खबरदुत 18 - चेपाङ1 ओहाङःसैको पावुल्पाय् आथेन्स् सहर्सै आल्ती कोरीन्थ त तोओ सहर्ताङ् वाङ्आ। 2 ओहाङः वाङ्आक्तीको पावुल्इ यात्चाक् पोन्तस् सहर्सै वाङ्ओ यहुदी मान्ता क्रुस्आकान्। ओउः मान्ताकोः मय्ङ् अक्वीला त तोओ खेःतो। अनम्ह्लो अक्वीलामा ओउःकोः बुधी प्रीस्कीला त तोओमा रोमी देस्हाङः मुओ खेःचतो। ओहाङःतीको क्लाव्दीयस् त तोओ रोमी देस्कोः राजाइ “लौ ङाकोः देस्हाङः यहुदी मान्तालम् मुलाम्” त दाय्ह्ती हुकुम् बयःआकान्। ओउःत झ्यान्ते अक्वीला नीस्पय्क्चाः ओउः रोमी देस्सै क्रव्ती कोरीन्थ सहर्ताङ् दाह्आकाच। 3 ओहाङःसैको अक्वीला नीस्पय्क्चाः पावुल्लो लेखा पाल् कीम् जाङ्ह्ओ काम् धुःती जाङ्ह्आकाचु ओउःत झ्यान्ते क्रुस्आक्तीको पावुल्पाय् ओउःनीस् पय्क्चाःकुस् मुआकाय्। 4 ओउःनीस्कुस् मुतोक् बेलाहाङः पावुल् सन्चर्बार् सन्चर्बार्कोः दीन्हाङः यहुदीलम्कोः थनःओ कीम्ताङ् आल्ती ओहाङः हुम्ओ यहुदीलम्कुस्मा एलेनी जात्कोः मान्तालम्कुस्मा येसुकोः कुरा नोःकाय्ती ओउःमयःकायः होम्सा बोङःआकान्। 5 ओहाङःसैको सीलास् तीमोथीनीस्पाय् मासीदोनीया देस्सै दाह्ती वाङ्आक्तीको पावुल्इ यहुदीलम्कायः “लौ येसु त तोओ परमेस्वर्इ ल्होक्ओ ख्रीस् लेःआः” त दाय्ह्ती दीन्भरीहाङः स्यान्ती मुआ। 6 ओहाङःसैको ओउः यहुदी मान्तालम्इ ओउःकायः पेमालो तोती झ्यान्ते पावुल्इ लयःकोः नाय्लम्कोः फुत्साः ह्रान्ह्ती “छ्यो उया दोह्गार् स्याव्तेःजेःपै। ङाखेइ पेओ कुरा स्यान्नेःनाङ्सतो नीङ्खेइ ङ्हाम्तेःनीली। ओउःत खेःया नीङ्इ लयःकायः न्युम्ह्तेःताक्तेःनाःइसी। द्याह्हाङःसैकोः ङा अरु यहुदी खेःमालो जात्लम्कायः स्यान्लाङ् आल्आनाङः” त दाय्ह्ती पावुल्इ जान्ती तोआथास। 7 एत जान्ती तोआक्तीको पावुल् अक्वीला नीस्पय्क्चाःकोः कीम् फेती यात्चाक् तीतस् जुस्तस् त मय्ङ्ओकोः कीम्ताङ् मुलाङ् दाह्आ। तीतस् त तोओपाय् यात्चाक् परमेस्वर्कायः झाह्ओ यहुदी खेःमालो जात्कोः मान्ता खेःतो। ओउःकोः कीम्खे यहुदीलम्कोः थनःओ कीम् द्याङ्तो खेःतो। 8 ओहाङःसैको ओउः थनःओ कीम्कोः ताङ्ह्ओ मान्ता क्रीस्पुस् त तोओमा ओउःकोः लयःकोः कीम्कोः मान्तालम्मा सबैइ प्रभु येसुकोः कुरा ङ्हाम्आकानी। कोरीन्थ सहर्हाङःमा नाःतो अरु मान्तालम्इ पावुल्इ स्यान्ओ कुरा सायःती ङ्हाम्ती बाप्तीस्मा त्याक्आकानी। 9 ओहाङःसैको यात्दीन्हाङः याह्दीङ्हाङः पावुल्इ माङःखा च्यवःआकान्। माङःखा च्यवःतोक् बेलाहाङः “लौ रैलाम् इहाङः र्याङःमाःत रैमाःत स्यान्उ दा। ङा नाङ्कुस् मुलेःनाङः। इ सहर्हाङः मुओ ङाकायः झाह्ओ मान्तालम् नाःतोलेः मुनै। 10 अरु सुइमा नाङ्कायः रेव्तो हायःसा खाय्तेःल” त माङःखाहाङः दाय्ह्ती प्रभु येसुइ तोओ कुरा सायःआकान्। 11 ओउःत माङ्खा च्यवःआक्तीको ओउः सहर्हाङः पावुल् अथार महीनाच्युक्कायः परमेस्वर्कोः कुरा स्यान्ती मुआ। 12 पावुल्पाय् ओहाङः स्यान्ती मुआ ओहाङःसैको गालीयो त तोओ मान्ता आखयाकोः अन्चलादीस् स्याव्तोक्हाङः यात्नीस् यहुदीलम्इ हुम्ती पावुल्इ तोओ कुरा “पेमालो लेःआः” त होम्काय्ती नोःती ओउःमयःइ पावुल्कायः चुम्ती ओउः अन्चलादीस्कःताङ् लात्ती वानःआथै। 13 ओउःकःताङ् वानःआक्तीको “इइपाय् ऐन्कोः हुकुम्इ ताक्मालो कुरा स्यान्ती ‘परमेस्वर्कायः एतलेः एतलेः झाह्ती तोसा खेःतो’ त तोती मुलेःनाः” त दाय्ह्ती ओउः यहुदीलम्इ पावुल्कायः गाल्तुम्ती तोआकानी। 14-16 ओहाङःसैको पावुल्खे त्याङ्खेःतोक्हाङः गालीयो त तोओ अन्चलादीस्खेहाङः ङ्हासै त्याङ्आ “अ नीङ् यहुदी मान्तालम्य नीङ्इ दोङ् मुत्ध जाङ्ह्ओ बोङःतेःनानी त खेःया ङाइ सायःनेःनाङ्सतो इ नीङ्इ लयः जवओ कुरालेःतेः तानःकाय्ती तोतेःनै रैस ओउःत झ्यान्ते ङाइ इ सायःसा जुगाङ् ग्याङल। नीङ्इ लयः सायःनीङ्इसी” त गालीयो दाय्ह्ती त्याङ्ती ओउः पावुल्कायः गाल्तुम्ती नोःसा बोङःओ यहुदीलम्कायः ओउःकःसै रुनःआथाच। 17 ओउःमयः रुनःतोक् बेलाहाङः ओउः हुम्ओ मान्तालम्इ अरु थनःओ कीम्कोः ताङ्ह्ओ मान्ता सोस्थेनेस् त तोओकायः चुम्ती अन्चलादीस्कोः मीक्हाङः घान्थातो ओउः अन्चलादीस्इ दोह्मा हायःउलु। 18 ओहाङःसैको कोरीन्थहाङः मुओ येसुकायः ङ्हाम्ओलम्कुस् पावुल् आन ज्याङःतो मुआ। ओहाङःसैको लोन्ते ङ्हाम्ओलम्कायः दाम्ती गम्आक्तीको पावुल्पाय् अक्वीला नीस्पय्क्चाःकुस् तीःजहास्हाङः लन्ह्ती सीरीया देस्ताङ् आल्आकाय्। ओहाङःसैको आल्धाङ्माखाहाङः केङ्क्रीया त तोओ सहर्हाङः पावुल्इ परमेस्वर्कायः “लौ लोने यरुसालेम्हाङः ङाइ आन झाह्ती तोनेःनाङ्” त दाय्ह्ती तोती कीरीया जाङ्ह्ती लयःकोः म्याङ् खुर्आकास। 19 ओहाङःसैको ओउः तीःजहास्पाय् एफेसस् त तोओ सहर्ताङ् दाह्ती अक्वीला नीस्पय्क्चाःकःसै तीःजहास्हाङः वेङ्ती पावुल् ग्ल्युङ्ह्ती एफेसस् सहर्कोः थनःओ कीम्ताङ् आल्ती पोक्ती वाङ्आ। पोक्आक्तीको येसुकोः कुरापाय् ओउः थनःओ कीम्हाङः हुम्ओ मान्तालम्कुस् नोःकाय्आकाय्। 20 एत नोःकाय्आक्तीको ओउः हुम्ओ मान्तालम्इ म्रोती सायःती “लौ ङीकःहाङः ज्याङःतोलेः मुअ दा” त दाय्ह्ती स्योत्ती तोथातो “इ बेलाहाङः मुसा दोःङल” त दाय्ह्ती पावुल् त्याङ्आ। 21 “लोन्ते परमेस्वर्इ ङाकायः दोःताक्नाःताङः त खेःया ङा द्यान्ह्ती वाङ्चाङः” त दाय्ह्ती तोती पावुल् थनःओ कीम्सै ग्ल्युङ्ह्ती ओउः तीःजहास्हाङः फेरी लन्ह्ती एफेसस्सै आल्आकाय्। 22 आल्आकाय् ओहाङःसैको सीजारीया सहर्ताङ् दाह्ती ओउः तीःजहास्सै ग्ल्युङ्ह्ती यरुसालेम्ताङ् आल्आकाय्। ओहाङः आल्ती दाह्आक्तीको पावुल्इ येसुकायः ङ्हाम्ओलम्कायः क्रुस्आकान्। ओहाङःकोः मान्तालम्कायः क्रुस्आक्तीको पावुल् अन्तीयोक् सहर्ताङ् आल्ती दाह्ती वाङ्आ। 23 अन्तीयोक् सहर्हाङः बल ज्याङःतो मुआक्तीको गालातीमा फ्रीग्या जील्लानीस्कःताङ् आल्ती ओहाङःकोः ङ्हाम्ओलम्कायः स्योत्ताङ् स्योत्ताङ् क्रुस्ती ओउःमयःकायः लव्ह्ती तोआथास। 24 ओहाङःसैको यात्चाक् आलेक्जान्द्रीया सहर्सै वाङ्ओ आपोलस् त तोओ मान्ता एफेसस्ताङ् दाह्आ। ओउः आपोलस् त तोओइ परमेस्वर्कोः आखरःकोः कुरा आन चीःती व्हाय्ती तोओ मान्ता खेःतो। 25 ओउःइपाय् प्रभु येसुकोः कुरापाय् चीःती झ्यान्ते ओउः कुरा स्यान्उतो युहनाकोः बाप्तीस्मा ह चीःआकान्। ओउःत झ्यान्ते येसुकायः तोओ कुरा ओउःइ गुच्युक्लेः चीःआकान् ओउःच्युक्लेः अरुलम्कायः पेतोलेः स्यान्आथास। 26 ओहाङःसैको एफेसस् सहर्ताङ् दाह्आक्तीको आपोलस्इपाय् थनःओ कीम्हाङः पोक्ती ओहाङः फुतीलेः स्यान्ती तोखयःआथास। थनःओ कीम्ताङ् स्यान्ती तोतोक्हाङः ओउःइ तोओ कुरा अक्वीला नीस्पय्क्चाःइ सायःआकाचु। सायःआक्तीको ओउःनीस्इ येसुकोः कुरा सबैलेः पेतो चीःताक्साकायः आपोलस् त तोओकायः लोन्ते पेतो स्यान्आकाचु। 27 ओउःनीस्इ पेतो स्यान्आक्तीको आपोलस् त तोओपाय् आखया जील्लाताङ् आल्सा म्हर्आ। ओउःत झ्यान्ते ओउः एफेसस् सहर्हाङः मुओ येसुकायः ङ्हाम्ओलम्इ “लौ पेतोलेः आल्अ दा” त तोती ल्होक्ती ओउः आखयाहाङः मुओ ङ्हाम्ओलम्कायः चेती लेखआकानी “लौ इ आपोलस् त तोओइ येसुकोः कुरा द्याह् पेतो नोःसा चीःनौ। ओउःकायः उया पेतो रोम्नु दा” त दाय्ह्ती चेती लेखती ल्होक्आकानी। ओहाङःसैको आखया दाह्आक्तीको आपोलस्इ ओहाङःकोः परमेस्वर्इ ङ्हाम्ताक्ओ मान्तालम्कायः आन लव्ह्ती तोआथास। 28 फेरी ओहाङःकोः यहुदीलम्कुस् नोःकाय्ती परमेस्वर्कोः आखरःहाङः “येसु त तोओ परमेस्वर्इ तोती गम्ओ ख्रीस् लेःआः” त लेखओ छ्यानःती ओउः यहुदीलम्कुस् आन व्हाय्तोलेः तानःती नोःआकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.