीसीलम्खेइ “माः रैस पावुल्कोः कुरा दोङ् कुरा लेःआः” त दाय्ह्ती दाय्ह्इतो “खेःल ओउः कुरापाय् स्याव्ल” त दाय्ह्ती सादुकीलम्खे त्याङ्आकाय्। 9 ओहाङःसैको एत काय्काय्तोक्हाङः फरीसीलम्कःहाङः यात्नीस्चाक् धर्मा स्यान्ओ मान्तालम् चीङ्ती “इ मान्तापाय् ‘दोह्मा रेव्तो जाङ्ह्उलु बा’ त होम्काय्तो नोःनाङी। ओउःकःहाङः यात्ज्योः परमेस्वर्कोः लाङ्कासै ल्होक्ओमयःया दोह्या थाती इ कुरा छ्यानःतीलेः तोआथै यादो” त दाय्ह्ती ओउः फरीसीकोः मान्तालम् दाय्ह्आकाय्। 10 ओउःत दाय्ह्आक्तीको ओउः काय्काय्ओ मान्तालम् क्योङ्ह्काय्ती मीन्ह्काय्सा बोङःआकानी। ओउःमयः मीन्ह्काय्सा बोङःओ च्यवःती “पावुल्कायः तेत्ती सात्चाःथै” त म्हर्ती ओउः हाकीम् र्याङःती रैआकाय्। ओउःत झ्यान्ते “मीन्ह्काय्ओलम्कःसै त्युत्ती पावुल्कायः चौकीताङ् वानःनु” त तोती पावुल् वानःसाकायः हाकीम्इ सीपाहीलम् ल्होक्आथास। 11 ओहाङःसैको चौकीहाङः दाह्आक्तीको अनम्ह्कोः स्याङ्ह्लोहाङः याह्दीङ्हाङः लयः प्रभु येसुलेः ओउःकोः चीनःसै मुओ पावुल्इ च्यवःआकान्। एत च्यवःतोक्हाङः “लौ रैतेःचानाः। यरुसालेम्हाङः नाङ्इ ङाकोः कुरा छ्यानःती तोतेःआकान् द्याह् रोम् सहर्हाङःमा नाङ् ओउःतलेः ङाकोः कुरा तोसालेःतेः खेःतेःनाः” त दाय्ह्ती प्रभु येसुइ तोआथै। 12 ओहाङःसैको न्याम् थोङ्आक्तीको ओउः पावुल्कः योगार्सीःमालो यहुदीलम् हुम्ती लयःकोः कुरा होम्काय्ती नोःकाय्आकाय् “लौ द्याह् पावुल्कायः आःताः सात्मातोक्हाङः ङीइ दोह्मा जेःङुसुलु तुङ्ङुसुलु” त दाय्ह्ती कीरीया जेःआकानी। 13 ओउः कीरीया जेःओ मान्तालम्पाय् चालीस्च्युक्कायः खेःइतो। 14 ओउःत कीरीया जाङ्ह्आक्ती ओउः चालीस् मान्तालम्पाय् ताङ्ह्ओ पुरोहीत्लम्कःताङ्मा अरु यहुदीकोः ताङ्ह्ओ मान्तालम्कःताङ्मा वाङ्ती “लौ ङीइ पावुल्कायः आःताः सात्माःत ङीइ लयःकायः दोह्मा जेःङुसुलु तुङ्ङुसुलु त हुन्द्यावःकाय्ती कीरीया जेःआलाङःसु। 15 ओउःत झ्यान्ते नीङ्पाय् ओउः सभाकोः मान्तालम्कुस् हाकीम्कायः दर्कास्कोः चेती ल्होक्नु दा। ‘इ पावुल्कोः कुरा पेतो सायःती चीःसाकायः ओउःकायः फेरीलेः सभाताङ् वानःपाःथै’ त लेखती हाकीम्कायः चेती ल्होक्नु। ल्होक्आक्तीको पावुल्कायः इहाङः वानःतोक् बेलाहाङः ङीइ सबै ल्याम्हाङः फाती ल्युङ्ह्ती सभाताङ् दाह्माखाहाङः सात्नाङःसु” त दाय्ह्तीताङः ओउः कीरीया जेःओलम्इ तोआकानी। 16 एतलेः नोःकाय्इतो ओउःमयःइ तोओ कुरा पावुल्कोः भनीस् सायःआकान्। सायःआक्तीको चौकीताङ् आल्ती ओउःइ सायःओ कुरापाय् पावुल्कायः छ्यानःआथै। 17 एत छ्यानःआक्तीको पावुल्इ यात्चाक् सुबेदार्कायः गोत्ती “लौ इ मान्ताकायः हाकीम्कःताङ् आलःउ दा। ओउःइ हाकीम्कायः यात्ज्योः कुरा छ्यानःसा खेःतो” त दाय्ह्ती सुबेदार्कायः तोआकान्। 18 ओहाङःसैको पावुल्कोः भनीस् लात्ती आलःती हाकीम्कःताङ् दाक्आथै “लौ इ लाव्मयः मान्ताकायः ‘हाकीम्कःताङ् आलःउ दा। ओउःइ हाकीम्कायः यात्ज्योः कुरा छ्यानःसा खेःतो’ त दाय्ह्ती नाङ्इ राक्ती गम्ओ पावुल् त तोओइ ङाकायः तोती ल्होक्आताङः” त दाय्ह्ती ओउः सुबेदार्इ हाकीम्कायः तोआकान्। 19 ओउःत तोआक्तीको पावुल्कोः भनीस्कायः क्रुत्हाङः चुम्ती अरुइ सायःसा खाय्मालोहाङः आलःती “लौ ङाकायः दोह्त तोसा खेःतेःतो” त दाय्ह्ती हाकीम्इ व्हत्आथै। 20 एत व्हत्आक्तीको “यहुदीलम्इ ‘ङीइ पावुल्कोः कुरा पेतो सायःती चीःसाकायः ओउःकायः ङीकोः सभा कीम्ताङ् दाक्ती वानःउ दा’ त दाय्ह्ती होम्काय्ती नाङ्कायः माःती दर्कास् ल्होक्तेःनाः। 21 इ दर्कास्कोः कुरा सायःतेःचौ ओउःपाय् दोङ् कुरा खेःबाय्ल। सभा कीम्ताङ् आल्सा ल्याम्हाङःपाय् पावुल्कायः सात्सा थेङा ओउःमयःकोः चालीस्जनच्युक् फाती मुनै। ‘सात्आताःमाःतो ङीइ दोह्मा जेःङुसुलु तुङ्ङुसुलु’ त दाय्ह्ती ओउःमयः कीरीया जेःआकानी। द्याह् नाङ्कोः ल्हुङ्तुक् कुरा सायःसाकायः ल्युङ्ह्ती मुनै” त दाय्ह्ती हाकीम्कायः तोआकान्। 22 ओउःत तोआक्तीको “लौ इ कुरापाय् ‘ङाइ हाकीम्कायः छ्यानःआलाङः’ त दाय्ह्ती नाङ्इ सुकायःमातेः तोतेःचौ” त दाय्ह्ती ओउः हाकीम्इ पावुल्कोः भनीस्कायः गानाक्ती तोआक्तीको ओउःकायः ल्होक्आथै। 23 पावुल्कोः भनीस्कायः ल्होक्आक्तीको ओउः हाकीम्इ नीस्चाक् सुबेदार् गोत्ती वानःआकान् “लौ द्याह्मयः नौबजे याह्दीङ्हाङः सीजारीयाताङ् आल्साकायः दुय्सै सीपाहीलम् चीङ्ताक्जु। ओउःमयःकुस्मा सत्री घोरा लन्ह्ओ सीपाहीलम्मा दुय्सै भाला लात्ओ सीपाहीलम्मा आल्सा खेःतो। 24 पावुल्कायःमा घोरा वानःती ओउःकायः अन्चलादीस् फेलीकस्कःताङ् पेतो ओम्पायःती दाक्जु दा” त दाय्ह्ती ओउः सुबेदार्नीस्कायः गानाक्ती तोआथाच। 25 एत तोआक्तीको ओउः हाकीम्इ चेती लेखआकान्। 26 “लौ इ चेती नाङ् अन्चलादीस् फेलीकस् त तोओकायः ङा क्लाव्दीयस् लुसीयस्इ नमस्ते तोती ल्होक्नेःनाङ्। 27 इ चेतीकोः कुरा इलेःआः। इ मान्ताकायःपाय् यहुदीलम्इ चुम्ती सात्खेःनीतो ओउःपाय् रोमी सहर्कोः मान्ता लेःआः त चीःआक्तीको ङाइ सीपाहीलम् वानःती ओउःकायः दल्ताक्आलाङः। 28 ओउःकायः दल्ताक्आक्तीको ‘यहुदीलम्इ दोह् हायःती सात्सा बोङःनीतो’ त चीःसाकायः ङाइ इ मान्ताकायः यहुदीलम्कोः सभा कीम्ताङ् कुरा सायःलाङ् आलःआलाङः। 29 आलःआक्तीको ओउःकोः कुरा सायःआक्तीको ओउःकायः सात्साकायः झ्याल्खानहाङः कासाकायः ओउःइ दोह् हायःओमा नाःआक्ल। ‘ओउः यहुदीलम्कोः लयः जवओ कुराकायः ह ओउःमयःइ गाल्तुम्आथै’ त ङाइ चीःआलाङः। 30 ओहाङःसैको ओउः यहुदीलम्इ लयःलेः ओउःकायः सात्सा बोङःओ खेःइतो इ कुरा सायःती ओउः मान्ताकायः ङाइ नाङ्कःताङ् ल्होक्आलाङः। ओउःकायः तुम्ती नोःसा मान्तालम्कायःमा ‘लौ नीङ्पाय् अन्चलादीस्कःताङ् आल्ती नीङ्कोः दर्कास् बयःनु’ त ङाइ गानाक्ती तोआलाङःसु” त दाय्ह्ती हाकीम्इ चेती लेखती ल्होक्आकान्। 31 ओहाङःसैको ओउः सीपाहीलम्इ हाकीम्इ तोओ कुरा ङ्हाम्ती जाङ्ह्ती सारो एनःच्युक्कोः याह्दीङ्हाङः पावुल्कायः अन्तीपात्रीस् त तोओ सहर्ताङ् लात्ती वानःआथै। 32 पावुल्कायः दाक्ती वानःआक्तीको अनम्ह्कोः स्याङ्ह्लोहाङः ओउः सत्री घोरा लन्ह्ओ सीपाहीलम्खे पावुल्कुस् सीजारीयाताङ् आल्आकाय् ओउः चार्सै अरु सीपाहीलम्खे लयःकोः चौकीताङ् पाय्ह्आकाय्। 33 ओहाङःसैको ओउः घोरा लन्ह्ओलम्इ पावुल्कायः सीजारीयाताङ् दाक्आक्तीको ओउः हाकीम्इ ल्होक्ओ चेतीमा पावुल्मा अन्चलादीस्कःताङ् ल्हाआकानी। 34 ल्हाआक्तीको चेती पह्रआक्तीको “नाङ् गाःहाङःकोःतेः खेःनाः” त दाय्ह्ती अन्चलादीस्इ पावुल्कायः व्हत्आथै। “ङापाय् सीलीसीया अन्चल्हाङः ओत्ओआः” त पावुल् त्याङ्आ। 35 “लौ उया नाङ्कायः गाल्तुम्ती तोओ मान्तालम् दाह्आक्तीको नाङ्कोः कुरा ङाइ सायःचाङः” त दाय्ह्ती “लौ इ पावुल्कायः हेरोद् राजाकोः दर्बाल्हाङः राक्पाः” त दाय्ह्ती ओउः अन्चलादीस्इ गानाक्ती तोआकान्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.