खबरदुत 13 - चेपाङ1 ओहाङःसैको अन्तीयोक् सहर्कोः येसुकोः ङ्हाम्ओलम्हाङः पास्जन लोन्ते स्याव्सा कुरा छ्यानःसा चीःओमा स्यान्ओ मान्ता खेःइतो। यात्ज्योःखे बर्नाबास् त तोओ खेःतो। यात्ज्योःखे गाल्ओ सीमोन् त मय्ङ्ओ खेःतो। यात्चाक्खे क्युरीनी देस्सै वाङ्ओ लुसीयस् त तोओ खेःतो। यात्चाक्खे मनएन् त तोओ ओउःलेः हेरोद् राजाकोः दर्बाल्हाङः स्यास्ओ खेःतो। यात्ज्योः अरुखे तार्सुस् सहर्सै वाङ्ओ सावुल् खेःतो। 2 ओउःमयः पास्जन परमेस्वर्कायः झाह्ती तोती उपाङ् काःती मुतोक्हाङः “लौ ङाइ तोओ काम् जाङ्ह्साकायः इनीस् सावुल् त तोओमा बर्नाबास् त तोओमा वेङ्ती गम्पाःच” त दाय्ह्ती परमेस्वर्कोः ग्वालामःइ तोआथास। 3 एत तोआक्तीको ओउःमयः उपाङ् काःती दप्आक्तीको परमेस्वर्कायः तोती ओउःनीस्कायः क्रुत्इ झाम्ह्ती दाम्ती ल्होक्आथाच। 4 ओहाङःसैको एतलेः परमेस्वर्कोः ग्वालामःइ ल्होक्ती ओउःनीस् सीलुसीया त तोओ देस्ताङ् आल्आक्तीको ओहाङः तीः जहास्हाङः लन्ह्ती वाह्ती क्युप्रस् त तोओ तीःकोः बुम्ताङ् आल्आकाच। 5 तीःजहास्हाङः आल्ती ओउः क्युप्रस् बुम्कोः सालामीस् सहर्ताङ् दाह्ती वाङ्आक्तीको ओउः सहर्हाङः यहुदी मान्तालम्कोः थनःओ कीम्लम्हाङः पोक्ती ओउःनीस्इ परमेस्वर्कोः कुरा थोल्ह्ती तोआकाचु। ओउःनीस्कुस् मर्कस् त तोओमा स्युलःती जाङ्ह्लाङ् आल्आ। 6 ओहाङःसैको ओउः तीः बुम्कोः देस्हाङः सबै तोमःती वाह्ती ओउःनीस् उःसैकोः द्युम्मालो तीःकोः छेव्हाङः मुओ पाफोस् सहर्ताङ् दाह्ती ओहाङः यात्चाक् बार्येसु त तोओ पान्दे काम् जाङ्ह्ओ मान्ता क्रुस्आकाच। ओउः मान्ताखे यात्चाक् यहुदी जात्कोः मान्तालेः खेःतो। एलेनी भासाहाङः ओउःपाय् “एलीमस्” त मय्ङ्ओ खेःतो। ओउःइ परमेस्वर्कोः कुरा पेतोलेः तोउलु ओउःइ माःती तोती छ्यानःआकान्। 7 ओउः एलीमस् त तोओइ क्युप्रस् बुम्कोः अन्चलादीस्कायः पान्देकोः काम् जाङ्ह्ओ खेःतो। ओउः अन्चलादीस् सर्गीयस् पावुलस् त तोओलेः ओउःखे आन व्हाय्तो चीःओ मान्ता खेःतो। ओहाङःसैको ओउः अन्चलादीस्इ परमेस्वर्कोः कुरा सायःसा झाक्ती ओउः नीस् सावुल्मा बर्नाबास्कायःमा गोत्आथाच। 8 ओउःनीस्कायः अन्चलादीस्इखे गोत्थाचतो ओउः एलीमस् त तोओ पान्देपाय् ओउःनीस्कोः कुरा सायःसा ग्यामाःत झ्यान्ते अन्चलादीस्कायः “लौ ओउःनीस्कोः कुरा पेल ओउःनीस्कायः सायःलाम् ङ्हाम्लाम्” त दाय्ह्ती ओउःइ कुरा ग्याताक्मालो जाङ्ह्सा बोङःथातो 9 सावुल्खेइ परमेस्वर्कोः ग्वालामः दोःती एलीमस्कायः जुर्ती योतो ती 10 “नाङ्पाय् सैतान्कोः चोःलेःतेः खेःतेःनाः रैस। नाङ्कोः ल्हुङ् आन पेमालो त झ्यान्ते नाङ्इ माःओ कुराखे लयःलेः तोती परमेस्वर्कोः दोङ् कुराखे तोसाकायः त्याःसा बोङःतेःनौ। इच्युक् पेओ कुराकायःमा नाङ्इ गलमा ‘पेल’ ततेः दाय्ह्तेःनाः। 11 लौ द्याह् नाङ्कायः परमेस्वर्इ न्युम्ह्ताक्तेःनाः। नाङ्कोः मीक्पाय् नाःतो दीन्कायः राक्ताक्लेःनाः थोङ्ओमा च्यवःतेःउलु” त दाय्ह्ती सावुल्इ एलीमस्कायः तोआथै। सावुल् त तोओकोः अरु मय्ङ् पावुल् खेःतो। ओहाङःसैको एत तोओ कुस्ब्रक्त बार्येसुकोः मीक् गाल्तो च्याक्धबलप्त स्याव्माआ ओउःपाय् साम्भार्ती याम्भार्ती वाह्ती क्रुत् ज्योती लात्सा मान्ताकायः बोङःआकान्। 12 ओहाङःसैको ओउः पान्देखेकायः एत स्याव्ओ च्यवःती “दोह् दयःआ आने” त दाय्ह्ती ग्याङ्ह्ती ओउः अन्चलादीस्खेइ प्रभु येसुकोः कुरा ङ्हाम्आकान्। 13 ओउः अन्चलादीस्खेइ ङ्हाम्आकान् ओहाङःसैको पावुल्मा ओउःकोः साथीलम्मा पाफोस् सहर्हाङः तीःजहास् लन्ह्ती क्युप्रस् त तोआ तीःबुम् फेती पाम्फील्या देस्कोः पेर्गा सहर्हाङः दाह्आकाय्। पेर्गा सहर्हाङः दाह्आक्तीको मर्कस्खेइ साथीलम्कायः वेङ्ती यरुसालेम्ताङ् पाय्ह्आ। 14 मर्कस्खे पाय्ह्आ ओउःकोः साथीनीस् पावुल्मा बर्नाबास्मा पीसीदीया जील्लाकोः अरु अन्तीयोक् त तोओ सहर्ताङ् दाह्आकाच। ओहाङः दाह्आक्तीको यहुदी मान्तालम्कोः धोओ सन्चर्बार् दीन्हाङः यहुदीलम्कोः थनःओ कीम्ताङ् पोक्ती मुआकाच। 15 ओहाङःसैको मोसाइ बयःओ ऐन्मा उय्ह्लेकोः परमेस्वर्कायः कुरा छ्यानःओलम्इ लेखओ कुरामा पह्रआक्तीको ओउः थनःओ कीम्कोः ताङ्ह्ओ मान्तालम्इ पावुल् बर्नाबास् नीस्कायःमा गोत्आथाच “लौ पुःनीस् नीङ्जी ल्हुङ् र्यानःओ कुरा मुनाः त खेःया इ हुम्ओ मान्तालम्कायः नोःनु दा” त दाय्ह्ती ओउःनीस्कायः तोआथाच। 16 ओउःत तोआक्तीको पावुल् चीङ्ती क्रुत् प्योती नोःखयःआ “लौ इस्राएल्कोः पुःचोङ् हौचोङ्य अरु जात्कोः परमेस्वर्कायः झाह्ओलम्य द्याह् सायःनु दा। 17 ङी इस्राएल् मान्तालम्कोः परमेस्वर्इ ङीकोः आय्कानः तोकानःलम्कायः छ्युङ्ह्ती मीस्रा देस्ताङ् आल्ती मुतोक्हाङः ओउःमयःकायः आन ब्याव्ताक्आथास। फेरी परमेस्वर्इ लयःकोः ग्वम् छ्यानःती ओउःमयःकायः मीस्रा देस्सै फाक्ती आलःआथास। 18 आल्आक्तीको याक्गार्सीःमालो देस्हाङः चालीस् बर्सकायः ब्याह्ती वाह्तोक्हाङः ओउःमयःकोः यव्ह्ती नोःओ कुरा ल्हुङ् मल्ह्माःत सायःआकान्। 19 ओहाङःसैको कनान् देस्ताङ् आलःती ओउः देस्कोः सात्गोता जात्लम्सै ङीकोः आय्कानः तोकानःलम् क्लीमःताक्ती ओउः कनान् त तोओ देस् ङीकोः आय्कानः तोकानःलम्कायः याक्सा बयःआथास। ओउः देस्हाङः चार्सै पचास् बर्सकायः ओउःमयः इतलेः याक्सा बयःआथास। 20 ओहाङःसैको ओउःमयःकायः परमेस्वर्इ कुरा सायःती तात्साकायःमा हुकुम् बयःसाकायःमा ओउःमयःकोः ताङ्ह्ओ मान्तालम् गम्आथास। लोन्ते परमेस्वर्कोः कुरा छ्यानःओ सामुएल् त तोओकोः मुतोक् बेलाहाङः 21 ‘ङीकायः लयःकायः राजा गम्ताङी’ त दाय्ह्ती ङीकोः आय्कानः तोकानःलम्इ परमेस्वर्कः तेती तोआकानी। एत तेती तोतोक्हाङः परमेस्वर्इ चालीस् बर्सकायः ओउः बेन्यामीन् थर्कोः कीस् त तोओकोः गोय्चोःचोः सावुल् त तोओ ओउःमयःकोः राजा गम्आथास। 22 चालीस् बर्सकायः गम्थातो ओहाङःसैको परमेस्वर्इ सावुल्कायः पेङ्कलःती यात्चाक् दावुद् त तोओकायः राजा जाङ्ह्आथै। ओउः दावुद् राजाकायः परमेस्वर्इ झाक्ती ‘लौ इ येसे त तोओकोः गोय्चोः दावुद् त तोओपाय् ङाकोः ल्हुङ् ङायःतो पेतो जाङ्ह्सा ग्यानाः’ त दाय्ह्ती तोआकान्। 23 परमेस्वर्इ ङ्हा तोती गम्ओ कुरा लोन्ह्ते स्याव्ताक्ती दावुद् राजाकोः प्लोमःदाने मोमःदानेहाङः यात्चाक् येसु त तोओकायः छ्युङ्ह्ती इस्राएल् मान्तालम्कायः स्याक्ताक्साकायः दोःताक्आथास। 24 ओउः येसु त तोओकोः वाङ्धाङ्माखाहाङः युहना त तोओइ सबै इस्राएल् मान्तालम्कायः ‘लौ नीङ्इ लयःकोः रेव्तो काम् फेती परमेस्वर्कोः कुरा ग्यान ओहाङःतीको बाप्तीस्मा त्याक्नु’ त दाय्ह्ती तोआथास। 25 ओहाङःसैको युहनाकोः काम् पुत्खेःओ बेलाहाङः ‘ङाकायःपाय् “नीङ् ख्रीस् लेःतेःआः” ततेः ताःतेःनानी यादो खेःल ङापाय् ख्रीस्लेः खेःङल। ङाकोः काम् जाङ्ह्ओ लोनेसै वाङ्ओ मान्ताखे ओउःलेः ख्रीस् त तोसा स्याव्नाः। ओउःसै ङा आन मीतोलेः खेःनाङः बा ओउःकोः जुत्तामा फास्सा स्याव्ङल’ त दाय्ह्ती युहना तोआथास। 26 लौ नीङ् आब्राहाम्कोः प्लोमःदाने नीङ् अरु जात्कोः परमेस्वर्कायः झाह्ओलम् सबै पुःचोङ्लम्य इ ङीकोः रेव्झ्याङ्सै दल्ताक्सा कुरा ङी सबैकायः तोआतय्ही बा। 27 यरुसालेम्हाङः मुओ मान्तालम्मा ओउःमयःकोः ताङ्ह्ओ मान्तालम्इमा येसु त तोओपाय् ‘ङीकायः दल्ताक्साकायः वाङ्ओ ख्रीस् लेःआः’ त तय्ह्आक्नीली। सन्चर्बार् सन्चर्बार्हाङः परमेस्वर्कोः कुरा छ्यानःओ मान्ताइ लेखओ कुरा पह्रओ खेःतो ओउः कुरामा ओउःमयःइ तय्ह्आक्नीतो येसुकायः सात्ती झ्यान्ते ओउः परमेस्वर्कोः आखरःहाङः लेखओ कुरापाय् ताप्ताक्आकानी। 28 येसुकायः दोङ् गाल्तुम्ती तोसाकायः ओउःमयःइ दोह्मा नोःसा खाय्आक्नीली ओउःमयःइ अन्चलादीस् पीलातस् त तोओकायः आन येसुकायः ‘सात्पाःथै’ त दाय्ह्ती तोआथै। 29 परमेस्वर्कोः आखरःहाङः गतलो लेखओ खेःतो ओउःतलेः येसुकायः जाङ्ह्ती खाय्आक्तीको ओउः कुरा सबै द्योक्आक्तीको येसुकायः ओउः सात्ओ सीङःहाङःसै कामःताङ् क्लाःती तेस्हाङः गम्आकानी। 30 तेस्हाङः गम्नीतो लोन्ते येसुकायः परमेस्वर्इ उह्ती च्योक्ताक्आथै। 31 सेलः च्योक्आक्तीको ओउःकुस् गालीलसै यरुसालेम्ताङ् वाह्ओमयःकायः येसु नाःतो दीन्कायः थालाङ् वाङ्झुङ्आ। येसु च्योक्ती थाओ च्यवःआक्तीको ओउःकुस् वाह्ओमयःइ ङी इस्राएली मान्तालम्कायः द्याह् ल्हाक्ती छ्यानःनानी। 32 फेरी इ पेओ समचार् नीङ्कायः ल्हाक्ती तोसाकायः ङीमा वाङ्आलाङी। ‘ओउःकायः सीआक्तीको उह्ती च्योक्ताक्नाङः’ त ङीकोः आय्कानः तोकानःलम्कायः परमेस्वर्इ तोती गम्ओ खेःतो। 33 द्याह् ङी प्लोमःदाने मोमःदाने मुओ बेलाहाङः इ तोती गम्ओ कुरापाय् ताप्ताक्तोलेः जाङ्ह्ती परमेस्वर्इ येसुकायः च्योक्ताक्ती स्याव्ताक्आकान्। ओउः कुरापाय् इतलेः लेखओ खेःतो ‘लौ नाङ्पाय् ङाकोः चोःतेः खेःतेःनाः। तेन्पाय् ङाइ नाङ्कायः जीङः दोःताक्नेःआलाङ्’ त दाय्ह्ती परमेस्वर्कोः आखरःहाङः दावुद्इ लेखओ मेओ कुरा मुनाः। 34 फेरी ‘नाङ्कायःमा ङाइ दावुद्कायः तोती गम्ओ पेओ छय्ङ्ओ कुरालेः बयःनेःनाङ् बा’ त दाय्ह्तीमा आखरःहाङः मुनाः। फेरी येसुकायः सीआक्तीको ह्र्योती वाय्ताक्माःत ओउःकायः उह्ती च्योक्ताक्नाःथै त छ्यानःती इ कुरामा मुनाः 35 ‘लौ नाङ् परमेस्वर्कोः जय्कुमःओ मान्ता सीआक्तीको ओउःकायः नाङ्इ सय्ङ्ती ल्ह्योतेःताक्तेःउलु’ त दाय्ह्ती अरु दावुद्इ लेखओ मेओ कुरा आखरःहाङः मुनाः। 36 एत लेखती मुलेःनाः दावुद् राजाखेइ लयः मुतोक्हाङः परमेस्वर्कोः काम् जाङ्ह्ती खाय्आकान्। जाङ्ह्ती खाय्आक्तीको दावुद्खे सीती लयःकोः आय्कानः तोकानःलम्कुस् पाय्ह्आ। ओउःकोः आङ्पाय् ल्ह्योतीलेः वाय्ओ लेःआः। 37 इ परमेस्वर्इ उह्ती च्योक्ताक्ओ येसु त तोओखे सेलः मुती आङ् ल्ह्योती वाय्बाय्ल। 38 ‘लौ पुःचोङ् हौचोङ्य इ येसुइ ङीकोः रेव्झ्याङ्कोः क्युम्ह्सा दोःताक्नाःतय्ही बा’ त दाय्ह्ती इ कुरा ङाइ दोङ्सीलेः तोनेःनाङ्स। इ कुरा पेतो ल्हुङ्हाङः तय्ह्ती सायःन दा। 39 मोसाइ बयःओ ऐन् चीःओ मान्तालम् लयःकोः रेव्ओ काम्लम् लयःइलेः फेसा खाय्नीली येसुकायः ङ्हाम्ती ह मान्तालम्कायः इ रेव्ओ काम्लम् फेताक्सामा क्युम्ह्ताक्सामा दोःनाः। 40 नीङ् यान्तती सायःनीङ्इसी यान्तती सायःतेःनीङ्सीली त खेःया इ उय्ह्ले लेखओ कुरा नीङ्लम्इमा धेःतेःचाःइसी। 41 ‘लौ नीङ् गाक्ती मुओलम्य नीङ्इ ग्याङ्ह्सीःओ काम् ङ्हाम्माःत योती सीतेःपै। इ ङाइ जाङ्ह्खेःओ ग्याङ्ह्राय्कोः कुरा अरुइ नीङ्कायः स्यान्ती थ्योन्ह्थासतो नीङ्इ ङ्हाम्तेःनीली ओउःत झ्यान्ते नीङ् वाय्तोलेः स्याव्तेःनै’ त दाय्ह्ती परमेस्वर्कोः कुरा उय्ह्लेहाङःसै लेखती मुनाः। इलो लेखा ह्र्योक्ती वाय्ओ नीङ्मा धेःतेःचाःइसी” त दाय्ह्ती ओउः थनःओ कीम्कोः मान्तालम्कायः पावुल्इ तोआथास। 42 ओहाङःसैको पावुल्मा बर्नाबास्मा ओउः थनःओ कीम्सै ग्ल्युङ्ह्ती पाय्ह्तोक् बेलाहाङः “लौ द्याह् वाङ्ओ सन्चर्बार्हाङःमा ङीलम्कायः तेन्कोःलेः स्यान्ओ स्यान्ती तोताङी दा” त दाय्ह्ती ओउः ङ्हा सायःओ मान्तालम्इ स्योत्ती स्योत्ती तोआथाच। 43 ओहाङःसैको ओउः थनःओ कीम्कोः मीतीङ् खाय्आक्तीको नाःतो यहुदीलम्मा अरु जात्कोः परमेस्वर्कायः झाह्ओलम्इमा पावुल् नीस् साथीचाःकायः गुल्ह्आकानी। गुल्ह्आक्तीको ओउःनीस्इ इ गुल्ह्ओ मान्तालम्कायःपाय् “लौ परमेस्वर्कोः कुरा फेमाःत ङ्हाम्ती ओउःइ बयःओ पेओ जीङः दोःती मुन” त दाय्ह्ती ओउःनीस्इ स्यान्आथास। 44 ओहाङःसैको लोन्नम्कोः सन्चर्बार् दीन्हाङः परमेस्वर्कोः कुरा स्यान्ओ सायःसा थेङा सहर्कोः मान्तालम् नाःतोलेः वाङ्आकाय्। 45 इच्युक् नाःतो हुम्ती वाङ्ओ च्यवःती यात्नीस् यहुदीकोः मान्तालम् लती ल्हुङ् मल्ह्आकाय्। ल्हुङ् मल्ह्ती ओउःमयः पावुल्कुस् काय्काय्ती तानःकाय्ती ओउःकोः कुरा त्याःसाकायः ओउःकायः पेमालो नोःआकाय्। 46 एत चीःआक्तीको पावुल्मा बर्नाबास्मा रैमाःत युमःमाःत फुस्तीलेः नोःआकाच “लौ परमेस्वर्कोः पेओ कुरा नीङ्कायः ङ्हालेः स्यान्सा खेःतो। नीङ्खेइ ओउःकोः कुरा ङ्हाम्माःत सायःती ओउः गलमा द्योक्मालो जीङः दोःसा झाक्माःत झ्यान्ते लौ इ कुरा अरु जात्लम्कायः स्यान्लाङ् आल्नाङी द्याह्। 47 इत हायःसाकायः प्रभु परमेस्वर्इ उय्ह्लेहाङःसै तोआताङी ‘लौ यहुदी खेःमालो जात्लम्कायः स्यान्ती ल्हुङ् थोङ्ताक्साकायःमा सबै ल्हाव्ह्दैबाङ्हाङः ङाकोः दल्ताक्सा कुरा तोसाकायःमा ङाइ ल्होक्नेःनाङ्स’ त परमेस्वर् दाय्ह्ती दाय्ह्ओ कुरा लेखती मुनाः” त दाय्ह्ती पावुल् नीस् साथीचाःइ ओउः यहुदी मान्तालम्खेकायः तोआथास। 48 इ कुरा सायःआक्तीको ओउः यहुदी जात् खेःमालो मान्तालम्खे आन म्रोती “इ पेओ कुरा लेःआः बा” त दाय्ह्ती परमेस्वर्कायः झाह्ती लुङ्ती तोआथै। ओहाङःसैको गुच्युक् मान्तालम् रौ जीङः दोःसाकायः रय्ह्ती गम्ओ खेःइतो ओउःमयःइ येसुकोः कुरा ङ्हाम्आकानी। 49 ओहाङःसैको ओउः देस्हाङः प्रभु येसुकोः कुरा तोमःती वार्ती लात्आकानी। 50 इ कुरा वार्ती लात्नीतो ओउः अन्तीयोक् सहर्हाङः सायःसा ग्यामालो यहुदीलम्इ अरु सहर्कोः ताङ्ह्ओ मान्तालम्मा मुह्ओ मोमःचोःलम्कायःमा फोल्यावःती तोती नाःतो पावुल् बर्नाबास्नीस्कायः क्योङ्ह्ती नोःती ओउःनीस्कायः आन लीह्सीःओ बयःती ओउः जील्लासै रुनःआथाच। 51 रुनःती आल्तोक् बेलाहाङः ओउःनीस्इ “इमयः पेमालो हायःआताङी” त छ्यानःसाकायः लयःकोः दोम्कोः फुत्साः काह्ती ओउः सहर्हाङः फेआकाच। ओउः सहर् फेती ओउःनीस् साथीचाः इकोनीयुम् त तोओ सहर्ताङ् दाह्आकाच। 52 ओउः बेलाहाङः ओउः अन्तीयोक्हाङः मुओ येसुकायः ङ्हाम्ओलम् परमेस्वर्कोः ग्वालामः दोःती आन चोङाय्ओ खेःतो। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.