खबरदुत 17 - चेपाङ1 फीलीपी सहर्सै आल्आक्तीको आम्फीपोलीस् आपोलोन्या सहर्नीस्हाङः च्योल्ती आल्ती थेसालोनीका त तोओ सहर्ताङ् दाह्आकाच। ओउः सहर्हाङः यहुदीलम्कोः थनःओ कीम् खेःतो। 2 ओउः थनःओ कीम्ताङ् पावुल्पाय् सन्चर्बार् सन्चर्बार्हाङः आल्माआ। सुम् सातच्युक्कायः पावुल्इ परमेस्वर्कोः आखरः पह्रती ओहाङः हुम्ओ मान्तालम्कायः स्यान्आथास। 3 स्यान्तोक् बेलाहाङः “ओउः वाङ्सा खेःओ ख्रीस् त तोओ ‘लीह्सीःओ च्यवःआक्तीको ओउःकायःपाय् सात्नानी। सात्ती सीआक्तीको ओउः ख्रीस्पाय् उह्ती च्योक्लेःनाः’ त उय्ह्लेहाङःसै आखरःहाङः लेखती मुनाः। ङीइ स्यान्ती तोओ येसुपाय् परमेस्वर्इ ल्होक्सा खेःओ ख्रीस् लेःआः” त दाय्ह्ती पावुल्इ छ्यानःतीलेः तोआथास। 4 एत तोआक्तीको यात्नीस्चाक् यहुदीलम्इमा नाःतो परमेस्वर्कायः झाह्ओ एलेनी जात्कोः मान्तालम्इमा पावुल्इ तोओ कुरा ङ्हाम्ती ओउःकुस् वाह्आकाय्। फेरी नाःतो ओउः सहर्कोः ताङ्ह्ओ मोमःचोःलम्इमा ङ्हाम्आकानी। 5 ओहाङःसैको “नाःतो मान्ता येसुकोः कुरा ङ्हाम्ती पावुल् नीस्साथीचाःकुस् वाह्ती मुओ” त च्यवःती अरु यहुदी मान्तालम्खे ल्हुङ्हाङः लआकाय्। ओउःमयः लती सहर्कोः पेमालो मान्तालम् हुम्लाङ् वानःती ओउः हुम्ओ मान्तालम्कायः थ्योन्ह्ती नोःकाय्आकाय् ओहाङःसैको ओउः पेमालो मान्तालम्इ सहर्कोः मान्तालम्कायः सबै पावुल् बर्नाबास्कः ल्हुङ् मल्ह्ताक्आथास। ल्हुङ् मल्ह्आक्तीको ओउः सहर्कोः मान्तालम्पाय् इताङ् उःताङ् वाह्ती यात्चाक् येसुकायः ङ्हाम्ओ मान्ता जासोन् त तोओकोः कीम्ताङ् दाह्ती पावुल्नीस् साथीचाःकायः बोङःलाङ् पोक्आकाय्। बोङःतोक्हाङः “ओउःनीस्कायः चुम्ती सबै मान्तालम्कःताङ् वानःनी” त म्हर्ती बोङःनीतो ओउःनीस्कायः च्यवःनीली। 6 ओउःत झ्यान्ते जासोन्मा अरु ङ्हाम्ओलम्कायःमा चुम्ती ओउः सहर्कोः ताङ्ह्ओ मान्तालम्कःताङ् ह्र्युत्ती लात्ती आलःआकानी। आलःआक्तीको “ङीइ बोङःओ नीस्चाक्पाय् देस् देस्हाङः आल्ती अरुलम्कायः ब्रःताक्ती वाह्आकाच। 7 द्याह् ओउःनीस् इहाङःमा वाङ्ती इ जासोन् त तोओइ ओउःनीस्कायः त्याक्ती लयःकोः कीम् मुसा रोम्आथाच। ‘येसु त तोआ ङीकोः राजा लेःआः’ त दाय्ह्ती ओउःमयःइ सबै ङीकोः सीजर् राजाकोः हुकुम् सायःनीली” त दाय्ह्ती ओउः हुम्ओ मान्तालम्इ तोआकानी। 8 एत तोओ सायःआक्तीको ओउः सहर्कोः ताङ्ह्ओ मान्तालम्मा अरु मान्तालम्मा ल्हुङ्हाङः र्याङःआकाय्। 9 “लौ ओउःनीस् आल्माधाङ्च्युक्कायः जासोन्इ ङीकुस् पैसा गम्सा खेःतो” त जासोन्कायःमा ओउःकोः साथीलम्कायःमा दाय्ह्ती तोआथास। ओहाङःसैको जमान् पैसा त्याक्आक्तीको ओउःमयःइ जासोन्कायःमा ओउःकोः साथीलम्कायःमा फेआथास। 10 ओहाङःसैको याह्दीङ्हाङः ओउः ङ्हाम्ओलम्इ पावुल् सीलास्कायः बेरोया त तोओ सहर्ताङ् ल्होक्आथाच। ल्होक्आक्तीको बेरोया सहर्ताङ् दाह्आक्तीको ओउःनीस्पाय् सहर्हाङः मुओ यहुदी मान्ताकोः थनःओ कीम्ताङ् पोक्आकाच। 11 ओउः थेसालोनीकाकोः मान्तालम्सै बेरोयाकोः मान्तालम्कोः ल्हुङ् आय्ह्तो मुइतो ओउःत झ्यान्ते ओउःमयःइ पावुल्इ स्यान्ती तोओ कुरा पेतो यान्ततीलेः सायःती “इ कुरापाय् परमेस्वर्कोः आखरःहाङः लेखओ कुराकुस् ब्राङ्नाःया ब्राङ्लया द्याह् योनी” त म्हर्ती दीन्का दीन् ओउःमयःइ परमेस्वर्कोः आखरःहाङः पह्रआकाय्। 12 ओहाङःसैको नीस्सुम्चाक् पैसा नाःओमा पह्रसा चीःओ एलेनी जात्कोः मोमःचोःलम्मा नाःतो एलेनीमा यहुदी गोय्चोःलम्इमा येसुकोः कुरा म्रोती ङ्हाम्ती सायःआकानी। 13 ओहाङःकोः “बेरोया सहर्हाङःमा पावुल्इ प्रभु येसुकोः कुरा स्यान्ती तोलेःनौ” त सायःती ओउः थेसालोनीकाकोः पेमालो यहुदीलम्मा बेरोया सहर्ताङ् वाङ्ती ओहाङःकोः मान्तालम्कायः हुम्ताक्ती “लौ ओउःनीस्इ पेमालो स्यान्नाःच ओउःनीस्कायः रुनःपाःथाच” त होम्काय्ती तोआथास। ओउःत थ्योन्ह्ती तोती ओउःमयःइ पावुल् साथीचाःकः ल्हुङ् मल्ह्ताक्आकानी 14 ओउःत झ्यान्ते ओहाङःकोः येसुकायः ङ्हाम्ओलम्इ पावुल्खेकायः द्युम्मालो तीःकोः छेव्हाङःताङ् ल्होक्आथै ओउःकोः साथीनीस् सीलास् तीमोथी त तोओनीस्खे बेरोया सहर्हाङः मुआकाच। 15 ओहाङःसैको द्युम्मालो तीःकोः छेव्हाङः दाह्आक्तीको पावुल्कुस् वाह्ओलम्इ ओउःकायः आथेन्स् सहर्ताङ् दाक्आथै। आथेन्स् त तोओ सहर्ताङ् दाक्आक्तीको “लौ ङाकोः साथीनीस् सीलास् तीमोथीपाय् इहाङः रेन्ह्तोलेः वाङ्पाःच” त दाय्ह्ती ओउःकायः दाक्ओलम्कायः पावुल्इ द्यान्ह्ती ल्होक्आथास। 16 ओहाङःसैको आथेन्स् सहर्हाङः तीमोथी सीलास् त तोओनीस्कायः ल्युङ्ह्ती मुतोक्हाङः पावुल्इ ओउः सहर्कोः द्यव्ता मुर्तीलम् नाःतोलेः च्यवःआकान्। एत च्यवःआक्तीको पावुल्पाय् “इ मान्तालम्पाय् परमेस्वर्कोः कुरा जुगाङ् चीःनीली” त म्हर्ती आन लीह्ओ खेःतो। 17 ओउःत झ्यान्ते पावुल्इ थनःओ कीम्हाङःमा येसुकोः कुरा आन नोःकाय्आकाय्। यहुदीलम्कुस्मा अरु जात्कोः परमेस्वर्कायः झाह्ओलम्कुस्मा येसुकोः कुरा नोःकाय्आकाय्। फेरी बजार्कोः क्रुम्ह्ओ थाव्लम्हाङःमा पावुल्इ दीन्का दीन् ओउःइ क्रुस्ओ मान्तालम्कुस्मा स्यान्ती नोःकाय्ती मुतो। 18 ओहाङःमा यात्नीस् एपीक्युरी त तोओ धर्मा स्यान्ओ मान्तालम्मा अरु स्तोइक् त तोओ धर्मा स्यान्ओ मान्तालम्मा पावुल्कुस् आन तानःकाय्ती नोःकाय्आकाय्। ओउः मान्तालम्हाङः कोय्खे “इ मान्तापाय् आह्रे चीःमाःत नोःओआः यादो” त दाय्ह्ती दाय्ह्आकाय् अरुखे “इपाय् थे थे द्यव्ताकोः कुरा स्यान्ती तोनाःतय्ही रैस” त दाय्ह्ती नोःकाय्आकाय्। पावुल्इपाय् “येसु सीआक्तीको च्योक्ओआः” त स्यान्ती तोओ त झ्यान्ते ओउःमयः “इपाय् थे थे कुरा” त नोःकाय्आकाय्। 19 ओहाङःसैको ओउः नया कुरा पेतो सायःसाकायः ओउः मान्तालम्इ पावुल्कायः अरीओपागुस् त तोओ हुम्सा थाव्ताङ् आलःआथै। 20-21 ओहाङः मुओ आथेन्स् सहर्कोः मान्तालम्मा अरु देस्सै वाङ्ओलम्मा साधे नया नया कुरा सायःसामा नोःकाय्सामा आन झाक्इतो। ओउःत झ्यान्ते ओउः थाव्हाङः आलःआक्तीको “लौ इ नाङ्इ स्यान्ती नोःओ थे थे कुरा लेःआः। इ नया कुरापाय् ङीइ पेतो सायःती चीःसा म्हर्नाङी” त दाय्ह्तीताङः पावुल्कायः तोआकानी। 22 एत तोआक्तीको पावुल्पाय् ओउः अरीओपागुस् त तोओ थाव्हाङः चीङ्ती “अ नीङ् आथेन्स्कोः मान्तालम्य नीङ्कायःपाय् ‘आन द्यव्ताकायः मनःओ मान्तालम्तेःआः इ’ त ङाइ चीःआलाङः। 23 नीङ्कोः सहर्हाङः वाह्तोक् बेलाहाङः ङाइ नाःतो मुर्ती च्यवःआलाङः बा। च्यवःतोक्हाङः यात्ज्योः थान्हाङः ‘इ थान् ङीइ चीःमालो इस्वर्कायः जाङ्ह्ओआः’ त लेखती मुओमा च्यवःआलाङः। लौ इ नीङ्इ झाह्ओ चीःआक्मालो इस्वर्कोः कुरा ङाइ द्याह् स्यान्ती चीःताक्चेःनाङ्स बा। 24 ओउः फेल्बाङ् ल्हाव्ह्दैबाङ् ओहाङः मुओ सबै थोक्लम् जाङ्ह्ओ परमेस्वर्लेः ओउःपाय् सबैसै ताङ्ह्ओ प्रभु लेःआः। एत ताङ्ह्ओ परमेस्वर्पाय् मान्ताकोः क्रुत्इ जाङ्ह्ओ थान्लम्हाङः गलमा याक्ल। 25 ओउःखेइ ङी मान्तालम्कायः स्याक्ताक्सा सास्लम् दोह्लम् बयःनाःतय्ही ओउःत झ्यान्ते ङीखेइ ओउःकायः बयःसा खेःहाङ्ल। 26 दोङ् ङ्हाताङ् परमेस्वर्इ यात्चाक् जाङ्ह्आकान् ओउः यातैज्याङ् मान्ता जाङ्ह्आक्तीको ओउःकःसै ङी सबै जात्लम् ग्ल्युङ्ह्ताक्आतय्ही। फेरी मान्तालम् सबै ल्हाव्ह्दैबाङ्हाङः ब्याव्ताक्ती याक्साकायः गम्ओ खेःतो। ओहाङःसै ओउःमयःकोः स्याक्साकायः ओघमा याक्साकायः देस्लम्मा ओउः परमेस्वर्इलेः ङ्हाहाङःसै दोक्ती गम्आतय्ही। 27 ‘लौ ङाकायःपाय् मान्तालम्इ बोङःपाःताङःस चीःपाःताङःस’ त दाय्ह्ती परमेस्वर्इ इ सबै कुरा जाङ्ह्आकान्। ‘ङाकायः मान्तालम्इ बोङःपाःथास’ त परमेस्वर्इ दाय्ह्तो ती दोङ्सीलेः ङी मान्तालम्पाय् सुमा ओउःकःसै लोक्तो मुतय्हीली। 28 लौ परमेस्वर्इ ताक्माःतो ङीइ स्याक्सामा वाह्सामा मुसामा दोह्मा खाय्तय्ह्नीली। इतलेः नीङ्कोः लयःकोः मान्तालम्इ तोती लेखआकानी रैस ‘ङीपाय् परमेस्वर्कोः रधीङः लेःआः तय्ही’ त ओउःमयः दाय्ह्ती लेखती मुनाः। 29 ङी मान्तालम्पाय् परमेस्वर्कोः रधीङःलेः खेःनाःतय्ही त खेःया ओउः परमेस्वर्पाय् ‘मान्ताकोः क्रुत्इ जाङ्ह्ओ सुन् चान्दी बाङ्कोः जाङ्ह्ओ द्यव्ता लेःआः। ओउःकोः रुप् जाङ्ह्सा खाय्नाःतय्ही’ त दाय्ह्ओ ङी गलमा म्हर्सा स्याव्ल। परमेस्वर्पाय् इ थोक्सै जाङ्ह्ओ खेःबाय्ल। 30 ङ्हाखे ओउःकायः तय्ह्धाङ्माखाहाङः परमेस्वर्इ ङी चीःमालो मान्तालम्कायः दोह्मा हायःतय्ह्नीली। द्याह्हाङःसैकोः आने ‘द्यव्ता मनःओ काम् फेती लयः परमेस्वर्कायः पेतो झाह्ती तोनु’ त दाय्ह्ती ओउःइ सबैकायः तोनाःतय्ही। 31 लोन्तेखेहाङः परमेस्वर्इ ङ्हा तोती गम्ओ दीन्हाङः यात्ज्योः परमेस्वर्इ छीङ्ह्ओचाक्इलेः सबै मान्तालम्कायः मान्ता मान्ताकोः कुरा सायःती सुसु ‘पेनाः’ सुसु ‘पेमालो’ त तय्छनःतीलेः तोनौ। इ कुरापाय् दोङ्सी लेःआः त सबैकायः छ्यानःसाकायः इ परमेस्वर्इ छीङ्ह्ओ चाक्कायः सीआक्तीको परमेस्वर्इ च्योक्ताक्आथै” त दाय्ह्ती पावुल्इ सायःलाङ् हुम्ओ मान्तालम्कायः तोआथास। 32 एतलेः पावुल्इ तोथासतो “यात्चाक् सीआक्तीको उह्ती च्योक्ओ लेःआः” त सायःआक्तीको यात्नीस् मान्तालम्खेइ ङ्हाम्माःत पावुल्कायः ङीःआथै अरुखेइ “नाङ्इ तोओ कुरापाय् ङीइ लोन्तेमा सायःसा खेःतो” त दाय्ह्ती तोआकानी। 33 ओहाङःसैको पावुल् ओउःमयःकःसै वेङ्ती पाय्ह्आ। 34 पाय्ह्आक्तीको ओउःइ तोओ येसुकोः कुरा यात्नीस्चाक्इ ङ्हाम्आकानी। यात्चाक् अरीओपागुस्हाङः मुओ दीयोनीस्यस् त तोओ मान्ताइ ङ्हाम्ती पावुल्कुस् वाह्आ। फेरी दामारीस् त तोओ मोमःचोःमा यात्नीस् अरुलम्मा ङ्हाम्ती ओउःकुस् वाह्आकाय्। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.