खबरदुत 16 - चेपाङ1 ओहाङःसैको पावुल् सीलास् नीस् साथीचाः देर्बे लीस्त्र सहर्नीस् द्यान्ह्ती वाङ्आक्तीको ओहाङः यात्चाक् तीमोथी त मय्ङ्ओ येसुकोः कुरा ङ्हाम्ओ मान्ताकायः क्रुस्आथै। ओउः तीमोथी त तोओकोः आमाखे यहुदी जात्कोः येसुकायः ङ्हाम्ओ मोमःचोः खेःतो ओउःकोः आपाखे यात्चाक् एलेनी भासा नोःओ मान्ता खेःतो। 2 फेरी तीमोथीकायः “इ पेओ मान्ता लेःआः” त सबै लीस्त्र इकोनीयुम्हाङः मुओ ङ्हाम्ओलम् नोःआकाय्। 3 ओउःत झ्यान्ते पावुल्पाय् तीमोथी त तोओकायः “ङाकुस् वाङ्पाः” त म्हर्ती तीमोथीकायः ओउः यहुदीलम्कोः पुन् तात्ओ चीन्ह जाङ्ह्ताक्आथै। तीमोथीकोः आपा “एलेनी जात्कोः मान्ता लेःआः” त सबै यहुदीलम्इ चीःआकानी ओउःत झ्यान्ते ओउःमयःकायः म्रोताक्साकायः पावुल्इ एतलेः जाङ्ह्ताक्आथै। 4 ओहाङःसैको यहुदीलम्कोः सहर् सहर्ताङ् वाह्ती आल्ती सबै येसुकोः ङ्हाम्ओलम्कायः ओउः ङ्हाकोः यरुसालेम्हाङः मुओ येसुकोः छ्युङ्ह्ओमयःमा थालवःपालम्मा होम्काय्ओ कुरा स्यान्ती तोआथास। 5 एत स्यान्ती तोतोक्हाङः ओउःहाङःकोः ङ्हाम्ओलम्इ न्हाङ्तोलेः पेतो ङ्हाम्माआकानी दीन्का दीन् अरुलम् ओउःमयःकुस् त्योम्साकायः न्हाङ्तोलेः पाःती वाङ्माआकाय्। 6 ओहाङःसैको पावुल् नीस्साथीचाःकायः “असीया देस्हाङः येसुकोः कुरा तोलाङ् आल्तेःचाःज” त दाय्ह्ती परमेस्वर्कोः ग्वालामःइ तोती झ्यान्ते ओउःनीस्पाय् फ्रीग्या गालाती नीस् अन्चल्ताङ् वाह्आकाच। 7 ओहाङः वाह्ती मीसीया अन्चल्कोः छेव्हाङः दाह्तोक्हाङः ओउःनीस्इ बीथीनीया अन्चल्ताङ् आल्सा बोङःचुतो प्रभु येसुकोः ग्वालामःइ ओहाङःमा आल्सा ताक्थाचल। 8 ओहाङः आल्सा ताक्थाचल ओउःत झ्यान्ते मीसीया अन्चल्हाङः च्योल्ती ओउःनीस् त्रोआस् त तोओ सहर्ताङ् दाह्आकाच। 9 ओहाङः दाह्ती मुतोक्हाङः द्याह्मयःलोहाङः पावुल्इ माङःखा च्यवःआकान्। यात्चाक् मासीदोनीया देस्कोः मान्ता थाती “लौ ङीकःताङ् येसुकोः कुरा तोलाङ् वाङ्अ दा” त दाय्ह्ती ओउः माङःखाहाङः च्यवःओ मान्ताइ तोआथै। 10 ओउःत माङःखा च्यवःआक्तीको इ कुरापाय् ङा लुका त तोओकायः छ्यानःती “लौ द्याह् मासीदोनीया देस्ताङ् परमेस्वर्इ लयःकोः पेओ कुरा तोसाकायः गोत्नाःतय्ही” त नोःकाय्ती ङीइ रेन्ह्तोलेः ओहाङः आल्सा बोङःआलाङःसु। 11 ओहाङःसैको चीङ्ती ङी मुओ त्रोआस् सहर्हाङः तीःजहास् लन्ह्ती ङी सामोथरेस् च्योल्ती उनम्ह्कोः स्याङ्ह्लोहाङः नेआपोलीस् सहर्ताङ् दाह्आलाङी। 12 ओहाङः दाह्आक्तीको ओउः तीःजहास्सै ग्ल्युङ्ह्ती ङी मासीदोनीया देस्कोः अरुसै ताङ्ह्ओ फीलीपी त तोओ सहर्ताङ् ल्याम्हाङः वाह्ती दाह्आकाच। ओउः फीलीपी त तोओ सहर्हाङः नाःतो रोमी देस्सै वाङ्ओ मान्तालम् मुइतो ओउःत झ्यान्ते ओउः रोमी देस्कोः राजाइ ओहाङः हुकुम् बयःती गम्ओ खेःतो। ओउः सहर्हाङः ङी सुम्चार् दीन्कायः मुआलाङी। 13 ओहाङःसैको सन्चर्बार् दीन्हाङः ङीइ परमेस्वर्कायः झाह्ती तोसाकायः छ्युह्ती क्रुम्ह्ओ थाव्कायः बोङःआलाङःसु। बोङःती ङी सहर् बाहीरसै ग्ल्युङ्ह्ती खोलाकोः छेव्हाङः दाह्आलाङी। दाह्ती वाङ्आक्तीको ङीइ ओहाङः क्रुम्ह्ओ मोमःचोःलम्कायः प्रभु येसुकोः कुरा तोआलाङःसु। 14 ओउः मोमःचोःलम्कःहाङः यात्चाक् थुयातीरा सहर्सै वाङ्ओ लीदीया त तोओ मोमःचोः परमेस्वर्कायः झाह्ती तोलाङ् वाङ्ओ खेःतो। ओउः मोमःचोःइपाय् ङालःओ रङ् वीनःओ साहुनी खेःतो। ओउः लीदीया त तोओ मोमःचोःइपाय् पावुल्इ तोओ कुरा आन सायःती मुओ खेःतो ओउःकायःपाय् येसुकोः कुरा ङ्हाम्साकायः परमेस्वर्इ झाक्ताक्आथै। 15 ओहाङःसैको ङ्हाम्आक्तीको ओउः लीदीया त तोओ मोमःचोःकायःमा ओउःकोः कीम्कोः मान्तालम्कायःमा बाप्तीस्मा जाङ्ह्आथास। बाप्तीस्मा जाङ्ह्आक्तीको “लौ ङाकायःपाय् ‘प्रभु येसुकोः कुरा दोङ्सीलेः ङ्हाम्नौ’ त ताःतेःनानाङ्स त खेःया ङाकोः कीम्ताङ् मुलाङ् वाङ्न” त दाय्ह्ती तोआताङी। ओउःत होम्ती तोआक्तीको ङी ओउःकोः कीम्ताङ् मुलाङ् आल्आलाङी। 16 ओहाङःसैको यात्दीन्हाङः ङीपाय् ओउः छ्युह्ती आल्ओ परमेस्वर्कायः झाह्ती तोसा थाव्ताङ् आल्सा बोङःङुसुतो ती ल्याम्हाङः यात्चाक् छेह्सा चीःओ लान्इ ङायःओ मोमःचोःइ क्रुस्आताङी। ओउः मोमःचोःपाय् छेह्ओ काम् धुःती जाङ्ह्साकायः मालीक्कायः वीनःओ खेःतो। ओउःकोः मालीक्लम्कायः ओउः मोमःचोःइ आन पैसा दोःताक्आथास। 17 ओहाङःसैको ङीकायः क्रुस्आक्तीको ओउः मोमःचोःइ पावुल्कायःमा ङीकायःमा गुल्ह्ती “इ मान्तालम्पाय् सबैसै ताङ्ह्ओ परमेस्वर् त तोओकोः काम् जाङ्ह्ओ मान्तालम् लेःआः इ बा। ओउःमयःइ गलमा द्योक्मालो जीङःपाय् ‘गत हायःती दोःनाः’ त नीङ्कायः स्यान्तेःनै” त आन सोतोलेः दाय्ह्ती दाय्ह्आ। 18 ओउः मोमःचोःपाय् नाःतो दीन्कायः एतलेः दाय्ह्ती ङीकायः गुल्ह्ताङीतो ओहाङःसैको पावुल्पाय् आन ल्हुङ् जीक्ती झ्यान्ते “लौ इ मोमःचोःकायः ‘ल्हेस्ती फेउ’ त ङाइ प्रभु येसु ख्रीस्कोः ग्वम्इ तोतेःनाङ् बा” त दाय्ह्ती ओउः मोमःचोःकायः ङायःओ लान्कायः तोउतो एत तोओ कुस्ब्रक्त ओउः लान् ल्हेस्तीलेः वाय्आ। 19 ओहाङःसैको ओउः लान् ल्हेस्ती वाय्ओ च्यवःती “द्याह् ङीकायः पैसा दोःल” त दाय्ह्ती ओउः मोमःचोःकोः मालीक्लम्इ पावुल् सीलास् त तोओनीस्कायः चुम्ती बजार्ताङ् लात्ती ओउः सहर्कोः ताङ्ह्ओ मान्तालम्कःताङ् दाक्आथाच। 20 ओउःनीस्कायः दाक्आक्तीको “लौ इनीस् यहुदी मान्तानीस्इपाय् नया कुरा स्यान्ती सबै सहर्कोः मान्तालम्कायः ब्रःताक्आकाचु। 21 इ नीस्इपाय् ङीकोः रोमी मान्तालम्कोः हुकुम्इ ताक्मालो कुरा स्यान्ती तोनानी बा” त दाय्ह्ती ओउः मोमःचोःकोः मालीक्लम्इ गाल्तुम्ती तोआकानी। 22 ओउः तुम्ओ कुरा सायःती नाःतो मान्तालम्इमा हुम्ती पावुल् नीस्साथीचाःकायः गाल्तुम्ती तोआकानी। ओउःत झ्यान्ते ओउः सहर्कोः ताङ्ह्ओ मान्तालम्इ ओउःनीस्कोः नाय् ल्ह्युन्आक्तीको “लौ इनीस्कायः लाव्रोइ थोःती घान्पाःथाच” त दाय्ह्ती तोआकानी। 23 एत तोआक्तीको ओउःनीस्कायः अरुलम्इ जोक्तो घान्ती थोःती ओहाङःसैको झ्याल्खानकायः ल्युङ्ह्ती गम्ओ मान्ताकःताङ् दाक्आथाच। “लौ इनीस्कायः पेतोलेः थुनती गम्नु दा” त दाय्ह्ती ओउः झ्याल्खानकोः ल्युङ्ह्ती गम्ओ मान्ताकायः तोआकानी। 24 ओउःत तोआक्तीको ओउः मान्ताइ ओउःनीस्कायः दोङ् भीत्रकोः कोथाहाङः काती दोम् थेङ्गोरा सीङःहाङःमा राक्ती गम्आथाच। 25 झ्याल्खानहाङः काती गम्ओहाङः दोङ् याह्दीङ्हाङः ओउःनीस्पाय् परमेस्वर्कोः गीत् मेतीमा परमेस्वर्कायः तोतीमा मुचतो अरु झ्याल्खानहाङः राक्ती गम्ओ मान्तालम्इ ओउः नीस्कायः सायःती मुआकाय्। ओउःमयःइ सायःती मुतोक्हाङः 26 रोमो तोकोलेः जोक्तो ल्याङ् वाङ्ती ओउः झ्याल्खान कीम्कायः आन ल्हङ्ती साङ्ह्ताक्आथै। ओउः झ्याल्खान कीम् साङ्ह्तोक्हाङः सबै धोकालम् फोल्माआ ओउः थुनओ मान्तालम्कोः थेङ्गोरा सीङःलम् गामाआ। 27 ओहाङःसैको ओउः ल्याङ् वाङ्ओ बेलाहाङः ओउः झ्याल्खानकायः ल्युङ्ह्ओ मान्ता एनःती मुओ खेःतो ल्याङ् वाङ्आक्तीको ओउः मान्तापाय् म्र्याती च्योक्ती सबै झ्याल्खान कीम्कोः धोकालम् फोल्ती मुओ च्यवःआकान्। एत च्यवःती “लौ द्याह्पाय् सबै राक्ती गम्ओ मान्तालम् क्रव्आताक्आलाङः रैस” त म्हर्ती लयःकोः च्युपे त्युत्ती लयःकायः सात्सा बोङःउतो ती 28 “इत हायःलाम् लयः दोह्मातेः हायःतेःचाःस। ङी सबै मुआनाङी बा” त दाय्ह्ती पावुल्इ तोआथै। 29 एत सायःआक्तीको ओउः झ्याल्खानकायः ल्युङ्ह्ओ मान्ता थोङ्ती योसा म्हेःलेः नोकरीसै तेती त्याक्ती पावुल् सीलास्कःताङ् तन्ती योलाङ् वाङ्आ। तन्ती वाङ्आक्तीको ओउः मान्ता रैतीमा रीङ्ह्तीमा पावुल् साथीनीस्कोः दोम्हाङःताङ् बाःआथाच। 30 ओहाङःसैको ओउःनीस्कायः बाहीरताङ् क्लाःती “लौ नीङ्जीइ ङाकायः तोची दा। ङा गत हायःती इ नया जीङः दोःचाङः ती” त दाय्ह्तीताङः व्हत्आथाच। 31 “लौ प्रभु येसु ख्रीस्इ तोओ कुरा ङ्हाम्ती सायःउ ओहाङःसैको इ परमेस्वर्इ बयःओ नया जीङःपाय् नाङ्मा दोःतेःनाः नाङ्कोः कीम्कोः मान्तालम्मा दोःलेःनै” त दाय्ह्ती त्याङ्आकाच। 32 एत त्याङ्आक्तीको ओउः झ्याल्खानकायः ल्युङ्ह्ओ मान्ताकायःमा ओउःकोः कीम्कोः मान्तालम्कायःमा ओउःनीस्इ प्रभु येसुकोः कुरा स्यान्ती तोआथास। 33 ओहाङःसैको ओउः बेलाहाङः ओउः झ्याल्खानकायः योती मुओ मान्ताइ पावुल् सीलास्नीस्कायः ओउःनीस्कोः घान्ओ चालम् हुर्ती दोह्ती पेतोलेः जाङ्ह्आथाच। ओहाङःसैको रेन्ह्तोलेः ओउःकायःमा ओउःकोः कीम्कोः मान्तालम्कायःमा बाप्तीस्मा जाङ्ह्आथास। 34 बाप्तीस्मा जाङ्ह्आक्तीको पावुल् सीलास्नीस्कायः ओउःइ लयःकोः कीम्हाङः वानःती ओउःनीस्कायः जेःगा तुङ्गा बयःआथाच। ओहाङःसैको “लौ द्याह्पाय् ङीइ परमेस्वर्कायः ङ्हाम्ती चीःनाङःसु” त दाय्ह्ती ओउः मान्तामा ओउःकोः कीम्कोः मान्तालम्मा सबै चोङाय्ती मुओ खेःइतो। 35 ओहाङःसैको न्याम् थोङ्आ। न्याम् थोङ्आक्तीको ओउः सहर्कोः ताङ्ह्ओ मान्तालम्इ “लौ ओउःनीस्कायः द्याह् फेउ” त दाय्ह्ती ओउःमयःइ पुलीस्लम्कायः तोती ल्होक्आकानी। एतलेः तोती ल्होक्आक्तीको ओउः पुलीस्लम्इ झ्याल्खानताङ् दाह्ती ओहाङःकोः ल्युङ्ह्ती मुओ मान्ताकायः इ कुरा तोआथै। 36 ओउःत तोआक्तीको ओउः मान्तापाय् पावुल्कःताङ् वाङ्ती “लौ नीङ्जीकायः ओउः सहर्कोः ताङ्ह्ओ मान्तालम्इ ‘फेउचु’ त तोती ल्होक्आताङः ओउःत झ्यान्ते नीङ्जी द्याह् इसै ग्ल्युङ्ह्ती पेतो ल्हुङ् धोमाय्तोलेः आल्ज दा” त दाय्ह्ती ओउःइ पावुल् नीस्साथीचाःकायः तोथाचतो 37 “खेःल सहर्कोः ताङ्ह्ओ मान्तालम्इ नीचीकोः कुरा पेतो सायःमाःत नीचीकायः घान्ती थोःती झ्याल्खानहाङः काआताङःच। ओउःत हायःताङःचतो नीची नीस्चाक्पाय् रोमीकोः सहर्कोः मान्ता लेःआः ङच। रोमी सहर्कोः मान्ताकायःपाय् ओउःत हायःसा जुगाङ् स्याव्मालो लेःआः बा। ओउःत झ्यान्ते नीचीकायः ओउः रोमी ऐन्हाङः तोओ लेखा जाङ्ह्सा खेःतो। द्याह् नीचीकायः अरुइ चीःमाःत फेती ल्होक्सा स्याव्बाय्ल। लौ ओउः ताङ्ह्ओ मान्तालम्इ लयः वाङ्ती नीचीकायः फेपाःताङःच” त दाय्ह्ती पुलीस्लम्कायः पावुल्इ तोआकान्। 38 ओहाङःसैको ओउः पुलीस् मान्तालम् द्यान्ह्ती पावुल्इ तोओ कुरा ओउः ताङ्ह्ओ मान्तालम्कायः ल्हाक्ती छ्यानःआथास। इ कुरा ल्हाक्ती छ्यानःआक्तीको “ङीइ थुनताक्ओ नीस्चाक्पाय् ‘रोमी सहर्कोः मान्तालम्’ ” त चीःती ओउः सहर्कोः ताङ्ह्ओ मान्तालम्पाय् “अह रोमी सहर्कोः मान्तालम्कायः एत हायःसा स्याव्बाय्ल” त म्हर्ती ओउःमयः रैती पावुल् सीलास्नीस्कःताङ् वाङ्आकाय्। 39 ओउःनीस्कःताङ् वाङ्ती “लौ ङीइ चीःमाःत एतलेः हायःआलाङःसु” त दाय्ह्ती ओउः नीस्साथीचाःकायः झ्याल्खानसै आलःती “लौ द्याह् नीङ्जी इ फीलीपी सहर्सै आल्ज दा” त दाय्ह्ती ओउः ताङ्ह्ओ मान्तालम्इ तोती ल्होक्आथाच। 40 ल्होक्आक्तीको पावुल्मा सीलास्मा लीदीया त तोओकोः कीम्ताङ् द्यान्ह्ती ओहाङःकोः ङ्हाम्ओलम्कायः लव्ह्ती तोआकाचु। ओहाङःसैको ओउःमयःकायः दाम्आक्तीको पावुल् सीलास् नीस् फीलीपी सहर्सै आल्आकाच। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.