खबरदुत 21 - चेपाङ1 ओहाङःसैको ओउः एफेसस्सै वाङ्ओलम्कायः दाम्ती फेती ङी पावुल् साथीचोङ्पाय् ओउः तीःजहास् फेरी लन्ह्ती द्युम्मालो तीःकोः उःसै गाःहाङःमा ब्याह्माःत आल्ती कोस् त तोओ सहर्ताङ् दाह्आलाङी। ओहाङःसैको आल्ती उनम्ह्कोः स्याङ्ह्लोहाङः रोदेस् त तोओ तीःकोः बुम् न्यास्माःत च्योल्ती पाथारताङ् दाह्आलाङी। 2 पाथारताङ् दाह्आक्तीको ङीइ ओउः जहास्सै फेती ग्ल्युङ्ह्ती अरु फोनीस्या देस्ताङ् आल्ओ तीःजहास्हाङः लन्ह्आलाङी। ओउः जहास्हाङः लन्ह्आक्तीको आल्ती क्युप्रस् त तोओ तीःकोः बुम्कोः दक्सीन्ताङ् च्योल्ती सीरीया देस्ताङ् दाह्आलाङी। 3 सीरीया देस्कोः तायर् सहर्हाङः ओउः तीःजहास्हाङः लात्ओ माल्ताल्लम् त्युत्ती क्लाःओ खेःतो ओउःत झ्यान्ते ङीमा ओहाङः ग्ल्युङ्ह्आलाङी। 4 तीःजहास्सै ग्ल्युङ्ह्आक्तीको ङीइ ओउः सहर्कोः येसुकायः ङ्हाम्ओ मान्तालम्कायः बोङःती क्रुस्आलाङःसु। क्रुस्आक्तीको ओउःमयःकुस्इ ङी यात् सातच्युक्कायः मुआलाङी। ओउःमयःकुस् मुतोक् बेलाहाङः यात्नीस् ङ्हाम्ओलम्कायः “लौ यरुसालेम्हाङः पावुल्कायः चुम्नानी” त परमेस्वर्कोः ग्वालामःइ ओउःमयःकायः तोती छ्यानःआथास ओउःत झ्यान्ते ङ्हाम्ओलम्इ “यरुसालेम्ताङ् आल्तेःचाः” त दाय्ह्ती पावुल्कायः गानाक्ती तोथातो ओउःमयःइ तोओ कुरा पावुल्इ सायःउलु। 5 ओहाङःसैको ङी आल्सा चीङ्तोक्हाङः ओउः सहर्कोः ङ्हाम्ओलम् सबै आमालम् आपालम् चोःलम् सबै ङीकुस् सहर् बाहीरसै द्युम्मालो तीःकोः छेव्हाङः दाह्आलाङी। ओहाङः दाह्आक्तीको ङीइ सबैइ घ्रुस्ती परमेस्वर्कायः तेती तोआलाङःसु। 6 परमेस्वर्कायः तोआक्तीको ओउः मान्तालम्कुस् दाम्काय्आक्तीको ङी पावुल् साथीचोङ्खे ओउः तीःजहास् फेरी लन्ह्आलाङी ओउःमयःखे तायर् सहर्कोः मान्तालम्खे पाय्ह्आकाय्। 7 ओउः तीःजहास्हाङः लन्ह्ती तायर्सै आल्ती तोलेमयस् त तोओ सहर्ताङ् दाह्आलाङी। ओहाङः दाह्आक्तीको ङी फेरी तीःजहास्सै ग्ल्युङ्ह्ती ओहाङःकोः ङ्हाम्ओलम्कायः क्रुस्ती ओउःमयःकुस् यात् दीन्च्युक्कायः मुआलाङी। 8 ओहाङःसैको उनम्ह्कोः स्याङ्ह्लोहाङः तीःजहास्हाङः फेरी लन्ह्ती आल्ती ङी सीजारीया त तोओ सहर्ताङ् दाह्आलाङी। सीजारीयाताङ् दाह्आक्तीको ङी तीःजहास्सै जुगाङ् फेती ग्ल्युङ्ह्ती फीलीप् त तोओकोः कीम्ताङ् वाङ्ती मुआलाङी। ओउः फीलीप् त तोओखेकायः योह्नम्हाङः अरु छजनकुस् पैसा वेःती बयःओ काम्कायः छ्युङ्ह्ओ खेःतो। ङी वाङ्तोक्हाङः ओउःइ सीजारीयाहाङः प्रभु येसुकोः पेओ समचार्कोः कुरा आन तोती मुओ खेःतो। 9 फीलीप्कोः चार्गोता एकान्राङी चोःद्याङ्लम् परमेस्वर्कोः कुरा आन चीःती छ्यानःआकानी। 10 ओहाङःसैको ङी ओहाङः बल ज्याङःतो मुतोक्हाङः यात्चाक् परमेस्वर्कोः कुरा छ्यानःओ मान्ता आगाबस् त तोओ यहुदीया देस्सै दाह्ती वाङ्आ। 11 ङीकःताङ् दाह्ती वाङ्आक्तीको आगाबस् त तोओइ पावुल्कोः तोङःनाय् त्याक्ती ओउःकोः लयःकोः दोम् क्रुत् पानःती “लौ इ तोङःनाय् मुह्ती मुओ मान्ताकायः इतलेः ‘यरुसालेम्कोः यहुदीलम्इ पानःती गम्आक्तीको ओउःकायः अरु जात्कोः मान्तालम्कायः दाक्नाःथै’ त दाय्ह्ती ङाकायः परमेस्वर्कोः ग्वालामःइ तोआताङः” त दाय्ह्ती आगाबस्इ तोआताङी। 12 ओउःत तोओ सायःआक्तीको ङी पावुल्कोः साथीलम्इमा सबै अरु ङ्हाम्ओलम्इमा “लौ यरुसालेम्ताङ् आल्तेःचाःनाः” त दाय्ह्ती स्योत्ती गानाक्ती तोआलाङःसु। 13 ओउःत गानाक्ती तोङुसुतो “नीङ्इ इच्युक्लेः र्याःती झ्यान्ते ङाकोः ल्हुङ् लीह्तेःताक्तेःनाङ्स। इपाय् परल ङाकोः प्रभु येसुकोः काम् जाङ्ह्साकायः ओउः यरुसालेम्कोः मान्तालम्इ ङाकायः पानःनाःताङः त खेःयामा सात्नाःताङः त खेःयामा दोह् खेःयामा ङा आल्सा ग्यालेःनाङः” त दाय्ह्ती पावुल् त्याङ्आ। 14 ओउःत त्याङ्आक्तीको पावुल् इच्युक् ल्हुङ् चाक्ओ त चीःआक्तीको “लौ छ्यो प्रभुकोः ल्हुङ्हाङः गतलो ओउःतलेः स्याव्पाः” त दाय्ह्ती ङीइ अरु तोङुसुलु। 15 ओहाङःसैको ङी र्ययःती चीङ्ती यरुसालेम्ताङ् आल्आलाङी। 16 आल्तोक् बेलाहाङः यात्नीस् सीजारीयाकोः ङ्हाम्ओलम्मा ङीकुस् आल्ती ङीकायः मनासोन् त तोओकोः कीम्ताङ् दाक्आताङी। मनासोन् त तोओ क्युप्रस् तीःबुम् देस्सै वाङ्ओआः ओउःइ ङ्हाहाङःसैलेः येसुकोः कुरा ङ्हाम्ओ खेःतो। यरुसालेम् दाह्तोक्हाङः ङी ओउःकोः कीम्हाङः मुआलाङी। 17 ओहाङःसैको यरुसालेम् दाह्आक्तीको ओहाङः मुओ येसुकायः ङ्हाम्ओलम्इ ङीकायः झाक्ती रोम्ती त्याक्आलाङी। 18 त्याक्आक्तीको उनम्ह्कोः स्याङ्ह्लोहाङः ङी पावुल्कुस् याकुब्कायः क्रुस्लाङ् आल्आलाङी। क्रुस्तोक् बेलाहाङः ओउः ङ्हाम्ओलम्कोः ताङ्ह्ओ थालवःपालम् याकुब्कुस् हुम्ओ खेःइतो। 19 ओहाङःसैको ओउः हुम्ती मुओ मान्तालम्कायः स्यवती यहुदीया खेःमालो जात्लम्कःहाङः वाह्तोक् बेलाहाङः “परमेस्वर्इ ङाकायः एत एत जाङ्ह्ताक्ती ओउः मान्तालम्इ आन ङ्हाम्आकानी” त दाय्ह्ती पावुल्इ ङ्हा जाङ्ह्ओ कुरा सबै ल्हाक्ती छ्यानःआथास। 20 ओउःत पावुल्इ ल्हाक्ती छ्यानःओ कुरा सायःती सबै हुम्ओलम्इमा परमेस्वर्कायः म्रोती तोआकानी। ओहाङःसैको “लौ इहाङःमा नाःतो यहुदीलम्इ प्रभु येसुकोः कुराकायःमा ङ्हाम्नानी। ओउःमयःइ मोसाकोः उय्ह्ले बयःओ ऐन्कोः कुरामा आन म्ह्याङ्ती जाङ्ह्नानी। 21 ओउःमयःखेइ मोसाकोः ऐन् म्ह्याङ्ती जाङ्ह्नानी नाङ्खेकायःपाय् ‘पावुल्इ अरु जात्कुस् ल्याव्ह्ती याक्ओ यहुदीलम्कायः “मोसाइ बयःओ ऐन्कोः हुकुम्मा चीन्हमा ङी यहुदीलम्इ जवओ कुरामा सबै जाङ्ह्सा परल” त दाय्ह्ती स्यान्लेःनौ’ ओउःत ल्हाक्ती तोओ कुरा इहाङःकोः येसुकायः ङ्हाम्ओ यहुदीलम्इ सायःआकानी। 22 नाङ्कायःपाय् ‘यरुसालेम्हाङः दाह्ती मुनाः’ त ओउःमयः लोने चीःनानी ओउःत झ्यान्ते द्याह् दोह् हायःसा दाय्ह्सा। 23 ङीइ इत तोओ कुरा जाङ्ह्उ दा। लौ ङीकःहाङः चार्गोता मान्तालम्इ परमेस्वर्कायः ‘लोन्ते मेत्छ्याः सात्ती बयःनाङःसु’ त तोती कीरीया जेःती मुनै। 24 ओउःमयःकुस् नाङ् मन्दीर्ताङ् आल्ती नाङ्मा ओउःमयःकुस् ब्राङःतीलेः म्याङ् खुर्ओ जय्लनःओ कुरा त्याक्नु दा। फेरी ओउः चार्जनकायः जाङ्ह्झ्याङ्कोः पैसा बयःउ। ओउःत हायःआक्तीको ‘मोसाइ बयःओ ऐन्कोः हुकुम् अरु यहुदीलम्खेकायः “फेनु” त तोमाःत पावुल्इ ऐन्कोः हुकुम् लयःइमा जाङ्ह्लेःनौ’ त अरुइ चीःसा खाय्चानी। 25 ओहाङःसैको यहुदी खेःमालो जात्कोः ङ्हाम्ओलम्खेकायः ङीइ यहुदीलम्खेइ जवओपाय् ‘नीङ्इ जाङ्ह्सा परतेःइली’ त तोती ‘इ हुकुम् ह नीङ्इ सायःती जाङ्ह्नु दा द्यव्तालम्कायः बयःओ जेःगालम्मा वयःलम्मा जेःतेःचानी। फेरी ल्हास्या काम्पाय् जुगाङ् जाङ्ह्तेःचानी’ त ओउः यहुदी खेःमालो मान्तालम्कायः लेखती ल्होक्ती इ हुकुम् ह तोती बयःआलाङी” त दाय्ह्ती ओउः यरुसालेम्कोः ङ्हाम्ओलम्इ पावुल्कायः तोआथै। 26 ओहाङःसैको उनम्ह्कोः स्याङ्ह्लोहाङः पावुल्इ ओउः चार्जनकायःपाय् यहुदीकोः मन्दीर्ताङ् आलःती म्याङ् खुर्ती जवओ काम् जाङ्ह्ती “लौ सात् दीन्हाङः ङीकोः जय्लनःओ दप्ती जाङ्ह्साकायः परमेस्वर्कायः ल्हाती बयःनाङःसु” त तोती गम्आकान्। 27-28 ओहाङःसैको ओउःइ तोओ सात् दीन् पुत्खेःओहाङः यात्नीस् असीया देस्सै वाङ्ओ पावुल्कायः तय्ह्ओ यहुदीलम् यरुसालेम्ताङ् दाह्ती वाङ्आकाय्। यहुदीयाकोः मन्दीर्हाङः पावुल्मा ओउः चार्जनमा पोक्ती मुओ च्यवःती ओउःमयः हुम्ती आन हीह्ती गोःआकाय् “अ इस्राएल्कोः मान्तालम् रेन्ह्तोलेः वाङ्न दा। इ मान्तापाय् गाःहाङःमा सबै मान्तालम्कायः ङीकोः यहुदीइ जवओ कुरा ‘जाङ्ह्लाम्’ त स्यान्ती तोलेःनौ। ङीकोः मन्दीर्हाङः ङीकोः जात् खेःमालो मान्ता पोस्ती मन्दीर्कायः क्रीसीःओ जाङ्ह्ताक्आकान्” त दाय्ह्ती सोतो गोःआकाय्। 29 अनम्ह्लो यात्चाक् एफेसस्सै वाङ्ओ त्रोफीमस् त तोओ एलेनी मान्ता पावुल्कुस् सहर्हाङः वाह्ओ च्यवःआकानी। च्यवःआक्तीको “यात्चाक् एलेनी मान्ता ङीकोः मन्दीर्हाङः पोस्आकान्” त ताःती म्हर्ओ खेःतो। 30 ओहाङःसैको सबै सहर्कोः मान्तालम् ल्हुङ् मल्ह्ती झ्यान्ते हुम्काय्ती पावुल्कःताङ् हुम्ती वाङ्आकाय्। वाङ्आक्तीको ओउःकायः चुम्ती मन्दीर्सै क्लाःती ओउः मन्दीर्कोः धोकालम् राक्आकानी। 31 पावुल्कायः बाहीरताङ् क्लाःआक्तीको ओउः यहुदीलम्इ पावुल्कायः सात्सा बोङःनीतो “लौ जुदा सहर्कोः मान्ता हुम्काय्ती गोःकाय्ती वाह्ती मुनै” त दाय्ह्ओ सायःती 32 ओउः रोमी सीपाहीकोः ताङ्ह्ओ हाकीम्इ ओउःकोः सीपाहीलम्मा हवल्दार्लम्मा आलःती रेन्ह्तोलेः ओउः हुम्ओ मान्तालम्कःताङ् वाङ्आकाय्। ओहाङःसैको सीपाहीलम् दाह्ती वाङ्ओ च्यवःती ओउःमयःइ पावुल्कायः घान्ओ फेआकानी। 33 ओहाङःसैको ओउः हाकीम् दाह्ती वाङ्ती “इकायः पानःपाः” त तोती सीपाहीलम्इ पावुल्कायः साङ्लाइ दोम् क्रुत् पानःआथै। पानःआक्तीको “इ सुलो। ओउःइ दोह् हायःआकान्” त दाय्ह्ती ओउः हाकीम्इ रेक्ती व्हत्आकान्। 34 ओउःत व्हत्तोक्हाङः हुम्ओ मान्तालम्इ यात्नीस्खे एत तोदा अरुलम्खे ओउःत तोदा त झ्यान्ते ओउः हाकीम्इ थङ्ह्त सायःसा खाय्उलु “लौ इकायः चौकीताङ् आलःपाःथै” त हुकुम् बयःआकान्। हुकुम् बयःआक्तीको पावुल्कायः चौकीताङ् आलःआथै। 35-36 ओहाङःसैको ओउः चौकीकोः दय्ह्लौताङ् दाह्तोक्हाङः हुम्ओ मान्तालम्इ “ओउःकायः सात्पाःथै” त दाय्ह्ती आन लमःती न्हेङःती झ्यान्ते ओउः सीपाहीलम्इ पावुल्कायः च्युन्ती लात्ती चौकीताङ् दाक्माथै। 37 ओहाङःसैको ओउः सीपाहीकोः चौकीहाङः दाक्खेःतोक्हाङः “अ हाकीम्य यात् कुरा ङाइ तोचेःनाङ् दा” त पावुल्इ एलेनी भासाहाङः नोःती तोआथै। ओउःत एलेनी भासाहाङः नोःओ सायःती ओउः हाकीम् ग्याङ्ह्ती सायःआकान् “अहै नाङ्इ एलेनी भासा नोःसा चीःतेःनौ रैस। 38 ओउःत खेःया ओउः चार्हजार् लुत्लम्कायः याक्गार्सीःमालो देस्ताङ् आलःओ मान्तातेः खेःतेःल बा। ङ्हापाय् नाङ्कायःपाय् ‘इपाय् ओउः मीस्रा देस्सै वाङ्ओ लुत्कोः मालीक्लेः’ त ङाइ चीःमाःत झ्यान्ते ताःङोतो” त ओउः हाकीम् दाय्ह्आ। 39 “खेःल ङापाय् सीलीसीया जील्लाकोः तार्सुस् सहर्हाङः ओत्ओ यहुदी मान्तालेः खेःनाङः। ओउः ताङ्ह्ओ सहर् ङाकोः आमा आपाकोः सहर्मा खेःतो। लौ द्याह् ङाइ ओउः हुम्ओलम्कायः तोसा ताक्चाक्ची” त दाय्ह्ती पावुल्इ हाकीम्कायः तोआकान्। 40 ओउः हाकीम्इ “लौ उया” त दाय्ह्ती पावुल्कायः नोःसा ताक्आथै। ओहाङःसै ओउः चौकीकोः पीन्देहाङः चीङ्ती ओउः हुम्ओ मान्तालम्कायः “ङैमाःत मुन” त छ्यानःसाकायः पावुल्इ क्रुत् प्योआकास। ओउःत हायःओ च्यवःती ओउः हुम्ओलम् ङैमाःत मुआकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.